Print Friendly, PDF & Email

[Mission 2022] ದೈನಂದಿನ ಪ್ರಚಲಿತ ಘಟನೆಗಳು ದಿನಾಂಕ – 14ನೇ ಜನೇವರಿ 2022

 

 

ಪರಿವಿಡಿ:

 ಸಾಮಾನ್ಯ ಅಧ್ಯಯನ ಪತ್ರಿಕೆ  2 :

1. ಆಯುಷ್ಮಾನ್ ಭಾರತ್ ಆರೋಗ್ಯ ಮೂಲಸೌಕರ್ಯ ಮಿಷನ್ ಎಂದರೇನು?

2. ಸರ್ ಕ್ರೀಕ್ ಒಪ್ಪಂದ.

3. ದಕ್ಷಿಣ ಚೀನಾ ಸಮುದ್ರ ವಿವಾದ.

 

ಸಾಮಾನ್ಯ ಅಧ್ಯಯನ ಪತ್ರಿಕೆ 3:

1. ಹಂದಿ ಹೃದಯ ಕಸಿ.

2. ದೇಶದ ಅರಣ್ಯ ಸ್ಥಿತಿ ವರದಿ 2021.

 

ಪೂರ್ವಭಾವಿ ಪರೀಕ್ಷೆಗೆ ಸಂಬಂಧಿಸಿದ ಸಂಗತಿಗಳು:

1. ಸಿಯಾಚಿನ್.

2. ಇಸ್ರೋದ ಹೊಸ ಮುಖ್ಯಸ್ಥರು.

 


ಸಾಮಾನ್ಯ ಅಧ್ಯಯನ ಪತ್ರಿಕೆ : 2


 

ವಿಷಯಗಳು: ಆರೋಗ್ಯ, ಶಿಕ್ಷಣ, ಸಾಮಾಜಿಕ ವಲಯ / ಸೇವೆಗಳ ಅಭಿವೃದ್ಧಿ ಮತ್ತು ನಿರ್ವಹಣೆಗೆ ಸಂಬಂಧಿಸಿದ ಮಾನವ ಸಂಪನ್ಮೂಲ ಸಂಬಂಧಿತ ವಿಷಯಗಳು.

ಆಯುಷ್ಮಾನ್ ಭಾರತ್ ಆರೋಗ್ಯ ಮೂಲಸೌಕರ್ಯ ಮಿಷನ್ ಎಂದರೇನು?


(What is Ayushman Bharat Health Infrastructure Mission?)

ಸಂದರ್ಭ:

ಇತ್ತೀಚೆಗೆ, ಪ್ರಧಾನಿ ನರೇಂದ್ರ ಮೋದಿ ಅವರು ‘ತಮಿಳುನಾಡಿನಲ್ಲಿ’ ‘ಆರೋಗ್ಯ ಮೂಲಸೌಕರ್ಯ ಮತ್ತು ಆರೋಗ್ಯ ಸಂಶೋಧನಾ ವಲಯ’ದಲ್ಲಿ, ನಿರ್ಣಾಯಕ ಅಂತರವನ್ನು ನಿವಾರಿಸುವ ಸಲುವಾಗಿ, ವಿಶೇಷವಾಗಿ ಜಿಲ್ಲಾ ಮಟ್ಟದಲ್ಲಿ, ಮುಂದಿನ ಐದು ವರ್ಷಗಳಲ್ಲಿ ‘ಪ್ರಧಾನ ಮಂತ್ರಿ ಆಯುಷ್ಮಾನ್ ಭಾರತ್ ಆರೋಗ್ಯ ಮೂಲಸೌಕರ್ಯ ಮಿಷನ್’ (Pradhan Mantri Ayushman Bharat Health Infrastructure Mission) ಅಡಿಯಲ್ಲಿ ಕೇಂದ್ರ ಸರ್ಕಾರವು ರಾಜ್ಯಕ್ಕೆ 3,000 ಕೋಟಿ ರೂ.ಗಳನ್ನು ನೀಡುವುದಾಗಿ ಘೋಷಿಸಿದ್ದಾರೆ.

ಈ ಯೋಜನೆಯ ಬಗ್ಗೆ:

  1. ದೇಶದಾದ್ಯಂತ ಆರೋಗ್ಯ ಸೇವೆಗಳ ಮೂಲಸೌಕರ್ಯವನ್ನು ಬಲಪಡಿಸುವುದು ಯೋಜನೆಯ ಉದ್ದೇಶವಾಗಿದೆ.
  2. ಈ ಮಿಷನ್‌ನ ಉದ್ದೇಶವು ಸಾರ್ವಜನಿಕ ಆರೋಗ್ಯ ಮೂಲಸೌಕರ್ಯವನ್ನು ಒದಗಿಸುವುದು,ವಿಶೇಷವಾಗಿ ‘ನಿರ್ಣಾಯಕ ಆರೈಕೆ ಸೌಲಭ್ಯಗಳು’ ಮತ್ತು ‘ಪ್ರಾಥಮಿಕ ಆರೈಕೆ’ ನಡುವಿನ ಅಂತರವನ್ನು ನಗರ ಮತ್ತು ಗ್ರಾಮೀಣ ಪ್ರದೇಶಗಳಲ್ಲಿ ತುಂಬುವುದು.
  3. ಇದರ ಮೂಲಕ, ದೇಶದ ಐದು ಲಕ್ಷಕ್ಕಿಂತ ಹೆಚ್ಚು ಜನಸಂಖ್ಯೆಯನ್ನು ಹೊಂದಿರುವ ಎಲ್ಲಾ ಜಿಲ್ಲೆಗಳಲ್ಲಿ ನಿರ್ದಿಷ್ಟ ‘ಕ್ರಿಟಿಕಲ್ ಕೇರ್ ಹಾಸ್ಪಿಟಲ್ ಬ್ಲಾಕ್’ಗಳ ಮೂಲಕ ‘ಕ್ರಿಟಿಕಲ್ ಕೇರ್ ಸೇವೆಗಳು’ ಲಭ್ಯವಾಗಲಿದ್ದು, ಉಳಿದ ಜಿಲ್ಲೆಗಳು ರೆಫರಲ್ ಸೇವೆಗಳ ಮೂಲಕ ಇದರ ವ್ಯಾಪ್ತಿಗೆ ಬರುತ್ತವೆ.
  4. ದೇಶಾದ್ಯಂತ ಪ್ರಯೋಗಾಲಯಗಳ ಜಾಲದ ಮೂಲಕ ಸಾರ್ವಜನಿಕ ಆರೋಗ್ಯ ವ್ಯವಸ್ಥೆಯಲ್ಲಿ ‘ರೋಗನಿರ್ಣಯ ಸೇವೆಗಳ’ ಸಂಪೂರ್ಣ ಶ್ರೇಣಿಗೆ ಜನರು ಪ್ರವೇಶವನ್ನು ಹೊಂದಿರುತ್ತಾರೆ ಮತ್ತು ಎಲ್ಲಾ ಜಿಲ್ಲೆಗಳಲ್ಲಿ ಸಮಗ್ರ ಸಾರ್ವಜನಿಕ ಆರೋಗ್ಯ ಪ್ರಯೋಗಾಲಯಗಳನ್ನು ಸ್ಥಾಪಿಸಲಾಗುವುದು.
  5. ಬ್ಲಾಕ್, ಜಿಲ್ಲೆ, ಪ್ರಾದೇಶಿಕ ಮತ್ತು ರಾಷ್ಟ್ರೀಯ ಮಟ್ಟದಲ್ಲಿ ಕಣ್ಗಾವಲು ಪ್ರಯೋಗಾಲಯಗಳ ಜಾಲದ ಮೂಲಕ ಐಟಿ-ಬೆಂಬಲಿತ (An IT-enabled) ‘ರೋಗ ಕಣ್ಗಾವಲು ವ್ಯವಸ್ಥೆ’ ಯನ್ನು ಸ್ಥಾಪಿಸಲಾಗುವುದು.
  6. ಎಲ್ಲಾ ಸಾರ್ವಜನಿಕ ಆರೋಗ್ಯ ಪ್ರಯೋಗಾಲಯಗಳನ್ನು ‘ಸಮಗ್ರ ಆರೋಗ್ಯ ಮಾಹಿತಿ ಪೋರ್ಟಲ್’ ಮೂಲಕ ಲಿಂಕ್ ಮಾಡಲಾಗುತ್ತದೆ, ಇದನ್ನು ಎಲ್ಲಾ ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಿಗೆ ವಿಸ್ತರಿಸಲಾಗುವುದು.

ಯೋಜನೆಯ ಅಡಿಯಲ್ಲಿ ಸ್ಥಾಪಿಸಬೇಕಾದ ಸಂಸ್ಥೆಗಳು:

ಯೋಜನೆಯಡಿಯಲ್ಲಿ, ‘ನ್ಯಾಷನಲ್ ಇನ್‌ಸ್ಟಿಟ್ಯೂಟ್ ಆಫ್ ಹೆಲ್ತ್’, ನಾಲ್ಕು ಹೊಸ ‘ನ್ಯಾಷನಲ್ ಇನ್‌ಸ್ಟಿಟ್ಯೂಟ್ ಆಫ್ ವೈರಾಲಜಿ’, ಸೇರಿದಂತೆ ವಿಶ್ವ ಆರೋಗ್ಯ ಸಂಸ್ಥೆಯ ಆಗ್ನೇಯ ಏಷ್ಯಾ ಪ್ರದೇಶಕ್ಕಾಗಿ ಪ್ರಾದೇಶಿಕ ಸಂಶೋಧನಾ ವೇದಿಕೆ ಒಂಬತ್ತು ಜೈವಿಕ ಸುರಕ್ಷತೆ ಹಂತ -III ಪ್ರಯೋಗಾಲಯಗಳು ಮತ್ತು ರೋಗ ನಿಯಂತ್ರಣಕ್ಕಾಗಿ ಐದು ಹೊಸ ಪ್ರಾದೇಶಿಕ ರಾಷ್ಟ್ರೀಯ ಕೇಂದ್ರಗಳನ್ನು ಸ್ಥಾಪಿಸಲಾಗುವುದು.

ಯೋಜನೆಯ ಪ್ರಯೋಜನಗಳು ಮತ್ತು ಪ್ರಾಮುಖ್ಯತೆ:

‘ಆಯುಷ್ಮಾನ್ ಭಾರತ್ ಹೆಲ್ತ್ ಇನ್ಫ್ರಾಸ್ಟ್ರಕ್ಚರ್ ಮಿಷನ್’ 10 ರಾಜ್ಯಗಳಲ್ಲಿ 17,788 ಗ್ರಾಮೀಣ ಆರೋಗ್ಯ ಮತ್ತು ಕ್ಷೇಮ ಕೇಂದ್ರಗಳಿಗೆ ವಿಶೇಷ ಬೆಂಬಲವನ್ನು ನೀಡುತ್ತದೆ. ಇದಲ್ಲದೆ, ಎಲ್ಲಾ ರಾಜ್ಯಗಳಲ್ಲಿ 11,024 ನಗರ ಆರೋಗ್ಯ ಮತ್ತು ಸ್ವಾಸ್ಥ್ಯ ಕೇಂದ್ರಗಳನ್ನು ಸ್ಥಾಪಿಸಲಾಗುವುದು.

ಭಾರತದಲ್ಲಿನ ‘ಆರೋಗ್ಯ ರಕ್ಷಣೆಯ ಮೂಲಸೌಕರ್ಯಗಳ’ ಸಂಕ್ಷಿಪ್ತ ಅವಲೋಕನ:

ಭಾರತ ಬಹಳ ಹಿಂದಿನಿಂದಲೂ ರಾಷ್ಟ್ರವ್ಯಾಪಿ ಆರೋಗ್ಯ ವ್ಯವಸ್ಥೆಯನ್ನು ಹೊಂದುವ ಅಗತ್ಯವನ್ನು ವ್ಯಕ್ತಪಡಿಸಿದೆ. ಇತ್ತೀಚಿನ ಸಮೀಕ್ಷೆಯ ಫಲಿತಾಂಶಗಳು ಈ ಕೆಳಗಿನಂತಿವೆ:

  1. ಸಮೀಕ್ಷೆ ನಡೆಸಿದ ಶೇಕಡಾ 70 ರಷ್ಟು ಸ್ಥಳಗಳಲ್ಲಿ ಸಾರ್ವಜನಿಕ ಆರೋಗ್ಯ ಸೇವೆಗಳು ಲಭ್ಯವಿವೆ. ಆದಾಗ್ಯೂ, ನಗರ ಪ್ರದೇಶಗಳಿಗೆ (ಶೇ 87) ಹೋಲಿಸಿದರೆ ಗ್ರಾಮೀಣ ಪ್ರದೇಶಗಳಲ್ಲಿ (ಶೇ 65) ಈ ಸೇವೆಗಳ ಲಭ್ಯತೆ ಕಡಿಮೆಯಾಗಿದೆ.
  2. ಸಮೀಕ್ಷೆ ನಡೆಸಿದ 45% ರಷ್ಟು ಸ್ಥಳಗಳಲ್ಲಿ, ಜನರು ಕಾಲ್ನಡಿಗೆಯ ಮೂಲಕ ಹೋಗಿ ಆರೋಗ್ಯ ಸೇವೆಗಳನ್ನು ಪಡೆಯಬಹುದು, ಆದರೆ 43 ಪ್ರತಿಶತ ಸ್ಥಳಗಳಲ್ಲಿ ಆರೋಗ್ಯ ಸೇವೆಯನ್ನು ಪಡೆಯಲು ಅವರು ಸಾರಿಗೆಯನ್ನು ಬಳಸಬೇಕಾಗುತ್ತದೆ.
  3. ನಗರ ಪ್ರದೇಶಗಳಲ್ಲಿ ಆರೋಗ್ಯ ಸೇವೆಗಳ ಸಾಮೀಪ್ಯದ ಲಭ್ಯತೆಯು ಹೆಚ್ಚಿದೆ ಎಂದು ಸಮೀಕ್ಷೆಯು ಕಂಡುಹಿಡಿದಿದೆ: 64 ಪ್ರತಿಶತ ಗಣತಿದಾರರ ಪ್ರಕಾರ, ನಗರ ಪ್ರದೇಶಗಳಲ್ಲಿ ಜನರು ಕಾಲ್ನಡಿಗೆಯಲ್ಲಿ ಹೋಗಿ ಆರೋಗ್ಯ ಸೇವೆಗಳನ್ನು ಪಡೆಯಬಹುದು,ಆದರೆ ಗ್ರಾಮೀಣ ಪ್ರದೇಶಗಳಲ್ಲಿ ಕೇವಲ 37 ಪ್ರತಿಶತದಷ್ಟು ಜನರು ಮಾತ್ರ ಕಾಲ್ನಡಿಗೆಯಲ್ಲಿ ಹೋಗಿ ಆರೋಗ್ಯ ಸೇವೆಗಳನ್ನು ಪಡೆಯಬಹುದಾಗಿದೆ.

 

ವಿಷಯಗಳು: ಭಾರತ ಮತ್ತು ನೆರೆಹೊರೆಯ ದೇಶಗಳೊಂದಿಗೆ ಅದರ ಸಂಬಂಧಗಳು.

ಸರ್ ಕ್ರೀಕ್ ಒಪ್ಪಂದ:


(Sir Creek pact)

ಸಂದರ್ಭ:

ಹಿಂದೆ, ‘ಸಿಯಾಚಿನ್’ ಮತ್ತು ‘ಸರ್ ಕ್ರೀಕ್’ ಭಾರತ ಮತ್ತು ಪಾಕಿಸ್ತಾನದ ನಡುವೆ ದೀರ್ಘಕಾಲದಿಂದ ‘ಸುಲಭವಾಗಿ ಪರಿಹರಿಸಬಹುದಾದ ಸಮಸ್ಯೆಗಳು’ (Low Hanging Fruits) ಎಂದು ವಿವರಿಸಲಾಗಿತ್ತು. ಸಿಯಾಚಿನ್ ವಿಚಾರವಾಗಿ, ರಕ್ಷಣಾ ಕಾರ್ಯದರ್ಶಿ ಮಟ್ಟದಲ್ಲಿ ಉಭಯ ದೇಶಗಳ ನಡುವೆ 13 ಸುತ್ತಿನ ಮಾತುಕತೆಗಳು ನಡೆದಿವೆ ಮತ್ತು ಈ ವಿಷಯದ ಬಗ್ಗೆ ಕೊನೆಯ ಮಾತುಕತೆಗಳು ಜೂನ್ 2012 ರಲ್ಲಿ ನಡೆದಿದ್ದವು.

  1. ಆದರೆ, ಈ ಸಮಸ್ಯೆಗೆ ಇದುವರೆಗೂ ಪರಿಹಾರ ಸಿಕ್ಕಿಲ್ಲ.

ಸರ್ ಕ್ರೀಕ್’ ಎಂದರೇನು?

ಸರ್ ಕ್ರೀಕ್ (Sir Creek), ರಾನ್ ಆಫ್ ಕಚ್‌ನ ಜೌಗು ಪ್ರದೇಶದಲ್ಲಿ ಭಾರತ ಮತ್ತು ಪಾಕಿಸ್ತಾನದ ನಡುವೆ 96 ಕಿಮೀ ಉದ್ದದ ವಿವಾದಿತ ಜಲಭಾಗವಾಗಿದೆ / ಜಲಧಾರೆಯಾಗಿದೆ.

  1. ಈ ಜಲಧಾರೆಯನ್ನು ಮೂಲತಃ ಬಾನ್ ಗಂಗಾ ಎಂದು ಕರೆಯಲಾಗುತ್ತಿತ್ತು, ನಂತರ ಇದನ್ನು ಬ್ರಿಟಿಷ್ ಅಧಿಕಾರಿಯ ಹೆಸರಿನಲ್ಲಿ ‘ಸರ್ ಕ್ರೀಕ್’ ಎಂದು ಹೆಸರಿಸಲಾಯಿತು.
  2. ಸರ್ ಕ್ರೀಕ್ ನ ಈ ಜಲಧಾರೆಯು ಪಾಕಿಸ್ತಾನದ ಸಿಂಧ್ ಪ್ರಾಂತ್ಯವನ್ನು ಗುಜರಾತ್ ನ ಕಚ್ ಪ್ರದೇಶದಿಂದ ವಿಭಜಿಸುವ ಮೂಲಕ ಅರಬ್ಬಿ ಸಮುದ್ರವನ್ನು ಸೇರುತ್ತದೆ.

ಏನಿದು ವಿವಾದ?

ಸರ್ ಕ್ರೀಕ್ ಲೈನ್ ವಿವಾದವು ಕಚ್ ಮತ್ತು ಸಿಂಧ್ ನಡುವಿನ ಕಡಲ ಗಡಿರೇಖೆಯ ಅಸ್ಪಷ್ಟ ವ್ಯಾಖ್ಯಾನದಲ್ಲಿದೆ.

ಭಾರತದ ಸ್ವಾತಂತ್ರ್ಯದ ಮೊದಲು, ಈ ಪ್ರಾಂತೀಯ ಪ್ರದೇಶವು ಬ್ರಿಟಿಷ್ ಭಾರತದ ಅಡಿಯಲ್ಲಿ ‘ಬಾಂಬೆ ಪ್ರೆಸಿಡೆನ್ಸಿ’ ಯ ಭಾಗವಾಗಿತ್ತು. ಆದರೆ 1947 ರಲ್ಲಿ ಭಾರತದ ಸ್ವಾತಂತ್ರ್ಯದ ನಂತರ, ಸಿಂಧ್ ಪ್ರದೇಶವು ಪಾಕಿಸ್ತಾನದ ಭಾಗವಾಯಿತು, ಆದರೆ ಕಚ್ ಭಾರತದ ಭಾಗವಾಗಿ ಉಳಿಯಿತು.

  1. ಆಗಿನ ಸಿಂಧ್ ಸರ್ಕಾರ ಮತ್ತು ಕಚ್‌ನ ರಾವ್ ಮಹಾರಾಜ್ ನಡುವೆ ಸಹಿ ಮಾಡಿದ 1914 ರ ಬಾಂಬೆ ಸರ್ಕಾರದ (Bombay Government Resolution of 1914) ನಿರ್ಣಯದ ಪ್ಯಾರಾಗ್ರಾಫ್ 9 ಮತ್ತು 10 ರ ಪ್ರಕಾರ, ಪಾಕಿಸ್ತಾನವು ಸಂಪೂರ್ಣ ಕ್ರೀಕ್ ಪ್ರದೇಶದ ಮೇಲೆ ಹಕ್ಕು ಸಾಧಿಸುತ್ತದೆ.
  2. ಈ ನಿರ್ಣಯದಲ್ಲಿ, ಈ ಎರಡು ಪ್ರದೇಶಗಳ ನಡುವಿನ ಗಡಿಗಳನ್ನು ಗುರುತಿಸಲಾಗಿದೆ, ಅದರ ಅಡಿಯಲ್ಲಿ ‘ಕ್ರೀಕ್’ ಅನ್ನು ಸಿಂಧ್ ಪ್ರಾಂತ್ಯದಲ್ಲಿ ಸೇರಿಸಲಾಯಿತು ಮತ್ತು ಕ್ರೀಕ್’ ನ ಪೂರ್ವದ ಅಂಚನ್ನು ಈ ಪ್ರಾಂತ್ಯದ ಗಡಿಯಾಗಿ ಹೊಂದಿಸಲಾಗಿದೆ, ಇದನ್ನು ಜನಪ್ರಿಯವಾಗಿ ‘ಗ್ರೀನ್ ಲೈನ್’ ಎಂದು ಕರೆಯಲಾಗುತ್ತದೆ.
  3. 1925 ರಲ್ಲಿ ಸಿದ್ಧಪಡಿಸಲಾದ ಮತ್ತೊಂದು ನಕ್ಷೆಯಲ್ಲಿ ತೋರಿಸಿರುವಂತೆ ಈ ಗಡಿಯು ಜಲಮೂಲದ ಮಧ್ಯದಲ್ಲಿ ಹಾದುಹೋಗುತ್ತದೆ ಮತ್ತು ಈ ಗಡಿಯನ್ನು 1924 ರಲ್ಲಿ ಜಲನಿಕಾಯದ ಮಧ್ಯದಲ್ಲಿ ‘ಕಂಬ’ಗಳನ್ನು ನಿರ್ಮಿಸುವ ಮೂಲಕ ನಿರ್ಧರಿಸಲಾಯಿತು ಎಂದು ಭಾರತ ಹೇಳಿಕೊಂಡಿದೆ.
  4. ಅದರ ಸಮರ್ಥನೆಯಲ್ಲಿ, ಭಾರತವು ಅಂತರರಾಷ್ಟ್ರೀಯ ಸಮುದ್ರ ಕಾನೂನಿನಲ್ಲಿನ ಥಲ್ವೆಗ್ ಸಿದ್ಧಾಂತ (Thalweg Doctrine) ವನ್ನು ಉಲ್ಲೇಖಿಸಿದೆ, ಇದರಲ್ಲಿ ಜನನಿಕಾಯವು ನೌಕಾಯಾನಕ್ಕೆ ಯೋಗ್ಯವಾದಾಗ, ಎರಡು ರಾಜ್ಯಗಳ ನಡುವಿನ ಗಡಿಯನ್ನು ನದಿಯ ಹರಿವಿನ ಮಧ್ಯದಿಂದ ಭಾಗಿಸಬಹುದು ಎಂದು ಹೇಳಲಾಗಿದೆ.

ಸರ್ ಕ್ರೀಕ್ ನ ಪ್ರಾಮುಖ್ಯತೆ:

ಆಯಕಟ್ಟಿನ ಸ್ಥಳದ ಕಾರ್ಯತಂತ್ರದ ಪ್ರಾಮುಖ್ಯತೆಯ ಹೊರತಾಗಿ, ಸರ್ ಕ್ರೀಕ್‌ನ ಮುಖ್ಯ ಪ್ರಾಮುಖ್ಯತೆಯು ಅದರ ಮೀನುಗಾರಿಕೆ ಸಂಪನ್ಮೂಲಗಳಲ್ಲಿ ಅಡಗಿದೆ. ಸರ್ ಕ್ರೀಕ್ ಅನ್ನು ಏಷ್ಯಾದ ಅತಿದೊಡ್ಡ ಮೀನುಗಾರಿಕೆ ಪ್ರದೇಶವೆಂದು ಪರಿಗಣಿಸಲಾಗಿದೆ.

ಇದರ ಪ್ರಾಮುಖ್ಯತೆಗೆ ಮತ್ತೊಂದು ಪ್ರಮುಖ ಕಾರಣವೆಂದರೆ ಈ ಪ್ರದೇಶದಲ್ಲಿ ಸಮುದ್ರದ ಅಡಿಯಲ್ಲಿ ಇರುವ ದೊಡ್ಡ ಪ್ರಮಾಣದ ತೈಲ ಮತ್ತು ಅನಿಲದ ಸಂಭಾವ್ಯ ಉಪಸ್ಥಿತಿಯಾಗಿದೆ. ಈ ಸಮಸ್ಯೆಯ ಕುರಿತು ನಡೆಯುತ್ತಿರುವ ಬಿಕ್ಕಟ್ಟಿನಿಂದಾಗಿ ಪ್ರಸ್ತುತ ಈ ಸ್ವತ್ತಿನ ಯಾವುದೇ ಬಳಕೆಯಾಗುತ್ತಿಲ್ಲ.

 

ವಿಷಯಗಳು:ಅನಿವಾಸಿ ಭಾರತೀಯರು ಮತ್ತು ಭಾರತದ ಹಿತಾಸಕ್ತಿಗಳ ಮೇಲೆ ಅಭಿವೃದ್ಧಿ ಹೊಂದಿದ ಮತ್ತು ಅಭಿವೃದ್ಧಿ ಹೊಂದುತ್ತಿರುವ ದೇಶಗಳ ನೀತಿಗಳು ಮತ್ತು ರಾಜಕೀಯದ ಪರಿಣಾಮಗಳು.

ದಕ್ಷಿಣ ಚೀನಾ ಸಮುದ್ರ ವಿವಾದ:


(South China Sea Dispute)

 ಸಂದರ್ಭ:

ಯುಎಸ್ ಸ್ಟೇಟ್ ಡಿಪಾರ್ಟ್ಮೆಂಟ್ ನ ಹೊಸ ವರದಿಯು ‘ದಕ್ಷಿಣ ಚೀನಾ ಸಮುದ್ರ’ದ ವಿಶಾಲ ಪ್ರದೇಶದ ಮೇಲೆ ಬೀಜಿಂಗ್‌ನ “ಐತಿಹಾಸಿಕ ಹಕ್ಕುಗಳ” ವ್ಯಾಪಕವಾದ ಪ್ರಾದೇಶಿಕ ಹಕ್ಕುಗಳನ್ನು ತಳ್ಳಿಹಾಕಿದೆ, ಅವುಗಳನ್ನು “ಅಂತರರಾಷ್ಟ್ರೀಯ ಕಾನೂನಿಗೆ ಸ್ಪಷ್ಟವಾಗಿ ಅಸಮಂಜಸವಾಗಿದೆ” ಎಂದು ಹೇಳುವ ಮೂಲಕ ಬೀಜಿಂಗ್‌ ಪ್ರತಿಪಾದಿಸುವ ಪ್ರಾದೇಶಿಕ ಹಕ್ಕುಗಳನ್ನು ತಿರಸ್ಕರಿಸಿದೆ.

ಮುಖ್ಯವಾಗಿ, ಚೀನಾ ಪ್ರತಿಪಾದಿಸುವ ಈ ಹಕ್ಕುಗಳು ‘ಸಾಗರಗಳಲ್ಲಿನ ಕಾನೂನು- ಸುವ್ಯವಸ್ಥೆಗಳನ್ನು’ ಮತ್ತು ‘ಸಮಾವೇಶದಲ್ಲಿ’ ಪ್ರತಿಫಲಿಸುವ ಸಾರ್ವತ್ರಿಕವಾಗಿ ಮಾನ್ಯತೆ ಪಡೆದ ಅಂತರರಾಷ್ಟ್ರೀಯ ಕಾನೂನಿನ ಹಲವಾರು ನಿಬಂಧನೆಗಳನ್ನು ಗಂಭೀರವಾಗಿ ದುರ್ಬಲಗೊಳಿಸುತ್ತವೆ ಎಂದು ವರದಿಯು ತೀರ್ಮಾನಿಸಿದೆ.

2016 ರಲ್ಲಿ ‘ಸಮುದ್ರದ ಕಾನೂನಿನ ಕುರಿತು ವಿಶ್ವಸಂಸ್ಥೆಯ ಸಮಾವೇಶ’ (UNCLOS) ವು ತೆಗೆದುಕೊಂಡ ನಿರ್ಧಾರ:

‘ಯುನೈಟೆಡ್ ನೇಷನ್ಸ್ ಕನ್ವೆನ್ಷನ್ ಆನ್ ಲಾ ಆಫ್ ದಿ ಸೀಸ್ (United Nations Convention on Law of Seas – UNCLOS)’ ಅಡಿಯಲ್ಲಿ 2016 ರಲ್ಲಿ ತೆಗೆದುಕೊಂಡ ನಿರ್ಧಾರವು ಚೀನಾ ಪ್ರತಿಪಾದಿಸುವ ಹಕ್ಕುಗಳಿಗೆ ಗಂಭೀರ ಹೊಡೆತವಾಗಿದೆ. ಈ ನಿರ್ಧಾರವು ಚೀನಾ ಅನುಮೋದಿಸಿದ ‘ಸಮುದ್ರದ ಕಾನೂನಿನ ಕುರಿತು ವಿಶ್ವಸಂಸ್ಥೆಯ ಸಮಾವೇಶ’ ವನ್ನು ಆಧರಿಸಿದೆ.

UNCLOS ನಿರ್ಣಯದ ಪ್ರಮುಖ ಅಂಶಗಳು:

  1. ಇಂಟರ್ನ್ಯಾಷನಲ್ ಮ್ಯಾರಿಟೈಮ್ ಟ್ರಿಬ್ಯೂನಲ್ ನೀಡಿದ ನಿರ್ಣಯವು ದಕ್ಷಿಣ ಚೀನಾ ಸಮುದ್ರದಲ್ಲಿ ನೈನ್-ಡ್ಯಾಶ್-ಲೈನ್’ ಅಡಿಯಲ್ಲಿ ಸಂಪೂರ್ಣ ಪ್ರದೇಶದ ಮೇಲೆ ಬೀಜಿಂಗ್‌ ಪ್ರತಿಪಾದಿಸುವ ಹಕ್ಕುಗಳನ್ನು ತಿರಸ್ಕರಿಸಿದೆ.
  2. ಈ ನಿರ್ಣಯದಲ್ಲಿದ್ವೀಪಗಳ” ವ್ಯಾಖ್ಯಾನವನ್ನು ಸ್ಪಷ್ಟಪಡಿಸಲಾಗಿದೆ.ಇಟು ಅಬಾ(Itu Aba), ಥಿಟು (Thitu), ಸ್ಪ್ರಾಟ್ಲಿ ದ್ವೀಪಗಳು, ನಾರ್ಥ್ ಈಸ್ಟ್ ಕೇ (Northeast Cay) ಮತ್ತು ಸೌತ್ ವೆಸ್ಟ್ ಕೇ (Southwest Cay) ಸೇರಿದಂತೆ ಯಾವುದೇ ದ್ವೀಪಗಳು ಕಾನೂನುಬದ್ಧವಾಗಿ ‘ದ್ವೀಪ’ಗಳಾಗಿಲ್ಲ ಎಂದು ಅದು ಗುರುತಿಸಿದೆ ಏಕೆಂದರೆ ಈ  ಯಾವುದೇ ದ್ವೀಪಗಳು ಯಾವುದೇ ಸ್ಥಿರ ಸಮುದಾಯ ಅಥವಾ ಸ್ವತಂತ್ರ ಆರ್ಥಿಕ ಜೀವನವನ್ನು ಉಳಿಸಿಕೊಳ್ಳಲು ಸಮರ್ಥವಾಗಿಲ್ಲ.
  3. ಈ ಪ್ರದೇಶದಲ್ಲಿ ನೆಲೆಗೊಂಡಿರುವ ಜಾನ್ಸನ್ ರೀಫ್, ಕ್ವಾರ್ಟರ್ಟನ್ ರೀಫ್ ಮತ್ತು ಫೇರಿ ಕ್ರಾಸ್ ರೀಫ್ ಕೇವಲ ಸಮುದ್ರದ ಬಂಡೆಗಳಾಗಿವೆಯೇ ಹೊರತು ದ್ವೀಪಗಳಲ್ಲ ಎಂದು ಫಿಲಿಪೈನ್ಸ್‌ನೊಂದಿಗೆ ಇಂಟರ್ನ್ಯಾಷನಲ್ ಮ್ಯಾರಿಟೈಮ್ ಟ್ರಿಬ್ಯೂನಲ್ ಸಹ ಒಪ್ಪಿಕೊಂಡಿತು. ‘ಹ್ಯೂಸ್ ರೀಫ್’ ಮತ್ತು ‘ಮಿಸ್ಚೀಫ್ ರೀಫ್’ ಹೆಚ್ಚಿನ ಉಬ್ಬರವಿಳಿತದ ನೀರಿನ ಅಡಿಯಲ್ಲಿ ಕಂಡುಬಂದಿವೆ, ಆದ್ದರಿಂದ ಅವುಗಳ ಮೇಲೆ ಯಾವುದೇ ಕಡಲ ಹಕ್ಕುಗಳನ್ನು ಪಡೆಯಲು ಸಾಧ್ಯವಿಲ್ಲ.
  4. ಸೆಕೆಂಡ್ ‘ಥಾಮಸ್ ಶೋಲ್’ ಮತ್ತು ‘ರೀಡ್ ಬ್ಯಾಂಕ್’ ನೀರಿನಲ್ಲಿ ಮುಳುಗಿವೆ ಮತ್ತು ಫಿಲಿಪೈನ್ಸ್‌ನ ಕಾಂಟಿನೆಂಟಲ್ ಶೆಲ್ಫ್‌ಗೆ ಸಂಬಂಧಿಸಿವೆ, ಆದ್ದರಿಂದ ಚೀನಾಕ್ಕೆ ಅವುಗಳ ಮೇಲೆ ಯಾವುದೇ ಹಕ್ಕಿಲ್ಲ ಎಂದು ನ್ಯಾಯಮಂಡಳಿಯು ತೀರ್ಪು ನೀಡಿದೆ.
  5. ಗಮನಾರ್ಹವಾಗಿ, ನ್ಯಾಯಮಂಡಳಿಯು ಚೀನಾದ “ಭೂ-ಪುನರ್ ಗ್ರಹಣ ಕ್ರಮ” ದ ವಿರುದ್ಧ ತೀರ್ಪು ನೀಡಿತು, ಇದು “ಹವಳದ ಬಂಡೆಗಳ ಪರಿಸರಕ್ಕೆ ಗಂಭೀರ ಹಾನಿಯನ್ನುಂಟುಮಾಡಿದೆ” ಎಂದು ಹೇಳಿದೆ. ಮತ್ತು ನ್ಯಾಯಮಂಡಳಿಯು ಚೀನಾದ ‘ಭೂ-ಪುನರ್ ಗ್ರಹಣ ಕ್ರಮಗಳನ್ನು’ (land reclamation) ಬಲವಾಗಿ ಟೀಕಿಸಿತು.
  6. ಸ್ಕಾರ್ಬರೋ ಶೋಲ್ ಅನ್ನು ಸ್ವಾಧೀನಪಡಿಸಿಕೊಳ್ಳುವ ಪ್ರಯತ್ನದಲ್ಲಿ ಚೀನಾ ಮೂಲಕ ಆದ ಫಿಲಿಪೈನ್ಸ್‌ನ ಹಕ್ಕುಗಳ ಉಲ್ಲಂಘನೆಯನ್ನು ನ್ಯಾಯಮಂಡಳಿಯು ದೃಢಪಡಿಸಿತು. 2012 ರಲ್ಲಿ, ಚೀನಾ ಕೈಗೊಂಡ ಈ ಕ್ರಮದ ವಿರುದ್ಧ ಮನಿಲಾ ಅಂತರರಾಷ್ಟ್ರೀಯ ಕಡಲ ನ್ಯಾಯಮಂಡಳಿಯ ಮುಂದೆ ಮೊಕದ್ದಮೆ ಹೂಡಿತು.
  7. ರೀಡ್ ಬ್ಯಾಂಕ್ ಬಳಿ ತೈಲ ಮತ್ತು ಅನಿಲವನ್ನು ಅನ್ವೇಷಿಸುವ ಮೂಲಕ ಚೀನಾ ಫಿಲಿಪೈನ್ಸ್‌ನ ಸಾರ್ವಭೌಮ ಹಕ್ಕುಗಳನ್ನು ಉಲ್ಲಂಘಿಸಿದೆ ಎಂಬುದನ್ನು ನ್ಯಾಯಮಂಡಳಿಯು ಗಮನಿಸಿದೆ.

ಒಟ್ಟಾರೆ ಸಮಸ್ಯೆ?

ಬೀಜಿಂಗ್ ದಕ್ಷಿಣ ಚೀನಾ ಸಮುದ್ರದಲ್ಲಿನ ಹಲವಾರು ಆಗ್ನೇಯ ಏಷ್ಯಾದ ರಾಷ್ಟ್ರಗಳೊಂದಿಗೆ ಪ್ರಾದೇಶಿಕ ಹಕ್ಕುಗಳನ್ನು ಅತಿಕ್ರಮಿಸುತ್ತಿದೆ.

  1. ಬ್ರೂನಿ, ಮಲೇಷ್ಯಾ, ಫಿಲಿಪೈನ್ಸ್, ತೈವಾನ್ ಮತ್ತು ವಿಯೆಟ್ನಾಂ ಗಳಿಂದ ಸ್ಪರ್ಧಾತ್ಮಕ ಹಕ್ಕುಗಳ ಜೊತೆಗೆ ಚೀನಾ ಬಹುತೇಕ ಸಂಪನ್ಮೂಲ-ಸಮೃದ್ಧ ಸಮುದ್ರದ ಮೇಲೆ ತನ್ನ ಹಕನ್ನು ಪ್ರತಿಪಾದಿಸುತ್ತದೆ, ಈ ಕಡಲ ಪ್ರದೇಶದಿಂದ ವಾರ್ಷಿಕವಾಗಿ ಶತಕೋಟಿ ಡಾಲರ್ ಮೌಲ್ಯದ ಸರಕು ಸಾಗಣೆ ವ್ಯಾಪಾರವು ನಡೆಯುತ್ತದೆ.
  2. ಬೀಜಿಂಗ್ ಅಲ್ಲಿ ಹಡಗು ವಿರೋಧಿ ಕ್ಷಿಪಣಿಗಳು ಮತ್ತು ಮೇಲ್ಮೈಯಿಂದ ಗಾಳಿಗೆ ಚಿಮ್ಮುವ ಕ್ಷಿಪಣಿಗಳು ಸೇರಿದಂತೆ ಹಲವಾರು ಮಿಲಿಟರಿ ಯಂತ್ರೋಪಕರಣಗಳನ್ನು ನಿಯೋಜಿಸಿದೆ ಎಂದು ಆರೋಪಿಸಲಾಗಿದೆ ಮತ್ತು ಚೀನಾ 2016 ರ ಅಂತರರಾಷ್ಟ್ರೀಯ ನ್ಯಾಯಮಂಡಳಿಯು ನೀಡಿದ ತೀರ್ಪನ್ನು ನಿರ್ಲಕ್ಷಿಸಿದೆ, ಈ ತೀರ್ಪಿನಲ್ಲಿ, ಅಂತರರಾಷ್ಟ್ರೀಯ ನ್ಯಾಯಮಂಡಳಿಯು ಈ ಕಡಲ ಪ್ರದೇಶದಲ್ಲಿ ಚೀನಾ ಪ್ರತಿಪಾದಿಸುತ್ತಿರುವ ಐತಿಹಾಸಿಕ ಹಕ್ಕುಗಳಿಗೆ ಯಾವುದೇ ಆಧಾರವಿಲ್ಲ ಎಂದು ಘೋಷಿಸಿದೆ.

ದಕ್ಷಿಣ ಚೀನಾ ಸಮುದ್ರದ ವಿವಾದದ ಕುರಿತು:

ದಕ್ಷಿಣ ಚೀನಾ ಸಮುದ್ರ ಮತ್ತು ಈ ಪ್ರದೇಶದಲ್ಲಿ ನೆಲೆಗೊಂಡಿರುವ ಇತರ ದೇಶಗಳೊಂದಿಗೆ ಚೀನಾದ ಗಡಿ ಮತ್ತು ಕಡಲ ವಿವಾದವು ಕಡಲ ಪ್ರದೇಶಗಳ ಮೇಲೆ ಚೀನಾ ತನ್ನ ಸಾರ್ವಭೌಮತ್ವವನ್ನು ಸ್ಥಾಪಿಸುವುದಕ್ಕೆ ಸಂಬಂಧಿಸಿದೆ.

  1. ಈ ಪ್ರದೇಶವು ‘ಪ್ಯಾರಾಸೆಲ್ ದ್ವೀಪಗಳು’ (Paracels Islands) ಮತ್ತು ‘ಸ್ಪ್ರಾಟ್ಲಿ ದ್ವೀಪಗಳು’ (Spratley Islands) ಎಂಬ ಎರಡು ದ್ವೀಪ ಸರಣಿಗಳನ್ನು ಒಳಗೊಂಡಿದೆ, ದ್ವೀಪಗಳು ಅನೇಕ ದೇಶಗಳ ಕಡಲ ಗಡಿಯಲ್ಲಿ ಹರಡಿಕೊಂಡಿವೆ, ಇದು ಈ ಪ್ರದೇಶದಲ್ಲಿನ ವಿವಾದಕ್ಕೆ ಪ್ರಮುಖ ಕಾರಣವಾಗಿದೆ.
  2. ಸಂಪೂರ್ಣ ಅಭಿವೃದ್ಧಿ ಹೊಂದಿದ ದ್ವೀಪಗಳ ಜೊತೆಗೆ, ಡಜನ್ ಗಟ್ಟಲೆ ಬಂಡೆಗಳು, ಅಟಾಲ್ಗಳು, ಮರಳು ತೀರಗಳು ಮತ್ತು ಸ್ಕಾರ್ಬರೋ ಶೋಲ್‌ನಂತಹ (Scarborough Shoal) ಬಂಡೆಗಳು ಸಹ ವಿವಾದಕ್ಕೆ ಕಾರಣವಾಗಿವೆ.
  3. ದಕ್ಷಿಣ ಚೀನಾ ಸಮುದ್ರದ ಬಹುಪಾಲು ಪ್ರದೇಶದ ಮೇಲೆ ತನ್ನ ಐತಿಹಾಸಿಕ ಹಕ್ಕುಗಳನ್ನು ಸಾಧಿಸಲು ಬೀಜಿಂಗ್ ಸಾಮಾನ್ಯವಾಗಿ 9 ಡ್ಯಾಶ್ ಲೈನ್ ಎಂಬ ವಿಚಾರವನ್ನು ಪ್ರಚೋದಿಸುತ್ತದೆ, ಅದೇ ರೀತಿ ಈ ಸಮುದ್ರದ ಕೆಲವು ಭಾಗಗಳ ಮೇಲೆ ತೈವಾನ್ ಮಲೇಷ್ಯಾ ಫಿಲಿಫೈನ್ಸ್ ಮತ್ತು ಬ್ರೂನೈ ದೇಶಗಳು ಸಹ ತಮ್ಮ ತಮ್ಮ ಹಕ್ಕುಗಳನ್ನು ಪ್ರತಿಪಾದಿಸುತ್ತವೆ.
  4. ದಕ್ಷಿಣ ಚೀನಾ ಸಮುದ್ರದ ಮೇಲೆ ಚೀನಾ ಪ್ರತಿಪಾದಿಸುತ್ತಿರುವ ಹಕ್ಕನ್ನು ಆಧಾರರಹಿತವೆಂದು ಹೇಳಿದ ಅಂತರರಾಷ್ಟ್ರೀಯ ನ್ಯಾಯಮಂಡಳಿಯ 2016 ರ ನಿರ್ಧಾರವನ್ನು ಚೀನಾ ನಿರ್ಲಕ್ಷಿಸಿದೆ.

ದಕ್ಷಿಣ ಚೀನಾ ಸಮುದ್ರ ಎಲ್ಲಿದೆ?

ದಕ್ಷಿಣ ಚೀನಾ ಸಮುದ್ರವು ಆಗ್ನೇಯ ಏಷ್ಯಾದ ಪಶ್ಚಿಮ ಪೆಸಿಫಿಕ್ ಮಹಾಸಾಗರದ ಒಂದು ಭಾಗವಾಗಿದೆ.

ಇದು ಚೀನಾದ ದಕ್ಷಿಣಕ್ಕೆ, ವಿಯೆಟ್ನಾಂನ ಪೂರ್ವ ಮತ್ತು ದಕ್ಷಿಣಕ್ಕೆ, ಫಿಲಿಪೈನ್ಸ್‌ನ ಪಶ್ಚಿಮಕ್ಕೆ ಮತ್ತು ಬೊರ್ನಿಯೊ ದ್ವೀಪದ ಉತ್ತರಕ್ಕೆ ಇದೆ.

ಇದು ತೈವಾನ್ ಜಲಸಂಧಿಯಿಂದ ‘ಪೂರ್ವ ಚೀನಾ ಸಮುದ್ರ’ಕ್ಕೆ ಮತ್ತು ಲುಝೋನ್ ಜಲಸಂಧಿಯ ಮೂಲಕ’ ಫಿಲಿಪೈನ್ ಸಮುದ್ರ’ಕ್ಕೆ ಸಂಪರ್ಕ ಹೊಂದಿದೆ.

ಗಡಿ ದೇಶಗಳು ಮತ್ತು ಪ್ರಾಂತ್ಯಗಳು: ಪೀಪಲ್ಸ್ ರಿಪಬ್ಲಿಕ್ ಆಫ್ ಚೀನಾ, ರಿಪಬ್ಲಿಕ್ ಆಫ್ ಚೀನಾ (ತೈವಾನ್), ಫಿಲಿಪೈನ್ಸ್, ಮಲೇಷ್ಯಾ, ಬ್ರೂನಿ, ಇಂಡೋನೇಷ್ಯಾ,ಸಿಂಗಾಪುರ್ ಮತ್ತು ವಿಯೆಟ್ನಾಂ.

ಕಾರ್ಯತಂತ್ರದ ಪ್ರಮುಖ್ಯತೆ:

‘ದಕ್ಷಿಣ ಚೀನಾ ಸಮುದ್ರ’ ವು, ಹಿಂದೂ ಮಹಾಸಾಗರ ಮತ್ತು ಪೆಸಿಫಿಕ್ ಮಹಾಸಾಗರದ (ಮಲಕ್ಕಾ ಜಲಸಂಧಿ) ನಡುವಿನ ಕೊಂಡಿಯಾಗಿದ್ದು, ಅದರ ಆಯಕಟ್ಟಿನ ಸ್ಥಳದಿಂದಾಗಿ ಅಪಾರವಾದ ಕಾರ್ಯತಂತ್ರದ ಮಹತ್ವವನ್ನು ಹೊಂದಿದೆ.

‘ವಿಶ್ವಸಂಸ್ಥೆಯ ವ್ಯಾಪಾರ ಮತ್ತು ಅಭಿವೃದ್ಧಿ ಸಮಾವೇಶ’ ದ (United Nations Conference on Trade And Development- UNCTAD) ಪ್ರಕಾರ, ಜಾಗತಿಕ ಹಡಗು ಸಾಗಾಟದ ಮೂರನೇ ಒಂದು ಭಾಗವು ‘ದಕ್ಷಿಣ ಚೀನಾ ಸಮುದ್ರ’ದ ಮೂಲಕ ಹಾದುಹೋಗುತ್ತದೆ, ಇದರ ಮೂಲಕ $ ಟ್ರಿಲಿಯನ್ ಗಟ್ಟಲೆ ವ್ಯಾಪಾರ ನಡೆಯುವುದರಿಂದಾಗಿ ಇದು ಒಂದು ಪ್ರಮುಖ ಭೌಗೋಳಿಕ ರಾಜಕೀಯ ಜಲ (geopolitical water body) ಘಟಕವಾಗಿದೆ.

ದಕ್ಷಿಣ ಚೀನಾ ಸಮುದ್ರದಲ್ಲಿರುವ ದ್ವೀಪಗಳಮೇಲೆ ವಿವಿಧ ದೇಶಗಳ ಸ್ಪರ್ಧಾತ್ಮಕ ಹಕ್ಕುಗಳು:

‘ಪ್ಯಾರಾಸೆಲ್ ದ್ವೀಪಗಳ’ (Paracels Islands) ಮೇಲೆ ಚೀನಾ, ತೈವಾನ್ ಮತ್ತು ವಿಯೆಟ್ನಾಂ ಹಕ್ಕು ಸಾಧಿಸಿವೆ.

ಸ್ಪ್ರಾಟ್ಲಿ ದ್ವೀಪಗಳನ್ನು (Spratley Islands) ಚೀನಾ, ತೈವಾನ್, ವಿಯೆಟ್ನಾಂ, ಬ್ರೂನಿ ಮತ್ತು ಫಿಲಿಪೈನ್ಸ್ ತಮ್ಮವೆಂದು ಹಕ್ಕು ಸಾಧಿಸಿವೆ.

ಸ್ಕಾರ್ಬರೋ ಶೋಲ್ (Scarborough Shoal) ಮೇಲೆ ಫಿಲಿಪೈನ್ಸ್, ಚೀನಾ ಮತ್ತು ತೈವಾನ್ ಗಳು ಹಕ್ಕು ಸಾಧಿಸಿವೆ.

2010 ರಿಂದೀಚೆಗೆ, ಚೀನಾವು ನಿರ್ಜನ ದ್ವೀಪಗಳನ್ನು ವಿಶ್ವಸಂಸ್ಥೆಯ ಸಮುದ್ರ ಕಾನೂನಿನ (United Nations Convention on the Law of the Sea- UNCLOS) ಅಡಿಯಲ್ಲಿ ತರಲು ಅವುಗಳನ್ನು ಕೃತಕ ದ್ವೀಪಗಳನ್ನಾಗಿ ಪರಿವರ್ತಿಸುತ್ತಿದೆ. (ಉದಾಹರಣೆಗೆ, ಹೆವೆನ್ ರೀಫ್, ಜಾನ್ಸನ್ ಸೌತ್ ರೀಫ್ ಮತ್ತು ಫೈರಿ ಕ್ರಾಸ್ ರೀಫ್).

current affairs

 


ಸಾಮಾನ್ಯ ಅಧ್ಯಯನ ಪತ್ರಿಕೆ : 3


 

ವಿಷಯಗಳು:ವಿಜ್ಞಾನ ಮತ್ತು ತಂತ್ರಜ್ಞಾನ- ಬೆಳವಣಿಗೆಗಳು ಮತ್ತು ಅವುಗಳ ಅನ್ವಯಗಳು ಮತ್ತು ದೈನಂದಿನ ಜೀವನದಲ್ಲಿ ಅವುಗಳ ಪರಿಣಾಮಗಳು ವಿಜ್ಞಾನ ಮತ್ತು ತಂತ್ರಜ್ಞಾನದಲ್ಲಿ ಭಾರತೀಯರ ಸಾಧನೆಗಳು; ತಂತ್ರಜ್ಞಾನದ ದೇಶೀಕರಣ ಮತ್ತು ಹೊಸ ತಂತ್ರಜ್ಞಾನವನ್ನು ಅಭಿವೃದ್ಧಿಪಡಿಸುವುದು.

ಹಂದಿ ಹೃದಯ ಕಸಿ:


(Pig heart transplant)

ಸಂದರ್ಭ:

ಅಮೆರಿಕದ ಶಸ್ತ್ರಚಿಕಿತ್ಸಕರ ದಿಟ್ಟ ಪ್ರಯತ್ನದಲ್ಲಿ, ಹಂದಿಯ ಹೃದಯವನ್ನು ಮಾನವ ರೋಗಿಯೊಳಗೆ ಕಸಿ ಮಾಡಲಾಗಿದೆ. ವೈದ್ಯಕೀಯ ವಿಜ್ಞಾನ ಜಗತ್ತಿನಲ್ಲಿ ಇದು ಈ ತರಹದ ಮೊದಲ ಉದಾಹರಣೆಯಾಗಿದೆ.

  1. ಈ ಸಫಲತೆಯು ಆರೋಗ್ಯಕರ ಅಂಗವನ್ನು ಪಡೆಯಲು ಮತ್ತು ಸಾಧ್ಯತೆಗಳ ಸಂಪೂರ್ಣ ಹೊಸ ಪ್ರಪಂಚವನ್ನು ತೆರೆಯಲು ಕಾಯುತ್ತಿರುವ ಜನರ ವರ್ಷಗಳ ದೀರ್ಘ ಕಾಯುವಿಕೆಯನ್ನು ಸಮರ್ಥವಾಗಿ ಕೊನೆಗೊಳಿಸಬಹುದಾಗಿದೆ.

Xenotransplantation:

Xenotransplantation ಎನ್ನುವುದು ವಿವಿಧ ಜಾತಿಗಳ ಸದಸ್ಯರ ನಡುವೆ ಅಂಗಗಳು ಅಥವಾ ಅಂಗಾಂಶಗಳನ್ನು ಕಸಿ ಮಾಡುವ ಅಥವಾ ಜೋಡಣೆ ಮಾಡುವ ಪ್ರಕ್ರಿಯೆಯಾಗಿದೆ.

  1. ಇದನ್ನು ಆಧುನಿಕ ವೈದ್ಯಕೀಯ ವಿಜ್ಞಾನವು ದಶಕಗಳಿಂದ ಅನುಸರಿಸುತ್ತಿದೆ, ಆದರೆ ತಜ್ಞರಿಗೆ ಮತ್ತೊಂದು ಪ್ರಜಾತಿಯ ಅಂಗವನ್ನು ಕಸಿ  ಮಾಡಬೇಕಾದ ವ್ಯಕ್ತಿಯ ‘ಪ್ರತಿರಕ್ಷಣಾ ವ್ಯವಸ್ಥೆ’ಯಿಂದ ತಿರಸ್ಕರಿಸಲ್ಪಡುವ ಸವಾಲು ಮತ್ತು ರೋಗಿಗಳ ಮೇಲೆ ಉಂಟಾಗುವ ಅದರ ಮಾರಕ ಪರಿಣಾಮಗಳ ಸವಾಲನ್ನು ಜಯಿಸುವುದು ಕಷ್ಟಕರವಾಗಿದೆ.

Current Affairs

 

ಕಸಿ ಮಾಡಿದ ಕಾರ್ಯವಿಧಾನ:

  1. ಕಸಿ ಮಾಡಲು ಹಂದಿಯಿಂದ ತೆಗೆದುಕೊಳ್ಳಲಾದ ಹೃದಯವನ್ನು ‘ಅನುವಂಶಿಕವಾಗಿ ಮಾರ್ಪಡಿಸಲಾಗಿದೆ’. ಈ ಪ್ರಕ್ರಿಯೆಯಲ್ಲಿ, ವಿಜ್ಞಾನಿಗಳು ಒಟ್ಟು ನಾಲ್ಕು ಜೀನ್ (Genes) ಗಳನ್ನು ಅಂದರೆ ‘ಮಾನವ ದೇಹದಲ್ಲಿ ಹಂದಿ ಅಂಗಗಳ ನಿರಾಕರಣೆಗೆ ಕಾರಣವಾದ ಮೂರು ಜೀನ್‌ಗಳು’ ಮತ್ತು ‘ಹಂದಿ ಹೃದಯ ಅಂಗಾಂಶದ ಅತಿಯಾದ ಬೆಳವಣಿಗೆಗೆ ಕಾರಣವಾದ ಒಂದು ಜೀನ್’ ಅನ್ನು ತೆಗೆದುಹಾಕಿದರು.
  2. ಇದರ ಜೊತೆಗೆ, ಮಾನವ ದೇಹವು ಮತ್ತೊಂದು ಜಾತಿಯ ಭಾಗವನ್ನು ಅಂಗೀಕರಿಸಲು ಅನುಕೂಲವಾದ ಆರು ಮಾನವ ವಂಶವಾಹಿಗಳನ್ನು ‘ಹಂದಿ ಜಿನೋಮ್’ಗೆ ಸೇರಿಸಲಾಯಿತು. ಅಂದರೆ, ಈ ಕಾರ್ಯಾಚರಣೆಯಲ್ಲಿ, ಅಮೆರಿಕದ ಬಯೋಟೆಕ್ ಸಂಸ್ಥೆ ರಿವಿವಿಕೋರ್ (Revivicor) ಒಟ್ಟು 10 ವಿಶಿಷ್ಟ ಜೀನ್‌ಗಳನ್ನು ಹಂದಿಗಳಲ್ಲಿ ಸಂಪಾದಿಸಿದ್ದಾರೆ.

ಕಸಿ ಮಾಡಲು ‘ಹಂದಿ ಹೃದಯ’ವನ್ನೇ ಬಳಸಲು ಕಾರಣಗಳು:

ಅಂಗಾಂಗ ಕಸಿಗೆ ಹಂದಿಗಳು ಹೆಚ್ಚು ಜನಪ್ರಿಯವಾದ ಅನ್ವಯಿಕೆಗಳಾಗಿವೆ. ಇದಕ್ಕೆ ಕಾರಣವೆಂದರೆ ಅದರ ಅಂಗಗಳು ಶಾರೀರಿಕ ರೂಪದಲ್ಲಿ ಮನುಷ್ಯರಿಗೆ ಹೋಲುತ್ತವೆ. ಇದಲ್ಲದೆ, ಜೆನೆಟಿಕ್ ಎಂಜಿನಿಯರಿಂಗ್‌ ಗಾಗಿ ‘ಹಂದಿಯ ಅಂಗಗಳು’ ಹೆಚ್ಚು ಸೂಕ್ತವಾಗಿವೆ.

ಅಂಗಾಂಗಗಳ ಕೊರತೆಯ ಸಮಸ್ಯೆ:

  1. ಭಾರತದಲ್ಲಿ, ರೋಗಿಗಳಿಗೆ ವಾರ್ಷಿಕವಾಗಿ 25,000-30,000 ಯಕೃತ್ತಿನ ಕಸಿ ಅಗತ್ಯವಿರುತ್ತದೆ. ಆದರೆ 1,500 ರೋಗಿಗಳು ಮಾತ್ರ ಇದನ್ನು ಪಡೆಯುತ್ತಾರೆ.
  2. ಅದೇ ರೀತಿ ಪ್ರತಿ ವರ್ಷ ಸುಮಾರು 50,000 ಜನರು ಹೃದಯಾಘಾತದಿಂದ ಸಾಯುತ್ತಾರೆ. ಆದರೂ, ಪ್ರತಿ ವರ್ಷ ಸುಮಾರು 10-15 ಹೃದಯ ಕಸಿಗಳನ್ನು ಮಾತ್ರ ನಡೆಸಲಾಗುತ್ತದೆ.
  3. ಕಸಿ ಪ್ರಕ್ರಿಯೆಯಲ್ಲಿನ ದೊಡ್ಡ ಅಡಚಣೆಗಳಲ್ಲಿ ಅಂಗಗಳನ್ನು ಸ್ವೀಕರಿಸದಿರುವುದು ಒಂದಾಗಿದೆ. ಹಂದಿಗಳ ಅಂಗಾಂಗಗಳನ್ನು ತಳೀಯವಾಗಿ ಮಾರ್ಪಡಿಸುವ ಮೂಲಕ ವಿಜ್ಞಾನಿಗಳು ಈ ಸಮಸ್ಯೆಯನ್ನು ಪರಿಹರಿಸಿದ್ದಾರೆ.

ಕ್ಸೆನೋಟ್ರಾನ್ಸ್ಪ್ಲಾಂಟೇಶನ್‌ನ ಆರಂಭಿಕ ಪ್ರಯತ್ನಗಳು:

  1. ಮಾನವರಲ್ಲದ ಸಸ್ತನಿಗಳಿಂದ ಮನುಷ್ಯರಿಗೆ ಮೂತ್ರಪಿಂಡ, ಯಕೃತ್ತು ಮತ್ತು ಹೃದಯ ಕಸಿಗಳ ಸರಣಿಯು 1970 ರ ದಶಕದಲ್ಲಿ ಪ್ರಾರಂಭವಾಯಿತು, ಆದರೆ ಈ ಕಸಿಗಳಲ್ಲಿ ಹೆಚ್ಚಿನವು ವಿಫಲವಾದವು.
  2. ಈ ವೈಫಲ್ಯಕ್ಕೆ ಮುಖ್ಯ ಕಾರಣವೆಂದರೆ ಮಾನವ ದೇಹದಿಂದ ‘ಇತರ ಜಾತಿಗಳ ಅಂಗಗಳನ್ನು ತಿರಸ್ಕರಿಸುವುದಾಗಿದೆ’-ಮಾನವನ ಪ್ರತಿರಕ್ಷಣಾ ವ್ಯವಸ್ಥೆಯು ಮಾನವ ದೇಹಕ್ಕೆ ಬಾಹ್ಯ ಪ್ರಜಾತಿಯ ಅಂಗಾಂಶಗಳನ್ನು ತಿರಸ್ಕರಿಸುತ್ತದೆ. ಕೆಲವು ಶಸ್ತ್ರಚಿಕಿತ್ಸಾ ತೊಡಕುಗಳು ಸಹ ಇಂಪ್ಲಾಂಟ್/ಕಸಿ ವೈಫಲ್ಯಕ್ಕೆ ಕಾರಣವಾಗಿವೆ.
  3. 1984 ರಲ್ಲಿ, ಬಬೂನ್‌ (Baboon) ನ ಹೃದಯವನ್ನು ಮಾನವ ಶಿಶುವಿಗೆ ಕಸಿ ಮಾಡಲಾಯಿತು. ಕಸಿ ಮಾಡಿದ 21 ದಿನಗಳ ನಂತರ ಆ ಶಿಶು ಸಾವನ್ನಪ್ಪಿತು.

1990 ರ ದಶಕದಲ್ಲಿ, ವೈರಸ್ ಹರಡುವ ಹೆಚ್ಚಿನ ಅಪಾಯದ ಕಾರಣದಿಂದ ಪ್ರೈಮೇಟ್‌ಗಳನ್ನು ಕಸಿ ಪ್ರಕ್ರಿಯೆಯಿಂದ ತೆಗೆದುಹಾಕಲಾಯಿತು. ಇದಾದ ನಂತರ ‘ಹಂದಿ’ಯು ಕಸಿ ಚರ್ಚೆಯ ಕೇಂದ್ರಕ್ಕೆ ಬಂದಿತು.

ಇದುವರೆಗಿನ ಪ್ರಗತಿ:

  1. 2017 ರಲ್ಲಿ, ಚೀನೀ ಶಸ್ತ್ರಚಿಕಿತ್ಸಕರು ಮಾನವರಲ್ಲಿ ದೃಷ್ಟಿಯನ್ನು ಪುನಃಸ್ಥಾಪಿಸಲು ಹಂದಿ ಕಾರ್ನಿಯಾವನ್ನು ಕಸಿ ಮಾಡಿದರು.
  2. 2020 ರಲ್ಲಿ, ಅಮೆರಿಕಾದ ತಜ್ಞರು ತಳೀಯವಾಗಿ-ಬದಲಿಸಲಾದ (genetically-altered) ಮೂತ್ರಪಿಂಡವನ್ನು ಮೆದುಳು ನಿಷ್ಕ್ರಿಯಗೊಂಡ (Brain dead) ವ್ಯಕ್ತಿಗೆ ಜೋಡಿಸುವಲ್ಲಿ ಯಶಸ್ವಿಯಾದರು.

 

ವಿಷಯಗಳು:ಸಂರಕ್ಷಣೆ ಮತ್ತು ಜೀವವೈವಿಧ್ಯತೆಗೆ ಸಂಬಂಧಿತ ಸಮಸ್ಯೆಗಳು.

ದೇಶದ ಅರಣ್ಯ ಸ್ಥಿತಿ ವರದಿ 2021:


(State of Forest Report 2021)

ಸಂದರ್ಭ:

ಇತ್ತೀಚೆಗೆ, ಪರಿಸರ, ಅರಣ್ಯ ಮತ್ತು ಹವಾಮಾನ ಬದಲಾವಣೆ ಸಚಿವಾಲಯ (MoEFCC) ವು ‘ಭಾರತ ಅರಣ್ಯ ವರದಿ 2021’ (India State of Forest Report – ISFR) ಅನ್ನು ಬಿಡುಗಡೆ ಮಾಡಿದೆ.

  1. ಭಾರತೀಯ ಅರಣ್ಯ ಸಮೀಕ್ಷೆ (FSI) ಸಿದ್ಧಪಡಿಸಿದ ಈ ದ್ವೈವಾರ್ಷಿಕ ವರದಿಯಲ್ಲಿ ದೇಶದ ಅರಣ್ಯ ಸಂಪನ್ಮೂಲಗಳನ್ನು ಅಂದಾಜು ಮಾಡಲಾಗಿದೆ.

ವರದಿಯ ಪ್ರಮುಖ ಅಂಶಗಳು:

  1. ದೇಶದ ಒಟ್ಟು ಅರಣ್ಯ ಮತ್ತು ಮರದಿಂದ ಆವೃತವಾಗಿರುವ ಪ್ರದೇಶವು 9 ಮಿಲಿಯನ್ ಹೆಕ್ಟೇರ್ ಆಗಿದೆ, ಇದು ದೇಶದ ಒಟ್ಟು ಭೌಗೋಳಿಕ ಪ್ರದೇಶದ 24.62 ಪ್ರತಿಶತವಾಗಿದೆ.
  2. ಅರಣ್ಯ ವ್ಯಾಪ್ತಿ ಕುರಿತಾದ ಬಿಡುಗಡೆ ಮಾಡಲಾದ 2021ರ ವರದಿಯಲ್ಲಿ 2019ರ ಸ್ಥಿತಿಗೆ ಹೋಲಿಸಿದರೆ, ಅರಣ್ಯ ವ್ಯಾಪ್ತಿಯು 1,540 ಚದರ ಕಿ.ಮೀ ಮತ್ತು ಮರಗಳ ವ್ಯಾಪ್ತಿಯು 721 ಚದರ ಕಿ.ಮೀ. ಒಟ್ಟು 2,261 ಚದರ ಕಿಲೋಮೀಟರ್ ನಷ್ಟು ಹೆಚ್ಚಳವನ್ನು ದಾಖಲಿಸಿದೆ, ಆಂಧ್ರಪ್ರದೇಶವು ಗರಿಷ್ಠ 647 ಚದರ ಕಿಮೀ ಅರಣ್ಯ ಪ್ರದೇಶದ ಹೆಚ್ಚಳವನ್ನು ದಾಖಲಿಸಿದೆ.
  3. ವರದಿಯಂತೆ, ದಟ್ಟ ಅರಣ್ಯದ ವ್ಯಾಪ್ತಿ 2019 ಮತ್ತು 2021ರ ನಡುವೆ ಸುಮಾರು 1,582 ಚದರ ಕಿ.ಮೀ.ನಷ್ಟು ಕಡಿಮೆ ಆಗಿದೆ. ಆದರೆ, ಅತಿದಟ್ಟ ಅರಣ್ಯ ವ್ಯಾಪ್ತಿಯು ಸುಮಾರು 501 ಚದರ ಕಿ.ಮೀನಷ್ಟು ಹೆಚ್ಚಾಗಿದೆ.
  4. ಆದರೆ, 2017 ಮತ್ತು 2019ರ ಅವಧಿಯಲ್ಲಿ ಅರಣ್ಯ ಬೆಳವಣಿಗೆ ಪ್ರಮಾಣ ಗಣನೀಯವಾಗಿ ಏರಿಕೆ ಕಂಡಿತ್ತು. ಈ ಅವಧಿಯಲ್ಲಿ ಅರಣ್ಯ 3,976 ಚದರ ಕಿ.ಮೀ. ಮತ್ತು ಮರಗಳ ವ್ಯಾಪ್ತಿಯು 1,212 ಚದರ ಕಿ.ಮೀ. ಏರಿಕೆಯಾಗಿತ್ತು.
  5. ದ್ವೈವಾರ್ಷಿಕ ಅರಣ್ಯ ವರದಿಗೆ ಸಂಬಂಧಿತ ಅಂಕಿ ಅಂಶಗಳು ಅಕ್ಟೋಬರ್ –ಡಿಸೆಂಬರ್‌ 2019ರ ಅವಧಿಗೆ ಸಂಬಂಧಿಸಿವೆ.
  6. ಭಾರತದ ಒಟ್ಟು ಅರಣ್ಯ ಮತ್ತು ಮರಗಳ ಕವರ್ ಈಗ 80.9 ಮಿಲಿಯನ್ ಹೆಕ್ಟೇರ್‌ಗಳಲ್ಲಿ ಹರಡಿದೆ, ಇದು ದೇಶದ ಒಟ್ಟು ಭೌಗೋಳಿಕ ಪ್ರದೇಶದ 62 ಪ್ರತಿಶತವಾಗಿದೆ.
  7. ಅರಣ್ಯ ವ್ಯಾಪ್ತಿ ಹೆಚ್ಚಳವಾಗಿರುವ ಐದು ರಾಜ್ಯಗಳಲ್ಲಿ ಕರ್ನಾಟಕವೂ ಒಂದಾಗಿದೆ. ರಾಜ್ಯದಲ್ಲಿ 155 ಚದರ ಕಿ.ಮೀ. ಅರಣ್ಯ ಪ್ರದೇಶ ಹೆಚ್ಚಿದೆ. ಉಳಿದಂತೆ, ಆಂಧ್ರಪ್ರದೇಶ (747 ಚ.ಕಿ.ಮೀ), ತೆಲಂಗಾಣ (632 ಚ.ಕಿ.ಮೀ), ಒಡಿಶಾ (537 ಚ.ಕಿ.ಮೀ) ಮತ್ತು ಜಾರ್ಖಂಡ್‌ (110 ಚ.ಕಿ.ಮೀ) ಇವೆ. ಈಶಾನ್ಯ ರಾಜ್ಯಗಳಲ್ಲಿ ಅರಣ್ಯ ವ್ಯಾಪ್ತಿಯು ಕುಗ್ಗಿದೆ.
  8. ಉತ್ತಮ ಸಂರಕ್ಷಣಾ ಕ್ರಮಗಳು, ಸಂರಕ್ಷಣೆ, ಅರಣ್ಯೀಕರಣ ಚಟುವಟಿಕೆಗಳು, ಪ್ಲಾಂಟೇಶನ್ ಡ್ರೈವ್‌ಗಳು ಮತ್ತು ಕೃಷಿ-ಅರಣ್ಯೀಕರಣದಿಂದಾಗಿ ಅರಣ್ಯದ ವ್ಯಾಪ್ತಿಯ ಹೆಚ್ಚಳ ಅಥವಾ ಅರಣ್ಯದ ಸಾಂದ್ರತೆಯ ಸುಧಾರಣೆಗೆ ಕಾರಣವೆಂದು ಹೇಳಬಹುದಾಗಿದೆ.
  9. ದೇಶದ ಪ್ರಮುಖ ನಗರಗಳಲ್ಲಿ/ ಮೆಗಾಸಿಟಿ ಗಳ ಪೈಕಿ, ಅಹಮದಾಬಾದ್ ನಗರವು ಅರಣ್ಯ ಪ್ರದೇಶದ ವಿಷಯದಲ್ಲಿ ಅತ್ಯಂತ ಹಿಂದುಳಿದ ನಗರವಾಗಿದೆ.

ಗರಿಷ್ಠ ಅರಣ್ಯ ಪ್ರದೇಶ ಹೊಂದಿರುವ ರಾಜ್ಯಗಳು:

  1. ಪ್ರದೇಶವಾರು ವಿಸ್ತೀರ್ಣದಲ್ಲಿ, ಮಧ್ಯಪ್ರದೇಶವು ದೇಶದಲ್ಲೇ ಅತಿ ಹೆಚ್ಚು ಅರಣ್ಯ ಪ್ರದೇಶವನ್ನು ಹೊಂದಿದ್ದು, ಅರುಣಾಚಲ ಪ್ರದೇಶ, ಛತ್ತೀಸ್‌ಗಢ, ಒಡಿಶಾ ಮತ್ತು ಮಹಾರಾಷ್ಟ್ರ ನಂತರದ ಸ್ಥಾನದಲ್ಲಿವೆ.
  2. 17 ರಾಜ್ಯಗಳು/ಕೇಂದ್ರಾಡಳಿತ ಪ್ರದೇಶಗಳು ತಮ್ಮ ಭೌಗೋಳಿಕ ಪ್ರದೇಶದ 33 ಪ್ರತಿಶತಕ್ಕಿಂತಲೂ ಹೆಚ್ಚು ಪ್ರದೇಶವು ಅರಣ್ಯ ವ್ಯಾಪ್ತಿಯಿಂದ ಕೂಡಿದೆ.
  3. ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳ ಪೈಕಿ ಲಕ್ಷದ್ವೀಪ, ಮಿಜೋರಾಂ, ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳು, ಅರುಣಾಚಲ ಪ್ರದೇಶ ಮತ್ತು ಮೇಘಾಲಯಗಳು ಶೇಕಡಾ 75 ಕ್ಕಿಂತ ಹೆಚ್ಚು ಅರಣ್ಯವನ್ನು ಹೊಂದಿವೆ.

ದೇಶದಲ್ಲಿ ಮ್ಯಾಂಗ್ರೋವ್ ಹೊದಿಕೆ:

  1. ದೇಶದ ಒಟ್ಟು ಮ್ಯಾಂಗ್ರೋವ್ ಪ್ರದೇಶವು 4,992 ಚದರ ಕಿ.ಮೀ.ಆಗಿದೆ.
  2. 2019 ರ ಅಂದಾಜಿಗೆ ಹೋಲಿಸಿದರೆ ಮ್ಯಾಂಗ್ರೋವ್ ಪ್ರದೇಶದಲ್ಲಿ 17 ಚದರ ಕಿಮೀ ಹೆಚ್ಚಳವನ್ನು ದಾಖಲಿಸಲಾಗಿದೆ.
  3. ಮ್ಯಾಂಗ್ರೋವ್ ಪ್ರದೇಶದ ಹೆಚ್ಚಳವನ್ನು ದಾಖಲಿಸಿದ ಮೊದಲ ಮೂರು ರಾಜ್ಯಗಳು ಒಡಿಶಾ (8 ಚದರ ಕಿಮೀ), ನಂತರದ ಸ್ಥಾನದಲ್ಲಿ ಮಹಾರಾಷ್ಟ್ರ (4 ಚದರ ಕಿಮೀ) ಮತ್ತು ಕರ್ನಾಟಕ (3 ಚದರ ಕಿಮೀ).

ಕಾರ್ಬನ್ ಸ್ಟಾಕ್:

  1. ದೇಶದ ಅರಣ್ಯದಲ್ಲಿ ಒಟ್ಟು ಇಂಗಾಲದ ಸಂಗ್ರಹವು 7,204 ಮಿಲಿಯನ್ ಟನ್‌ಗಳು ಎಂದು ಅಂದಾಜಿಸಲಾಗಿದೆ.
  2. 2019 ರ ಕೊನೆಯ ಅಂದಾಜಿಗೆ ಹೋಲಿಸಿದರೆ ದೇಶದ ಕಾರ್ಬನ್ ಸ್ಟಾಕ್ 79.4 ಮಿಲಿಯನ್ ಟನ್‌ಗಳಷ್ಟು ಹೆಚ್ಚಾಗಿದೆ.
  3. ಕಾರ್ಬನ್ ಸ್ಟಾಕ್ನಲ್ಲಿ ವಾರ್ಷಿಕ ಹೆಚ್ಚಳ 39.7 ಮಿಲಿಯನ್ ಟನ್ಗಳು.

ಕಳವಳಗಳು:

ಈಶಾನ್ಯ ರಾಜ್ಯಗಳು ಸಕಾರಾತ್ಮಕ ಫಲಿತಾಂಶಗಳನ್ನು ತೋರಿಸಿಲ್ಲ, ಏಕೆಂದರೆ ಈ ಪ್ರದೇಶವು ಪ್ರಸ್ತುತ ಮೌಲ್ಯಮಾಪನದ ಪ್ರಕಾರ 1,020 ಚದರ ಕಿ.ಮೀಗಳಷ್ಟು ಅರಣ್ಯ ಪ್ರದೇಶವನ್ನು ಕಳೆದುಕೊಂಡಿದೆ.

ಅರುಣಾಚಲ ಪ್ರದೇಶವು 257 ಚ.ಕಿ.ಮೀ ಗರಿಷ್ಠ ಅರಣ್ಯ ಪ್ರದೇಶವನ್ನು ಕಳೆದುಕೊಂಡಿದೆ, ನಂತರ ಮಣಿಪುರ 249 ಚ.ಕಿ.ಮೀ, ನಾಗಾಲ್ಯಾಂಡ್ 235 ಚ.ಕಿ.ಮೀ, ಮಿಜೋರಾಂ 186 ಚ.ಕಿ.ಮೀ ಮತ್ತು ಮೇಘಾಲಯ 73 ಚ.ಕಿ.ಮೀ. ಗಳಷ್ಟು ಅರಣ್ಯ ಪ್ರದೇಶವನ್ನು ಕಳೆದುಕೊಂಡಿವೆ.

ಕಳೆದ ಎರಡು ವರ್ಷಗಳಲ್ಲಿ ದೇಶದ 140 ಗುಡ್ಡಗಾಡು ಜಿಲ್ಲೆಗಳಲ್ಲಿ 902 ಚದರ ಕಿ.ಮೀ ನಷ್ಟು ಅರಣ್ಯ ಪ್ರದೇಶವು ಕಡಿಮೆಯಾಗಿದೆ. 2019ರ ವರದಿಯಲ್ಲಿ ಗುಡ್ಡಗಾಡು ಪ್ರದೇಶಗಳಲ್ಲಿ ಅರಣ್ಯ ಪ್ರದೇಶದಲ್ಲಿ 544 ಚ.ಕಿ.ಮೀ ಹೆಚ್ಚಳವಾಗಿತ್ತು.

ದೇಶದಲ್ಲಿ ಅರಣ್ಯ ಪ್ರದೇಶವನ್ನು ಹೆಚ್ಚಿಸಲು ಸರ್ಕಾರದ ಪ್ರಯತ್ನಗಳು:

2030 ರ ವೇಳೆಗೆ ಹೆಚ್ಚುವರಿ ಕಾರ್ಬನ್ ಸಿಂಕ್ ಅನ್ನು 2.5 ರಿಂದ 3 ಶತಕೋಟಿ ಟನ್ಗಳಷ್ಟು ಇಂಗಾಲದ ಡೈಆಕ್ಸೈಡ್ ಗೆ ಸಮಾನವಾಗಿ ಹೆಚ್ಚಿಸುವ ಭಾರತದ ಗುರಿಯನ್ನು ಸಾಧಿಸಲು, ಭಾರತದಲ್ಲಿ ಮರಗಳ ಹೊದಿಕೆಯನ್ನು ಹೆಚ್ಚಿಸಲು ನಗರ ವನ ಯೋಜನೆ’ ಯನ್ನು ಪ್ರಾರಂಭಿಸಲಾಗಿದೆ. ಈ ಯೋಜನೆಯನ್ನು ಮುಂದಿನ ಐದು ವರ್ಷಗಳವರೆಗೆ ಪ್ರಾರಂಭಿಸಲಾದ ‘ಹಸಿರು ಮಿಷನ್’ ಎರಡನೇ ಹಂತದ ವಿಶೇಷ ಅಭಿಯಾನದಲ್ಲಿ  ಸೇರಿಸಲಾಗಿದೆ.

ಅರಣ್ಯ ಸಮೀಕ್ಷೆ ವರದಿಯ ಪ್ರಮುಖ ಅಂಶಗಳು (ISFR-2021):

  1. ಪ್ರಸ್ತುತ ISFR 2021 ರಲ್ಲಿ, ‘ಫಾರೆಸ್ಟ್ ಸರ್ವೆ ಆಫ್ ಇಂಡಿಯಾ’ (FSI) ಭಾರತದ ಹುಲಿ ಸಂರಕ್ಷಿತ ಪ್ರದೇಶಗಳು, ಕಾರಿಡಾರ್‌ಗಳು ಮತ್ತು ಸಿಂಹ ಸಂರಕ್ಷಣಾ ಪ್ರದೇಶಗಳಲ್ಲಿನ ಅರಣ್ಯದ ಅಂದಾಜಿಗೆ ಸಂಬಂಧಿಸಿದ ಹೊಸ ಅಧ್ಯಾಯವನ್ನು ಸೇರಿಸಿದೆ.
  2. ಈ ಸಂದರ್ಭದಲ್ಲಿ, ಹುಲಿ ಸಂರಕ್ಷಿತ ಪ್ರದೇಶಗಳು, ಕಾರಿಡಾರ್‌ಗಳು ಮತ್ತು ಸಿಂಹ ಸಂರಕ್ಷಣಾ ಪ್ರದೇಶಗಳಲ್ಲಿನ ಅರಣ್ಯ ಪ್ರದೇಶದಲ್ಲಿನ ಬದಲಾವಣೆಗಳ ಕುರಿತಾದ ಈ ದಶಕದ ಮೌಲ್ಯಮಾಪನವು ವರ್ಷಗಳಲ್ಲಿ ಜಾರಿಗೊಳಿಸಲಾದ ಸಂರಕ್ಷಣಾ ಕ್ರಮಗಳು ಮತ್ತು ನಿರ್ವಹಣೆಯ ಪರಿಣಾಮವನ್ನು ನಿರ್ಣಯಿಸಲು ಸಹಾಯ ಮಾಡುತ್ತದೆ.
  3. ‘ಭಾರತೀಯ ಅರಣ್ಯ ಸಮೀಕ್ಷೆ’ಯ ಹೊಸ ಉಪಕ್ರಮದ ಅಡಿಯಲ್ಲಿ ಹೊಸ ಅಧ್ಯಾಯವನ್ನು ಸೇರಿಸಲಾಗಿದೆ, ಇದರಲ್ಲಿ ನೆಲದ ಮೇಲಿನ ಜೀವರಾಶಿಯನ್ನು (Above Ground Biomass – AGB)’ ಅಂದಾಜಿಸಲಾಗಿದೆ. FSI, ಇಸ್ರೋ, ಅಹಮದಾಬಾದ್‌ನ ಬಾಹ್ಯಾಕಾಶ ಅಪ್ಲಿಕೇಶನ್‌ ಕೇಂದ್ರ (SAC) ದ ಸಹಯೋಗದೊಂದಿಗೆ ಆಫ್ ಸಿಂಥೆಟಿಕ್ ಅಪರ್ಚರ್ ರಾಡಾರ್ (SAR) ಡೇಟಾದ ಎಲ್-ಬ್ಯಾಂಡ್ ಅನ್ನು ಬಳಸಿ ಅಖಿಲ ಭಾರತ ಮಟ್ಟದಲ್ಲಿ ನೆಲದ ಮೇಲಿನ ಜೀವರಾಶಿಗಳ (AGB) ಅಂದಾಜಿಗಾಗಿ ವಿಶೇಷ ಅಧ್ಯಯನವನ್ನು ಪ್ರಾರಂಭಿಸಿತು.
  4. ಬಿರ್ಲಾ ಇನ್‌ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ ಅಂಡ್ ಸೈನ್ಸ್ (BITS) ಪಿಲಾನಿಯ ಗೋವಾ ಕ್ಯಾಂಪಸ್‌ನ ಸಹಯೋಗದೊಂದಿಗೆ ಫಾರೆಸ್ಟ್ ಸರ್ವೆ ಆಫ್ ಇಂಡಿಯಾ’ ‘ಭಾರತೀಯ ಅರಣ್ಯಗಳಲ್ಲಿನ ಹವಾಮಾನ ಬದಲಾವಣೆಯ ಹಾಟ್‌ಸ್ಪಾಟ್‌ಗಳನ್ನು ಮ್ಯಾಪಿಂಗ್ ಆಧರಿಸಿ ಅಧ್ಯಯನವನ್ನು ನಡೆಸಿದೆ. ಈ ಸಹಯೋಗಾತ್ಮಕ ಅಧ್ಯಯನವು ಮೂರು ಭವಿಷ್ಯದ ಅವಧಿಗಳಿಗೆ ಅಂದರೆ 2030, 2050 ಮತ್ತು 2085 ಕ್ಕೆ ತಾಪಮಾನ ಮತ್ತು ಮಳೆಯ ದತ್ತಾಂಶದ ಮೇಲೆ ಕಂಪ್ಯೂಟರ್ ಮಾದರಿ-ಆಧಾರಿತ ಅಂದಾಜಿನ ಮೂಲಕ ಭಾರತದಲ್ಲಿ ಅರಣ್ಯದ ಹೊದಿಕೆಯ ಮೇಲೆ ಹವಾಮಾನ ಹಾಟ್‌ಸ್ಪಾಟ್‌ಗಳನ್ನು ಮ್ಯಾಪಿಂಗ್ ಮಾಡುವ ಗುರಿಯನ್ನು ಹೊಂದಿದೆ.
  5. ವರದಿಯು ರಾಜ್ಯ/UT ವಾರು ವಿವಿಧ ನಿಯತಾಂಕಗಳ ಮಾಹಿತಿಯನ್ನು ಒಳಗೊಂಡಿದೆ. ಗುಡ್ಡಗಾಡು, ಬುಡಕಟ್ಟು ಜಿಲ್ಲೆಗಳು ಮತ್ತು ಈಶಾನ್ಯ ಪ್ರದೇಶದ ಅರಣ್ಯ ಪ್ರದೇಶಗಳ ವಿಶೇಷ ವಿಷಯಾಧಾರಿತ ಮಾಹಿತಿಯನ್ನು ವರದಿಯಲ್ಲಿ ಪ್ರತ್ಯೇಕವಾಗಿ ನೀಡಲಾಗಿದೆ.

ದಯವಿಟ್ಟು ಗಮನಿಸಿ:

ಕರ್ನಾಟಕದಲ್ಲಿ 2019ನೇ ಸಾಲಿನ ಅಂದಾಜಿಗೆ ಹೋಲಿಸಿದರೆ ಗರಿಷ್ಠ ಪ್ರಮಾಣದ ಅರಣ್ಯ ಪ್ರದೇಶ ವೃದ್ಧಿಯು ಬೆಳಗಾವಿ (24.06 ಚ.ಕಿ.ಮೀ), ಚಿತ್ರದುರ್ಗ (30.39 ಚ.ಕಿ.ಮೀ), ತುಮಕೂರು ಜಿಲ್ಲೆಯಲ್ಲಿ (39.03 ಚ.ಕಿ.ಮೀ) ಆಗಿದೆ. ಗರಿಷ್ಠ ಪ್ರಮಾಣದಲ್ಲಿ ಅರಣ್ಯ ವ್ಯಾಪ್ತಿಯು ಕುಗ್ಗಿರುವ ಜಿಲ್ಲೆ ಎಂದರೆ ಉಡುಪಿ (26.65 ಚ.ಕಿ.ಮೀ).

ರಾಜ್ಯದ ಏಳು ಪ್ರಮುಖ ನಗರಗಳಿಗೆ ಸಂಬಂಧಿಸಿದಂತೆ ಕಳೆದ ಒಂದು ದಶಕದ ಅಂಕಿ ಅಂಶಗಳ ವಿಶ್ಲೇಷಣೆ ಪ್ರಕಾರ, ಬೆಂಗಳೂರಿನಲ್ಲಿ ಸುಮಾರು 5 ಚದರ ಕಿ.ಮೀ.ನಷ್ಟು ಅರಣ್ಯ ವ್ಯಾಪ್ತಿಯು ಕುಗ್ಗಿದೆ.

ಇದು,  ಸುಮಾರು 700 ಫುಟ್‌ಬಾಲ್‌ ಮೈದಾನಕ್ಕೆ ಸರಿಸಮಾನವಾದುದು. 2011 ಮತ್ತು 2021ರ ಅವಧಿಯಲ್ಲಿ ಇಷ್ಟು ಪ್ರಮಾಣದ ಅರಣ್ಯ ಭೂಮಿ ಕುಗ್ಗಿದೆ.

ಈ ನಷ್ಟದ ಹೊರತಾಗಿಯೂ ದಕ್ಷಿಣ ರಾಜ್ಯಗಳ ಪ್ರಮುಖ ನಗರಗಳಲ್ಲಿ ಒಂದಾದ ಬೆಂಗಳೂರಿನಲ್ಲಿ 89 ಚದರ ಕಿ.ಮೀ.ನಷ್ಟು ಅರಣ್ಯ ಭೂಮಿ ಇದೆ. ಈ ಪಟ್ಟಿಯಲ್ಲಿ ಮೊದಲ ಸ್ಥಾನದಲ್ಲಿ ದೆಹಲಿ (194 ಚದರ ಕಿ.ಮೀ) ಮತ್ತು ಮುಂಬೈ (111 ಚದರ ಕಿ.ಮೀ.) ಇವೆ.

 


ಪೂರ್ವಭಾವಿ ಪರೀಕ್ಷೆಗೆ ಸಂಬಂಧಿಸಿದ ವಿದ್ಯಮಾನಗಳು:


 ಸಿಯಾಚಿನ್ ಹಿಮನದಿ:

ಸಿಯಾಚಿನ್ ಗ್ಲೇಸಿಯರ್ ಬಗ್ಗೆ:

  1. ಇದು ಹಿಮಾಲಯದ ಪೂರ್ವ ಕಾರಕೋರಂ ಶ್ರೇಣಿಯಲ್ಲಿದೆ.
  2. ಇದು ಧ್ರುವೇತರ ಪ್ರದೇಶಗಳಲ್ಲಿರುವ ಪ್ರಪಂಚದ ಎರಡನೇ ಅತಿ ಉದ್ದದ ಹಿಮನದಿ.
  3. ಸಿಯಾಚಿನ್ ಗ್ಲೇಸಿಯರ್ ಯುರೇಷಿಯನ್ ಪ್ಲೇಟ್ ಅನ್ನು ಭಾರತೀಯ ಉಪಖಂಡದಿಂದ ಬೇರ್ಪಡಿಸುವ ‘ಗ್ರೇಟ್ ವಾಟರ್ ಡಿವೈಡ್’ ನ ದಕ್ಷಿಣಕ್ಕೆ ಇದೆ.

ಸುದ್ದಿಯಲ್ಲಿರಲು ಕಾರಣ:

ಸೇನಾ ಮುಖ್ಯಸ್ಥ ಜನರಲ್ ಎಂ.ಎಂ. ನರವಾಣೆ ಇತ್ತೀಚೆಗೆ ಭಾರತವು ಸಿಯಾಚಿನ್ ಗ್ಲೇಸಿಯರ್‌ನ ಸಶಸ್ತ್ರೀಕರಣದ ವಿರುದ್ಧವಾಗಿಲ್ಲ, ಆದರೆ ಇದಕ್ಕಾಗಿ ಪಾಕಿಸ್ತಾನವು ಎರಡು ದೇಶಗಳ ಸ್ಥಾನವನ್ನು ವಿಭಜಿಸುವ ವಾಸ್ತವ ಗ್ರೌಂಡ್ ಪೋಸಿಶನ್ ಲೈನ್ (AGPL) ಅನ್ನು ಒಪ್ಪಿಕೊಳ್ಳಬೇಕಾಗುತ್ತದೆ ಎಂದು ಹೇಳಿದ್ದಾರೆ.

  1. ಸಿಯಾಚಿನ್‌ನ ಮಿಲಿಟರಿಕರಣವು, ಪಾಕಿಸ್ತಾನವು 1984 ರ ಕೊನೆಯಲ್ಲಿ ಯಥಾಸ್ಥಿತಿಯನ್ನು ಏಕಪಕ್ಷೀಯವಾಗಿ ಬದಲಾಯಿಸಲು ನಡೆಸಿದ ಪ್ರಯತ್ನದ ಫಲವಾಗಿದೆ. ಪಾಕಿಸ್ತಾನದ ಈ ಕ್ರಮವು ಭಾರತವನ್ನು ಪ್ರತೀಕಾರದ ಕ್ರಮಗಳನ್ನು ಕೈಗೊಳ್ಳುವಂತೆ ಪ್ರೇರೇಪಿಸಿತು ಎಂದು ಸೇನಾ ಮುಖ್ಯಸ್ಥರು ಹೇಳಿದರು.

 

ಇಸ್ರೋದ ಹೊಸ ಮುಖ್ಯಸ್ಥ:

ಭಾರತೀಯ ಬಾಹ್ಯಾಕಾಶ ಮತ್ತು ಸಂಶೋಧನಾ ಸಂಸ್ಥೆ(ಇಸ್ರೋ)ಯ ನೂತನ ಮುಖ್ಯಸ್ಥರನ್ನಾಗಿ ರಾಕೆಟ್‌ ವಿಜ್ಞಾನ ತಜ್ಞರಾದ ಎಸ್‌. ಸೋಮನಾಥ್‌ ಅವರನ್ನು ಕೇಂದ್ರ ಸರಕಾರ ನೇಮಕ ಮಾಡಿದೆ.

  1. ಹಾಲಿ ಅಧ್ಯಕ್ಷ ಕೆ. ಶಿವನ್‌ ಅವರ ಅಧಿಕಾರಾವಧಿ ಮುಗಿದ ಬಳಿಕ ಕೇರಳ ಮೂಲದ ಸೋಮನಾಥ್‌ ಅಧಿಕಾರ ವಹಿಸಿಕೊಳ್ಳಲಿದ್ದಾರೆ. ಜಿಎಸ್‌ಎಲ್‌ವಿ ಎಂಕೆ-3 ಉಡಾವಣ ವಾಹಕವನ್ನು ಅಭಿವೃದ್ಧಿಪಡಿಸುವಲ್ಲಿ ಸೋಮನಾಥ್‌ ಪ್ರಮುಖ ಪಾತ್ರ ವಹಿಸಿದ್ದರು. ಅವರು ಇಸ್ರೋ ಅಧ್ಯಕ್ಷರಾಗಿ ಮಾತ್ರವಲ್ಲದೆ ಬಾಹ್ಯಾಕಾಶ ಇಲಾಖೆಯ ಕಾರ್ಯದರ್ಶಿಯೂ ಆಗಿರಲಿದ್ದಾರೆ.
  2. ಕೇರಳದಲ್ಲಿ ಜನಿಸಿದ್ದ ಸೋಮನಾಥ್‌ ಕೊಲ್ಲಂನಲ್ಲಿ ಎಂಜಿನಿಯರಿಂಗ್‌ ವ್ಯಾಸಂಗ ಮಾಡಿದ್ದರು. ಬಳಿಕ ಬೆಂಗಳೂರಿನ ಐಐಎಸ್‌ಸಿಯಲ್ಲಿ ಏರೋಸ್ಪೇಸ್‌ ಎಂಜಿನಿಯರಿಂಗ್‌ನಲ್ಲಿ ಸ್ನಾತಕೋತ್ತರ ಪದವಿ ಪೂರೈಸಿದ್ದರು. 2010ರಿಂದ 2014ರ ವರೆಗೆ ಜಿಎಸ್‌ಎಲ್‌ವಿ ಎಂಕೆ-3 ವಾಹಕದ ಪ್ರಾಜೆಕ್ಟ್ ಡೈರೆಕ್ಟರ್‌ ಆಗಿ ಸೇವೆ ಸಲ್ಲಿಸಿದ್ದರು.

Current Affairs

 


  • Join our Official Telegram Channel HERE for Motivation and Fast Updates
  • Subscribe to our YouTube Channel HERE to watch Motivational and New analysis videos