[Mission 2022] ದೈನಂದಿನ ಪ್ರಚಲಿತ ಘಟನೆಗಳು ದಿನಾಂಕ – 30ನೇ ಅಕ್ಟೋಬರ್ 2021

ಪರಿವಿಡಿ:

 ಸಾಮಾನ್ಯ ಅಧ್ಯಯನ ಪತ್ರಿಕೆ 2:

1. ಭಾರತದ ಲೆಕ್ಕ ನಿಯಂತ್ರಕರು ಮತ್ತು ಮಹಾಲೆಕ್ಕ ಪರಿಶೋಧಕರು.

2. MGNREGA ಬೊಕ್ಕಸದಲ್ಲಿ ಯಾವುದೇ ಹಣ ಉಳಿದಿಲ್ಲ.

3. ನ್ಯುಮೋಕೊಕಲ್ 13-ವ್ಯಾಲೆಂಟ್ ಕಾಂಜುಗೇಟ್ ಲಸಿಕೆ (PCV).

ಸಾಮಾನ್ಯ ಅಧ್ಯಯನ ಪತ್ರಿಕೆ 3:

1. 2020 ರಲ್ಲಿ ಕೃಷಿ ಕಾರ್ಮಿಕರ ಆತ್ಮಹತ್ಯೆ ಪ್ರಕರಣಗಳು 18% ಹೆಚ್ಚಾಗಿದೆ.

2. ಡೇಟಾ ಸಂರಕ್ಷಣಾ ಮಸೂದೆ 2019.

ಪೂರ್ವಭಾವಿ ಪರೀಕ್ಷೆಗೆ ಸಂಬಂಧಿಸಿದ ವಿದ್ಯಮಾನಗಳು:

1. ಅತ್ಯುತ್ತಮ ಸಾರ್ವಜನಿಕ ಸಾರಿಗೆ ಪ್ರಶಸ್ತಿಯನ್ನು ಗೆದ್ದ ಸೂರತ್.

ಸಾಮಾನ್ಯ ಅಧ್ಯಯನ ಪತ್ರಿಕೆ : 2

ವಿಷಯಗಳು: ವಿವಿಧ ಸಾಂವಿಧಾನಿಕ ಹುದ್ದೆಗಳಿಗೆ ನೇಮಕಾತಿ,ವಿವಿಧ ಸಾಂವಿಧಾನಿಕ ಸಂಸ್ಥೆಗಳ ಅಧಿಕಾರಗಳು, ಕಾರ್ಯಗಳು ಮತ್ತು ಜವಾಬ್ದಾರಿಗಳು.

ಭಾರತದ ಲೆಕ್ಕ ನಿಯಂತ್ರಕರು ಮತ್ತು ಮಹಾಲೆಕ್ಕ ಪರಿಶೋಧಕರು:

ಸಂದರ್ಭ:

ಭಾರತದ ಲೆಕ್ಕ ನಿಯಂತ್ರಕರು ಮತ್ತು ಮಹಾಲೆಕ್ಕ ಪರಿಶೋಧಕರು (Comptroller and Auditor General of India – CAG) ಮತ್ತು ಮಾಲ್ಡೀವ್ಸ್‌ನ ಆಡಿಟರ್ ಜನರಲ್  (Auditor General of Maldives) ಅವರು ಸಾರ್ವಜನಿಕ ಹಣಕಾಸಿನ ಲೆಕ್ಕಪರಿಶೋಧನಾ ಪ್ರಕ್ರಿಯೆಯನ್ನು ಬಲಪಡಿಸಲು ತಿಳುವಳಿಕೆ ಪತ್ರಕ್ಕೆ ಸಹಿ ಹಾಕಿದ್ದಾರೆ.

1. ಎರಡೂ ದೇಶಗಳ ನಡುವೆ ಸಾರ್ವಜನಿಕ ವಲಯದ ಲೆಕ್ಕಪರಿಶೋಧನೆಯ ಕ್ಷೇತ್ರದಲ್ಲಿ ಮಾಹಿತಿ ವಿನಿಮಯ ಮಾಡಿಕೊಳ್ಳುವ ಗುರಿಯನ್ನು ಸಹ ಈ ಒಪ್ಪಂದ / ತಿಳುವಳಿಕೆ ಪತ್ರ (memorandum of understanding) ಹೊಂದಿದೆ.

CAG ಬಗ್ಗೆ:

1. ಭಾರತದ ಸಂವಿಧಾನದ ಭಾಗ V ರ ಅಡಿಯ ಅಧ್ಯಾಯ V ರಲ್ಲಿ ಕಂಟ್ರೋಲರ್ ಮತ್ತು ಆಡಿಟರ್ ಜನರಲ್ ಆಫ್ ಇಂಡಿಯಾ (CAG) ದ ಸ್ವತಂತ್ರ ಕಚೇರಿಯನ್ನು ಒದಗಿಸಲಾಗಿದೆ ಎಂಬ ನಿಬಂಧನೆಯನ್ನು ಮಾಡಲಾಗಿದೆ.
2. ಸಿಎಜಿಯನ್ನು ಭಾರತದ ಸಂವಿಧಾನದಲ್ಲಿ ಆರ್ಟಿಕಲ್ 148 – 151 ರ ಅಡಿಯಲ್ಲಿ ಉಲ್ಲೇಖಿಸಲಾಗಿದೆ.
3. ಅವರು ಭಾರತೀಯ ಲೆಕ್ಕಪರಿಶೋಧನೆ ಮತ್ತು ಲೆಕ್ಕಪತ್ರ ವಿಭಾಗದ ಮುಖ್ಯಸ್ಥರಾಗಿದ್ದಾರೆ.
4. ಅವರು ಸಾರ್ವಜನಿಕ ಹಣದ ರಕ್ಷಕರಾಗಿದ್ದಾರೆ ಮತ್ತು ದೇಶದ ಸಂಪೂರ್ಣ ಹಣಕಾಸು ವ್ಯವಸ್ಥೆಯನ್ನು ಕೇಂದ್ರ ಮತ್ತು ರಾಜ್ಯ ಎರಡೂ ಹಂತಗಳಲ್ಲಿ ನಿಯಂತ್ರಿಸುತ್ತಾರೆ.
5. ಆರ್ಥಿಕ ಆಡಳಿತ ಕ್ಷೇತ್ರದಲ್ಲಿ ಭಾರತದ ಸಂವಿಧಾನ ಮತ್ತು ಸಂಸತ್ತಿನ ಕಾನೂನುಗಳನ್ನು ಎತ್ತಿಹಿಡಿಯುವುದು ಅವರ ಕರ್ತವ್ಯವಾಗಿದೆ.

ಸಾಂವಿಧಾನಿಕ ಹುದ್ದೆಗಳಿಗೆ ನೇಮಕಾತಿ ಮತ್ತು ಅಧಿಕಾರವಧಿ:

1. ಸಿಎಜಿಯನ್ನು ಭಾರತದ ರಾಷ್ಟ್ರಪತಿಗಳು ತಮ್ಮ ಸಹಿ ಮತ್ತು ಮುದ್ರೆಯ ಅಡಿಯಲ್ಲಿ ವಾರಂಟ್ ಮೂಲಕ ನೇಮಕ ಮಾಡುತ್ತಾರೆ.
2. ಅವರು ಆರು ವರ್ಷಗಳ ಅವಧಿಗೆ ಅಥವಾ 65 ವರ್ಷಗಳವರೆಗೆ, ಯಾವುದು ಮೊದಲೋ ಅಲ್ಲಿಯವರೆಗೆ ಅಧಿಕಾರವನ್ನು ಹೊಂದಿರುತ್ತಾರೆ.
3. ಇವರ ವೇತನ ಸರ್ವೋಚ್ಚ ನ್ಯಾಯಾಲಯದ ನ್ಯಾಯಾಧೀಶರ ವೇತನಕ್ಕೆ ಸಮನಾಗಿರುತ್ತದೆ.
4. ಇವರನ್ನು ಅಧಿಕಾರದಿಂದ ತೆಗೆಯಬೇಕಾದರೆ ಸಂಸತ್ತಿನ ಶಿಫಾರಸಿನ ಮೇರೆಗೆ ರಾಷ್ಟ್ರಪತಿಗಳು ಕ್ರಮ ಕೈಗೊಳ್ಳುತ್ತಾರೆ.
5. CAG ನಿವೃತ್ತಿ ಹೊಂದಿದ ಮೇಲೆ ಭಾರತ ಸರಕಾರದ ಅಥವಾ ಒಕ್ಕೂಟದ ಯಾವುದೇ ರಾಜ್ಯ ಸರ್ಕಾರದ ಅಧೀನದಲ್ಲಿರುವ ಯಾವುದೇ ಹುದ್ದೆಗೆ ನೇಮಕಗೊಳ್ಳಲು ಅರ್ಹರಾಗಿರುವುದಿಲ್ಲ.

ಕರ್ತವ್ಯಗಳು:

1. CAG ಭಾರತದ ಸಂಚಿತ ನಿಧಿಯಿಂದ ಮಾಡಲಾದ ಎಲ್ಲಾ ವೆಚ್ಚಗಳಿಗೆ ಸಂಬಂಧಿಸಿದ ಖಾತೆಗಳನ್ನು ಲೆಕ್ಕಪರಿಶೋಧಿಸುತ್ತದೆ, ಹಾಗೂ ಪ್ರತಿ ರಾಜ್ಯ ಮತ್ತು ಶಾಸಕಾಂಗ ಸಭೆಯನ್ನು ಹೊಂದಿರುವ ಕೇಂದ್ರಾಡಳಿತ ಪ್ರದೇಶಗಳ ಸಂಚಿತ ನಿಧಿಯ ಖಾತೆಗಳನ್ನು ಲೆಕ್ಕಪರಿಶೋಧನೆ ಮಾಡುತ್ತದೆ.
2. CAG ಭಾರತದ ಸಾದಿಲ್ವಾರು ನಿಧಿ ಮತ್ತು ಭಾರತದ ಸಾರ್ವಜನಿಕ ಖಾತೆ ಮತ್ತು ಪ್ರತಿ ರಾಜ್ಯದ ಸಾದಿಲ್ವಾರು ನಿಧಿ ಮತ್ತು ಸಾರ್ವಜನಿಕ ಖಾತೆಯಿಂದ ಮಾಡಲಾದ ಎಲ್ಲಾ ಖರ್ಚುಗಳನ್ನು ಲೆಕ್ಕಪರಿಶೋಧಿಸುತ್ತದೆ.
3. CAG ಎಲ್ಲಾ ವ್ಯಾಪಾರ, ಉತ್ಪಾದನೆ, ಲಾಭ ಮತ್ತು ನಷ್ಟದ ಖಾತೆಗಳು, ಬ್ಯಾಲೆನ್ಸ್ ಶೀಟ್‌ಗಳು ಮತ್ತು ಕೇಂದ್ರ ಸರ್ಕಾರ ಮತ್ತು ರಾಜ್ಯ ಸರ್ಕಾರಗಳ ಯಾವುದೇ ಇಲಾಖೆಯು ಹೊಂದಿರುವ ಇತರ ಅಂಗಸಂಸ್ಥೆ ಖಾತೆಗಳನ್ನು ಲೆಕ್ಕಪರಿಶೋಧಿಸುತ್ತದೆ.
4. CAG ಸಂಬಂಧಿತ ಕಾನೂನುಗಳು ಬಯಸಿದಾಗ ಹಾಗೂ ಅಗತ್ಯವಿದ್ದಲ್ಲಿ, ಕೇಂದ್ರ ಅಥವಾ ರಾಜ್ಯ ಆದಾಯದಿಂದ ಗಣನೀಯವಾಗಿ ಹಣಕಾಸು ನೆರವು ಪಡೆಯುವ ಎಲ್ಲಾ ಸಂಸ್ಥೆಗಳು ಮತ್ತು ಪ್ರಾಧಿಕಾರಗಳ ಸ್ವೀಕೃತಿಗಳು ಮತ್ತು ವೆಚ್ಚಗಳನ್ನು ಲೆಕ್ಕಪರಿಶೋಧಿಸುತ್ತದೆ; ಸರ್ಕಾರಿ ಕಂಪನಿಗಳು; ಇತರ ನಿಗಮಗಳು ಮತ್ತು ಸಂಸ್ಥೆಗಳ ಲೆಕ್ಕಪರಿಶೋಧಿಸುತ್ತದೆ.
5. ಅವರು ಯಾವುದೇ ತೆರಿಗೆ ಅಥವಾ ಸುಂಕದ ನಿವ್ವಳ ಆದಾಯವನ್ನು ಖಚಿತಪಡಿಸಿಕೊಳ್ಳುತ್ತಾರೆ ಮತ್ತು ಪ್ರಮಾಣೀಕರಿಸುತ್ತಾರೆ ಮತ್ತು ಅವರ ಪ್ರಮಾಣಪತ್ರವು ಈ ವಿಷಯದಲ್ಲಿ ಅಂತಿಮವಾಗಿರುತ್ತದೆ.

ಅವರು ಸಂಸತ್ತಿನ ಸಾರ್ವಜನಿಕ ಲೆಕ್ಕಪತ್ರ ಸಮಿತಿಯ ಮಾರ್ಗದರ್ಶಿ, ಸ್ನೇಹಿತ ಮತ್ತು ತತ್ವಜ್ಞಾನಿಯಾಗಿ ಕಾರ್ಯನಿರ್ವಹಿಸುತ್ತಾರೆ.

ವರದಿಗಳು:

1. CAG ರವರು ಕೇಂದ್ರ ಮತ್ತು ರಾಜ್ಯದ ಖಾತೆಗಳಿಗೆ ಸಂಬಂಧಿಸಿದ ತನ್ನ ಲೆಕ್ಕಪರಿಶೋಧನಾ ವರದಿಗಳನ್ನು ರಾಷ್ಟ್ರಪತಿ ಮತ್ತು ಸಂಬಂಧಿಸಿದ ರಾಜ್ಯಗಳ ರಾಜ್ಯಪಾಲರಿಗೆ ಸಲ್ಲಿಸುತ್ತಾರೆ, ರಾಷ್ಟ್ರಪತಿಗಳು ಕೇಂದ್ರದ ವರದಿಯನ್ನು ಸಂಸತ್ತಿನ ಎರಡೂ ಸದನಗಳಲ್ಲಿ ಮತ್ತು ರಾಜಪಾಲರು ರಾಜ್ಯ ಶಾಸಕಾಂಗದಲ್ಲಿ ಮಂಡಿಸಲು ಕ್ರಮ ಕೈಗೊಳ್ಳುತ್ತಾರೆ.
2. ಅವರು ಅಧ್ಯಕ್ಷರಿಗೆ 3 ಆಡಿಟ್ ವರದಿಗಳನ್ನು ಸಲ್ಲಿಸುತ್ತಾರೆ: ವಿನಿಯೋಗ ಖಾತೆಗಳ ಲೆಕ್ಕಪರಿಶೋಧನಾ ವರದಿ(Audit report on appropriation accounts), ಹಣಕಾಸು ಖಾತೆಗಳ ಲೆಕ್ಕಪರಿಶೋಧನಾ ವರದಿ (audit report on finance accounts) ಮತ್ತು ಸಾರ್ವಜನಿಕ ಉದ್ಯಮಗಳ ಮೇಲಿನ ಲೆಕ್ಕ ಪರಿಶೋಧನಾ ವರದಿ (audit report on public undertakings).

ವಿಷಯಗಳು: ಕೇಂದ್ರ ಮತ್ತು ರಾಜ್ಯಗಳಿಂದ  ದುರ್ಬಲ ವರ್ಗದ ಜನಸಮುದಾಯದವರಿಗೆ ಇರುವ ಕಲ್ಯಾಣ ಯೋಜನೆಗಳು ಮತ್ತು ಈ ಯೋಜನೆಗಳ ಕಾರ್ಯಕ್ಷಮತೆ; ಕಾರ್ಯವಿಧಾನಗಳು,ಕಾನೂನುಗಳು, ಸಂಸ್ಥೆಗಳು ಮತ್ತು ಈ ದುರ್ಬಲ ವಿಭಾಗಗಳ ರಕ್ಷಣೆ ಮತ್ತು ಸುಧಾರಣೆಗಾಗಿ ರಚಿಸಲಾದ ಸಂಸ್ಥೆಗಳು.

MGNREGA ಬೊಕ್ಕಸದಲ್ಲಿ ಯಾವುದೇ ಹಣ ಉಳಿದಿಲ್ಲ

(No money left in MGNREGA coffers)

ಸಂದರ್ಭ:

ಸರ್ಕಾರವು ನೀಡಿದ ತನ್ನದೇ ಆದ ಹಣಕಾಸು ಹೇಳಿಕೆ (financial statement)ಯ ಪ್ರಕಾರ, ಮಹಾತ್ಮ ಗಾಂಧಿ ರಾಷ್ಟ್ರೀಯ ಗ್ರಾಮೀಣ ಉದ್ಯೋಗ ಖಾತರಿ ಕಾಯಿದೆ (MGNREGA) ಯೋಜನೆಗೆ ಕಾಯ್ದಿರಿಸಿದ ಹಣವು ಈ ಆರ್ಥಿಕ ವರ್ಷದ ಅರ್ಧದಲ್ಲೇ  ಖಾಲಿಯಾಗಿದೆ ಮತ್ತು ಈ ಬಿಕ್ಕಟ್ಟಿನಿಂದ ಯೋಜನೆಯನ್ನು ಹೊರತರಲು ‘ಪೂರಕ ಬಜೆಟ್ ಹಂಚಿಕೆ’ ಮುಂದಿನ ಸಂಸತ್ತಿನ ಅಧಿವೇಶನ ಪ್ರಾರಂಭವಾಗುವ ಮೊದಲು ಮಾಡಲಾಗುವುದಿಲ್ಲ. ಮುಂದಿನ ಸಂಸತ್ ಅಧಿವೇಶನ ಆರಂಭವಾಗಲು ಇನ್ನೂ ಕನಿಷ್ಠ ಒಂದು ತಿಂಗಳು ಬಾಕಿ ಇದೆ.

ಪರಿಣಾಮಗಳು:

ಇದರರ್ಥ,ರಾಜ್ಯಗಳು ತಮ್ಮ ಸ್ವಂತ ನಿಧಿಯಿಂದ ಹಣವನ್ನು ಬಿಡುಗಡೆ ಮಾಡದ ಹೊರತು MGNREGA ಕಾರ್ಮಿಕರ ವೇತನ ಪಾವತಿಗಳು ಮತ್ತು ಬಳಸಿದ ಸಲಕರಣೆ ವೆಚ್ಚಗಳು ವಿಳಂಬವಾಗುತ್ತವೆ.

ಆರ್ಥಿಕ ಸಂಕಷ್ಟದ ಸಮಯದಲ್ಲಿ ವೇತನ ಪಾವತಿಯನ್ನು ವಿಳಂಬ ಮಾಡುವ ಮೂಲಕ ಕೇಂದ್ರವು ಕಾರ್ಮಿಕರನ್ನು “ಬಲವಂತದ ದುಡಿಮೆಗೆ” ಒಳಪಡಿಸುತ್ತಿದೆ ಎಂದು ಕಾರ್ಯಕರ್ತರು ಹೇಳುತ್ತಾರೆ.

ಕೇಂದ್ರದ ಪ್ರತಿಕ್ರಿಯೆ:

ಆದಾಗ್ಯೂ, ಕೇಂದ್ರವು ಈಗ ಅನೇಕ ರಾಜ್ಯಗಳು  ಭೂಮಿಯಲ್ಲಿ ಕೆಲಸಕ್ಕಾಗಿ ಬೇಡಿಕೆಯನ್ನು “ಕೃತಕವಾಗಿ ಸೃಷ್ಟಿಸುತ್ತಿವೆ” ಎಂದು ಆರೋಪಿಸುತ್ತಿದೆ.

MGNREGA ಯೋಜನೆಯ ಕುರಿತು:

ಈ ಯೋಜನೆಯನ್ನು 2005 ರಲ್ಲಿ “ಕೆಲಸದ ಹಕ್ಕನ್ನು”(Right to Work) ಖಾತರಿಪಡಿಸುವ ಸಾಮಾಜಿಕ ಕ್ರಮವಾಗಿ ಪರಿಚಯಿಸಲಾಯಿತು.

ಈ ಸಾಮಾಜಿಕ ಅಳತೆ ಮತ್ತು ಕಾರ್ಮಿಕ ಕಾನೂನಿನ ಪ್ರಮುಖ ಸಿದ್ಧಾಂತವೆಂದರೆ ಗ್ರಾಮೀಣ ಭಾರತದಲ್ಲಿ ಸ್ಥಳೀಯ ಸರ್ಕಾರವು ಗ್ರಾಮೀಣ ಕೌಶಲ್ಯರಹಿತ ಜನರ ಜೀವನ ಮಟ್ಟವನ್ನು ಹೆಚ್ಚಿಸಲು ಕಾನೂನುಬದ್ಧವಾಗಿ ಕನಿಷ್ಠ 100 ದಿನಗಳ ವೇತನ ಉದ್ಯೋಗವನ್ನು ಒದಗಿಸಬೇಕಾಗುತ್ತದೆ.

ಪ್ರಮುಖ ಉದ್ದೇಶಗಳು:

1. ಕೌಶಲ್ಯರಹಿತ ಕಾಮಗಾರಿಗಳನ್ನು ಮಾಡಲು ಸಿದ್ಧರಿರುವ ಪ್ರತಿ ಕುಟುಂಬದ ವಯಸ್ಕ ಕಾರ್ಮಿಕರಿಗೆ 100 ದಿನಗಳಿಗಿಂತ ಕಡಿಮೆಯಿಲ್ಲದ ಅಥವಾ ಕನಿಷ್ಠ 100 ದಿನಗಳ ಸಂಬಳ ಸಹಿತ ಗ್ರಾಮೀಣ ಉದ್ಯೋಗದ ಒದಗಿಸುವಿಕೆ.
2. ಗ್ರಾಮೀಣ ಬಡವರ ಜೀವನೋಪಾಯವನ್ನು ಬಲಪಡಿಸುವ ಮೂಲಕ ಸಾಮಾಜಿಕ ಸೇರ್ಪಡೆಗಾಗಿ ಪೂರ್ವಭಾವಿಯಾಗಿ ಖಾತರಿನೀಡುವುದು.
3. ಬಾವಿಗಳು, ಕೊಳಗಳು, ರಸ್ತೆಗಳು ಮತ್ತು ಕಾಲುವೆಗಳಂತಹ ಗ್ರಾಮೀಣ ಪ್ರದೇಶಗಳಲ್ಲಿ ಬಾಳಿಕೆ ಬರುವ ಸ್ಥಿರ ಆಸ್ತಿಗಳ ಸೃಷ್ಟಿ.
4. ಗ್ರಾಮೀಣ ಪ್ರದೇಶಗಳಿಂದ ನಗರ ವಲಸೆಯನ್ನು ಕಡಿಮೆ ಮಾಡುವುದು.
5. ತರಬೇತಿ ರಹಿತ ಗ್ರಾಮೀಣ ಕಾರ್ಮಿಕರನ್ನು ಬಳಸಿಕೊಂಡು ಗ್ರಾಮೀಣ ಮೂಲಸೌಕರ್ಯಗಳನ್ನು ರಚಿಸುವುದು.

MGNREGA ಯೋಜನೆಯಡಿ ಪ್ರಯೋಜನಗಳನ್ನು ಪಡೆಯುವ ಅರ್ಹತಾ ಮಾನದಂಡಗಳು ಈ ಕೆಳಗಿನಂತಿವೆ:

1. MGNREGA ಯೋಜನೆಯ ಪ್ರಯೋಜನಗಳನ್ನು ಪಡೆಯಲು ಅವರು ಭಾರತದ ನಾಗರಿಕರಾಗಿರಬೇಕು.
2. ಉದ್ಯೋಗಕ್ಕೆ ಅರ್ಜಿ ಸಲ್ಲಿಸುವ ಸಮಯದಲ್ಲಿ ಆ ವ್ಯಕ್ತಿಯು 18 ವರ್ಷಗಳನ್ನು ಪೂರೈಸಿರಬೇಕು.
3. ಅರ್ಜಿದಾರನು ಸ್ಥಳೀಯ ಪ್ರದೇಶದ ಭಾಗವಾಗಿರಬೇಕು (ಅಂದರೆ ಸ್ಥಳೀಯ ಗ್ರಾಮ ಪಂಚಾಯಿತಿಯ ಮೂಲಕ ಅರ್ಜಿ ಸಲ್ಲಿಸಬೇಕು).
4. ಅರ್ಜಿದಾರರು ಸ್ವಯಂಪ್ರೇರಣೆಯಿಂದ ಕೌಶಲ್ಯರಹಿತ ಕೆಲಸಗಳನ್ನು ಮಾಡಲು ಮುಂದೆ ಬರಬೇಕು.

MGNREGA ಯೋಜನೆಯಡಿ ಪ್ರಯೋಜನಗಳನ್ನು ಪಡೆಯುವ ಅರ್ಹತಾ ಮಾನದಂಡಗಳು ಈ ಕೆಳಗಿನಂತಿವೆ:

1. MGNREGA ಯೋಜನೆಯ ಪ್ರಯೋಜನಗಳನ್ನು ಪಡೆಯಲು ಅವರು ಭಾರತದ ನಾಗರಿಕರಾಗಿರಬೇಕು.
2. ಉದ್ಯೋಗಕ್ಕೆ ಅರ್ಜಿ ಸಲ್ಲಿಸುವ ಸಮಯದಲ್ಲಿ ಆ ವ್ಯಕ್ತಿಯು 18 ವರ್ಷಗಳನ್ನು ಪೂರೈಸಿರಬೇಕು.
3. ಅರ್ಜಿದಾರನು ಸ್ಥಳೀಯ ಪ್ರದೇಶದ ಭಾಗವಾಗಿರಬೇಕು (ಅಂದರೆ ಸ್ಥಳೀಯ ಗ್ರಾಮ ಪಂಚಾಯಿತಿಯ ಮೂಲಕ ಅರ್ಜಿ ಸಲ್ಲಿಸಬೇಕು).
4. ಅರ್ಜಿದಾರರು ಸ್ವಯಂಪ್ರೇರಣೆಯಿಂದ ಕೌಶಲ್ಯರಹಿತ ಕೆಲಸಗಳನ್ನು ಮಾಡಲು ಮುಂದೆ ಬರಬೇಕು.

ಯೋಜನೆಯ ಅನುಷ್ಠಾನ:

1. ಕೆಲಸಕ್ಕಾಗಿ ಅರ್ಜಿಯನ್ನು ಸಲ್ಲಿಸಿದ 15 ದಿನಗಳಲ್ಲಿ ಅಥವಾ ಕೆಲಸಕ್ಕೆ ಅರ್ಜಿ ಸಲ್ಲಿಸಿದ ದಿನಾಂಕದಿಂದ, ಅರ್ಜಿದಾರರಿಗೆ ವೇತನ ಉದ್ಯೋಗವನ್ನು ಒದಗಿಸಲಾಗುತ್ತದೆ.
2. ಉದ್ಯೋಗವು ಲಭ್ಯವಿಲ್ಲದಿದ್ದ ಸಂದರ್ಭದಲ್ಲಿ ಅರ್ಜಿಯನ್ನು ಸಲ್ಲಿಸಿದ ಹದಿನೈದು ದಿನಗಳಲ್ಲಿ ಅಥವಾ ಕೆಲಸ ಕೋರಿದ ದಿನಾಂಕದಿಂದ ಉದ್ಯೋಗವನ್ನು ಒದಗಿಸದಿದ್ದಲ್ಲಿ ನಿರುದ್ಯೋಗ ಭತ್ಯೆ ಪಡೆಯುವ ಹಕ್ಕು.
3. MGNREGA ಕಾರ್ಯಚಟುವಟಿಕೆಗಳ ಸಾಮಾಜಿಕ ಲೆಕ್ಕಪರಿಶೋಧನೆಯು ಕಡ್ಡಾಯವಾಗಿದೆ, ಆ ಮೂಲಕ ಕಾರ್ಯಕ್ರಮದಲ್ಲಿ ಹೊಣೆಗಾರಿಕೆ ಮತ್ತು ಪಾರದರ್ಶಕತೆಯನ್ನು ಖಾತರಿ ಪಡಿಸಲಾಗಿದೆ.
4. ವೇತನ ಪಡೆಯುವವರು ಧ್ವನಿ ಎತ್ತುವ ಮತ್ತು ದೂರುಗಳನ್ನು ಸಲ್ಲಿಸುವ ಪ್ರಮುಖ ವೇದಿಕೆ ಗ್ರಾಮಸಭೆಯಾಗಿದೆ.
5. MGNREGA ಅಡಿಯಲ್ಲಿ ಮಾಡಲಾಗುವ ಕಾಮಗಾರಿಗಳಿಗೆ ಅನುಮೋದನೆ ನೀಡುವುದು ಮತ್ತು ಅವುಗಳಿಗೆ ಆದ್ಯತೆಯನ್ನು ನೀಡುವ ಜವಾಬ್ದಾರಿಯು ಗ್ರಾಮಸಭೆ ಮತ್ತು ಗ್ರಾಮ ಪಂಚಾಯಿತಿಗಳದಾಗಿರುತ್ತದೆ.

ವಿಷಯಗಳು: ಆರೋಗ್ಯ, ಶಿಕ್ಷಣ, ಸಾಮಾಜಿಕ ವಲಯ / ಸೇವೆಗಳ ಅಭಿವೃದ್ಧಿ ಮತ್ತು ನಿರ್ವಹಣೆಗೆ ಸಂಬಂಧಿಸಿದ ಮಾನವ ಸಂಪನ್ಮೂಲ ಸಂಬಂಧಿತ ವಿಷಯಗಳು.

ನ್ಯುಮೋಕೊಕಲ್ 13-ವ್ಯಾಲೆಂಟ್ ಕಾಂಜುಗೇಟ್ ಲಸಿಕೆ (PCV):

(Pneumococcal 13-valent Conjugate Vaccine (PCV)

ಸಂದರ್ಭ:

‘ಆಜಾದಿ ಕಾ ಅಮೃತ್ ಮಹೋತ್ಸವ’ ಕಾರ್ಯಕ್ರಮದ ಭಾಗವಾಗಿ ಯುನಿವರ್ಸಲ್ ಇಮ್ಯುನೈಸೇಶನ್ ಪ್ರೋಗ್ರಾಂ / ಸಾರ್ವತ್ರಿಕ ರೋಗನಿರೋಧಕ ಕಾರ್ಯಕ್ರಮ (Universal Immunisation Programme-UIP) ಅಡಿಯಲ್ಲಿ ಸರ್ಕಾರವು ನ್ಯುಮೋಕೊಕಲ್ 13-ವ್ಯಾಲೆಂಟ್ ಕಾಂಜುಗೇಟ್ ಲಸಿಕೆ (Pneumococcal 13-valent Conjugate Vaccine-PCV) ಯನ್ನು ಉಪಲಬ್ಧ ಗೊಳಿಸಲು ಈ ಕಾರ್ಯಕ್ರಮದ ರಾಷ್ಟ್ರವ್ಯಾಪಿ ವಿಸ್ತರಣೆಯನ್ನು ಪ್ರಾರಂಭಿಸಿದೆ.

1. ದೇಶದಲ್ಲೇ ಮೊದಲ ಬಾರಿಗೆ PCV ಲಸಿಕೆಯು ಸಾರ್ವತ್ರಿಕ ಬಳಕೆಗೆ ಲಭ್ಯವಾಗಲಿದೆ.
2. ನ್ಯುಮೋಕೊಕಲ್ ಕಾಯಿಲೆಗೆ ಕಾರಣವಾಗುವ 13 ವಿಧದ ಬ್ಯಾಕ್ಟೀರಿಯಾಗಳ ವಿರುದ್ಧ PCV13 ರಕ್ಷಿಸುತ್ತದೆ.

ನ್ಯುಮೋನಿಯಾ ಎಂದರೇನು?

1. ಮಕ್ಕಳಲ್ಲಿ ತೀವ್ರವಾದ ನ್ಯುಮೋನಿಯಾಕ್ಕೆ ನ್ಯುಮೋಕೊಕಸ್ನಿಂದ ಉಂಟಾಗುವ ನ್ಯುಮೋನಿಯಾ ಸಾಮಾನ್ಯ ಕಾರಣವಾಗಿದೆ.
2. ಜಾಗತಿಕವಾಗಿ ಮತ್ತು ಭಾರತದಲ್ಲಿ ಐದು ವರ್ಷದೊಳಗಿನ ಮಕ್ಕಳ ಸಾವಿಗೆ ನ್ಯುಮೋನಿಯಾ ಪ್ರಮುಖ ಕಾರಣವಾಗಿದೆ. ಭಾರತದಲ್ಲಿ ನ್ಯುಮೋನಿಯಾದಿಂದ ಸುಮಾರು 16% ರಷ್ಟು ಮಕ್ಕಳ ಸಾವುಗಳು ಸಂಭವಿಸುತ್ತದೆ.

ನ್ಯುಮೋಕೊಕಲ್ ಕಾಯಿಲೆ ಎಂದರೇನು?

ನ್ಯುಮೋಕೊಕಲ್ ರೋಗವು(Pneumococcal disease) ನ್ಯುಮೋಕೊಕಲ್ ಬ್ಯಾಕ್ಟೀರಿಯಾದಿಂದ ಉಂಟಾಗುವ ಯಾವುದೇ ಅನಾರೋಗ್ಯವನ್ನು ಸೂಚಿಸುತ್ತದೆ. ಈ ಬ್ಯಾಕ್ಟೀರಿಯಾಗಳು ಶ್ವಾಸಕೋಶದ ಸೋಂಕಾದ ನ್ಯುಮೋನಿಯಾ ಸೇರಿದಂತೆ ಅನೇಕ ರೀತಿಯ ಕಾಯಿಲೆಗಳನ್ನು ಉಂಟುಮಾಡಬಹುದು. ನ್ಯುಮೊಕೊಕಲ್ ಬ್ಯಾಕ್ಟೀರಿಯಾವು ನ್ಯುಮೋನಿಯಾದ ಸಾಮಾನ್ಯ ಕಾರಣಗಳಲ್ಲಿ ಒಂದಾಗಿದೆ.

ಸಾರ್ವತ್ರಿಕ ರೋಗನಿರೋಧಕ ಕಾರ್ಯಕ್ರಮ:

1. ಲಸಿಕೆಯಿಂದ ತಡೆಗಟ್ಟಬಹುದಾದ 12 ರೋಗಗಳ ವಿರುದ್ಧ ಮಕ್ಕಳು ಮತ್ತು ಗರ್ಭಿಣಿ ಮಹಿಳೆಯರಲ್ಲಿ ಮರಣ ಮತ್ತು ಅನಾರೋಗ್ಯವನ್ನು ತಡೆಗಟ್ಟಲು ಸಾರ್ವತ್ರಿಕ ರೋಗನಿರೋಧಕ ಕಾರ್ಯಕ್ರಮವನ್ನು 1985 ರಲ್ಲಿ ಪ್ರಾರಂಭಿಸಲಾಯಿತು.ಇದರಲ್ಲಿ ಸುಮಾರು 2.67 ಕೋಟಿ ನವಜಾತ ಶಿಶುಗಳು ಮತ್ತು 2.9 ಕೋಟಿ ಗರ್ಭಿಣಿಯರು ವಾರ್ಷಿಕವಾಗಿ ರಕ್ಷಣೆ ಪಡೆಯುತ್ತಾರೆ.
2. ಸಾರ್ವತ್ರಿಕ ರೋಗನಿರೋಧಕ ಕಾರ್ಯಕ್ರಮ ದ (UIP) ಅಡಿಯಲ್ಲಿ, ಲಸಿಕೆಯಿಂದ ತಡೆಗಟ್ಟಬಹುದಾದ 12 ರೋಗಗಳ ವಿರುದ್ಧ ಉಚಿತವಾಗಿ ಲಸಿಕೆ ನೀಡಲಾಗುತ್ತದೆ, ಅಂದರೆ ಕ್ಷಯ, ಡಿಫ್ತೀರಿಯಾ, ಪೆರ್ಟುಸಿಸ್, ಟೆಟನಸ್, ಪೋಲಿಯೊ, ಹೆಪಟೈಟಿಸ್ ಬಿ, ನ್ಯುಮೋನಿಯಾ ಮತ್ತು ಮೆನಿಂಜೈಟಿಸ್‌ನಿಂದಾಗಿ ಹಿಮೋಫಿಲಸ್ ಇನ್ಫ್ಲುಯೆಂಜಾ ಟೈಪ್ ಬಿ (ಹಿಬ್), ದಡಾರ, ರುಬೆಲ್ಲಾ, ಜಪಾನೀಸ್ ಎನ್ಸೆಫಾಲಿಟಿಸ್ (ಜೆ.ಇ) ಮತ್ತು ರೋಟವೈರಸ್ ಅತಿಸಾರ. (Tuberculosis, Diphtheria, Pertussis, Tetanus, Polio, Hepatitis B, Pneumonia and Meningitis due to Haemophilus Influenzae type b (Hib), Measles, Rubella, Japanese Encephalitis (JE) and Rotavirus diarrhoea)
3. ಈ ಕಾರ್ಯಕ್ರಮವು ವಿಶ್ವದ ಅತಿದೊಡ್ಡ ಆರೋಗ್ಯ ಕಾರ್ಯಕ್ರಮಗಳಲ್ಲಿ ಒಂದಾಗಿದೆ. ಹಲವು ವರ್ಷಗಳಿಂದ ಕಾರ್ಯನಿರ್ವಹಿಸುತ್ತಿದ್ದರೂ, ಸಾರ್ವತ್ರಿಕ ರೋಗನಿರೋಧಕ ಕಾರ್ಯಕ್ರಮವು (UIP) 1 ವರ್ಷಕ್ಕಿಂತ ಕಡಿಮೆ ವಯಸ್ಸಿನ 65% ಮಕ್ಕಳಿಗೆ ಮಾತ್ರ ಸಂಪೂರ್ಣವಾಗಿ ರೋಗನಿರೋಧಕ ಶಕ್ತಿಯನ್ನು ನೀಡಲು ಸಮರ್ಥವಾಗಿದೆ.

ಸಾಮಾನ್ಯ ಅಧ್ಯಯನ ಪತ್ರಿಕೆ : 3

ವಿಷಯಗಳು: ನೇರ ಮತ್ತು ಪರೋಕ್ಷ ಕೃಷಿ ಸಬ್ಸಿಡಿಗಳು ಮತ್ತು ಕನಿಷ್ಠ ಬೆಂಬಲ ಬೆಲೆಗೆ ಸಂಬಂಧಿಸಿದ ವಿಷಯಗಳು; ಸಾರ್ವಜನಿಕ ವಿತರಣಾ ವ್ಯವಸ್ಥೆ – ಉದ್ದೇಶಗಳು, ಕಾರ್ಯಗಳು, ಮಿತಿಗಳು, ಸುಧಾರಣೆಗಳು; ಬಫರ್ ಸ್ಟಾಕ್ ಮತ್ತು ಆಹಾರ ಭದ್ರತೆಗೆ ಸಂಬಂಧಿಸಿದ ವಿಷಯಗಳು; ತಂತ್ರಜ್ಞಾನ ಮಿಷನ್; ಪಶುಸಂಗೋಪನೆಗೆ ಸಂಬಂಧಿಸಿದ ಅರ್ಥಶಾಸ್ತ್ರ.

 2020 ರಲ್ಲಿ ಕೃಷಿ ಕಾರ್ಮಿಕರ ಆತ್ಮಹತ್ಯೆ ಪ್ರಕರಣಗಳು 18% ಹೆಚ್ಚಾಗಿದೆ:

(Suicides among farm workers rose 18% in 2020)

ಸಂದರ್ಭ:

ಇತ್ತೀಚಿಗೆ,ರಾಷ್ಟ್ರೀಯ ಅಪರಾಧ ದಾಖಲೆಗಳ ಬ್ಯೂರೋ (National Crime Records Bureau NCRB) ಕೃಷಿ ಕಾರ್ಮಿಕರ ಆತ್ಮಹತ್ಯೆಗಳ ಕುರಿತ ವರದಿಯನ್ನು ಬಿಡುಗಡೆ ಮಾಡಿದೆ.

ವರದಿಯ ಮುಖ್ಯಾಂಶಗಳು:

1. 2020 ರಲ್ಲಿ ಆತ್ಮಹತ್ಯೆಯಿಂದ ಸಾವನ್ನಪ್ಪಿದ ಕೃಷಿ ಕಾರ್ಮಿಕರ ಸಂಖ್ಯೆ ಹಿಂದಿನ ವರ್ಷಕ್ಕೆ ಹೋಲಿಸಿದರೆ 18% ಹೆಚ್ಚಾಗಿದೆ.
2. ಒಟ್ಟಾರೆಯಾಗಿ, 2020 ರಲ್ಲಿ ಕೃಷಿ ವಲಯದಲ್ಲಿ ತೊಡಗಿರುವ 10,677 ಜನರು ಆತ್ಮಹತ್ಯೆಯಿಂದ ಸಾವನ್ನಪ್ಪಿದ್ದಾರೆ.
3. ಆದಾಗ್ಯೂ, ಸಾಂಕ್ರಾಮಿಕ ವರ್ಷದಲ್ಲಿ ಭೂಮಾಲೀಕ ರೈತರ ಆತ್ಮಹತ್ಯೆಗಳು ಸ್ವಲ್ಪ ಕಡಿಮೆಯಾಗಿದೆ.
4. ಪಿಎಂ ಕಿಸಾನ್‌ನಂತಹ ಆದಾಯ ಬೆಂಬಲ ಯೋಜನೆಗಳಿಂದ ಪ್ರಯೋಜನ ಪಡೆಯದ ಭೂರಹಿತ ಕೃಷಿ ಕಾರ್ಮಿಕರು, ಸಾಂಕ್ರಾಮಿಕ ಸಮಯದಲ್ಲಿ ಹೆಚ್ಚಿನ ಮಟ್ಟದ ಸಂಕಷ್ಟವನ್ನು ಎದುರಿಸಿದ್ದಾರೆ.
5. ಕೃಷಿಯಲ್ಲಿ ತೊಡಗಿರುವ ಕೃಷಿಕಾರ್ಮಿಕರ ಆತ್ಮಹತ್ಯೆಯ ವಿಷಯದಲ್ಲಿ ಮಹಾರಾಷ್ಟ್ರದ ಪರಿಸ್ಥಿತಿಯು 4006 ಆತ್ಮಹತ್ಯೆಗಳಿಗೆ ಎಲ್ಲ ರಾಜ್ಯಗಳಿಗಿಂತ ಕೆಟ್ಟದಾಗಿದೆ. ಮಹಾರಾಷ್ಟ್ರದ ಕೃಷಿಕಾರ್ಮಿಕರ ಆತ್ಮಹತ್ಯೆಯಲ್ಲಿ ಶೇಕಡ 15ರಷ್ಟು ಹೆಚ್ಚಳ ಕಂಡುಬಂದಿದೆ.
6. ಕರ್ನಾಟಕ (2016), ಆಂಧ್ರಪ್ರದೇಶ (889) ಮತ್ತು ಮಧ್ಯಪ್ರದೇಶ (735) ಕಳಪೆ ದಾಖಲೆ ಹೊಂದಿರುವ ಇತರ ರಾಜ್ಯಗಳು. ಕರ್ನಾಟಕದಲ್ಲಿ 2020 ರಲ್ಲಿ ಕೃಷಿ ಕಾರ್ಮಿಕರ ಆತ್ಮಹತ್ಯೆಗಳ ಸಂಖ್ಯೆಯಲ್ಲಿ 43% ರಷ್ಟು ಏರಿಕೆ ಕಂಡಿದೆ.

ಕೃಷಿ ವಲಯ ಎದುರಿಸುತ್ತಿರುವ ಸಮಸ್ಯೆಗಳು:

ಕೆಲವು ಪ್ರಮುಖ ಕೃಷಿ ಉತ್ಪನ್ನಗಳ ದಾಖಲೆ ಉತ್ಪಾದನೆ ಮತ್ತು ರಫ್ತು ಹೆಚ್ಚಳದ ಹೊರತಾಗಿಯೂ, ಭಾರತದ ಕೃಷಿ ಕ್ಷೇತ್ರವು ಕಡಿಮೆ ಬೆಳೆ ಇಳುವರಿ, ಮಾನ್ಸೂನ್ ಅವಲಂಬನೆ, ಜಾಗತಿಕ ಮಾರುಕಟ್ಟೆಗಳಲ್ಲಿ ರಫ್ತಿನ ಕಡಿಮೆ ಪಾಲು, ಕೃಷಿ ಯಾಂತ್ರೀಕರಣದಲ್ಲಿ ವಿಳಂಬ, ಸಾಲಗಳ ಹೊರೆ ಮತ್ತು ರೈತರ ಆತ್ಮಹತ್ಯೆಗಳಂತಹ ಕೆಲವು ಮಹತ್ವದ ಅಂತರ್ಗತ ಸವಾಲುಗಳನ್ನು ಎದುರಿಸುತ್ತಿದೆ. ಈ ಎಲ್ಲ ಸವಾಲುಗಳು ಈಗಾಗಲೇ ಹೆಣಗಾಡುತ್ತಿರುವ ಕೃಷಿ ಉದ್ಯಮದ ಮೇಲೆ ಹೊರೆ ಹಾಕುವುದಷ್ಟೇ ಅಲ್ಲದೆ ಅದರ ಬೆಳವಣಿಗೆಯನ್ನು ಸೀಮಿತಗೊಳಿಸುತ್ತದೆ.

ರೈತರ ಆತ್ಮಹತ್ಯೆಗೆ ಕಾರಣಗಳು:

ಮುಖ್ಯ ಕಾರಣಗಳು ಏನಾಗಿರಬಹುದು ಎಂಬುದರ ಕುರಿತು ಯಾವುದೇ ಒಮ್ಮತವಿಲ್ಲ ಆದರೆ ಅಧ್ಯಯನಗಳು ಆತ್ಮಹತ್ಯೆ ಮಾಡಿಕೊಂಡ ಸಂತ್ರಸ್ತರು ಒಂದಕ್ಕಿಂತ ಹೆಚ್ಚು ಕಾರಣಗಳಿಂದ ಪ್ರೇರೇಪಿಸಲ್ಪಟ್ಟಿದ್ದಾರೆ ಎಂದು ಕಾಣಿಸುತ್ತದೆ ಆದರೆ ಪ್ರಾಥಮಿಕ ಕಾರಣಗಳು ಸಾಲಗಳನ್ನು ಮರುಪಾವತಿಸಲು ಅವರು ಅಸಮರ್ಥರಾಗಿರುವುದಾಗಿದೆ.

1. ವರದಿಯಾಗಿರುವ ಪ್ರಮುಖ ಕಾರಣಗಳೆಂದರೆ ದಿವಾಳಿತನ/ಋಣಭಾರ, ಕೌಟುಂಬಿಕ ಸಮಸ್ಯೆಗಳು, ಬೆಳೆ ವೈಫಲ್ಯ, ಅನಾರೋಗ್ಯ ಮತ್ತು ಮದ್ಯಪಾನ/ಮಾದಕವಸ್ತುವಿನ ದುರ್ಬಳಕೆ.
2. ಹೊಲಗಳಲ್ಲಿ ಮರೆಮಾಚುವ ನಿರುದ್ಯೋಗವು ಇನ್ನೂ ಗರಿಷ್ಠ ಮಟ್ಟದಲ್ಲಿದೆ.ಭೂ ಹಿಡುವಳಿಗಳ ವಿಘಟನೆಯು ಹಲವಾರು ರೈತರನ್ನು ತುಂಡು ಭೂಮಿಯ ಒಡೆಯರನ್ನಾಗಿಸಿದೆ. ಈ ತುಂಡು ಭೂಮಿಯಿಂದ ಅವರು ಲಾಭಗಳಿಸುವುದು ಕಷ್ಟಸಾಧ್ಯವಾಗಿದೆ.
3. ಸಾಲ, ನೀರಾವರಿ ಮತ್ತು ತಂತ್ರಜ್ಞಾನದ ಕಡಿಮೆ ಪ್ರವೇಶವು ಆರಾಮದಾಯಕ ಜೀವನವನ್ನು ಮಾಡುವ ಅವರ ಸಾಮರ್ಥ್ಯವನ್ನು ಹದಗೆಡಿಸುತ್ತದೆ. ನಮ್ಮ ಕೃಷಿಕರಲ್ಲಿ ಹತ್ತನೇ ಒಂದು ಭಾಗದಷ್ಟು ರೈತರು ಭೂರಹಿತರಾಗಿದ್ದಾರೆ.
4. ಅವರು ಕೃಷಿ ಮಾಡಲು ಗುತ್ತಿಗೆ ಭೂಮಿಯನ್ನು ಬಳಸುತ್ತಾರೆ, ಆದರೆ ಗುತ್ತಿಗೆ ಭೂಮಿಯ ಕಾರ್ಯವಿಧಾನಗಳ ಅಸಮರ್ಪಕತೆಯಿಂದಾಗಿ ಉತ್ಪಾದನೆಯನ್ನು ಹೆಚ್ಚಿಸಲು ಅವರಿಗೆ ಕಷ್ಟಕರವಾಗಿದೆ.
5. ಹತ್ತಿ ಮತ್ತು ಕಬ್ಬು ಮುಂತಾದ ವಾಣಿಜ್ಯ ಬೆಳೆಗಳನ್ನು ಬೆಳೆಯುವ ಪ್ರದೇಶಗಳಲ್ಲಿ ಹೆಚ್ಚಿನ ಆತ್ಮಹತ್ಯೆಗಳು ಸಂಭವಿಸಿವೆ. ಈ ವಾಣಿಜ್ಯ ಬೆಳೆಗಳು ನಿರಂತರ ಮತ್ತು ಸ್ಥಿತಿಸ್ಥಾಪಕದ ಹೆಚ್ಚಿನ ಇಳುವರಿ ತತ್ವವನ್ನು ಆಧರಿಸಿರದೆ ಹೆಚ್ಚಿನ ಖರ್ಚು ಅಧಿಕ ಲಾಭದ ಜೂಜಾಟದಂತಿವೆ.

ಮುಂದಿರುವ ಸವಾಲುಗಳು:

1. ಭಾರತದ ಒಟ್ಟಾರೆ ಕೃಷಿಭೂಮಿಯ ಅರ್ಧಕ್ಕಿಂತ ಕಡಿಮೆ ಭಾಗವು ನೀರಾವರಿಗೆ ಒಳಪಟ್ಟಿದೆ. ಕೃಷಿಭೂಮಿಯನ್ನು ನೀರಾವರಿಗೆ ಒಳಪಡಿಸುವ ವಿದ್ಯಮಾನವು ಕಳೆದ ದಶಕದಲ್ಲಿ ಹೆಚ್ಚು ಬದಲಾಗಿಲ್ಲ ಮತ್ತು ನಮ್ಮ 60% ಕ್ಕಿಂತ ಹೆಚ್ಚು ರೈತರು ಮಳೆಯ ವೈಪರೀತ್ಯಗಳಿಗೆ ಒಳಗಾಗುತ್ತಾರೆ.
2. ಸಾಮಾನ್ಯವಾಗಿ,ಮಳೆ-ಆಧಾರಿತ ಕೃಷಿ ಭೂಮಿಯ ಇಳುವರಿಯು ನೀರಾವರಿ ಕೃಷಿ ಭೂಮಿಯ ಅರ್ಧಕ್ಕಿಂತ ಕಡಿಮೆ ಇರುವುದು.
3. ಭಾರತವು ಜಾಗತಿಕ ಮಟ್ಟದ ರಸಗೊಬ್ಬರ ಬಳಕೆಯನ್ನು ಮಾಡುತ್ತಿದ್ದರೂ, ಇದು ಪರಿಣಾಮಕಾರಿಯೂ ಅಲ್ಲ ಅಥವಾ ಪರಿಸರ ಸಮರ್ಥನೀಯವೂ ಅಲ್ಲ. ಇವೆರಡೂ ಕೃಷಿ ವೆಚ್ಚವನ್ನು ಹೆಚ್ಚಿಸುತ್ತವೆ.
4. ಹೆಚ್ಚಿನ ಇಳುವರಿ ನೀಡುವ ಬೆಳೆಗಳ ಮೇಲಿನ ಸಂಶೋಧನೆಯು ಹಸಿರು ಕ್ರಾಂತಿಯ ಸಮಯದಲ್ಲಿ ಆದ ಆರಂಭಿಕ ಸ್ಫೋಟದ ನಂತರ ಸ್ಥಗಿತಗೊಂಡಿದೆ ಮತ್ತು ರೈತರು ತಮ್ಮ ಅಲ್ಪ ಭೂಮಿಯಲ್ಲಿ ಹೆಚ್ಚಿನ ಲಾಭವನ್ನು ಪಡೆಯಲು ಪೇಟೆಂಟ್ ಹೊಂದಿದ ಬೀಜಗಳನ್ನು ಆಶ್ರಯಿಸಬೇಕಾಗಿದೆ.
5. eNAM ನಂತಹ ಉಪಕ್ರಮಗಳು ರೈತರ ಉತ್ಪನ್ನಗಳನ್ನು ನೇರವಾಗಿ ಮಾರುಕಟ್ಟೆಯೊಂದಿಗೆ ಸಂಯೋಜಿಸಲು ಸಹಾಯ ಮಾಡುತ್ತಿವೆ, ಆದಾಗ್ಯೂ, ಮಧ್ಯವರ್ತಿಗಳ ಪಾತ್ರವನ್ನು ಕಡಿತಗೊಳಿಸುವುದು ಇನ್ನೂ ಸಾಧ್ಯವಾಗಿಲ್ಲ.

ವಿಷಯಗಳು: ಸಂವಹನ ಜಾಲಗಳ ಮೂಲಕ ಆಂತರಿಕ ಭದ್ರತೆಗೆ ಸವಾಲು ಹಾಕುವುದು, ಆಂತರಿಕ ಭದ್ರತಾ ಸವಾಲುಗಳಲ್ಲಿ ಮಾಧ್ಯಮ ಮತ್ತು ಸಾಮಾಜಿಕ ಜಾಲತಾಣಗಳ ಪಾತ್ರ, ಸೈಬರ್ ಭದ್ರತೆಯ ಮೂಲಭೂತ ಅಂಶಗಳು, ಅಕ್ರಮ ಹಣ ವರ್ಗಾವಣೆ ಮತ್ತು ಅದನ್ನು ತಡೆಯುವುದು.

ದತ್ತಾಂಶ ಸಂರಕ್ಷಣಾ ಮಸೂದೆ 2019:

(Data Protection Bill 2019)

ಸಂದರ್ಭ:

ಭಾರತೀಯ ವಿಶಿಷ್ಟ ಗುರುತಿನ ಪ್ರಾಧಿಕಾರ (Unique Identification Authority of India UIDAI) ವು ವೈಯಕ್ತಿಕ ದತ್ತಾಂಶ ಸಂರಕ್ಷಣೆ (Personal Data Protection-PDP) ಕಾನೂನಿನಿಂದ ವಿನಾಯಿತಿ ಬಯಸಿದೆ.

ಕಾರಣ?

UIDAI ಪದಾಧಿಕಾರಿಗಳು ಪ್ರಾಧಿಕಾರವು ಈಗಾಗಲೇ ಆಧಾರ್ ಕಾಯಿದೆ (Aadhaar Act) ಯ ಅಡಿಯಲ್ಲಿ ಆಡಳಿತ ನಡೆಸುತ್ತಿದೆ ಆದಕಾರಣ ಇದನ್ನು ಇದೇ ಉದ್ದೇಶದ ಇನ್ನೊಂದು ಕಾನೂನಿನ ಅಡಿಯಲ್ಲಿ ತರಲಾಗುವುದಿಲ್ಲ ಎಂದು ಹೇಳಿದ್ದಾರೆ.

ವೈಯಕ್ತಿಕ ದತ್ತಾಂಶ ಸಂರಕ್ಷಣೆ (PDP) ಮಸೂದೆ 2019:

ಈ ಮಸೂದೆಯ ಮೂಲವು ನ್ಯಾಯಮೂರ್ತಿ ಬಿ.ಎನ್.ಶ್ರೀಕೃಷ್ಣ ನೇತೃತ್ವದ ತಜ್ಞರ ಸಮಿತಿಯು ಸಿದ್ಧಪಡಿಸಿದ ವರದಿಯಲ್ಲಿದೆ.

ಖಾಸಗಿತನದ ಹಕ್ಕು ಪ್ರಕರಣ(ನ್ಯಾಯಮೂರ್ತಿ ಕೆ.ಎಸ್. ಪುಟ್ಟಸ್ವಾಮಿ ವಿರುದ್ಧ ಭಾರತ ಒಕ್ಕೂಟ)ದ ಕುರಿತು ಸುಪ್ರೀಂ ಕೋರ್ಟ್‌ನಲ್ಲಿ ವಿಚಾರಣೆ ನಡೆಯುತ್ತಿದ್ದ ಸಂದರ್ಭದಲ್ಲಿ ಸರ್ಕಾರವು ಈ ಸಮಿತಿಯನ್ನು ರಚಿಸಿದೆ.

ಡೇಟಾವನ್ನು ನಿಯಂತ್ರಿಸಲು ಮಸೂದೆಯು ಹೇಗೆ ಪ್ರಯತ್ನಿಸುತ್ತದೆ?

ಮಸೂದೆಯು 3 ವೈಯಕ್ತಿಕ ಮಾಹಿತಿ ಪ್ರಕಾರಗಳನ್ನು ಒಳಗೊಂಡಿದೆ:

1. ಗಂಭೀರ (Critical)
2. ಸಂವೇದನಾಶೀಲ/ಸೂಕ್ಷ್ಮ(Sensitive)
3. ಸಾಮಾನ್ಯ (General)

ಇತರ ಪ್ರಮುಖ ನಿಬಂಧನೆಗಳು:

ಡೇಟಾ ಪ್ರಿನ್ಸಿಪಾಲ್: ಮಸೂದೆಯ ಪ್ರಕಾರ,ಇಲ್ಲಿ ವ್ಯಕ್ತಿಯ ಡೇಟಾವನ್ನು ಸಂಗ್ರಹಿಸಲಾಗುತ್ತದೆ ಮತ್ತು ಪ್ರಕ್ರಿಯೆಗೊಳಿಸಲಾಗುತ್ತದೆ.

ಸಾಮಾಜಿಕ ಮಾಧ್ಯಮ ಕಂಪನಿಗಳು: ದತ್ತಾಂಶದ ಪರಿಮಾಣ ಮತ್ತು ಸೂಕ್ಷ್ಮತೆ ಹಾಗೂ ಅವುಗಳ ವಹಿವಾಟು ಮುಂತಾದ ಅಂಶಗಳ ಆಧಾರದ ಮೇಲೆ ಗಮನಾರ್ಹವಾದ ದತ್ತಾಂಶ ವಿಶ್ವಾಸಿಗಳೆಂದು ಪರಿಗಣಿಸಲಾಗುವ ಸಾಮಾಜಿಕ ಮಾಧ್ಯಮ ಕಂಪನಿಗಳು,ತಮ್ಮದೇ ಆದ ಬಳಕೆದಾರ ಪರಿಶೀಲನಾ ಕಾರ್ಯವಿಧಾನವನ್ನು ಅಭಿವೃದ್ಧಿಪಡಿಸಬೇಕು.

ಡೇಟಾ ಪ್ರೊಟೆಕ್ಷನ್ ಏಜೆನ್ಸಿ (DPA) ಎಂಬ ಸ್ವತಂತ್ರ ನಿಯಂತ್ರಕದ ಮೂಲಕ ಮೌಲ್ಯಮಾಪನಗಳು ಮತ್ತು ಲೆಕ್ಕಪರಿಶೋಧನೆಗಳು ಮತ್ತು ವ್ಯಾಖ್ಯಾನ ತಯಾರಿಕೆಯ ಮೇಲ್ವಿಚಾರಣೆಯನ್ನು ಮಾಡುವುದು.

ಪ್ರತಿ ಕಂಪನಿಯು ದತ್ತಾಂಶ ಸಂರಕ್ಷಣಾ ಅಧಿಕಾರಿಯನ್ನು (DPO) ಹೊಂದಿರುತ್ತದೆ ಅವರು ಲೆಕ್ಕಪರಿಶೋಧನೆ, ಕುಂದುಕೊರತೆ ಪರಿಹಾರ, ದಾಖಲೆ ನಿರ್ವಹಣೆ ಮತ್ತು ಹೆಚ್ಚಿನವುಗಳಿಗಾಗಿ DPA ಯೊಂದಿಗೆ ಸಂಪರ್ಕ ಸಾಧಿಸುತ್ತಾರೆ.

ಈ ಮಸೂದೆಯು ವ್ಯಕ್ತಿಗಳಿಗೆ ಡೇಟಾ ಪೋರ್ಟೆಬಿಲಿಟಿ ಹಕ್ಕನ್ನು ನೀಡುತ್ತದೆ ಮತ್ತು ಇದು ಪ್ರತಿಯೊಬ್ಬರೂ ತಮ್ಮ ಸ್ವಂತ ಡೇಟಾವನ್ನು ಪ್ರವೇಶಿಸುವ ಮತ್ತು ವರ್ಗಾಯಿಸುವ ಅಧಿಕಾರವನ್ನು ನೀಡುತ್ತದೆ.

ಮರೆತುಹೋಗುವ ಹಕ್ಕು: ಈ ಹಕ್ಕು ಪ್ರತಿ ವ್ಯಕ್ತಿಗೆ ಡೇಟಾ ಸಂಗ್ರಹಣೆ ಮಾಡಲು ಮತ್ತು ಅದನ್ನು ಪ್ರಕಟಿಸಲು  ಸಮ್ಮತಿಯನ್ನು ನಿರಾಕರಿಸುವ ಅಧಿಕಾರವನ್ನು ನೀಡುತ್ತದೆ.

ವಿನಾಯಿತಿಗಳು:

ವೈಯಕ್ತಿಕ ಡೇಟಾ ಸಂರಕ್ಷಣಾ (PDP) ಮಸೂದೆ 2019 ವಿವಾದಾತ್ಮಕ ಸೆಕ್ಷನ್ 35 ಅನ್ನು ಹೊಂದಿದೆ, ಇದು “ಭಾರತದ ಸಾರ್ವಭೌಮತೆ ಮತ್ತು ಸಮಗ್ರತೆ”, “ಸಾರ್ವಜನಿಕ ಸುವ್ಯವಸ್ಥೆ”, “ವಿದೇಶಿ ರಾಜ್ಯಗಳೊಂದಿಗೆ ಸ್ನೇಹ ಸಂಬಂಧಗಳು” ಮತ್ತು “ರಾಜ್ಯದ ಭದ್ರತೆ” ಯನ್ನು ಆಹ್ವಾನಿಸುತ್ತದೆ. ಈ ವಿವಾದಾತ್ಮಕ ಸೆಕ್ಷನ್ 35 ಸರ್ಕಾರಿ ಏಜೆನ್ಸಿಗಳಿಗಾಗಿ ವೈಯಕ್ತಿಕ ಡೇಟಾ ಸಂರಕ್ಷಣಾ ಕಾಯ್ದೆಯ ಎಲ್ಲಾ ಅಥವಾ ಯಾವುದೇ ನಿಬಂಧನೆಗಳನ್ನು  ಅಮಾನತುಗೊಳಿಸಲು ಕೇಂದ್ರ ಸರ್ಕಾರಕ್ಕೆ ಅಧಿಕಾರವನ್ನು ನೀಡುತ್ತದೆ.

ಮಸೂದೆಯ ಬಗ್ಗೆ ಕಾಳಜಿ ಏಕೆ?

ಈ ಮಸೂದೆಯು ಎರಡು ಅಲಗಿನ ಕತ್ತಿಯಂತಿದೆ. ಒಂದೆಡೆ ಈ ಮಸೂದೆಯು ಭಾರತೀಯರಿಗೆ ಡೇಟಾ ಮಾಲೀಕತ್ವದ ಹಕ್ಕುಗಳನ್ನು ನೀಡುವ ಮೂಲಕ ಭಾರತೀಯರ ವೈಯಕ್ತಿಕ ಡೇಟಾವನ್ನು ರಕ್ಷಿಸುವ ಕೆಲಸ ಮಾಡುತ್ತದೆ. ಮತ್ತೊಂದೆಡೆ,ಇದು ವೈಯಕ್ತಿಕ ಡೇಟಾವನ್ನು ಪ್ರಕ್ರಿಯೆಗೊಳಿಸುವ ತತ್ವಗಳಿಗೆ ವಿರುದ್ಧವಾದ ವಿನಾಯಿತಿಗಳೊಂದಿಗೆ ಕೇಂದ್ರ ಸರ್ಕಾರಕ್ಕೆ ನೀಡುತ್ತದೆ.

1. ಸರ್ಕಾರವು ಅಗತ್ಯವಿದ್ದಾಗ ಡೇಟಾ ಪ್ರಿನ್ಸಿಪಾಲ್‌ಗಳಿಂದ ಸ್ಪಷ್ಟ ಅನುಮತಿಯಿಲ್ಲದೆ ಸೂಕ್ಷ್ಮವಾದ ವೈಯಕ್ತಿಕ ಡೇಟಾವನ್ನು ಸಹ ಪ್ರಕ್ರಿಯೆಗೊಳಿಸಬಹುದು.

ಪೂರ್ವಭಾವಿ ಪರೀಕ್ಷೆಗೆ ಸಂಬಂಧಿಸಿದ ವಿದ್ಯಮಾನಗಳು:

ಅತ್ಯುತ್ತಮ ಸಾರ್ವಜನಿಕ ಸಾರಿಗೆ ಪ್ರಶಸ್ತಿಯನ್ನು ಗೆದ್ದ ಸೂರತ್:

ಅತ್ಯುತ್ತಮ ಸಾರ್ವಜನಿಕ ಸಾರಿಗೆ ವ್ಯವಸ್ಥೆಯನ್ನು ಹೊಂದಿರುವ ಕಾರಣಕ್ಕಾಗಿ ಕೇಂದ್ರ ಸರ್ಕಾರವು ಸೂರತ್ ಅನ್ನು ಪ್ರಶಸ್ತಿ ನೀಡಿ ಗೌರವಿಸಿದೆ.

ವಸತಿ ಮತ್ತು ನಗರ ವ್ಯವಹಾರಗಳ ಸಚಿವಾಲಯವು ಈ ಪ್ರಶಸ್ತಿಯನ್ನು ಪ್ರದಾನ ಮಾಡಿದೆ.

ಇತರ ವಿಜೇತರು:

1. ಕೊಚ್ಚಿಯು ಅತ್ಯಂತ ಸುಸ್ಥಿರ ಸಾರಿಗೆ ವ್ಯವಸ್ಥೆಯನ್ನು ಹೊಂದಿರುವ ನಗರವೆಂದು ನಿರ್ಣಯಿಸಲ್ಪಟ್ಟಿದೆ.
2. ದೆಹಲಿ:ಚಾಂದಿನಿ ಚೌಕ್ ಪುನರಾಭಿವೃದ್ಧಿ ಯೋಜನೆಗಾಗಿ ದೆಹಲಿಯು ಅತ್ಯುತ್ತಮ ಮೋಟಾರುರಹಿತ ಸಾರಿಗೆ ವ್ಯವಸ್ಥೆಯನ್ನು ಹೊಂದಿರುವ ನಗರಕ್ಕಾಗಿ ಪ್ರಶಸ್ತಿಯನ್ನು ಸ್ವೀಕರಿಸಿದೆ.
3. ದೆಹಲಿ: ದೆಹಲಿ ಮೆಟ್ರೋಗೆ ಅತ್ಯುತ್ತಮ ಪ್ರಯಾಣಿಕ ಸೇವೆಗಳು ಮತ್ತು ಸಂತೃಪ್ತಿ ಪ್ರಶಸ್ತಿಯನ್ನು ಸಹ ನೀಡಲಾಗಿದೆ.
4. ನಾಗಪುರ: ಮೆಟ್ರೋ ರೈಲಿನೊಂದಿಗೆ ನಾಗ್ಪುರದ ಬಹು-ಮಾದರಿ ಸಾರಿಗೆ ವ್ಯವಸ್ಥೆಯ ಸಂಯೋಜನೆಯು ದೇಶದಲ್ಲೇ ಅತ್ಯುತ್ತಮವಾಗಿದೆ ಎಂದು ಕಂಡುಬಂದಿದೆ.
5. ಇಂದೋರ್ ನಗರವು ಅತ್ಯಂತ ನವೀನ ಹಣಕಾಸು ವ್ಯವಸ್ಥೆಯನ್ನು ಅಳವಡಿಸಿಕೊಂಡಿದ್ದಕ್ಕಾಗಿ ಪ್ರಶಸ್ತಿ ನೀಡಿ ಗೌರವಿಸಲಾಗಿದೆ.