Print Friendly, PDF & Email

[Mission 2022] ದೈನಂದಿನ ಪ್ರಚಲಿತ ಘಟನೆಗಳು ದಿನಾಂಕ – 4ನೇ ಏಪ್ರಿಲ್ 2022

ಪರಿವಿಡಿ:

ಸಾಮಾನ್ಯ ಅಧ್ಯಯನ ಪತ್ರಿಕೆ 1:

  1. ರಾಜ ರವಿವರ್ಮ

ಸಾಮಾನ್ಯ ಅಧ್ಯಯನ ಪತ್ರಿಕೆ 2:

  1. ಮರಣದಂಡನೆ ಶಿಕ್ಷೆಯಲ್ಲಿ ಸುಧಾರಣೆ.
  2. ರಾಷ್ಟ್ರೀಯ ಚಲನಚಿತ್ರ ಅಭಿವೃದ್ಧಿ ನಿಗಮ (NFDC) ಲಿಮಿಟೆಡ್.
  3. ಭಾರತ ನೇಪಾಳ ಗಡಿ ವಿವಾದ.
  4. ಶ್ರೀಲಂಕಾದಲ್ಲಿ ಆರ್ಥಿಕ ಬಿಕ್ಕಟ್ಟು.
  5. ಇಂಟರ್ನ್ಯಾಷನಲ್ ಸೋಲಾರ್ ಅಲೈಯನ್ಸ್ (ISA).

 

ಪ್ರಿಲಿಮ್ಸ್‌ಗೆ ಸಂಬಂಧಿಸಿದ ಸಂಗತಿಗಳು:

  1. ಟಾಟಾ ನ್ಯೂ (Tata Neu) ಎಂದರೇನು?
  2. ನಗರ ಪ್ರದೇಶಗಳಲ್ಲಿ ಬಿಡಾಡಿ ದನಗಳನ್ನು ನಿಯಂತ್ರಿಸಲು ಗುಜರಾತ್‌ನ ಮಸೂದೆ.
  3. ಡಾರ್ಲಾಂಗ್ ಸಮುದಾಯ.
  4. ಸೂರತ್ ಭಾರತದ ಮೊದಲ ಸ್ಟೀಲ್ ಸ್ಲ್ಯಾಗ್ ರಸ್ತೆಯನ್ನು ಪಡೆಯುತ್ತದೆ.
  5. ಸೋಲು ಕಾರಿಡಾರ್ ಟ್ರಾನ್ಸ್ಮಿಷನ್ ಲೈನ್.

 


ಸಾಮಾನ್ಯ ಅಧ್ಯಯನ ಪತ್ರಿಕೆ 1:


ವಿಷಯಗಳು: ಭಾರತೀಯ ಸಂಸ್ಕೃತಿಯು ಪ್ರಾಚೀನ ಕಾಲದಿಂದ ಆಧುನಿಕ ಕಾಲದವರೆಗೆ ಕಲಾ ಪ್ರಕಾರಗಳು, ಸಾಹಿತ್ಯ ಮತ್ತು ವಾಸ್ತುಶಿಲ್ಪದ ಪ್ರಮುಖ ಅಂಶಗಳನ್ನು ಒಳಗೊಂಡಿದೆ.

 

ರಾಜ ರವಿವರ್ಮ:

 

ಸಂದರ್ಭ:

ಸಾಮಾನ್ಯವಾಗಿ ಆಧುನಿಕ ಭಾರತೀಯ ಕಲೆಯ ಪಿತಾಮಹ ಎಂದು ಕರೆಯಲ್ಪಡುವ ರಾಜಾ ರವಿವರ್ಮ ಅವರು ಭಾರತೀಯ ದೇವರು ಮತ್ತು ದೇವತೆಗಳ ವಾಸ್ತವಿಕ ಚಿತ್ರಣಕ್ಕಾಗಿ ವ್ಯಾಪಕವಾಗಿ ಹೆಸರುವಾಸಿಯಾಗಿದ್ದಾರೆ.

ಏಪ್ರಿಲ್ 6 ರಂದು, ಅವರ ಪ್ರಮುಖ ಚಿತ್ರಗಳಲ್ಲಿ ಒಂದಾದ ‘ದ್ರೌಪದಿ ವಸ್ತ್ರಾಪಹರಣ’ ಚಿತ್ರವನ್ನು ಮೊದಲ ಬಾರಿಗೆ ಹರಾಜಿಗೆ ಇಡಲಾಗಿದೆ. ಈ ಕ್ಯಾನ್ವಾಸ್ ನ ಮಹಾಭಾರತದ ಒಂದು ದೃಶ್ಯದಲ್ಲಿ ದ್ರೌಪದಿಯ ಸೀರೆಯನ್ನು ಸೆಳೆಯುವ ಚಿತ್ರಣವಿದೆ ಮತ್ತು ಹರಾಜಿನಿಂದ 15 ರಿಂದ 20 ಕೋಟಿ ರೂ. ಸಂಪಾದಿಸುವ ನಿರೀಕ್ಷೆಯಿದೆ.

ಅವರ ಪ್ರಮುಖ ಕೊಡುಗೆಗಳು:

  1. ಹಿಂದೂ ದೇವರು ಮತ್ತು ದೇವತೆಗಳ ಪಾಶ್ಚಿಮಾತ್ಯ, ಶಾಸ್ತ್ರೀಯ ಪ್ರಾತಿನಿಧ್ಯಗಳನ್ನು ಭಾರತೀಯರಿಗೆ ನೀಡಿದ್ದಕ್ಕಾಗಿ ಅವರನ್ನು ನೆನಪಿಸಿಕೊಳ್ಳಲಾಗುತ್ತದೆ.
  2. ಅವರ ಪ್ರಿಂಟಿಂಗ್ ಪ್ರೆಸ್ ಮೂಲಕ, ವರ್ಮಾ ಅವರ ಹಿಂದೂ ಪಂಥಾಹ್ವಾನದ ಮಾನವೀಯ ಚಿತ್ರಣವು ದುಬಾರಿ ಕ್ಯಾನ್ವಾಸ್‌ಗಳ ಮೇಲ್ಮೈಗಳನ್ನು ಮೀರಿ ಕಾರ್ಮಿಕ ವರ್ಗದ ಮನೆಗಳ ಪ್ರಾರ್ಥನೆಯ ಸ್ಥಳ ಮತ್ತು ವಾಸದ ಕೋಣೆಗಳಲ್ಲಿ ಸ್ಥಾನವನ್ನು ಪಡೆಯಿತು.
  3. ಬಡವರಿಗೂ ಸುಲಭವಾಗಿ ಸಿಗುವ ಕೈಗೆಟಕುವ ಬೆಲೆಯ ಲಿಥೋಗ್ರಾಫ್‌ಗಳನ್ನು ತಯಾರಿಸುವ ಮೂಲಕ ಅವರು ಇದನ್ನು ಸಾಧಿಸಿದರು.
  4. ರವಿವರ್ಮ ಅವರು ಮೊದಲು ಮುಂಬೈನಲ್ಲಿ ಮುದ್ರಣಾಲಯವನ್ನು ಪ್ರಾರಂಭಿಸಿದರು ಮತ್ತು ನಂತರ ಅದನ್ನು ಲೋನಾವಾಲಾ ಬಳಿಯ ಒಂದು ಸ್ಥಳಕ್ಕೆ ಸ್ಥಳಾಂತರಿಸಿದರು.

 

ಬಿರುದುಗಳು:

ಅವರ 1873 ರ ಚಿತ್ರಕಲೆ, ನಾಯರ್ ಲೇಡಿ ಅಡೋರ್ನಿಂಗ್ ಹರ್ ಹೇರ್, ವರ್ಮಾ ಅವರಿಗೆ ಪ್ರತಿಷ್ಠಿತ ಪ್ರಶಸ್ತಿಗಳನ್ನು ಗೆದ್ದುಕೊಟ್ಟಿತು, ಇದನ್ನು ಮದ್ರಾಸ್ ಪ್ರೆಸಿಡೆನ್ಸಿಯಲ್ಲಿ ಪ್ರಸ್ತುತಪಡಿಸಿದಾಗ ರಾಜ್ಯಪಾಲರ ಚಿನ್ನದ ಪದಕ ಮತ್ತು ವಿಯೆನ್ನಾದಲ್ಲಿನ ಪ್ರದರ್ಶನದಲ್ಲಿ ಮೆರಿಟ್ ಪ್ರಮಾಣಪತ್ರವನ್ನು ನೀಡಲಾಯಿತು.

1904 ರಲ್ಲಿ, ಬ್ರಿಟಿಷ್ ವಸಾಹತುಶಾಹಿ ಸರ್ಕಾರವು ವರ್ಮಾಗೆ ಕೈಸರ್-ಐ-ಹಿಂದ್ ಚಿನ್ನದ ಪದಕವನ್ನು ನೀಡಿತು. 2013 ರಲ್ಲಿ, ಬುಧ ಗ್ರಹದ ಒಂದು ಕುಳಿಗೆ   ಗೌರವಾರ್ಥವಾಗಿ ರವಿವರ್ಮ ಅವರ  ಹೆಸರನ್ನು ಇಡಲಾಯಿತು.

 

ಅವರ ಪ್ರಮುಖ ಕಲಾಕೃತಿಗಳು:

ಅವರ ಪ್ರಮುಖ ಕಲಾಕೃತಿಗಳು ಎಂದರೆ:

ಎ ಫ್ಯಾಮಿಲಿ ಆಫ್ ಬೆಗ್ಗರ್ಸ್, ಎ ಲೇಡಿ ಪ್ಲೇಯಿಂಗ್ ಸ್ವರ್ಬಾತ್, ಅರ್ಜುನ ಮತ್ತು ಸುಭದ್ರೆ, ಹಂಸದೊಂದಿಗೆ ಮಾತನಾಡುತ್ತಿರುವ ದಮಯಂತಿ, ಜಟಾಯು (ಭಗವಾನ್ ರಾಮನ ಭಕ್ತ ಪಕ್ಷಿ), ಲೇಡಿ ಲಾಸ್ಟ್ ಇನ್ ಥಾಟ್, ಮತ್ತು ಶಕುಂತಲಾ.

 

ಟೀಕೆಗಳು:

ವರ್ಮಾ ಅವರ ವರ್ಣಚಿತ್ರಗಳಲ್ಲಿ ತುಂಬಾ ತೋರಿಕೆಯಿದೆ ಎಂದು ಟೀಕಿಸಲಾಗಿದೆ. ಅವರ ವರ್ಣಚಿತ್ರಗಳು ಸಾಂಪ್ರದಾಯಿಕ ಭಾರತೀಯ ಕಲಾ ಪ್ರಕಾರಗಳನ್ನು, ವಿಶೇಷವಾಗಿ ಹಿಂದೂ ದೇವರುಗಳು ಮತ್ತು ದೇವತೆಗಳನ್ನು ಚಿತ್ರಿಸಿದ ರೀತಿಯನ್ನು ಸಹ ಖಂಡಿಸಲಾಗಿದೆ. ಅವರ ಕಲಾ ವಿಧಾನವು ಸಾಂಪ್ರದಾಯಿಕ ವರ್ಣಚಿತ್ರಗಳಲ್ಲಿ ಕಂಡುಬರುವ ಅಭಿವ್ಯಕ್ತಿಯ ಕ್ರಿಯಾಶೀಲತೆಯನ್ನು ಹೊಂದಿಲ್ಲ ಎಂದು ಹೇಳಲಾಗುತ್ತದೆ. ರಾಜಾ ರವಿವರ್ಮರು ದೇವತೆಗಳನ್ನು ವೇಶ್ಯೆಯರಂತೆ ನಿರೂಪಿಸುತ್ತಿದ್ದರು ಎಂದು ವಿಮರ್ಶಕರು ಟೀಕಿಸಿದ್ದಾರೆ, ಅವರ ದೇವತೆಗಳಿಗೆ ನೀಡಿದ ಪ್ರಾತಿನಿಧ್ಯವು ಅವರನ್ನು ಮನುಷ್ಯರ ಮಟ್ಟಕ್ಕೆ ಇಳಿಸಿದೆ ಎಂದು ಹೇಳಿದ್ದಾರೆ.


ಸಾಮಾನ್ಯ ಅಧ್ಯಯನ ಪತ್ರಿಕೆ 2:


 

ವಿಷಯಗಳು: ಸರ್ಕಾರದ ವಿವಿಧ ಅಂಗಗಳ ನಡುವೆ ಅಧಿಕಾರ ವಿಭಜನೆ, ವಿವಾದ ಪರಿಹಾರ ಕಾರ್ಯವಿಧಾನಗಳು ಮತ್ತು ಸಂಸ್ಥೆಗಳು.

 

ಮರಣದಂಡನೆ:

(Death penalty)

 

ಸಂದರ್ಭ:

ನಿರ್ದಿಷ್ಟ ಪ್ರಕರಣವೊಂದರಲ್ಲಿ ಉದ್ಭವಿಸಿರುವ ಸಮಸ್ಯೆಗಳನ್ನು ಪರಿಶೀಲಿಸುವ ಸಮಯದಲ್ಲಿ, ನ್ಯಾಯಾಲಯಗಳು ಮರಣದಂಡನೆಯನ್ನು ನೀಡುವ ಪ್ರಕ್ರಿಯೆಯನ್ನು ಪರಿಶೀಲಿಸಲು ಸುಪ್ರೀಂ ಕೋರ್ಟ್ ಸ್ವಯಂ ಪ್ರೇರಿತವಾಗಿ ಈ ಮಹತ್ವದ ವಿಚಾರವನ್ನು ಕೈಗೆತ್ತಿಕೊಂಡಿದೆ.

 

ಸಮಸ್ಯೆ ಏನು?

ಸೆಪ್ಟೆಂಬರ್ 2021 ರಿಂದ ಮರಣದಂಡನೆಯ ಮೇಲ್ಮನವಿಗಳನ್ನು ಆಲಿಸುತ್ತಿರುವಾಗ, ವಿಚಾರಣಾ ನ್ಯಾಯಾಲಯಗಳು ಮತ್ತು ಉಚ್ಚ ನ್ಯಾಯಾಲಯಗಳು ತೀರಾ ಕಡಿಮೆ (ಸಂಬಂಧಿಸಿದ) ಮಾಹಿತಿಯೊಂದಿಗೆ ಶಿಕ್ಷೆಯನ್ನು ಜಾರಿಗೊಳಿಸಲು ಅನುಸರಿಸಿದ ವಿಧಾನದ ಬಗ್ಗೆ ಸುಪ್ರೀಂ ಕೋರ್ಟ್ ಪದೇ ಪದೇ ಕಳವಳ ವ್ಯಕ್ತಪಡಿಸಿದೆ.

 

ವರಿಷ್ಠ ನ್ಯಾಯಾಲಯವು ಹೇಳಿರುವುದೇನು?

ಬಚನ್ ಸಿಂಗ್ ತೀರ್ಪಿನಲ್ಲಿ ನೀಡಲಾದ ಸೂಚನೆಯನ್ನು ತೆಗೆದುಕೊಂಡು, ಗಲ್ಲು ಶಿಕ್ಷೆಯ ಪ್ರಕರಣಗಳ ಸರಣಿಯಲ್ಲಿ ನ್ಯಾಯಮೂರ್ತಿ ಲಲಿತ್, ಇತ್ತೀಚೆಗೆ ಅಂತಹ ವಿಷಯಗಳಲ್ಲಿ ನ್ಯಾಯಾಲಯಕ್ಕೆ “ಸಂಪೂರ್ಣ ನೆರವು” ಪ್ರಕರಣದಲ್ಲಿ ಸಾಕ್ಷ್ಯವನ್ನು ಮಾತ್ರವಲ್ಲದೆ ಖೈದಿಯ ಮಾನಸಿಕ ಆರೋಗ್ಯದ ಇತ್ತೀಚಿನ ಸ್ಥಿತಿಯನ್ನು ಸಹ ಸಲ್ಲಿಸುವುದು ಅಗತ್ಯವಾಗಿರುತ್ತದೆ ಎಂದು ಹೇಳಿದ್ದಾರೆ.

 

ಬಚನ್ ಸಿಂಗ್ vs ಪಂಜಾಬ್ ರಾಜ್ಯ (1980) ಪ್ರಕರಣದಲ್ಲಿ ಸುಪ್ರೀಂ ಕೋರ್ಟ್ ತೀರ್ಪು:

ಈ ತೀರ್ಪು ಆರೋಪಿಗೆ ಸಂಬಂಧಿಸಿದಂತೆ, ಒಬ್ಬ ವ್ಯಕ್ತಿಗೆ ಮರಣದಂಡನೆ ಅಥವಾ ಜೀವಾವಧಿ ಶಿಕ್ಷೆಯನ್ನು ವಿಧಿಸಬೇಕೆ ಎಂದು ನಿರ್ಧರಿಸಲು, ಅಪರಾಧ ಮತ್ತು ಅಪರಾಧಿ ಎರಡು ಸಂದರ್ಭಗಳಿಗೆ ಸಂಬಂಧಿಸಿದ ‘ಗಂಭೀರತೆಯನ್ನು ಹೆಚ್ಚಿಸುವ’ ಮತ್ತು ‘ಗಂಭೀರತೆಯನ್ನು ಕಡಿಮೆಗೊಳಿಸುವ’ ಸಂದರ್ಭಗಳನ್ನು ಮೌಲ್ಯಮಾಪನ ಮಾಡುವುದು ಅವಶ್ಯಕವಾಗಿದೆ ಎಂದು ಹೇಳಿದ್ದಲ್ಲದೆ “ಅಪರೂಪದಲ್ಲೇ ಅಪರೂಪದ” ಅಪರಾಧದ ಸಿದ್ಧಾಂತವನ್ನು (doctrine of “rarest of rare”) ಸ್ಥಾಪಿಸಿತು.

 

  1. ನ್ಯಾಯಾಲಯವು ಅಪರಾಧ ಮತ್ತು ಕ್ರಿಮಿನಲ್ ಎರಡನ್ನೂ ಕೂಲಂಕಷವಾಗಿ ಪರಿಶೀಲಿಸಬೇಕು ಮತ್ತು ನಂತರ ಪ್ರಕರಣದ ಸತ್ಯಗಳಲ್ಲಿ ಮರಣದಂಡನೆಯು ಸೂಕ್ತವಾದ ಶಿಕ್ಷೆಯೇ ಎಂದು ನಿರ್ಧರಿಸಬೇಕು ಎಂದು ತೀರ್ಪು ವಿಧಿಸಿತು.
  2. ಪ್ರಕರಣದ ಸತ್ಯಗಳು ಮತ್ತು ಸಂದರ್ಭಗಳ ಮೇಲೆ ಅವಲಂಬಿತವಾಗಿರುವ ಉಲ್ಬಣಗೊಳ್ಳುವ ಮತ್ತು ತಗ್ಗಿಸುವ ಅಂಶಗಳ ಮೇಲೆ ಸಹ ಒತ್ತು ನೀಡಬೇಕು.
  3. ನ್ಯಾಯಾಲಯವು ಅಪರಾಧ ಮತ್ತು ಅಪರಾಧಿ ಎರಡನ್ನೂ ಕೂಲಂಕಷವಾಗಿ ಪರಿಶೀಲಿಸಬೇಕು ಮತ್ತು ನಂತರ ಪ್ರಕರಣದಲ್ಲಿ ಲಭ್ಯವಿರುವ ಸಾಕ್ಷಿಗಳಿಗೆ ಅನುಗುಣವಾಗಿ ಮರಣದಂಡನೆಯೊಂದೆ ಸೂಕ್ತವಾದ ಶಿಕ್ಷೆಯೇ ಎಂದು ನಿರ್ಧರಿಸಬೇಕು ಎಂದು ತೀರ್ಪು ನೀಡಿತು.
  4. ಬಚನ್ ಸಿಂಗ್ ಪ್ರಕರಣದ ತೀರ್ಪಿನ ಪ್ರಕಾರ, ಒಬ್ಬ ಅಪರಾಧಿಯು ಪ್ರಕರಣದಲ್ಲಿ ಮರಣದಂಡನೆಗೆ ಅರ್ಹನಾಗಲು, ಸನ್ನಿವೇಶಗಳ ‘ ಗಂಭೀರತೆಯನ್ನು -ಹೆಚ್ಚುತ್ತಿರುವ’ ಸಂದರ್ಭಗಳು ‘ಗಂಭೀರತೆಯನ್ನು- ಕಡಿಮೆ ಗೊಳಿಸುವ’ ಪರಿಸ್ಥಿತಿಗಳಿಗಿಂತ ಹೆಚ್ಚಾಗಿರಬೇಕು.

 

1983 ರ ಮಾಚಿ ಸಿಂಗ್ v/s ಪಂಜಾಬ್ ರಾಜ್ಯ ಪ್ರಕರಣ:

ಈ ಪ್ರಕರಣದಲ್ಲಿ, ಸುಪ್ರೀಂ ಕೋರ್ಟ್ “ಅಪರೂಪದಲ್ಲೇ ಅಪರೂಪದ” ಸಿದ್ಧಾಂತವನ್ನು ಸ್ಪಷ್ಟಪಡಿಸಿತು ಮತ್ತು ಮರಣದಂಡನೆ ಪ್ರಕರಣಗಳಲ್ಲಿ ಕೆಲವು ಮಾರ್ಗದರ್ಶಿ ತತ್ವಗಳನ್ನು ರೂಪಿಸಿತು.

  1. ‘ಗಂಭೀರತೆಯನ್ನು ಹೆಚ್ಚಿಸುವ’ ಸಂದರ್ಭಗಳು ಅಪರಾಧವನ್ನು ಮಾಡಿದ ವಿಧಾನ, ಅಪರಾಧವನ್ನು ಮಾಡಿದ ಉದ್ದೇಶ, ಅಪರಾಧದ ತೀವ್ರತೆ ಮತ್ತು ಅಪರಾಧದ ಬಲಿಪಶುವನ್ನು ಒಳಗೊಂಡಿವೆ.
  2. ‘ಗಂಭೀರತೆಯನ್ನು ತಗ್ಗಿಸುವ ಸಂದರ್ಭಗಳು ಆರೋಪಿಯ ಮನಃ ಪರಿವರ್ತನೆ ಮತ್ತು ಪುನರ್ವಸತಿ ಸಾಧ್ಯತೆ, ಅವನ ಮಾನಸಿಕ ಆರೋಗ್ಯ ಮತ್ತು ಅವನ ಪೂರ್ವಾಪರಗಳನ್ನು ಒಳಗೊಂಡಿವೆ.

 

ದೀರ್ಘಕಾಲದಿಂದ ಬಾಕಿ ಉಳಿದಿರುವ ಮರಣದಂಡನೆ ಶಿಕ್ಷೆಯ ಪ್ರಕರಣಗಳು ಹಾಗೂ ಪುನರ್ ಪರಿಶೀಲನಾ ಅರ್ಜಿಗಳ ಬಗ್ಗೆ ವರಿಷ್ಠ ನ್ಯಾಯಾಲಯದ ಅಭಿಮತ:

 

  1. 2014 ರಲ್ಲಿ, ಮರಣದಂಡನೆಯನ್ನು ಜಾರಿಗೊಳಿಸುವಲ್ಲಿನ ವಿವರಿಸಲಾಗದ ವಿಳಂಬವು ಮರಣದಂಡನೆಯನ್ನು ಪರಿವರ್ತಿಸಲು ಒಂದು ಕಾರಣವೆಂದು ಸುಪ್ರೀಂ ಕೋರ್ಟ್ ತೀರ್ಪು ನೀಡಿತು ಮತ್ತು ಒಬ್ಬ ಕೈದಿ, ಅವನ ಅಥವಾ ಅವಳ ಸಂಬಂಧಿಕರು ಅಥವಾ ಸಾರ್ವಜನಿಕ ಮನೋಭಾವದ ನಾಗರಿಕರು ಸಹ ಅಂತಹ ಬದಲಾವಣೆಯನ್ನು ಕೋರಿ ರಿಟ್ ಅರ್ಜಿಯನ್ನು ಸಲ್ಲಿಸಬಹುದು.
  2. ಮರಣದಂಡನೆಯನ್ನು ಜಾರಿಗೊಳಿಸುವಲ್ಲಿನ ದೀರ್ಘಾವಧಿಯ ವಿಳಂಬವು ಮರಣದಂಡನೆ ಶಿಕ್ಷೆಗೊಳಗಾದ ಕೈದಿಗಳ ಮೇಲೆ “ಅಮಾನವೀಯ ಪರಿಣಾಮ” ಬೀರುತ್ತದೆ ಎಂದು ಅದು ಹೇಳಿದೆ, ಅವರು ತಮ್ಮ ಕ್ಷಮಾದಾನ ಅರ್ಜಿಯು ವಿಲೇವಾರಿಗಾಗಿ  ಕಾದಿರುವ ಸಮಯದಲ್ಲಿ ಸಾವಿನ ನೆರಳಿನಲ್ಲಿ ವರ್ಷಗಳ ಕಾಲ ಕಾಯುವ ಸಂಕಟವನ್ನು ಎದುರಿಸಬೇಕಾಗುತ್ತದೆ.ಮಿತಿಮೀರಿದ ವಿಳಂಬವು ಖಂಡಿತವಾಗಿಯೂ ಅವರ ದೇಹ ಮತ್ತು ಮನಸ್ಸಿನ ಮೇಲೆ ಮಾನಸಿಕ ಕ್ಲೇಶೆಯ ಪರಿಣಾಮಗಳನ್ನು ಬೀರುತ್ತದೆ.
  3. ಅದೇ ವರ್ಷದಲ್ಲಿ, ಸಾಂವಿಧಾನಿಕ ಪೀಠವು ಮರಣದಂಡನೆಯ ಅಪರಾಧಿಯ ಮರುಪರಿಶೀಲನಾ ಅರ್ಜಿಯನ್ನು ಮುಕ್ತ ನ್ಯಾಯಾಲಯದಲ್ಲಿ ತ್ರಿಸದಸ್ಯ ಪೀಠದಿಂದ ವಿಚಾರಣೆ ನಡೆಸಲಾಗುವುದು ಎಂದು ತೀರ್ಪು ನೀಡಿತು. ಅಂತಹ ಪ್ರಕರಣಗಳನ್ನು ಮೊದಲು ನ್ಯಾಯಾಧೀಶರ ಕೊಠಡಿಯಲ್ಲಿ ದ್ವಿಸದಸ್ಯ ಪೀಠಗಳು ಯಾವುದೇ ಮೌಖಿಕ ವಾದಗಳಿಲ್ಲದೆ ಪರಿಗಣಿಸುತ್ತಿದ್ದವು. 

 

ಸುಪ್ರೀಂಕೋರ್ಟ್ ಮಾಡಿದ ಅವಲೋಕನಗಳು:

  1. ವಿಚಾರಣಾ ನ್ಯಾಯಾಧೀಶರು ಕೇವಲ ಅಪರಾಧದ ಭಯಾನಕ ಸ್ವರೂಪ ಮತ್ತು ಸಮಾಜದ ಮೇಲೆ ಅದರ ಹಾನಿಕಾರಕ ಪರಿಣಾಮವನ್ನು ದೃಷ್ಟಿಯಲ್ಲಿಟ್ಟುಕೊಂಡು ‘ಮರಣದಂಡನೆ’ಯ ಪರವಾಗಿ ಒಲವು ತೋರಬಾರದು. ನ್ಯಾಯಾಧೀಶರು, ಅಂತಹ ಪ್ರಕರಣಗಳಲ್ಲಿ, ‘ಮರಣ ದಂಡನೆ’ಯ ಶಿಕ್ಷೆಯನ್ನು ‘ಜೀವಾವಧಿ ಜೈಲು’ ಶಿಕ್ಷೆಗೆ ಕಡಿಮೆ ಮಾಡಲು ಕಾರಣವಾಗಬಹುದಾದ ಅಂಶಗಳನ್ನು ಸಹ ಪರಿಗಣಿಸಬೇಕು ಎಂದು ಹೇಳಿದೆ.
  2. ಸುಪ್ರೀಂ ಕೋರ್ಟ್ ತನ್ನ ತೀರ್ಪಿನಲ್ಲಿ ‘ದಂಡ ಶಾಸ್ತ್ರದ ತತ್ವಗಳ ವಿಕಸನ’ (evolution of the principles of penology) ವನ್ನು ಉಲ್ಲೇಖಿಸಿದೆ, ಆದಾಗ್ಯೂ, ‘ಮರಣದಂಡನೆ’ ಒಂದು ಪ್ರತಿಬಂಧಕವಾಗಿ ಕಾರ್ಯನಿರ್ವಹಿಸುತ್ತದೆ ಮತ್ತು “ಸೂಕ್ತ ಪ್ರಕರಣಗಳಲ್ಲಿ ಸೂಕ್ತ ಶಿಕ್ಷೆಗಾಗಿ ಸಮಾಜದ ಬೇಡಿಕೆಗೆ ಪ್ರತಿಕ್ರಿಯೆ” ಎಂದು ಹೇಳಿದೆ. ಆದರೆ, ‘ದಂಡಶಾಸ್ತ್ರ’ ದ (Penology) ತತ್ವಗಳು “ಸಮಾಜದ ಇತರ ಕಟ್ಟುಪಾಡುಗಳನ್ನು ಸಮತೋಲನಗೊಳಿಸಲು ವಿಕಸನಗೊಂಡಿವೆ”.
  3. ಅಂದರೆ, ಈ ತತ್ವಗಳ ಪ್ರಕಾರ, ಆರೋಪಿಗೆ ಮರಣದಂಡನೆಯು ಅನಿವಾರ್ಯವಾಗದಿದ್ದರೆ ಮತ್ತು ಇತರ ಸಾಮಾಜಿಕ ಕಾರಣಗಳು ಮತ್ತು ಸಮಾಜದ ಸಾಮೂಹಿಕ ಆತ್ಮಸಾಕ್ಷಿಯ ತೃಪ್ತಿಯ ಪ್ರಶ್ನೆಯನ್ನು ಹುಟ್ಟುಹಾಕದ ಹೊರತು ಮಾನವ ಜೀವ-ಆರೋಪಿಯ ಜೀವನವನ್ನು ಸಹ ಸಂರಕ್ಷಿಸಬೇಕು. 

 

ಮುಂದಿರುವ ಸವಾಲುಗಳು:

  1. 2022 ರಲ್ಲಿ ಭಾರತದಲ್ಲಿನ ವಿಚಾರಣಾ ನ್ಯಾಯಾಲಯಗಳು ಈಗಾಗಲೇ 50 ಕ್ಕೂ ಹೆಚ್ಚು ಜನರಿಗೆ ಮರಣದಂಡನೆಯನ್ನು ಸಾಮಾನ್ಯವಾಗಿ ಕಾರ್ಯವಿಧಾನದ ಮತ್ತು ವಸ್ತುನಿಷ್ಠ ಕಾನೂನುಗಳನ್ನು ಉಲ್ಲಂಘಿಸಿವ ಮೂಲಕ ವಿಧಿಸಿವೆ ಮತ್ತು ಈ ಅಂಶದಿಂದ ಸುಪ್ರೀಂ ಕೋರ್ಟ್‌ನ ಮುಂದಿರುವ ಕಾರ್ಯದ ಅಗಾಧತೆಯನ್ನು ಕಂಡುಹಿಡಿಯಲಾಗಿದೆ.
  2. ಭಾರತದಲ್ಲಿನ ನ್ಯಾಯಾಲಯಗಳಾದ್ಯಂತ ಮರಣದಂಡನೆ ಶಿಕ್ಷೆಯಲ್ಲಿ ನ್ಯಾಯಸಮ್ಮತತೆ ಮತ್ತು ಸ್ಥಿರತೆಯ ಸಮತೋಲನವನ್ನು ತರಲು ಸುಪ್ರೀಂ ಕೋರ್ಟ್‌ಗೆ ಸುಲಭವಲ್ಲ ಆದರೆ ನ್ಯಾಯಾಲಯವು ಅದನ್ನು ನೇರವಾಗಿ ಪರಿಹರಿಸಲು ಆಯ್ಕೆ ಮಾಡಿದೆ ಎಂಬುದು ಖಂಡಿತವಾಗಿಯೂ ಗಮನಾರ್ಹ ಮತ್ತು ನಮ್ಮ ಮೆಚ್ಚುಗೆಗೆ ಅರ್ಹವಾಗಿದೆ.

 

ವಿಷಯಗಳು: ಪ್ರಮುಖ ಶಾಸನಬದ್ಧ, ನಿಯಂತ್ರಕ ಮತ್ತು ವಿವಿಧ ಅರೆ-ನ್ಯಾಯಾಂಗ ಸಂಸ್ಥೆಗಳು.

 

ರಾಷ್ಟ್ರೀಯ ಚಲನಚಿತ್ರ ಅಭಿವೃದ್ಧಿ ನಿಗಮ (NFDC) ಲಿಮಿಟೆಡ್:

(National Film Development Corporation (NFDC) Ltd)

 

ಸಂದರ್ಭ:

ಕೇಂದ್ರ ಮಾಹಿತಿ ಮತ್ತು ಪ್ರಸಾರ ಸಚಿವಾಲಯ ಮಹತ್ವದ ಹೆಜ್ಜೆ ಇಟ್ಟಿದೆ. ಸಾಕ್ಷ್ಯಚಿತ್ರಗಳು ಮತ್ತು ಕಿರುಚಿತ್ರಗಳ ನಿರ್ಮಾಣ, ಚಲನಚಿತ್ರೋತ್ಸವಗಳ ಸಂಘಟನೆ ಮತ್ತು ಚಲನಚಿತ್ರಗಳ ಸಂರಕ್ಷಣೆ ಘಟಕಗಳನ್ನು ರಾಷ್ಟ್ರೀಯ ಚಲನಚಿತ್ರ ಅಭಿವೃದ್ಧಿ ನಿಗಮದ ಜೊತೆ ವಿಲೀನಗೊಳಿಸಿದೆ.

 

ಕೇಂದ್ರ ಮತ್ತು ಮಾಹಿತಿ ಪ್ರಸಾರ ಸಚಿವಾಲಯದಡಿಯಲ್ಲಿ ಕಾರ್ಯನಿರ್ವಹಿಸುತ್ತಿರುವ ರಾಷ್ಟ್ರೀಯ ಚಲನಚಿತ್ರ ಅಭಿವೃದ್ಧಿ ನಿಗಮ ಇದೀಗ ಎಲ್ಲಾ  ಚಲನಚಿತ್ರ ಮಾಧ್ಯಮ ಘಟಕಗ ಮೇಲುಸ್ತುವಾರಿ ನೋಡಿಕೊಳ್ಳಲಿದೆ.

 

ಮಹತ್ವ:

ಇದರಿಂದ ವಿವಿಧ ಘಟಕಗಳ ಎಲ್ಲಾ ಚಟುವಟಿಕೆಗಳು ಒಂದೇ ನಿರ್ವಹಣೆಯಡಿಯಲ್ಲಿ ಬರಲಿದೆ. ಇಷ್ಟೇ ಅಲ್ಲ ವಿವಿಧ ಚಟುವಟಿಕೆಗಳ ಅತಿಕ್ರಮ ಕಡಿಮೆಯಾಗಲಿದೆ. ಜೊತೆಗೆ ಸಾರ್ವಜನಿಕ ಸಂಪನ್ಮೂಲಗಳ ಉತ್ತಮ ಬಳಕೆಯೂ ಸಾಧ್ಯವಾಗಲಿದೆ ಅನ್ನೋ ಕಾರಣಕ್ಕೆ ಈ ನಿರ್ಧಾರ ತೆಗೆದುಕೊಂಡಿದೆ.

 

  1. ರಾಷ್ಟ್ರೀಯ ಚಲನಚಿತ್ರಗಳ ಅಭಿವೃದ್ಧಿ ನಿಗಮ( NFDC) ಎಲ್ಲಾ ಚಲನಚಿತ್ರಗಳ ನಿರ್ಮಾಣದ ಆದೇಶ ನಿರ್ವಹಿಸುತ್ತಿದೆ. ಈ ವಿಲೀನದಿಂದ ಚಲನಚಿತ್ರಗಳು, ಸಾಕ್ಷ್ಯಚಿತ್ರಗಳು, ಮಕ್ಕಳ ಚಲನಚಿತ್ರಗಳು ಮತ್ತು ಅನಿಮೇಷನ್ ಚಲನಚಿತ್ರಗಳು ಸೇರಿದಂತೆ ಎಲ್ಲಾ ಪ್ರಕಾರಗಳ ಚಲನಚಿತ್ರಗಳ ನಿರ್ಮಾಣಕ್ಕೆ ಉತ್ತೇಜನ ಸಿಗಲಿದೆ.
  2. ವಿಲೀನದಿಂದ ಸದ್ಯ ಕೇಂದ್ರ ಮಾಹಿತಿ ಮತ್ತು ಪ್ರಸಾರ ಸಚಿವಾಲಯ ಆಯೋಜಿಸುವ ಅಂತಾರಾಷ್ಟ್ರೀಯ ಚಲನ ಉತ್ಸವ ಆಯೋಜನೆ, ಚಲನಚಿತ್ರ ಪ್ರಚಾರ, ಸಂರಕ್ಷಣೆ, ಡಿಜಿಟಲೀಕರಣ, ಚಲನಚಿತ್ರಗಳ ಮರುಸ್ಥಾಪನೆ, ವಿತರಣೆ ಮಾಲೀಕತ್ವ ಭಾರತ ಸರ್ಕಾರದಲ್ಲೇ ಇರಲಿದೆ. 
  3. ಸಾಕ್ಷ್ಯಚಿತ್ರಗಳ ನಿರ್ಮಾಣ ಜವಾಬ್ದಾರಿಯನ್ನು ಸಂಪೂರ್ಣವಾಗಿ  NFDC ವರ್ಗಾಯಿಸಲಾಗಿದೆ. ಇದನ್ನು ಫಿಲ್ಮ್ಸ್ ವಿಭಾಗ ಎಂದು ಹೆಸರಿಡಲಾಗಿದೆ. ಇದರ ಜೊತೆಗೆ ಚಲನಚಿತ್ರೋತ್ಸವಗಳ ಸಂಘಟನೆಯನ್ನು NFDC ಗೆ ವರ್ಗಾಯಿಸಲಾಗಿದೆ. ಇದರಿಂದ  ರಾಷ್ಟ್ರೀಯ ಮತ್ತು ಅಂತರಾಷ್ಟ್ರೀಯ ಚಲನಚಿತ್ರೋತ್ಸವಗಳ ಸಂಘಟನೆ ಒಂದೇ ವಿಭಾಗದಡಿಯಲ್ಲಿ ಕಾರ್ಯನಿರ್ವಹಿಸಲಿದೆ.
  4. ಚಲನಚಿತ್ರ ಸಂರಕ್ಷಣೆ ಕಾರ್ಯಗಳು ಕೂಡ ಇದೀಗ NFDC ನಿರ್ವಹಿಸಲಿದೆ. ಇದುವರೆಗೆ  ರಾಷ್ಟ್ರೀಯ ಫಿಲ್ಮ್ ಆರ್ಕೈವ್ ಆಫ್ ಇಂಡಿಯಾ ಈ ಕಾರ್ಯ ಮಾಡುತ್ತಿತ್ತು. ಇದೀಗ ವಿಲೀನದೊಂದಿಗೆ ಈ ಜವಾಬ್ದಾರಿ NFDC ಹೆಗಲೇರಿದೆ.  ಆಡಿಯೋ ವಿಶುವಲ್ ಸೇವಾ ವಲಯವನ್ನು ಮತ್ತಷ್ಟು ಉತ್ತೇಜಿಸಲು ಈ ಕ್ರಮ ಕೈಗೊಳ್ಳಲಾಗಿದೆ. ಇದರೊಂದಿಗೆ  ಸೃಜನಶೀಲ ಮತ್ತು ತಾಂತ್ರಿಕ ಸೇವೆಗಳಿಗೂ ಪ್ರೋತ್ಸಾಹ ಸಿಗಲಿದೆ. ವಿಲೀನದ ಜೊತೆಗೆ  ಆಡಿಯೊ-ದೃಶ್ಯ ಸಹ-ನಿರ್ಮಾಣ, ಭಾರತದಲ್ಲಿ ವಿದೇಶಿ ಚಲನಚಿತ್ರಗಳ ಚಿತ್ರೀಕರಣದ ಪ್ರಚಾರ ಸೇರಿದಂತೆ ಇತರ ಕಾರ್ಯಗಳಿಗಾಗಿ ಹಣಕಾಸಿನ ಪ್ರೋತ್ಸಾಹವ ನೀಡಲಾಗಿದೆ.

 

ಹಿನ್ನೆಲೆ:

ಡಿಸೆಂಬರ್, 2020 ರಲ್ಲಿ, ಕೇಂದ್ರ ಸಚಿವ ಸಂಪುಟವು ಎನ್‌ಎಫ್‌ಡಿಸಿಯ ಸಂಘದ ಆರ್ಟಿಕಲ್ ಗಳ ಮೆಮೊರಾಂಡಮ್ ಮೂಲಕ

 ತನ್ನ ನಾಲ್ಕು ಚಲನಚಿತ್ರ ಮಾಧ್ಯಮ ಘಟಕಗಳನ್ನು – ಚಲನಚಿತ್ರ ವಿಭಾಗ, ಚಲನಚಿತ್ರೋತ್ಸವಗಳ ನಿರ್ದೇಶನಾಲಯ, ರಾಷ್ಟ್ರೀಯ ಚಲನಚಿತ್ರ ಆರ್ಕೈವ್ ಆಫ್ ಇಂಡಿಯಾ ಮತ್ತು ಮಕ್ಕಳ ಚಲನಚಿತ್ರ ಸೊಸೈಟಿ, ಭಾರತವನ್ನು ರಾಷ್ಟ್ರೀಯ ಚಲನಚಿತ್ರ ಅಭಿವೃದ್ಧಿ ನಿಗಮ ಲಿಮಿಟೆಡ್‌ನೊಂದಿಗೆ ವಿಲೀನಗೊಳಿಸಲು ನಿರ್ಧರಿಸಿದೆ. 

 

  1. ಸಚಿವಾಲಯವು ಜನವರಿಯಲ್ಲಿ ಈ ನಿಟ್ಟಿನಲ್ಲಿ ವಾರ್ತಾ ಮತ್ತು ಪ್ರಸಾರ ಇಲಾಖೆಯ (I&B) ಮಾಜಿ ಕಾರ್ಯದರ್ಶಿ ಬಿಮಲ್ ಜುಲ್ಕಾ ನೇತೃತ್ವದ ತಜ್ಞರ ಸಮಿತಿಯ ಶಿಫಾರಸುಗಳನ್ನು ಸಾರ್ವಜನಿಕಗೊಳಿಸಿತ್ತು. 
  2. ಚಲನಚಿತ್ರ ನಿರ್ಮಾಣ, ಚಲನಚಿತ್ರೋತ್ಸವಗಳು, ಚಲನಚಿತ್ರ ಪರಂಪರೆ, ಚಲನಚಿತ್ರ ಜ್ಞಾನ ಹೀಗೆ ನಾಲ್ಕು ವಿಭಾಗಗಳಲ್ಲಿ, ಒಂದೇ ಛಾವಣಿಯಡಿಯಲ್ಲಿ ಎಲ್ಲ ಸಂಸ್ಥೆಗಳನ್ನು ತರಲು ಹಾಗೂ ಎಲ್ಲ ವಿಭಾಗಗಳ ಮುಖ್ಯಸ್ಥರಾಗಿ ಚಲನಚಿತ್ರ ಕ್ಷೇತ್ರದ ತಜ್ಞರನ್ನೇ ನೇಮಿಸಬೇಕು ಎಂದೂ ಈ ಸಮಿತಿಯು ಶಿಫಾರಸು ಮಾಡಿತ್ತು.

 

ಚಲನಚಿತ್ರ ಮಾಧ್ಯಮ ಸಂಸ್ಥೆಗಳ ಪಾತ್ರ:

 

ಚಲನಚಿತ್ರಗಳ ವಿಭಾಗ (Films Division): ಭಾರತೀಯ ಇತಿಹಾಸದ ಅತಿದೊಡ್ಡ ಚಲಿಸುವ-ಚಿತ್ರ ಭಂಡಾರ ಮತ್ತು ಧ್ವನಿ-ದೃಶ್ಯ ದಾಖಲೆಯನ್ನು 1948 ರಲ್ಲಿ ಸಾರ್ವಜನಿಕ ಸೇವಾ ಜಾಗೃತಿ ಚಲನಚಿತ್ರಗಳನ್ನು ರಚಿಸಲು, ವಸಾಹತುಶಾಹಿ ಮತ್ತು ರಾಷ್ಟ್ರ-ನಿರ್ಮಾಣ ಪ್ರಕ್ರಿಯೆಯನ್ನು ಚಿತ್ರೀಕರಿಸಲು ಮತ್ತು ಸುದ್ದಿಚಿತ್ರಗಳು ಮತ್ತು ಸಾಕ್ಷ್ಯಚಿತ್ರಗಳನ್ನು ನಿರ್ಮಿಸಲು ಮತ್ತು ವಿತರಿಸಲು ಸ್ಥಾಪಿಸಲಾಯಿತು.ವಸಾಹತುಶಾಹಿ ಸಂಸ್ಥೆಗಳಾದ ಫಿಲ್ಮ್ ಅಡ್ವೈಸರಿ ಬೋರ್ಡ್, ಇನ್ಫರ್ಮೇಷನ್ ಫಿಲ್ಮ್ಸ್ ಆಫ್ ಇಂಡಿಯಾ, ಇಂಡಿಯನ್ ನ್ಯೂಸ್ ಪರೇಡ್ ಮತ್ತು ಆರ್ಮಿ ಫಿಲ್ಮ್ ಮತ್ತು ಫೋಟೋಗ್ರಾಫಿಕ್ ಯುನಿಟ್ ಅನ್ನು ಇದಕ್ಕೆ ಹಸ್ತಾಂತರಿಸಲಾಯಿತು. FD ಯು ಇಂದು 8,000 ಕ್ಕೂ ಹೆಚ್ಚು ನ್ಯೂಸ್‌ರೀಲ್‌ಗಳು, ಸಾಕ್ಷ್ಯಚಿತ್ರಗಳು, ಕಿರುಚಿತ್ರಗಳು ಮತ್ತು ಐತಿಹಾಸಿಕ ಘಟನೆಗಳು ಮತ್ತು ರಾಜಕೀಯ ವ್ಯಕ್ತಿಗಳ ಮೇಲೆ ತಯಾರಿಸಲಾದ ಅನಿಮೇಷನ್ ಚಲನಚಿತ್ರಗಳನ್ನು ಹೊಂದಿದೆ.

 

CFSI: ಇದು 1955 ರಲ್ಲಿ ರೂಪುಗೊಂಡಿತು, ಇದು ಚಿಕ್ಕ ಪಟ್ಟಣಗಳು ​​ಮತ್ತು ಗ್ರಾಮೀಣ ಪ್ರದೇಶಗಳಲ್ಲಿನ ಸೌಲಭ್ಯವಂಚಿತ ಮಕ್ಕಳಿಗಾಗಿ ಮಕ್ಕಳ ಚಲನಚಿತ್ರಗಳು ಮತ್ತು ಮೌಲ್ಯಾಧಾರಿತ ಮನರಂಜನೆಯನ್ನು ನಿರ್ಮಿಸುವ ಕಾರ್ಯವನ್ನು ನಿರ್ವಹಿಸಿತು.

 

NFAI: ಇದನ್ನು ಹೆಸರಾಂತ ಕ್ಯುರೇಟರ್ P K ನಾಯರ್ ಅಡಿಯಲ್ಲಿ 1964 ರಲ್ಲಿ ಸ್ಥಾಪಿಸಲಾಯಿತು, ಇದು ಭಾರತದಲ್ಲಿ ಕಾಲ್ಪನಿಕ ಸಿನಿಮಾದ ಪರಂಪರೆಯನ್ನು ಪತ್ತೆಹಚ್ಚುವ, ಸ್ವಾಧೀನಪಡಿಸಿಕೊಳ್ಳುವ ಮತ್ತು ಸಂರಕ್ಷಿಸುವ ಕಾರ್ಯವನ್ನು ನಿರ್ವಹಿಸಿತು.

 

DFF: ಇದನ್ನು 1973 ರಲ್ಲಿ ಸ್ಥಾಪಿಸಲಾಯಿತು, ಮತ್ತು ಸಾಂಸ್ಕೃತಿಕ ವಿನಿಮಯ, ವಿಶ್ವಾದ್ಯಂತ ಭಾರತೀಯ ಸಿನಿಮಾವನ್ನು ಪ್ರಚಾರ ಮಾಡುವುದು, ರಾಷ್ಟ್ರೀಯ ಚಲನಚಿತ್ರ ಪ್ರಶಸ್ತಿಗಳು ಮತ್ತು ದಾದಾಸಾಹೇಬ್ ಫಾಲ್ಕೆ ಪ್ರಶಸ್ತಿಗಳು, ಮುಂಬೈ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವ ಮತ್ತು ಗೋವಾದಲ್ಲಿ ಭಾರತದ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವವನ್ನು ಆಯೋಜಿಸುವುದು ಇದರ ಕಾರ್ಯವಾಗಿದೆ.

 

NFDC: 1975 ರಲ್ಲಿ ಸ್ಥಾಪಿತವಾದ PSU, ಅದರ ಹಿಂದಿನ ಅವತಾರವು ಫಿಲ್ಮ್ ಫೈನಾನ್ಸ್ ಕಾರ್ಪೊರೇಶನ್ ಆಗಿತ್ತು. ಚಲನಚಿತ್ರಗಳಿಗೆ ಹಣಕಾಸು ಒದಗಿಸುವುದು, ನಿರ್ಮಿಸುವುದು ಮತ್ತು ವಿತರಿಸುವುದು ಮತ್ತು ಮುಖ್ಯವಾಹಿನಿಯ ಹೊರಗಿನ ಚಲನಚಿತ್ರ ನಿರ್ಮಾಪಕರನ್ನು ಉತ್ತೇಜಿಸುವುದು ಇದರ ಕೆಲಸವಾಗಿತ್ತು. ತನ್ನ ಫಿಲ್ಮ್ ಬಜಾರ್ ವರ್ಕ್-ಇನ್-ಪ್ರೋಗ್ರೆಸ್ (WIP) ಲ್ಯಾಬ್ ಮೂಲಕ, NFDC ಯುವ ಪ್ರತಿಭೆಗಳಿಗೆ ಸಂವಹನ ನಡೆಸಲು ಮತ್ತು ಕಲಿಯಲು ವೇದಿಕೆಯನ್ನು ಒದಗಿಸಿದೆ.

 

ಈ ವಿಲೀನಕ್ಕೆ ವಿರೋಧವೇಕೆ?

  1. ಪಾರದರ್ಶಕತೆ ಮತ್ತು ಹೊಣೆಗಾರಿಕೆಯ ಕೊರತೆ, ಮತ್ತು ಪ್ರಕ್ರಿಯೆಯನ್ನು ನಡೆಸಲಾಗುವ ಅನಿಯಂತ್ರಿತ ವಿಧಾನ.
  2. ಉದ್ಯೋಗಿಗಳು ಮತ್ತು ಸ್ವತಂತ್ರ ಮತ್ತು ಸಾಕ್ಷ್ಯಚಿತ್ರ ನಿರ್ಮಾಪಕರ ಭವಿಷ್ಯದ ಬಗ್ಗೆ ಆತಂಕಗಳು , ಹಾಗೆಯೇ ಅವರು ರಾಷ್ಟ್ರೀಯ ಪರಂಪರೆ ಎಂದು ಘೋಷಿಸಲು ಬಯಸುವ ಆರ್ಕೈವಲ್ ದೃಶ್ಯಾವಳಿಗಳ ಕುರಿತ ಅನಿಶ್ಚಿತತೆ.

 

ವಿಷಯಗಳು: ಭಾರತ ಮತ್ತು ನೆರೆಹೊರೆಯ ದೇಶಗಳೊಂದಿಗೆ ಅದರ  ಸಂಬಂಧಗಳು.

 

ಭಾರತ ನೇಪಾಳ ಗಡಿ ವಿವಾದ:

 

ಸಂದರ್ಭ:

ಉಭಯ ದೇಶಗಳ ಪ್ರಧಾನಿಗಳ ನಡುವೆ ಇತ್ತೀಚೆಗೆ ನಡೆದ ಸಭೆಯಲ್ಲಿ ಭಾರತ ಮತ್ತು ನೇಪಾಳ ನಡುವಿನ ಕಾಲಾಪಾನಿ ಗಡಿ ವಿವಾದದ ಕುರಿತು ಚರ್ಚಿಸಲಾಗಿದೆ.

ಗಡಿ ವಿವಾದವನ್ನು “ರಾಜಕೀಯಗೊಳಿಸುವುದನ್ನು” ತಪ್ಪಿಸುವಂತೆ ಭಾರತವು ನೇಪಾಳವನ್ನು ಒತ್ತಾಯಿಸಿದೆ.

 

ಹಿನ್ನೆಲೆ:

ಭಾರತದ ಪರಿಷ್ಕೃತ ರಾಜಕೀಯ ನಕ್ಷೆಯು ಉತ್ತರಾಖಂಡದ ಪ್ರದೇಶದೊಳಗೆ ಕಾಲಾಪಾನಿ-ಲಿಪುಲೆಕ್-ಲಿಂಪಿಯಾಧುರಾ ತ್ರಿಕೋನ ಪ್ರದೇಶವನ್ನು ಚಿತ್ರಿಸಿದ ನಂತರ ನವೆಂಬರ್ 2019 ರಲ್ಲಿ ಕಾಲಾಪಾನಿ ಗಡಿ ಸಮಸ್ಯೆ ಭುಗಿಲೆದ್ದ ನಂತರ ನೇಪಾಳದ ನಾಯಕನ ಮೊದಲ ಭಾರತ ಭೇಟಿಯಾಗಿದೆ.

 

‘ಕಾಲಪಾನಿ’ ಪ್ರದೇಶ ಇರುವ ಸ್ಥಳ:

‘ಕಾಲಪಾನಿ’ ಪ್ರದೇಶವು (Kalapani) ಉತ್ತರಾಖಂಡದ ಪಿಥೋರಘರ್ ಜಿಲ್ಲೆಯ ಪೂರ್ವ ತುದಿಯಲ್ಲಿದೆ.

  1. ಇದು ಉತ್ತರದಲ್ಲಿ ಚೀನಾದ ಅಡಿಯಲ್ಲಿ ಟಿಬೆಟ್ ಸ್ವಾಯತ್ತ ಪ್ರದೇಶ ಮತ್ತು ಪೂರ್ವ ಮತ್ತು ದಕ್ಷಿಣದಲ್ಲಿ ನೇಪಾಳದೊಂದಿಗೆ ಗಡಿಯನ್ನು ಹಂಚಿಕೊಂಡಿದೆ.
  2. ಇದು ಲಿಂಪಿಯಾಧುರ ಮತ್ತು ಲಿಪುಲೇಖ್ ನಡುವೆ ಇದೆ.
  3. ‘ಕಲಾಪಾನಿ ಪ್ರದೇಶ’ವು ನೇಪಾಳ ಮತ್ತು ಭಾರತದ ನಡುವಿನ ಅತಿದೊಡ್ಡ ಪ್ರಾದೇಶಿಕ ವಿವಾದವಾಗಿದೆ. ಈ ಪ್ರದೇಶವು ಎತ್ತರದ ಹಿಮಾಲಯದಲ್ಲಿ ಕನಿಷ್ಠ 37,000 ಹೆಕ್ಟೇರ್ ಭೂಮಿಯನ್ನು ಒಳಗೊಂಡಿದೆ.

 

‘ಕಾಲಾಪಾನಿ ಪ್ರದೇಶ’ದ ಮೇಲೆ ಯಾರ ನಿಯಂತ್ರಣವಿದೆ?

ಈ ಪ್ರದೇಶವು ಭಾರತದ ನಿಯಂತ್ರಣದಲ್ಲಿದೆ ಆದರೆ ನೇಪಾಳವು ಈ ಪ್ರದೇಶವನ್ನು ಐತಿಹಾಸಿಕ ಮತ್ತು ಕಾರ್ಟೋಗ್ರಾಫಿಕ್ ಕಾರಣಗಳಿಗಾಗಿ ಹೇಳಿಕೊಂಡಿದೆ.

 

ವಿವಾದಕ್ಕೆ ಕಾರಣ:

‘ಕಾಲಾಪಾನಿ ಕ್ಷೇತ್ರ’ ಎಂಬ ಹೆಸರು ಅದರ ಮೂಲಕ ಹರಿಯುವ ‘ಕಾಳಿ ನದಿ’ ಯಿಂದ ಬಂದಿದೆ.ಈ ಪ್ರದೇಶದ ಮೇಲೆ ನೇಪಾಳದ ಹಕ್ಕು ಈ ನದಿಯನ್ನು ಆಧರಿಸಿದೆ. 1814-16 ರಲ್ಲಿ ‘ಗೂರ್ಖಾ ಯುದ್ಧ’ / ‘ಆಂಗ್ಲೋ-ನೇಪಾಳ ಯುದ್ಧ’ದ ನಂತರ, ಕಾಠ್ಮಂಡುವಿನ ಗೂರ್ಖಾ ಆಡಳಿತಗಾರರು ಮತ್ತು ಈಸ್ಟ್ ಇಂಡಿಯಾ ಕಂಪನಿಯ ನಡುವೆ ಸಹಿ ಹಾಕಿದ’ ಸುಗೌಲಿ ಒಪ್ಪಂದ’ದಲ್ಲಿ ‘ಕಾಳಿ ನದಿ’ ನೇಪಾಳದ ಗಡಿಯಾಗಿ ನಿರ್ಧರಿಸಲಾಯಿತು. ಒಪ್ಪಂದವನ್ನು 1816 ರಲ್ಲಿ ಅಂಗೀಕರಿಸಲಾಯಿತು.

 

  1. ಒಪ್ಪಂದದ ಅಡಿಯಲ್ಲಿ, ನೇಪಾಳವು ಪಶ್ಚಿಮದಲ್ಲಿ ಕುಮಾವುನ್-ಗರ್ವಾಲ್ ಮತ್ತು ಪೂರ್ವದಲ್ಲಿ ಸಿಕ್ಕಿಂ ಪ್ರದೇಶಗಳನ್ನು ಕಳೆದುಕೊಳ್ಳಬೇಕಾಯಿತು.
  2. ಒಪ್ಪಂದದ 5 ನೇ ವಿಧಿಯ ಪ್ರಕಾರ, ನೇಪಾಳದ ರಾಜನು ಕಾಳಿ ನದಿಯ ಪಶ್ಚಿಮದ ಪ್ರದೇಶದ ಮೇಲಿನ ತನ್ನ ಹಕ್ಕನ್ನು ತ್ಯಜಿಸಿದನು. ಕಾಳಿ ನದಿಯು ಎತ್ತರದ ಹಿಮಾಲಯದಲ್ಲಿ ಹುಟ್ಟಿ ಭಾರತೀಯ ಉಪಖಂಡದ ವಿಶಾಲವಾದ ಬಯಲು ಪ್ರದೇಶಗಳ ಮೂಲಕ ಹರಿಯುತ್ತದೆ.
  3. ಒಪ್ಪಂದದ ಪ್ರಕಾರ, ಬ್ರಿಟಿಷ್ ಆಡಳಿತಗಾರರು ಕಾಳಿ ನದಿಯ ಪೂರ್ವದ ಪ್ರದೇಶದ ಮೇಲೆ ನೇಪಾಳದ ಹಕ್ಕನ್ನು ಗುರುತಿಸಿದರು.

 

ಪ್ರಸ್ತುತ ಸಮಸ್ಯೆಗಳು:

  1. ನೇಪಾಳದ ತಜ್ಞರ ಪ್ರಕಾರ, ಕಾಳಿ ನದಿಯ ಪೂರ್ವ ಪ್ರದೇಶದ ಆರಂಭವನ್ನು ನದಿಯ ಮೂಲದಿಂದ ಪರಿಗಣಿಸಬೇಕು. ಅವರ ಪ್ರಕಾರ, ನದಿಯ ಮೂಲವು ‘ಲಿಂಪಿಯಧುರ’ ಬಳಿಯ ಪರ್ವತಗಳಲ್ಲಿದೆ, ಇದು ನದಿಯ ಉಳಿದ ಹರಿವಿನ ಪ್ರದೇಶಕ್ಕಿಂತ ಹೆಚ್ಚಿನ ಎತ್ತರದಲ್ಲಿದೆ.
  2. ಲಿಂಪಿಯಾಧುರದಿಂದ ಹರಿಯುವ ನದಿಯ ಸಂಪೂರ್ಣ ಹೊಳೆಯ ಪೂರ್ವಕ್ಕೆ ಇರುವ ಎತ್ತರದ ಪರ್ವತ ಪ್ರದೇಶವು ತಮಗೇ ಸೇರಿದೆ ಎಂದು ನೇಪಾಳ ಹೇಳಿಕೊಂಡಿದೆ.
  3. ಮತ್ತೊಂದೆಡೆ, ಭಾರತವು ಕಾಲಪಾಣಿಯಿಂದ ತನ್ನ ಗಡಿ ಆರಂಭವಾಗುತ್ತದೆ ಎಂದು ಹೇಳುತ್ತದೆ ಕಾರಣ ನದಿಯು ಇಲ್ಲಿಂದ ಆರಂಭವಾಗುತ್ತದೆ ಎಂಬುದು ಭಾರತದ ವಾದವಾಗಿದೆ.

 

ಲಿಪುಲೇಖ್ ಮೇಲೆ ಭಾರತದ ನಿಯಂತ್ರಣ:

  1. ಟಿಬೆಟಿಯನ್ ಪ್ರಸ್ಥಭೂಮಿಯೊಂದಿಗೆ ಹಿಮಾಲಯದ ಸುರಂಗ ಮಾರ್ಗಗಳ ಅಥವಾ ಪಾಸ್ ಗಳ ಪ್ರಾಮುಖ್ಯತೆಯು 1962 ರ ಯುದ್ಧದಲ್ಲಿ ಸ್ಪಷ್ಟವಾಗಿ ತಿಳಿಯಿತು.
  2. ಆ ಯುದ್ಧದ ಸಮಯದಲ್ಲಿ, ಚೀನೀ ಪಡೆಗಳು ತವಾಂಗ್‌ನಲ್ಲಿ ಸೆ ಲಾ ಪಾಸ್ ಅನ್ನು ಬಳಸಿಕೊಂಡು   ಪೂರ್ವದಲ್ಲಿನ ಬ್ರಹ್ಮಪುತ್ರ ಬಯಲು ಪ್ರದೇಶವನ್ನು ತಲುಪಿದವು.
  3. ಪೂರ್ವದಲ್ಲಿ ಉಂಟಾದ ಮಿಲಿಟರಿ ಸೋಲು ದುರ್ಬಲವಾಗಿ ಸಂರಕ್ಷಿಸಲ್ಪಟ್ಟ ಪಾಸ್‌ಗಳು ಚೀನಾದ ವಿರುದ್ಧ ಭಾರತೀಯ ಮಿಲಿಟರಿ ಸನ್ನದ್ಧತೆಯ ಪ್ರಮುಖ ದುರ್ಬಲತೆ ಎಂಬುದನ್ನು ಸ್ಪಷ್ಟವಾಗಿ ತೋರಿಸಿತು.
  4. ಸ್ವಲ್ಪಮಟ್ಟಿಗೆ ಕೋಟೆಯೊಂದಿಗೆ ಸುಭದ್ರವಾಗಿದ್ದ ಸೆ ಲಾ ಪಾಸ್ ಗೆ ಹೋಲಿಸಿದರೆ, ಲಿಪುಲೇಖ್ ಪ್ರದೇಶವು ಶತ್ರು ದಾಳಿಗಳಿಗೆ ಬಹುಬೇಗನೆ ಒಳಗಾಗಬಹುದಾಗಿತ್ತು.
  5. ನೇಪಾಳದ ರಾಜ ಮಹೇಂದ್ರ ದೆಹಲಿಯೊಂದಿಗೆ ಒಪ್ಪಂದ ಮಾಡಿಕೊಂಡರು ಮತ್ತು ಭದ್ರತಾ ಉದ್ದೇಶಗಳಿಗಾಗಿ ಈ ಪ್ರದೇಶವನ್ನು ಭಾರತಕ್ಕೆ ಹಸ್ತಾಂತರಿಸಿದರು.
  6. 1969 ರಲ್ಲಿ, ದ್ವಿಪಕ್ಷೀಯ ಮಾತುಕತೆಗಳ ಅಡಿಯಲ್ಲಿ ಕಾಲಾಪಾನಿ ಹೊರತುಪಡಿಸಿ ಉಳಿದ ಎಲ್ಲಾ ಪ್ರದೇಶಗಳಲ್ಲಿನ ಭದ್ರತಾ ಠಾಣೆಗಳನ್ನು ತೆಗೆದುಹಾಕಲಾಯಿತು.

 

ಪ್ರಸ್ತುತ ಪರಿಸ್ಥಿತಿ:

ಕೆಲ ಸಮಯದ ಹಿಂದೆ, ಪರಿಷ್ಕೃತ ಅಧಿಕೃತ ನಕ್ಷೆಯನ್ನು ನೇಪಾಳವು ಪ್ರಕಟಿಸಿತು, ಇದರಲ್ಲಿ ಕಾಳಿ ನದಿಯ ಮೂಲವಾದ ಲಿಂಪಿಯಧುರದಿಂದ ಕಾಲಪಾಣಿ ಮತ್ತು ತ್ರಿಭುಜ ಪ್ರದೇಶದ ಈಶಾನ್ಯದಲ್ಲಿ ಲಿಪುಲೇಖ್ ಹಾದುಹೋಗುತ್ತದೆ.

  1. ಕಳೆದ ವರ್ಷ ನೇಪಾಳದ ಪ್ರಧಾನಿ ಕೆ.ಪಿ. ಶರ್ಮಾ ಒಲಿ ಈ ನಕ್ಷೆಗೆ ಸಾಂವಿಧಾನಿಕ ಸ್ಥಾನಮಾನ ನೀಡಲು ಸಾಂವಿಧಾನಿಕ ತಿದ್ದುಪಡಿ ಪ್ರಸ್ತಾವನೆಯನ್ನು ಸಹ ಮಂಡಿಸಿದ್ದರು.
  2. ಭಾರತೀಯ ವೀಕ್ಷಕರು ಹೇಳುವಂತೆ ನೇಪಾಳ ಸರ್ಕಾರದ ಈ ಕ್ರಮವು ‘ಕಾಲಪಾನಿ ಸಮಸ್ಯೆಯ’ ಯಾವುದೇ ಭವಿಷ್ಯದ ಪರಿಹಾರವನ್ನು ಬಹುತೇಕ ಅಸಾಧ್ಯವಾಗಿಸಬಹುದು, ಏಕೆಂದರೆ ಈ ಪ್ರಸ್ತಾಪಕ್ಕೆ ಸಾಂವಿಧಾನಿಕ ಖಾತರಿಯು ಈ ವಿಷಯದ ಬಗ್ಗೆ ಕಠ್ಮಂಡುವಿನ ನಿಲುವನ್ನು ಗಟ್ಟಿಗೊಳಿಸುತ್ತದೆ. 

ವಿಷಯಗಳು: ಭಾರತ ಮತ್ತು ನೆರೆಹೊರೆಯ ದೇಶಗಳೊಂದಿಗೆ ಅದರ ಸಂಬಂಧಗಳು.

 

ಶ್ರೀಲಂಕಾದಲ್ಲಿ ಆರ್ಥಿಕ ಬಿಕ್ಕಟ್ಟು:

(Sri Lanka economic crisis)

 

ಸಂದರ್ಭ:

ಶ್ರೀಲಂಕಾದ ಆರ್ಥಿಕ ಬಿಕ್ಕಟ್ಟು ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದೆ. ನಿಯಂತ್ರಣದ ಸಾಧ್ಯತೆಗಳು ಕಡಿಮೆಯಾಗುತ್ತಿದ್ದು, ಪರಿಸ್ಥಿತಿ ಈಗಾಗಲೇ ಕೈಮೀರಿದೆ. ಸಚಿವ ಸಂಪುಟದಲ್ಲಿದ್ದ ಎಲ್ಲ 26 ಸಚಿವರೂ ಒಮ್ಮೆಲೆ ರಾಜೀನಾಮೆ ಕೊಟ್ಟಿದ್ದು ರಾಜಕೀಯ ಬಿಕ್ಕಟ್ಟೂ ಸೃಷ್ಟಿಯಾಗಿದೆ. ಜನರು ದಿನದಿಂದ ದಿನಕ್ಕೆ ಸಹನೆ ಕಳೆದುಕೊಳ್ಳುತ್ತಿದ್ದಾರೆ.

 

ಪ್ರಸ್ತುತ ಪರಿಸ್ಥಿತಿ:

 

  1. ದೇಶದಲ್ಲಿ ವಿದೇಶಿ ವಿನಿಮಯ ಮೀಸಲು ಪಾತಾಳಕ್ಕೆ ಕುಸಿದಿದೆ.
  2. ಇಂಧನ ಸೇರಿದಂತೆ ಅಗತ್ಯವಸ್ತುಗಳ ಆಮದುಗಳಿಗೆ ಪಾವತಿಸಲು ಶ್ರೀಲಂಕಾ ಸರ್ಕಾರಕ್ಕೆ ಸಾಧ್ಯವಾಗುತ್ತಿಲ್ಲ.
  3. ಇದರಿಂದಾಗಿ 13 ಗಂಟೆಗಳವರೆಗೆ ವಿದ್ಯುತ್ ಕಡಿತವನ್ನು ಘೋಷಿಸಲಾಗಿದೆ.
  4. ಶ್ರೀಲಂಕಾದ  ಸಾಮಾನ್ಯ ಜನತೆ ಸಹ ವಸ್ತುಗಳ ಕೊರತೆ ಮತ್ತು ಗಗನಕ್ಕೇರುತ್ತಿರುವ ಹಣದುಬ್ಬರವನ್ನು ಎದುರಿಸುತ್ತಿದ್ದಾರೆ.
  5. ದೇಶವು ತನ್ನ ಮೀಸಲುಗಳಲ್ಲಿ ಕೇವಲ $2.31 ಶತಕೋಟಿ (ಫೆಬ್ರವರಿಯವರೆಗೆ) ಉಳಿದಿದೆ ಆದರೆ 2022 ರಲ್ಲಿ ಸುಮಾರು $4 ಶತಕೋಟಿ ಸಾಲ ಮರುಪಾವತಿಯನ್ನು ಎದುರಿಸುತ್ತಿದೆ, ಇದರಲ್ಲಿ ಜುಲೈನಲ್ಲಿ ಮುಕ್ತಾಯಗೊಳ್ಳುವ $1 ಶತಕೋಟಿ ಅಂತರರಾಷ್ಟ್ರೀಯ ಸಾವರಿನ್ ಬಾಂಡ್ (ISB) ಕೂಡ ಸೇರಿದೆ. 

 

ಶ್ರೀಲಂಕಾದ ಈ ಪರಿಸ್ಥಿತಿಗೆ ಕಾರಣಗಳು:

 

ದೇಶದಲ್ಲಿ ಅಧಿಕಾರಕ್ಕೆ ಬಂದ ಪ್ರತಿಯೊಂದು ಸರ್ಕಾರವು ಆರ್ಥಿಕತೆಯನ್ನು ನಿರ್ವಹಿಸುವಲ್ಲಿ ಎಡವಿದ್ದು: ಇದು ಅವಳಿ ಕೊರತೆಯ ಸೃಷ್ಟಿಗೆ ಮತ್ತು ಮುಂದುವರೆಯಲು – ಚಾಲ್ತಿ ಖಾತೆ ಕೊರತೆಯ ಜೊತೆಗೆ ಬಜೆಟ್ ಕೊರತೆ.

ಪ್ರಸ್ತುತ ಸರ್ಕಾರದ ಜನಪ್ರಿಯ ನೀತಿಗಳು: ಉದಾಹರಣೆಗೆ ತೆರಿಗೆ ಕಡಿತ.

ಸಾಂಕ್ರಾಮಿಕದ ಪರಿಣಾಮ: ದೇಶದ ಪ್ರಮುಖ ಪ್ರವಾಸೋದ್ಯಮ ಕ್ಷೇತ್ರವು ಆರ್ಥಿಕ ಹೊಡೆತವನ್ನು ಅನುಭವಿಸಿತು ಮತ್ತು ವಿದೇಶಿ ಕೆಲಸಗಾರರು ದೇಶಕ್ಕೆ ರವಾನಿಸುವ ಹಣದಲ್ಲಿ ಕಡಿತ ಉಂಟಾಯಿತು.

ಭತ್ತದ ಉತ್ಪಾದನೆಯಲ್ಲಿ ಕಡಿತ: 2021 ರಲ್ಲಿ ಎಲ್ಲಾ ರೀತಿಯ ರಾಸಾಯನಿಕ ಗೊಬ್ಬರಗಳನ್ನು ನಿಷೇಧಿಸುವ ಮತ್ತು ಕೇವಲ ಸಾವಯವ ಗೊಬ್ಬರಗಳನ್ನು ಬಳಸುವ ಪ್ರಸ್ತುತ ಸರ್ಕಾರದ ನಿರ್ಧಾರದಿಂದಾಗಿ ದೇಶವು ಆಹಾರ ಕೊರತೆಯನ್ನು ಎದುರಿಸುವಂತಾಯಿತು. 

 

ಭಾರತದಿಂದ ಬೆಂಬಲ:

  1. ಭಾರತದೊಂದಿಗೆ ಸಹಿ ಮಾಡಿದ $500 ಮಿಲಿಯನ್ ಕ್ರೆಡಿಟ್ ಲೈನ್ ಅಡಿಯಲ್ಲಿ ಡೀಸೆಲ್ ಪೂರೈಕೆಯು ಶೀಘ್ರದಲ್ಲೇ ಶ್ರೀಲಂಕಾವನ್ನು ತಲುಪುವ ನಿರೀಕ್ಷೆಯಿದೆ.
  2. ಆಹಾರ ಮತ್ತು ಔಷಧ ಸೇರಿದಂತೆ ಅಗತ್ಯ ವಸ್ತುಗಳನ್ನು ಆಮದು ಮಾಡಿಕೊಳ್ಳಲು ಶ್ರೀಲಂಕಾ ಮತ್ತು ಭಾರತ $1 ಬಿಲಿಯನ್ ಸಾಲ ಒಪ್ಪಂದಕ್ಕೆ ಸಹಿ ಹಾಕಿವೆ.
  3. ಶ್ರೀಲಂಕಾ ಸರ್ಕಾರವು ನವ ದೆಹಲಿಯಿಂದ ಕನಿಷ್ಠ $ 1 ಬಿಲಿಯನ್ ಸಾಲವನ್ನು ಕೋರಿದೆ.

 

ದ್ವೀಪ ರಾಷ್ಟ್ರಕ್ಕೆ ಸಹಾಯ ಮಾಡುವುದರಿಂದ ಭಾರತಕ್ಕಾಗುವ ಅನುಕೂಲಗಳು:

  1. ಬಹುಮುಖ್ಯವಾಗಿ, ಚೀನಾದೊಂದಿಗೆ ಶ್ರೀಲಂಕಾದಲ್ಲಿನ ಯಾವುದೇ ಭ್ರಮನಿರಸನವು ಇಂಡೋ-ಪೆಸಿಫಿಕ್‌ನಲ್ಲಿ ಚೀನಾದ ‘ ಸ್ಟ್ರಿಂಜ್ ಆಫ್ ಪರ್ಲ್ಸ್ ‘ ಭೂ ರಾಜಕೀಯ ಆಟದಿಂದ ಲಂಕಾ ದ್ವೀಪಸಮೂಹವನ್ನು ಹೊರಗಿಡುವ ಭಾರತದ ಪ್ರಯತ್ನವನ್ನು ಸುಲಭಗೊಳಿಸುತ್ತದೆ.
  2. ಈ ಪ್ರದೇಶದಲ್ಲಿ ಚೀನಾದ ಉಪಸ್ಥಿತಿಯನ್ನು ಕಟ್ಟಿಹಾಕಲು ಮತ್ತು ತನ್ನ ಪ್ರಭಾವವನ್ನು ಹೆಚ್ಚಿಸಿಕೊಳ್ಳಲು ಇದು ಭಾರತಕ್ಕೆ ನೆರವಾಗುತ್ತದೆ.

 

ವಿಷಯಗಳು: ಪ್ರಮುಖ ಅಂತರರಾಷ್ಟ್ರೀಯ ಸಂಸ್ಥೆಗಳು, ಏಜೆನ್ಸಿಗಳು ಮತ್ತು ವೇದಿಕೆಗಳು, ಅವುಗಳ ರಚನೆ, ಮತ್ತು ಆದೇಶ.

 

ಅಂತಾರಾಷ್ಟ್ರೀಯ ಸೌರ ಒಕ್ಕೂಟ: (International Solar Alliance – ISA)

 

ಸಂದರ್ಭ:

ನೇಪಾಳ ದೇಶವು ಇಂಟರ್ನ್ಯಾಷನಲ್ ಸೋಲಾರ್ ಅಲೈಯನ್ಸ್ (ISA) ಚೌಕಟ್ಟಿನ ಒಪ್ಪಂದಕ್ಕೆ ಸಹಿ ಹಾಕಿದ 105 ನೇ ಸದಸ್ಯ ರಾಷ್ಟ್ರವಾಗಿದೆ

 

ಅಂತರರಾಷ್ಟ್ರೀಯ ಸೌರ ಒಕ್ಕೂಟ (ISA) ದ ಕುರಿತು:

  1. ಅಂತರರಾಷ್ಟ್ರೀಯ ಸೌರ ಒಕ್ಕೂಟ (ISA) ವನ್ನು ಭಾರತ ಮತ್ತು ಫ್ರಾನ್ಸ್‌ನ ಜಂಟಿ ಪ್ರಯತ್ನವಾಗಿ ‘ಸೌರ ಶಕ್ತಿ ಪರಿಹಾರಗಳ’ ನಿಯೋಜನೆಯ ಮೂಲಕ ಹವಾಮಾನ ಬದಲಾವಣೆಯ ವಿರುದ್ಧ ಪ್ರಯತ್ನಗಳನ್ನು ಸಜ್ಜುಗೊಳಿಸಲು ಕಲ್ಪಿಸಲಾಗಿದೆ.
  2. ಇದನ್ನು ಭಾರತದ ಪ್ರಧಾನ ಮಂತ್ರಿ ಮತ್ತು ಫ್ರಾನ್ಸ್ ಅಧ್ಯಕ್ಷರು 30 ನವೆಂಬರ್ 2015 ರಂದು ಫ್ರೆಂಚ್ ರಾಜಧಾನಿ ಪ್ಯಾರಿಸ್‌ನಲ್ಲಿ ಆಯೋಜಿಸಲಾದ COP-21 ಸಮಯದಲ್ಲಿ ಪ್ರಾರಂಭಿಸಿದರು.
  3. ಭಾರತ ಪ್ರಾರಂಭಿಸಿದ ISA ಜಗತ್ತಿನ ಬಹುತೇಕ ದೇಶಗಳನ್ನು ಒಳಗೊಂಡ ಒಕ್ಕೂಟವಾಗಿದೆ.
  4. ISA ಸೌರಶಕ್ತಿಯನ್ನು ಬಳಸಿಕೊಂಡು ತಮ್ಮ ಶಕ್ತಿಯ ಅಗತ್ಯಗಳನ್ನು ಪೂರೈಸಲು ಕರ್ಕಾಟಕ ಸಂಕ್ರಾಂತಿ ಮತ್ತು ಮಕರ ಸಂಕ್ರಾಂತಿಯ ನಡುವೆ ಸಂಪೂರ್ಣವಾಗಿ ಅಥವಾ ಭಾಗಶಃ ನೆಲೆಗೊಂಡಿರುವ ಸೌರ ಸಂಪನ್ಮೂಲ ಶ್ರೀಮಂತ ರಾಷ್ಟ್ರಗಳ ಒಕ್ಕೂಟವಾಗಿದೆ.
  5. ಪ್ಯಾರಿಸ್ ಘೋಷಣೆಯಲ್ಲಿ, ಐಎಸ್ಎ ತನ್ನ ಸದಸ್ಯ ರಾಷ್ಟ್ರಗಳಲ್ಲಿ ಸೌರಶಕ್ತಿಯ ಉತ್ತೇಜನಕ್ಕೆ ಮೀಸಲಾಗಿರುವ ಒಕ್ಕೂಟವೆಂದು ಘೋಷಿಸಲಾಗಿದೆ.
  6. ಇಂಟರ್ನ್ಯಾಷನಲ್ ಸೋಲಾರ್ ಅಲೈಯನ್ಸ್ ಅಸ್ತಿತ್ವದಲ್ಲಿರುವ ಸೌರ ತಂತ್ರಜ್ಞಾನಗಳ ದೊಡ್ಡ-ಪ್ರಮಾಣದ ನಿಯೋಜನೆಯನ್ನು ಸುಗಮಗೊಳಿಸುತ್ತದೆ ಮತ್ತು ಸಹಯೋಗದ ಸೌರ ಸಂಶೋಧನೆ ಮತ್ತು ಅಭಿವೃದ್ಧಿ ಸಾಮರ್ಥ್ಯ ನಿರ್ಮಾಣವನ್ನು ಉತ್ತೇಜಿಸುತ್ತದೆ.
  7. ISA ಜಾಗತಿಕ ಬೇಡಿಕೆಯನ್ನು ಒಟ್ಟುಗೂಡಿಸಲು ಶ್ರೀಮಂತ ಸೌರ ಸಾಮರ್ಥ್ಯ ಹೊಂದಿರುವ ದೇಶಗಳನ್ನು ಒಟ್ಟುಗೂಡಿಸುತ್ತದೆ, ಇದರಿಂದಾಗಿ ಬೃಹತ್ ಖರೀದಿಯ ಮೂಲಕ ಬೆಲೆಗಳನ್ನು ಕಡಿಮೆ ಮಾಡುತ್ತದೆ.

 

ಸಚಿವಾಲಯ:

  1. ‘ಗುರುಗ್ರಾಮ’ದಲ್ಲಿ ಭಾರತ ಮತ್ತು ಫ್ರಾನ್ಸ್ ಗಳು ಜಂಟಿಯಾಗಿ ‘ಇಂಟರ್‌ನ್ಯಾಷನಲ್ ಸೋಲಾರ್ ಅಲಯನ್ಸ್’ ನ ಪ್ರಧಾನ ಕಛೇರಿಯ ಅಡಿಪಾಯವನ್ನು ಹಾಕಿದವು.
  2. ಹರಿಯಾಣದ ಗುರುಗ್ರಾಮ್‌ನಲ್ಲಿರುವ ‘ನ್ಯಾಷನಲ್ ಇನ್‌ಸ್ಟಿಟ್ಯೂಟ್ ಆಫ್ ಸೋಲಾರ್ ಎನರ್ಜಿ ಕಾಂಪ್ಲೆಕ್ಸ್’ ನಲ್ಲಿ ISA ನ ಮಧ್ಯಂತರ ಸೆಕ್ರೆಟರಿಯೇಟ್ ಅನ್ನು ಅವರು ಉದ್ಘಾಟಿಸಿದರು

 

ಉದ್ದೇಶಗಳು:

  1. ‘ಅಂತರರಾಷ್ಟ್ರೀಯ ಸೌರ ಒಕ್ಕೂಟ’ದ ಪ್ರಮುಖ ಉದ್ದೇಶಗಳು ಜಾಗತಿಕವಾಗಿ 1,000GW ಸೌರ ಉತ್ಪಾದನಾ ಸಾಮರ್ಥ್ಯವನ್ನು ನಿಯೋಜಿಸುವುದು ಮತ್ತು 2030 ರ ವೇಳೆಗೆ ಸೌರ ಶಕ್ತಿಯಲ್ಲಿ US $ 1000 ಶತಕೋಟಿಗಿಂತ ಹೆಚ್ಚಿನ ಹೂಡಿಕೆಯನ್ನು ಸಜ್ಜುಗೊಳಿಸುವುದು.
  2. ISA ಅಡಿಯಲ್ಲಿ, ತಂತ್ರಜ್ಞಾನ ಲಭ್ಯತೆ ಮತ್ತು ಆರ್ಥಿಕ ಸಂಪನ್ಮೂಲಗಳ ಅಭಿವೃದ್ಧಿ, ಮತ್ತು ಶೇಖರಣಾ ತಂತ್ರಜ್ಞಾನದ ಅಭಿವೃದ್ಧಿ, ದೊಡ್ಡ ಪ್ರಮಾಣದ ಉತ್ಪಾದನೆ ಮತ್ತು ನಾವೀನ್ಯತೆಗಳ ಲಭ್ಯತೆ ಮತ್ತು ಅಭಿವೃದ್ಧಿಗಾಗಿ ಸಂಪೂರ್ಣ ಪರಿಸರ ವ್ಯವಸ್ಥೆಯನ್ನು ಸಕ್ರಿಯಗೊಳಿಸಲು ಯೋಜಿಸಲಾಗಿದೆ.

ಸಹಿ:

ಒಟ್ಟು 80 ದೇಶಗಳು ‘ಅಂತರರಾಷ್ಟ್ರೀಯ ಸೌರ ಒಕ್ಕೂಟ’ ಚೌಕಟ್ಟಿನ ಒಪ್ಪಂದಕ್ಕೆ ಸಹಿ ಹಾಕಿವೆ ಮತ್ತು ಅನುಮೋದಿಸಿವೆ,ಮತ್ತು 101 ದೇಶಗಳು ಒಪ್ಪಂದಕ್ಕೆ ಸಹಿ ಹಾಕಿವೆ.

 

ಅವಶ್ಯಕತೆ:

 

  1. ಕಡಿಮೆ ವೆಚ್ಚದ ತಂತ್ರಜ್ಞಾನದೊಂದಿಗೆ ಹೆಚ್ಚು ಮಹತ್ವಾಕಾಂಕ್ಷೆಯ ಸೌರಶಕ್ತಿ ಕಾರ್ಯಕ್ರಮಗಳನ್ನು ಪ್ರಾರಂಭಿಸಬಹುದು.
  2. ಸೌರ ಶಕ್ತಿಯು ಅಗ್ಗದ ಮತ್ತು ವಿಶ್ವಾಸಾರ್ಹ ಶಕ್ತಿಯ ಪ್ರಮುಖ ಮೂಲವಾಗಿದೆ. ಯೋಜನೆಯ ಯಶಸ್ವಿ ಅನುಷ್ಠಾನವು ಯುನಿವರ್ಸಲ್ ಎನರ್ಜಿ ಆಕ್ಸೆಸ್ ಗೋಲ್ (SDG 7) ಸಾಧಿಸುವಲ್ಲಿ ಪ್ರಮುಖ ಪಾತ್ರವನ್ನು ವಹಿಸುತ್ತದೆ.

 

‘ಅಂತರರಾಷ್ಟ್ರೀಯ ಸೌರ ಒಕ್ಕೂಟ’ದ ಆರು ಪ್ರಮುಖ ಕಾರ್ಯಕ್ರಮಗಳು ಪರಿಸರ ಸಂರಕ್ಷಣೆಗಾಗಿ ‘ಗೇಮ್ ಚೇಂಜರ್’ ಎಂದು ಸಾಬೀತುಪಡಿಸಬಹುದು.

 

  1. ಕೃಷಿ ಬಳಕೆಗಾಗಿ ಸೌರ ಅನ್ವಯಗಳು,
  2. ಹೆಚ್ಚು ಕೈಗೆಟುಕುವ ಹಣಕಾಸು,
  3. ಮಿನಿ ಗ್ರಿಡ್ ಗಳು,
  4. ಸೌರ ಛಾವಣಿಗಳು
  5. ‘ಸೋಲಾರ್ ಇ-ಮೊಬಿಲಿಟಿ’ ಮತ್ತು ಸ್ಟೋರೇಜ್ ಮತ್ತು ದೊಡ್ಡ ಪ್ರಮಾಣದ ಸೌರ ಉದ್ಯಾನವನ.


ಪೂರ್ವಭಾವಿ ಪರೀಕ್ಷೆಗೆ ಸಂಬಂಧಿಸಿದ ವಿದ್ಯಮಾನಗಳು:


 

ಟಾಟಾ ನ್ಯೂ (Tata Neu) ಎಂದರೇನು?

 

Tata Neu ಎಂಬುದು ಸಂಘಟಿತ ಕಂಪನಿಯ ಸೂಪರ್ ಅಪ್ಲಿಕೇಶನ್ ಆಗಿದ್ದು ಅದು ತನ್ನ ಎಲ್ಲಾ ಡಿಜಿಟಲ್ ಸೇವೆಗಳು ಮತ್ತು ಅಪ್ಲಿಕೇಶನ್‌ಗಳನ್ನು ಒಂದೇ ವೇದಿಕೆಯಲ್ಲಿ ಒಟ್ಟುಗೂಡಿಸುತ್ತದೆ.

  1. ಇದು ಏಪ್ರಿಲ್ 7 ರಂದು ಲಾಂಚ್ ಆಗಲಿದೆ.
  2. ಟಾಟಾ ಗ್ರೂಪ್ ನ ವಿವಿಧ ಡಿಜಿಟಲ್ ಸೇವೆಗಳಾದ ಫ್ಲೈಟ್ ಟಿಕೆಟ್‌ಗಳನ್ನು ಕಾಯ್ದಿರಿಸುವುದು, ಹೋಟೆಲ್‌ ಕೊಠಡಿಗಳನ್ನು ಕಾಯ್ದಿರಿಸುವುದು, ದಿನಸಿ ಮತ್ತು ಔಷಧಗಳನ್ನು ಆರ್ಡರ್ ಮಾಡುವುದು ಟಾಟಾ ನ್ಯೂ ಆಪ್ ಮೂಲಕ ಸಾಧ್ಯವಾಗುತ್ತದೆ.

ನಗರ ಪ್ರದೇಶಗಳಲ್ಲಿ ಬಿಡಾಡಿ ದನಗಳನ್ನು ನಿಯಂತ್ರಿಸಲು ಗುಜರಾತ್‌ನ ಮಸೂದೆ:

 

ನಗರ ಪ್ರದೇಶಗಳಲ್ಲಿ ಬಿಡಾಡಿ ದನಗಳನ್ನು ನಿಯಂತ್ರಿಸುವ ಗುಜರಾತ್ ಸರ್ಕಾರದ ಮಸೂದೆಯನ್ನು ಇತ್ತೀಚೆಗೆ ಗುಜರಾತ್ ವಿಧಾನಸಭೆಯಲ್ಲಿ ಬಹುಮತದಿಂದ ಅಂಗೀಕರಿಸಲಾಯಿತು.

 

ಕಾನೂನು 8 ನಗರಗಳಿಗೆ ಅನ್ವಯವಾಗಲಿದೆ.

 

  1. ಪ್ರಸ್ತಾವಿತ ಕಾನೂನು ಎಮ್ಮೆಗಳು, ಹಸುಗಳು, ಅವುಗಳ ಕರುಗಳು ಮತ್ತು ಹೋರಿಗಳು, ಎತ್ತುಗಳು, ಗೂಳಿಗಳು, ಮೇಕೆಗಳು, ಕುರಿಗಳು ಮತ್ತು ಕತ್ತೆಗಳನ್ನು ಒಳಗೊಂಡಿರುವ ಜಾನುವಾರುಗಳನ್ನು ಸಾಕಲು ಸ್ಥಳೀಯ ಪ್ರಾಧಿಕಾರದಿಂದ (LA, ಮುನ್ಸಿಪಲ್ ಕಾರ್ಪೊರೇಷನ್ ಅಥವಾ ಪುರಸಭೆ) ಪರವಾನಗಿ ಪಡೆಯುವುದನ್ನು ಕಡ್ಡಾಯಗೊಳಿಸುತ್ತದೆ.
  2. ಮಾಲೀಕರು ಹಸುಗಳನ್ನು ಸಾಕಲು ಸಾಕಷ್ಟು ಸ್ಥಳವನ್ನು ಹೊಂದಿದ್ದಾರೆ ಎಂಬುದನ್ನು ಪರವಾನಗಿ ನೀಡುವ ಪ್ರಾಧಿಕಾರವು ಖಚಿತಪಡಿಸಿಕೊಳ್ಳಬೇಕು.
  3. ಅಂತಹ ಪರವಾನಗಿಯನ್ನು ಪಡೆಯಲು, ಜಾನುವಾರು-ಮಾಲೀಕನು ತನ್ನ ದನವನ್ನು ಸಾಕಲು ಪ್ರಸ್ತಾಪಿಸುವ ದನದ ಕೊಟ್ಟಿಗೆಯ ವಿವರಗಳನ್ನು ಸಲ್ಲಿಸಬೇಕು, ಅವನ ಪ್ರತಿಯೊಂದು ದನದ ತಲೆಯನ್ನು ಟ್ಯಾಗ್ ಮಾಡಿ ಮತ್ತು ಅದರ ವಿವರಗಳನ್ನು LA/ಸ್ಥಳೀಯ ಪ್ರಾಧಿಕಾರಕ್ಕೆ  ಸಲ್ಲಿಸಬೇಕು. ಪರವಾನಗಿ ಪಡೆದ ಗೋಶಾಲೆಯ ಹೊರಗಿರುವ ಯಾವುದೇ ಜಾನುವಾರುಗಳನ್ನು ವಶಪಡಿಸಿಕೊಳ್ಳಲಾಗುವುದು.
  4. ಅಲ್ಲದೆ, ಈ ಉದ್ದೇಶಿತ ಕಾನೂನು LA ಗಳು ಮತ್ತು ರಾಜ್ಯ ಸರ್ಕಾರಕ್ಕೆ ಸಂಪೂರ್ಣ ನಗರ ಪ್ರದೇಶ ಅಥವಾ ಅದರ ಸ್ವಲ್ಪ ಭಾಗವನ್ನು ಜಾನುವಾರುಗಳ ನಿಷೇಧಿತ ವಲಯ ಎಂದು ಅಧಿಸೂಚಿಸಲು ಅಧಿಕಾರ ನೀಡುತ್ತದೆ.  

 

ಅಗತ್ಯತೆ:

ಬಹುತೇಕ ಎಲ್ಲಾ ಪ್ರಮುಖ ನಗರಗಳು ಮತ್ತು ಪಟ್ಟಣಗಳು ​​ಬಿಡಾಡಿ ದನಗಳ ಹಾವಳಿಯೊಂದಿಗೆ ಹೆಣಗಾಡುತ್ತಿವೆ. ಕಳೆದ ಎಂಟು ವರ್ಷಗಳಲ್ಲಿ, ರಾಜ್‌ಕೋಟ್ ಮುನ್ಸಿಪಲ್ ಕಾರ್ಪೊರೇಷನ್ (RMC) ನಗರದ ರಸ್ತೆಗಳಲ್ಲಿ ಅಡ್ಡಾಡುತ್ತಿದ್ದ 72,000 ಜಾನುವಾರುಗಳನ್ನು ವಶಪಡಿಸಿಕೊಂಡಿದೆ. ನಗರದ ರಸ್ತೆಗಳಲ್ಲಿ ಜಾನುವಾರುಗಳನ್ನು ಒಳಗೊಂಡ ಅಪಘಾತಗಳಲ್ಲಿ ಮಾನವ ಜೀವಗಳು ಮತ್ತು ಗಾಯಗಳ ಜೊತೆಗೆ, ಸಮಸ್ಯೆಯು ಭಾರೀ ಆರ್ಥಿಕ ವೆಚ್ಚವನ್ನು ಸಹ ಉಂಟುಮಾಡುತ್ತದೆ. 

 

ಡಾರ್ಲಾಂಗ್ ಸಮುದಾಯ:

(Darlong community)

 

2022 ರ ಸಂವಿಧಾನ (ಪರಿಶಿಷ್ಟ ಬುಡಕಟ್ಟು) ಆದೇಶ (ತಿದ್ದುಪಡಿ) ಮಸೂದೆಯನ್ನು (Constitution (Scheduled Tribes) Order (Amendment) Bill, 2022) ಲೋಕಸಭೆಯು ಅಂಗೀಕರಿಸಿದ ನಂತರ ತ್ರಿಪುರಾದಲ್ಲಿ ವಾಸಿಸುವ ಸುಮಾರು 11,000 ಜನರನ್ನು ಒಳಗೊಂಡ ಸಣ್ಣ ಸಮುದಾಯವಾದ ಡಾರ್ಲಾಂಗ್ ಸಮುದಾಯವನ್ನು ಅಧಿಕೃತವಾಗಿ ಪರಿಶಿಷ್ಟ ಪಂಗಡಗಳ ಪಟ್ಟಿಯಲ್ಲಿ ಸೇರಿಸಲಾಗಿದೆ.

 

  1. ಇಲ್ಲಿಯವರೆಗೆ, ಅವರನ್ನು ಕುಕಿ ಸಮುದಾಯದ ಅಡಿಯಲ್ಲಿನ ಒಂದು ಸಾಮಾನ್ಯ/ ಜೆನೆರಿಕ್ ಬುಡಕಟ್ಟು ಎಂದು ಪರಿಗಣಿಸಲಾಗಿತ್ತು ಮತ್ತು ಅವರನ್ನು ‘ಕುಕಿ’ ಸಮುದಾಯದ ಸದಸ್ಯರೆಂದು ಪರಿಗಣಿಸಿ ಅವರಿಗೆ ಬುಡಕಟ್ಟು ಪ್ರಮಾಣಪತ್ರಗಳನ್ನು ನೀಡಲಾಗುತ್ತಿತ್ತು.
  2. ವಿಶೇಷವಾಗಿ ಆಧುನಿಕ ಶಿಕ್ಷಣವನ್ನು ಹೊಂದಿದ ಡಾರ್ಲಾಂಗ್ ಯುವಕರಲ್ಲಿನ ಗುರುತಿನ ಬಿಕ್ಕಟ್ಟು, ಅವರು ತಮ್ಮದೇ ಆದ ಪ್ರತ್ಯೇಕ ಶಾಸನಬದ್ಧ ಗುರುತಿನ ಬೇಡಿಕೆಯನ್ನು ಮಂಡಿಸಿದ ನಂತರ  ಹೋರಾಟವು 1995 ರಲ್ಲಿ ಉತ್ತುಂಗಕ್ಕೇರಿತ್ತು.

ಸೂರತ್ ಭಾರತದ ಮೊದಲ ಸ್ಟೀಲ್ ಸ್ಲ್ಯಾಗ್ ರಸ್ತೆಯನ್ನು ಪಡೆಯುತ್ತದೆ: 

 

ಸೂರತ್ ಸಂಸ್ಕರಿಸಿದ ಸ್ಟೀಲ್ ಸ್ಲ್ಯಾಗ್ (ಕೈಗಾರಿಕಾ ತ್ಯಾಜ್ಯ) ರಸ್ತೆಯನ್ನು ಪಡೆದ ದೇಶದ ಮೊದಲ ನಗರವಾಗಿದೆ.

 

  1. ಈ ಯೋಜನೆಯು ತ್ಯಾಜ್ಯದಿಂದ ಸಂಪತ್ತು ಮತ್ತು ಸ್ವಚ್ಛ ಭಾರತ ಅಭಿಯಾನದ ಉಪಕ್ರಮದ ಅಡಿಯಲ್ಲಿ (Waste to Wealth and Clean India Campaign) ಬರುತ್ತದೆ.
  2. ಇದು ಕೌನ್ಸಿಲ್ ಆಫ್ ಸೈಂಟಿಫಿಕ್ ಅಂಡ್ ಇಂಡಸ್ಟ್ರಿಯಲ್ ರಿಸರ್ಚ್ (CSIR), ಸೆಂಟ್ರಲ್ ರೋಡ್ ರಿಸರ್ಚ್ ಇನ್‌ಸ್ಟಿಟ್ಯೂಟ್ (CRRI), ಕೇಂದ್ರ ಉಕ್ಕಿನ ಸಚಿವಾಲಯ, ಸರ್ಕಾರದ ಚಿಂತಕರ ಚಾವಡಿಯಾದ NITI ಆಯೋಗ, ಮತ್ತು ಹಜಿರಾದಲ್ಲಿರುವ ArcelorMtttal-Nippon Steel (AM/NS) ಜಂಟಿ ಉದ್ಯಮದ ಒಂದು ಭಾಗವಾಗಿದೆ.

 

ಸ್ಲ್ಯಾಗ್ ಅನ್ನು ಉಕ್ಕಿನ ಕುಲುಮೆಯಲ್ಲಿ ಸುಮಾರು 1,500-1,600 ಡಿಗ್ರಿ ಸೆಂಟಿಗ್ರೇಡ್‌ ಉಷ್ಣತೆಯಲ್ಲಿ ಕರಗಿದ ಫ್ಲಕ್ಸ್ ವಸ್ತುವಿನ ರೂಪದಲ್ಲಿ ಅಶುದ್ಧ ರೂಪದಲ್ಲಿ ಉತ್ಪಾದಿಸಲಾಗುತ್ತದೆ.

 

ಸೋಲು ಕಾರಿಡಾರ್ ಟ್ರಾನ್ಸ್ಮಿಷನ್ ಲೈನ್:

(Solu Corridor Transmission Line)

 

ನೇಪಾಳ ಪ್ರಧಾನಿ ದೇವುಬಾ ಮತ್ತು ಭಾರತದ ಪ್ರಧಾನಿ ಮೋದಿ ಜಂಟಿಯಾಗಿ 132 ಕೆವಿ ಸಾಮರ್ಥ್ಯದ  ಸೋಲು ಕಾರಿಡಾರ್ ಟ್ರಾನ್ಸ್‌ಮಿಷನ್ ಲೈನ್ ಅನ್ನು ಉದ್ಘಾಟಿಸಿದರು.

  1. ಸೋಲು ಕಾರಿಡಾರ್ ಟ್ರಾನ್ಸ್‌ಮಿಷನ್ ಲೈನ್ ಅನ್ನು ಸೋಲುಕುಂಬು ಮತ್ತು ಸುತ್ತಮುತ್ತಲಿನ ಜಲವಿದ್ಯುತ್ ಯೋಜನೆಗಳಿಂದ ಉತ್ಪಾದಿಸುವ ವಿದ್ಯುತ್ ಅನ್ನು ಸೋಲುಕುಂಬು, ಓಖಲ್ದುಂಗ ಮತ್ತು ಉದಯಪುರದಲ್ಲಿ ವಿತರಿಸಲು ಮತ್ತು ಉಳಿದಿರುವ ವಿದ್ಯುತ್ತನ್ನು ರಾಷ್ಟ್ರೀಯ ಗ್ರಿಡ್‌ಗೆ ಸಂಪರ್ಕಿಸಲು ಇದನ್ನು ನಿರ್ಮಿಸಲಾಗಿದೆ.