Print Friendly, PDF & Email

[ ದೈನಂದಿನ ಪ್ರಚಲಿತ ಘಟನೆಗಳು ] ದಿನಾಂಕ – 19ನೇ ಜುಲೈ 2021

 

ಪರಿವಿಡಿ:

 ಸಾಮಾನ್ಯ ಅಧ್ಯಯನ ಪತ್ರಿಕೆ 1:

1. ಟಿಪ್ಪು ಸುಲ್ತಾನ್.

 

ಸಾಮಾನ್ಯ ಅಧ್ಯಯನ ಪತ್ರಿಕೆ 2:

1.  ಸುಪ್ರೀಂ ಕೋರ್ಟ್ ಮುಂದೆ ವೈವಾಹಿಕ ಹಕ್ಕುಗಳು.

2. ಮಾನವ ಕಳ್ಳಸಾಗಣೆ ವಿರೋಧಿ ಕರಡು ಮಸೂದೆ.

3. ಮೇಕೆಡಾಟು ಅಣೆಕಟ್ಟು ಯೋಜನೆ.

 

ಸಾಮಾನ್ಯ ಅಧ್ಯಯನ ಪತ್ರಿಕೆ 3:

1. ಚೀನಾದ ಜುರಾಂಗ್ ಮಾರ್ಸ್ ರೋವರ್.

2. ಏನದು ಇಸ್ರೇಲಿ ಸ್ಪೈವೇರ್ ಪೆಗಾಸಸ್ ?

 

ಪೂರ್ವಭಾವಿ ಪರೀಕ್ಷೆಗೆ ಸಂಬಂಧಿಸಿದ ವಿದ್ಯಮಾನಗಳು:

1. ಕದಂಬಿನಿ ಗಂಗೂಲಿ.

2. ಬುಧ ಗ್ರಹದ ಕೋರ್ ನಲ್ಲಿ ಹೊಸ ಸಂಶೋಧನೆಗಳು.

 


ಸಾಮಾನ್ಯ ಅಧ್ಯಯನ ಪತ್ರಿಕೆ : 1


 

ವಿಷಯಗಳು: ಆಧುನಿಕ ಭಾರತದ ಇತಿಹಾಸ- ಹದಿನೆಂಟನೇ ಶತಮಾನದ ಮಧ್ಯಭಾಗದಿಂದ ಇಂದಿನವರೆಗಿನ- ಮಹತ್ವದ ಘಟನೆಗಳು, ವ್ಯಕ್ತಿತ್ವಗಳು, ಸಮಸ್ಯೆಗಳು.

ಟಿಪ್ಪು ಸುಲ್ತಾನ್:


ಇತ್ತೀಚೆಗೆ, ಪೂರ್ವ ಮುಂಬೈನ ಉಪನಗರವಾದ ಗೋವಂಡಿಯಲ್ಲಿನ ಉದ್ಯಾನವನವೊಂದಕ್ಕೆ ಮೈಸೂರು ದೊರೆ ‘ಟಿಪ್ಪು ಸುಲ್ತಾನ್’ ಅವರ ಹೆಸರಿಸಲು ಬೃಹನ್ ಮುಂಬೈ ಮುನ್ಸಿಪಲ್ ಕಾರ್ಪೊರೇಷನ್ (BMC) ನ ಪ್ರಯತ್ನವು ವಿವಾದದ ಕೇಂದ್ರಬಿಂದುವಾಗಿದೆ.

ಏನಿದು ಪ್ರಕರಣ?

  1. ‘ಟಿಪ್ಪು ಸುಲ್ತಾನ್’ ಒಬ್ಬ ಸ್ವಾತಂತ್ರ್ಯ ಹೋರಾಟಗಾರ” ಮತ್ತು ಬ್ರಿಟಿಷ್ ಈಸ್ಟ್ ಇಂಡಿಯಾ ಕಂಪನಿ ವಿರುದ್ಧದ ಹೋರಾಟಗಾರ ಎಂದು ಬಣ್ಣಿಸಿದ ಪೂರ್ವ ಮುಂಬೈನ ಸ್ಥಳೀಯ ಕೌನ್ಸಿಲರ್ ಒಬ್ಬರು,ಇತ್ತೀಚೆಗೆ ಅಭಿವೃದ್ಧಿಪಡಿಸಿದ ಹೊಸ ಉದ್ಯಾನವನಕ್ಕೆ ಟಿಪ್ಪು ಸುಲ್ತಾನ್ ಅವರ ಹೆಸರನ್ನು ಇಡಬೇಕೆಂದು ಸಲಹೆ ನೀಡಿದರು.
  2. ಕೌನ್ಸಿಲರ್ ಬೇಡಿಕೆಯನ್ನು ಬಿಎಂಸಿ ಆಡಳಿತವು ‘ಜೂನ್’ ನಲ್ಲಿ ಅಂಗೀಕರಿಸಿತು ಮತ್ತು ಅದರ ಅನುಮೋದನೆಗಾಗಿ ಜುಲೈ 15 ರಂದು ‘ಮಾರುಕಟ್ಟೆ ಮತ್ತು ಉದ್ಯಾನ ಸಮಿತಿಗೆ’ ಕಳುಹಿಸಿತು.
  3. ಆದರೆ, ಟಿಪ್ಪು ಸುಲ್ತಾನ್ ಹಿಂದೂ ವಿರೋಧಿ ಆಡಳಿತಗಾರರಾಗಿದ್ದರು ಉದ್ಯಾನವನಕ್ಕೆ ಅವರ ಹೆಸರನ್ನಿಡುವುದು ಹಿಂದೂ ಸಮುದಾಯದ ಧಾರ್ಮಿಕ ಭಾವನೆಗಳಿಗೆ ಧಕ್ಕೆ ತರುತ್ತದೆ ಎಂದು ಬಿಎಂಸಿಯ ಈ ನಿರ್ಧಾರವನ್ನು ಪ್ರತಿಪಕ್ಷಗಳು ಟೀಕಿಸುತ್ತಿವೆ.

 

ಟಿಪ್ಪು ಸುಲ್ತಾನ್’ ಯಾರು?

  1. ಟಿಪ್ಪು ಸುಲ್ತಾನ್ ಮೈಸೂರು ಸಾಮ್ರಾಜ್ಯದ ಆಡಳಿತಗಾರ ಮತ್ತು ಮೈಸೂರು ಸುಲ್ತಾನನಾದ ಹೈದರ್ ಅಲಿಯ ಹಿರಿಯ ಮಗ.
  2. ವ್ಯಾಪಕವಾದ ರಾಷ್ಟ್ರೀಯ ಇತಿಹಾಸದಲ್ಲಿ, ಟಿಪ್ಪು ಇಲ್ಲಿಯವರೆಗೆ ಕಾಲ್ಪನಿಕ ಮತ್ತು ಧೈರ್ಯಶಾಲಿ ವ್ಯಕ್ತಿಯಾಗಿ ಕಾಣಿಸಿಕೊಂಡಿದ್ದಾನೆ ಮತ್ತು ಒಬ್ಬ ಅದ್ಭುತ ಮಿಲಿಟರಿ ತಂತ್ರಜ್ಞ, ತನ್ನ 17 ವರ್ಷಗಳ ಅಲ್ಪಾವಧಿಯ ಆಳ್ವಿಕೆಯಲ್ಲಿ, ಭಾರತದಲ್ಲಿನ ಬ್ರಿಟಿಷ್ ಕಂಪನಿಗೆ ಅತ್ಯಂತ ಗಂಭೀರ ಸವಾಲನ್ನು ಒಡ್ಡಿದ್ದ.

 

ಟಿಪ್ಪು ಸುಲ್ತಾನರ ಕೊಡುಗೆಗಳು:

  1. ಟಿಪ್ಪು ಸುಲ್ತಾನ್ ತನ್ನ 17 ನೇ ವಯಸ್ಸಿನಲ್ಲಿ ಮೊದಲ ಆಂಗ್ಲೋ-ಮೈಸೂರು ಯುದ್ಧದಲ್ಲಿ (1767-69) ಮತ್ತು ನಂತರ, ಮರಾಠರ ವಿರುದ್ಧ ಮತ್ತು ಎರಡನೇ ಆಂಗ್ಲೋ-ಮೈಸೂರು ಯುದ್ಧದಲ್ಲಿ (1780–84) ಭಾಗವಹಿಸಿದ್ದರು.
  2. ಅವರು 1767-99ರ ಅವಧಿಯಲ್ಲಿ ಕಂಪನಿಯ ಪಡೆಗಳೊಂದಿಗೆ ನಾಲ್ಕು ಯುದ್ಧಗಳನ್ನು ಮಾಡಿದರು ಮತ್ತು ನಾಲ್ಕನೇ ಆಂಗ್ಲೋ-ಮೈಸೂರು ಯುದ್ಧದಲ್ಲಿ ತಮ್ಮ ರಾಜಧಾನಿ ಶ್ರೀರಂಗಪಟ್ಟಣವನ್ನು ರಕ್ಷಿಸಿಕೊಳ್ಳುವ ಪ್ರಯತ್ನದಲ್ಲಿ ಮರಣ ಹೊಂದಿದರು.
  3. ಟಿಪ್ಪು ಹೊಸ ತಂತ್ರಜ್ಞಾನವನ್ನು ಬಳಸಿಕೊಂಡು ತನ್ನ ಸೈನ್ಯವನ್ನು ಯುರೋಪಿಯನ್ ಮಾರ್ಗಗಳಲ್ಲಿ ಮರುಸಂಘಟಿಸಿದನು ಮತ್ತು ತನ್ನ ಸೈನ್ಯದಲ್ಲಿ ಮೊದಲ ಬಾರಿಗೆ ಯುದ್ಧ ರಾಕೆಟ್‌ಗಳನ್ನು ಸೇರಿಸಿ ಬಳಸಿದನು.
  4. ವಿವರವಾದ ಸಮೀಕ್ಷೆ ಮತ್ತು ವರ್ಗೀಕರಣದ ಆಧಾರದ ಮೇಲೆ ಅವರು ಭೂ-ಕಂದಾಯ ವ್ಯವಸ್ಥೆಯನ್ನು ರೂಪಿಸಿದರು, ರೈತರ ಮೇಲೆ ನೇರವಾಗಿ ತೆರಿಗೆ ವಿಧಿಸಲಾಗುತ್ತಿತ್ತು ಮತ್ತು ಈ ತೆರಿಗೆಗಳನ್ನು ಸಂಬಳ ಪಡೆಯುವ ಏಜೆಂಟರ ಮೂಲಕ ನಗದು ರೂಪದಲ್ಲಿ ಸಂಗ್ರಹಿಸಿ ರಾಜ್ಯದ ಸಂಪನ್ಮೂಲ-ಆಧಾರವನ್ನು ವಿಸ್ತರಿಸಿದರು.
  5. ಅವರು ಕೃಷಿಯನ್ನು ಆಧುನೀಕರಿಸಿದರು, ಬಂಜರು ಜಮೀನುಗಳ ಅಭಿವೃದ್ಧಿಗೆ ತೆರಿಗೆ ವಿನಾಯಿತಿ ನೀಡಿದರು, ನೀರಾವರಿ ಮೂಲಸೌಕರ್ಯಗಳನ್ನು ನಿರ್ಮಿಸಿದರು ಮತ್ತು ಹಳೆಯ ಅಣೆಕಟ್ಟುಗಳನ್ನು ದುರಸ್ತಿ ಪಡಿಸಿದರು. ಕೃಷಿ ಉತ್ಪನ್ನಗಳು ಮತ್ತು ರೇಷ್ಮೆ ಕೃಷಿಯನ್ನು ಪ್ರೋತ್ಸಾಹಿಸಿದರು. ವ್ಯಾಪಾರವನ್ನು ಬೆಂಬಲಿಸಲು ನೌಕಾಪಡೆಯೊಂದನ್ನು ರಚಿಸಲಾಯಿತು.
  6. ಕಾರ್ಖಾನೆಗಳನ್ನು ಸ್ಥಾಪಿಸಲು ಅವರು ರಾಜ್ಯ ವಾಣಿಜ್ಯ ನಿಗಮ” ವನ್ನು ರಚಿಸಿದರು.

 

ಟಿಪ್ಪು ಸುಲ್ತಾನ್’ ಕುರಿತ ವಿವಾದಗಳಿಗೆ ಕಾರಣಗಳು:

ಬಹುತೇಕ ಎಲ್ಲ ಐತಿಹಾಸಿಕ ವ್ಯಕ್ತಿಗಳು ಟಿಪ್ಪು ಸುಲ್ತಾನ್ ಬಗ್ಗೆ ಆಸಕ್ತಿ ತೋರಿಸಿದ್ದಾರೆ ಮತ್ತು ಬಹುತೇಕ ಎಲ್ಲರೂ ವಿಭಿನ್ನ ದೃಷ್ಟಿಕೋನವನ್ನು ಹೊಂದಿದ್ದಾರೆ.

  1. ಬಲವಾದ ಪ್ರಾದೇಶಿಕ ಮಹತ್ವಾಕಾಂಕ್ಷೆಗಳನ್ನು ಹೊಂದಿದ್ದ ಹೈದರ್ ಮತ್ತು ಟಿಪ್ಪು ಇಬ್ಬರೂ ತಮ್ಮ ರಾಜ್ಯವನ್ನು ವಿಸ್ತರಿಸುವ ಮಹತ್ವಾಕಾಂಕ್ಷೆಗಳೊಂದಿಗೆ, ಮೈಸೂರಿನ ಹೊರಗಿನ ಸಾಮ್ರಾಜ್ಯಗಳ ಮೇಲೆ ಆಕ್ರಮಣ ಮಾಡಿ ತಮ್ಮ ಅಧಿಕಾರವನ್ನು ಸ್ಥಾಪಿಸಿದರು. ಈ ದಾಳಿಯ ಸಮಯದಲ್ಲಿ, ಅವರು ಸಣ್ಣ ಪಟ್ಟಣಗಳು ​​ಮತ್ತು ಹಳ್ಳಿಗಳನ್ನು ಸುಟ್ಟುಹಾಕಿದರು, ನೂರಾರು ದೇವಾಲಯಗಳು ಮತ್ತು ಚರ್ಚುಗಳನ್ನು ನಾಶಪಡಿಸಿದರು ಮತ್ತು ಹಿಂದೂಗಳನ್ನು ಬಲವಂತವಾಗಿ ಮತಾಂತರಗೊಳಿಸಿದರು.
  2. ಐತಿಹಾಸಿಕ ದಾಖಲೆಗಳಲ್ಲಿ, “ನಾಸ್ತಿಕರನ್ನು” ಇಸ್ಲಾಂಗೆ ಮತಾಂತರಗೊಳ್ಳುವಂತೆ ಒತ್ತಾಯಿಸುವ ಮತ್ತು ಅವರ ಪೂಜಾ ಸ್ಥಳಗಳನ್ನು ನಾಶಪಡಿಸಿದ ಬಗ್ಗೆ ಟಿಪ್ಪು ಹೆಮ್ಮೆಪಡುವ ದಾಖಲೆ ಇದೆ.
  3. ಟಿಪ್ಪುಗೆ ಸಂಬಂಧಿಸಿದಂತೆ ಎರಡು ರೀತಿಯ ಭಿನ್ನ ಅಭಿಪ್ರಾಯ ಹೊಂದಿದ ಜನರಿದ್ದಾರೆ, ಒಬ್ಬರು ಅವರನ್ನು “ಮೈಸೂರು ಹುಲಿ” ಎಂದು ಬಣ್ಣಿಸುತ್ತಾರೆ, ವಸಾಹತುಶಾಹಿಯ ವಿರುದ್ಧದ ಪ್ರತಿರೋಧ ಮತ್ತು ಅವರನ್ನು ಕರ್ನಾಟಕದ ಮಹಾನ್ ಮಗನಾಗಿ ನೋಡುವವರು ಮತ್ತು ಇತರರು, ಟಿಪ್ಪು ನನ್ನು ದೇವಾಲಯಗಳನ್ನು ನಾಶಪಡಿಸಿದವನು ಮತ್ತು ಹಿಂದೂಗಳು ಮತ್ತು ಕ್ರಿಶ್ಚಿಯನ್ನರನ್ನು ಬಲವಂತವಾಗಿ ಮತಾಂತರ ಗೊಳಿಸಿದವನು ಎಂದು ಆರೋಪಿಸಿ ಅವನನ್ನು ಮತಾಂಧ ಮತ್ತು ದಬ್ಬಾಳಿಕೆಯ ಪ್ರವೃತ್ತಿಯವನೆಂದು ಕರೆಯುತ್ತಾರೆ.

 

ದಯವಿಟ್ಟು ಗಮನಿಸಿ:

ಟಿಪ್ಪು ಜನ್ಮದಿನ ಬದಲು: ಹೊಸ ಸಂಶೋಧನೆ:

ನಿರಂತರ ಸಂಶೋಧನೆಯ ಫಲವಾಗಿ ಟಿಪ್ಪು ಸುಲ್ತಾನ್ ಜನ್ಮದಿನ 1 ಡಿಸೆಂಬರ್ 1751 ಎನ್ನುವುದು ದೃಢಪಟ್ಟಿದೆ ಎಂದು ಇತಿಹಾಸ ತಜ್ಞ, ಸಂಶೋಧಕ ನಿಧಿನ್ ಓಲಿಕಾರ್‌ ಹೇಳಿದ್ದಾರೆ.

  1. ಇದುವರೆಗೂ ಟಿಪ್ಪು ಜನ್ಮದಿನ 20 ನವೆಂಬರ್ 1750 ಎಂದು ನಂಬಲಾಗಿದೆ. ನಿಖರವಾದ ಸತ್ಯ ತಿಳಿಯಲು ಹಲವು ವರ್ಷಗಳ ಕಾಲ ಸಂಶೋಧನೆ ಮಾಡಿದ್ದೇನೆ. ಲಂಡನ್‍ ಮ್ಯೂಸಿಯಂನ ಅಧಿಕೃತ ಪತ್ರಗಳ ಸಮಗ್ರ ಅಧ್ಯಯನ ನಡೆಸಿರುವೆ. ಪ್ರಮುಖ ಮೂರು ದಾಖಲೆ ಸಲ್ಲಿಸಿದ್ದೇನೆ. ಮಂಗಳೂರು ಮತ್ತು ಗೋವಾ ವಿಶ್ವವಿದ್ಯಾಲಯದ ವಿಶ್ರಾಂತ ಕುಲಪತಿ, ಇತಿಹಾಸಜ್ಞ ಪ್ರೊ.ಶೇಖ್‍ ಅಲಿ ಅವರು ಅನುಮೋದಿಸಿದ್ದಾರೆ. ಅಧ್ಯಯನದ ಸಂಪೂರ್ಣ ವಿವರಗಳನ್ನು ಸರ್ಕಾರಕ್ಕೆ ಸಲ್ಲಿಸಿದ್ದೇನೆ. ಮುಂದಿನ ದಿನಗಳಲ್ಲಿ ಟಿಪ್ಪು ಜನ್ಮದಿನ 1 ಡಿಸೆಂಬರ್ 1751 ಆಗಬೇಕು ಎಂದು ಮನವಿ ಮಾಡಲಾಗಿದೆ’ ಎಂದು ಶನಿವಾರ ಪತ್ರಿಕಾಗೋಷ್ಠಿಯಲ್ಲಿ ಮಾಹಿತಿ ನೀಡಿದರು.
  2. ‘ನಿಧಿನ್ ಅವರು ಲಂಡನ್‍ಗೆ ತೆರಳಿದಾಗ ಅಲ್ಲಿನ ಬ್ರಿಟಿಷ್ ಗ್ರಂಥಾಲಯದಲ್ಲಿ ಟಿಪ್ಪುಗೆ ಸಂಬಂಧಿಸಿದ ಪರ್ಶಿಯನ್ ಭಾಷೆಯ ‘ಫತೇ ಉಲ್ ಮುಜಾಹಿದ್ದೀನ್’ ಹಸ್ತಪ್ರತಿ ಸಿಕ್ಕಿತು. ಅದು ಸ್ವತಃ ಟಿಪ್ಪು ತಾನೇ ಬರೆಸಿದ ಕೈಪಿಡಿ. ಆ ಕೈಪಿಡಿಯಲ್ಲಿ ಜಕ್ರಿ ಮಾಸದ 14ನೇ ದಿನ 1165 ಇಜ್ರಿ ದಿನ ಸೂರ್ಯೋದಯವಾದ 10 ಗಂಟೆಗಳ ನಂತರ ನನ್ನ ಜನ್ಮದಿನ ಆಚರಿಸಬೇಕು. ಮೈಸೂರು ಸಂಸ್ಥಾನದ ಸಮಸ್ತ ಪ್ರಜೆಗಳು ಸಂಭ್ರಮದಲ್ಲಿ ಭಾಗವಹಿಸಬೇಕು ಎಂಬ ಉಲ್ಲೇಖವಿದೆ. ಈ ಆಧಾರದ ಮೇಲೆ ಆಂಗ್ಲ ಕ್ಯಾಲೆಂಡರ್‌ಗೆ ಬದಲಾಯಿಸಿಕೊಂಡು ಅಧ್ಯಯನ ನಡೆಸಲಾಗಿದೆ. ಕೆಲವು ಹಸ್ತ ಪ್ರತಿಗಳಲ್ಲೂ ಜನ್ಮದಿನದ ಸುಳಿವು ದೊರೆತಿದೆ’ ಎಂದು ಇತಿಹಾಸಕಾರ ಖಂಡೋಬ ರಾವ್ ವಿವರ ನೀಡಿದರು.

 


ಸಾಮಾನ್ಯ ಅಧ್ಯಯನ ಪತ್ರಿಕೆ : 2


 

ವಿಷಯಗಳು: ಸರ್ಕಾರದ ವಿವಿಧ ಅಂಗಗಳ ನಡುವೆ ಅಧಿಕಾರ ವಿಭಜನೆ, ವಿವಾದ ಪರಿಹಾರ ಕಾರ್ಯವಿಧಾನಗಳು ಮತ್ತು ಸಂಸ್ಥೆಗಳು.

ಸುಪ್ರೀಂ ಕೋರ್ಟ್ ಮುಂದೆ ವೈವಾಹಿಕ ಹಕ್ಕುಗಳು:


(Conjugal rights before Supreme Court)

 ಸಂದರ್ಭ:

ಇತ್ತೀಚೆಗೆ, ಹಿಂದೂ ವೈಯಕ್ತಿಕ ಕಾನೂನು’ ಅಡಿಯಲ್ಲಿ ‘ವೈವಾಹಿಕ ಹಕ್ಕುಗಳ ಮರುಸ್ಥಾಪನೆಗೆ’(Restitution of Conjugal Rights) ಅವಕಾಶ ನೀಡುವ ನಿಬಂಧನೆಯ ಕುರಿತು ಸುಪ್ರೀಂ ಕೋರ್ಟ್ ಹೊಸ ವಿಚಾರಣೆಯನ್ನು ಆಲಿಸುವ ಸಾಧ್ಯತೆಯಿದೆ.

 

ವೈವಾಹಿಕ ಹಕ್ಕುಗಳು’ ಎಂದರೇನು?

ಹಿಂದೂ ವಿವಾಹ ಕಾಯ್ದೆ, 1955’  (Hindu Marriage Act, 1955)  ರ ಸೆಕ್ಷನ್ 9 ರಲ್ಲಿ ‘ವೈವಾಹಿಕ ಹಕ್ಕುಗಳ ಮರುಸ್ಥಾಪನೆ’ ಕುರಿತು ಚರ್ಚಿಸಲಾಗಿದೆ.

‘ವೈವಾಹಿಕ ಹಕ್ಕುಗಳು’ ಮದುವೆಯಿಂದ ರಚಿಸಲ್ಪಟ್ಟ ಹಕ್ಕುಗಳು, ಅಂದರೆ, ಇಬ್ಬರು ವ್ಯಕ್ತಿಗಳು (ಗಂಡ ಮತ್ತು ಹೆಂಡತಿ) ಒಬ್ಬರನ್ನೊಬ್ಬರು ಮದುವೆಯಾದಾಗ, ಮದುವೆ ಸಂಪನ್ನವಾದ ನಂತರ, ಕೆಲವು ಸಾಮಾಜಿಕ ಹಕ್ಕುಗಳು ಮತ್ತು ಕಟ್ಟುಪಾಡುಗಳು ಇಬ್ಬರ ನಡುವೆ ಪರಸ್ಪರರ ಕಡೆಗೆ ಉದ್ಭವಿಸುತ್ತವೆ.

  1. ಮದುವೆ, ವಿಚ್ಛೇದನ ಇತ್ಯಾದಿಗಳಿಗೆ ಸಂಬಂಧಿಸಿದ ‘ವೈಯಕ್ತಿಕ ಕಾನೂನುಗಳಲ್ಲಿ’ ಮತ್ತು ಅಪರಾಧ ಕಾನೂನಿನಲ್ಲಿ, ಸಂಗಾತಿಗೆ ನಿರ್ವಹಣೆ ಮತ್ತು ಜೀವನಾಂಶದ ಅಗತ್ಯತೆಯನ್ನು ಗಣನೆಗೆ ತೆಗೆದುಕೊಂಡು ಈ ನೆಲದ ಕಾನೂನು ಈ ಸಾಮಾಜಿಕ ಹಕ್ಕುಗಳು ಮತ್ತು ಕಟ್ಟುಪಾಡುಗಳನ್ನು ಗುರುತಿಸುತ್ತದೆ.
  2. ಹಿಂದೂ ವಿವಾಹ ಕಾಯ್ದೆಯ ಸೆಕ್ಷನ್ 9 ‘ವೈವಾಹಿಕ ಹಕ್ಕುಗಳ’ ಒಂದು ಅಂಶವನ್ನು ಗುರುತಿಸುತ್ತದೆ-ಗಂಡ ಮತ್ತು ಹೆಂಡತಿಯ ಒಡನಾಟದ ಹಕ್ಕು-ಮತ್ತು ಈ ಹಕ್ಕುಗಳ ಅನುಷ್ಠಾನಕ್ಕಾಗಿ,ಸಂಗಾತಿಯನ್ನು ನ್ಯಾಯಾಲಯಕ್ಕೆ ಹೋಗಲು ಅನುಮತಿಸುವ ಮೂಲಕ ಅವರನ್ನು ರಕ್ಷಿಸುತ್ತದೆ.

 

ಈ ಹಕ್ಕುಗಳನ್ನು ಹೇಗೆ ಜಾರಿಗೊಳಿಸಬಹುದು?

  1. ಸಂಗಾತಿಯೊಬ್ಬರು, ಯಾವುದೇ ಸಮಂಜಸವಾದ ಕಾರಣವಿಲ್ಲದೆ (Reasonable excuse), ಇನ್ನೊಬ್ಬರನ್ನು ತೊರೆದಾಗ, ಆದ್ದರಿಂದ ಉದ್ಭವಿಸುವ ಇಂತಹ ಪರಿಸ್ಥಿತಿಯಲ್ಲಿ ಸಂತ್ರಸ್ತ ಪಕ್ಷವು ಅರ್ಜಿಯ ಮೂಲಕ ಜಿಲ್ಲಾ ನ್ಯಾಯಾಲಯದಲ್ಲಿ ಮೇಲ್ಮನವಿ ಸಲ್ಲಿಸಬಹುದು.
  2. ಅರ್ಜಿಯಲ್ಲಿ ನೀಡಿದ ಹೇಳಿಕೆಗಳ ಸತ್ಯದ ಬಗ್ಗೆ ತೃಪ್ತಿ ಹೊಂದಿದ ನಂತರ ಮತ್ತು ಅರ್ಜಿಯನ್ನು ಏಕೆ ನೀಡಬಾರದು ಎಂಬುದಕ್ಕೆ ಯಾವುದೇ ಕಾನೂನು ಆಧಾರಗಳಿಲ್ಲ, ಎಂದು ಮನಗಂಡ ನಂತರ ನ್ಯಾಯಾಲಯವು ‘ವೈವಾಹಿಕ ಹಕ್ಕುಗಳ ಮರುಸ್ಥಾಪನೆ’(Restitution of Conjugal Rights) ಗೆ ಆದೇಶಿಸಬಹುದು.
  3. ಇದಲ್ಲದೆ, ಒಬ್ಬ ಸಂಗಾತಿಯೂ ಒಟ್ಟಿಗೆ ವಾಸಿಸಲು ನಿರಾಕರಿಸಿದರೆ, ಇತರ ಪಕ್ಷವು ‘ಕುಟುಂಬ ನ್ಯಾಯಾಲಯ’ದಲ್ಲಿ ಒಟ್ಟಿಗೆ ವಾಸಿಸಲು ಆದೇಶ ನೀಡುವಂತೆ ಕೋರಿ ಮನವಿ ಸಲ್ಲಿಸಬಹುದು. ನ್ಯಾಯಾಲಯದ ಆದೇಶವನ್ನು ಪಾಲಿಸದಿದ್ದಲ್ಲಿ, ನ್ಯಾಯಾಲಯವು ತಪ್ಪಿತಸ್ಥ ಪಕ್ಷದ ಆಸ್ತಿಯನ್ನು ಲಗತ್ತಿಸಬಹುದು. ಆದರೆ, ನ್ಯಾಯಾಲಯದ ಈ ನಿರ್ಧಾರವನ್ನು ಹೈಕೋರ್ಟ್ ಮತ್ತು ಸುಪ್ರೀಂ ಕೋರ್ಟ್‌ನಲ್ಲಿ ಮೇಲ್ಮನವಿ ಸಲ್ಲಿಸುವ ಮೂಲಕ ಪ್ರಶ್ನಿಸಬಹುದು.

 

ಈ ಕಾನೂನನ್ನು ಪ್ರಶ್ನಿಸಲು ಕಾರಣಗಳು:

ಈ ಕಾನೂನನ್ನು ಪ್ರಶ್ನಿಸುವ ಮುಖ್ಯ ಆಧಾರವೆಂದರೆ ಅದು ‘ಗೌಪ್ಯತೆಯ ಮೂಲಭೂತ ಹಕ್ಕನ್ನು’ ಉಲ್ಲಂಘಿಸುತ್ತದೆ.

  1. ಈ ಕಾನೂನು ರಾಜ್ಯದ ಕಡೆಯಿಂದ “ದಬ್ಬಾಳಿಕೆಯ ಕೃತ್ಯ” ಕ್ಕೆ ಸಮನಾಗಿರುತ್ತದೆ ಮತ್ತು ಇದು ಒಬ್ಬರ ಲೈಂಗಿಕ ಮತ್ತು ನಿರ್ಧಾರ ತೆಗೆದುಕೊಳ್ಳುವ ಸ್ವಾಯತ್ತತೆಗೆ ಮತ್ತು ಗೌಪ್ಯತೆ ಮತ್ತು ಘನತೆಯ ಹಕ್ಕನ್ನು ಉಲ್ಲಂಘಿಸುತ್ತದೆ.
  2. ಈ ನಿಬಂಧನೆಯು ಮಹಿಳೆಯರ ಮೇಲೆ ಅನುಚಿತ ರೀತಿಯಲ್ಲಿ ಪರಿಣಾಮ ಬೀರುತ್ತದೆ. ಈ ನಿಬಂಧನೆಯಡಿಯಲ್ಲಿ ಮಹಿಳೆಯರನ್ನು ಹೆಚ್ಚಾಗಿ ತಮ್ಮ ಗಂಡನ ಮನೆಗಳಿಗೆ ಕರೆಯಿಸಿಕೊಳ್ಳಲಾಗುತ್ತದೆ, ಮತ್ತು ‘ವೈವಾಹಿಕ ಅತ್ಯಾಚಾರ’ವನ್ನು ಕಾನೂನಿನಡಿಯಲ್ಲಿ ಅಪರಾಧವೆಂದು ಪರಿಗಣಿಸಲಾಗುವುದಿಲ್ಲವಾದ್ದರಿಂದ, ಮಹಿಳೆಯರನ್ನು ಈ ದೃಷ್ಟಿಯಿಂದ ಒಟ್ಟಿಗೆ ವಾಸಿಸಲು ಒತ್ತಾಯಿಸುವುದು, ಅವರನ್ನು ದುರ್ಬಲಗೊಳಿಸುತ್ತದೆ ಮತ್ತು ಅವರು ಅಂತಹ ಬಲವಂತದ ಸಹವಾಸಕ್ಕೆ ಒಳಗಾಗುತ್ತಾರೆ.
  3. ಇದಲ್ಲದೆ, ಗಂಡ ಹೆಂಡತಿಯನ್ನು ಒಟ್ಟಿಗೆ ಇರಿಸಲು ರಾಜ್ಯವು ಕಾನೂನಿನ ಬಳಕೆ ಮಾಡಿಕೊಳ್ಳುವ ಮೂಲಕ ವಿವಾಹದ ಸಂಸ್ಥೆಯನ್ನು ರಕ್ಷಿಸುವಲ್ಲಿ ರಾಜ್ಯವು ಯಾವ ಪ್ರಮುಖ ಆಸಕ್ತಿಯನ್ನು ಹೊಂದಿರಬಹುದು ಎಂಬ ಪ್ರಶ್ನೆಯೂ ಉದ್ಭವಿಸುತ್ತದೆ.

 

ವಿಷಯಗಳು:ಸರ್ಕಾರದ ನೀತಿಗಳು ಮತ್ತು ವಿವಿಧ ಕ್ಷೇತ್ರಗಳಲ್ಲಿನ ಅಭಿವೃದ್ಧಿಯ ಅಡಚಣೆಗಳು ಮತ್ತು ಅವುಗಳ ವಿನ್ಯಾಸ ಮತ್ತು ಅನುಷ್ಠಾನದಿಂದ ಉಂಟಾಗುವ ಸಮಸ್ಯೆಗಳು.

ಮಾನವ ಕಳ್ಳಸಾಗಣೆ ವಿರೋಧಿ ಕರಡು ಮಸೂದೆ:


(Draft anti-trafficking Bill)

ಸಂದರ್ಭ:

ಮುಂಬರುವ ಸಂಸತ್ತಿನ ಮುಂಗಾರು ಅಧಿವೇಶನದಲ್ಲಿ ಮಾನವ ಕಳ್ಳಸಾಗಣೆ (ತಡೆಗಟ್ಟುವಿಕೆ, ಆರೈಕೆ ಮತ್ತು ಪುನರ್ವಸತಿ) ಮಸೂದೆ 2021  (Trafficking in Persons (Prevention, Care and Rehabilitation) Bill, 2021)  ಅನ್ನು, ಪರಿಚಯಿಸುವ ಸಾಧ್ಯತೆಯಿದೆ.

 

ಈ ಮಸೂದೆಯ ಪ್ರಮುಖಾಂಶಗಳು:

  1. ಪ್ರಸ್ತಾವಿತ ಮಸೂದೆಯು ಅಪರಾಧಿಗಳಿಗೆ ಭಾರಿ ದಂಡ ಮತ್ತು ಅವರ ಆಸ್ತಿಗಳನ್ನು ಮುಟ್ಟುಗೋಲು ಹಾಕಿಕೊಳ್ಳುವುದು ಸೇರಿದಂತೆ ಕಠಿಣ ಶಿಕ್ಷೆಯನ್ನು ಸೂಚಿಸುತ್ತದೆ.
  2.  ಮಹಿಳೆಯರು ಮತ್ತು ಮಕ್ಕಳಿಗೆ ರಕ್ಷಣೆ ನೀಡುವುದರ ಜೊತೆಗೆ, ಮಸೂದೆಯಲ್ಲಿ ಲೈಂಗಿಕ ಅಲ್ಪಸಂಖ್ಯಾತ ಅಥವಾ ಬಲಿಪಶುಗಳಾಗಿ ಸಾಗಿಸಲ್ಪಡುವ ಯಾವುದೇ ಸಂತ್ರಸ್ತ ವ್ಯಕ್ತಿಯೂ ಸೇರಿದ್ದಾರೆ.
  3.  ಈ ಕರಡು, ವ್ಯಕ್ತಿಯನ್ನು ‘ಬಲಿಪಶು’ / ‘ಸಂತ್ರಸ್ತ’ ಎಂದು ವ್ಯಾಖ್ಯಾನಿಸಲು, ಒಂದು ಸ್ಥಳದಿಂದ ಮತ್ತೊಂದು ಸ್ಥಳಕ್ಕೆ ಸಾಗಿಸುವುದು ಅವಶ್ಯಕ ಎಂಬ ನಿಬಂಧನೆಯನ್ನು ಸಹ ತೆಗೆದುಹಾಕಲು ಪ್ರಯತ್ನಿಸುತ್ತದೆ.
  4. ‘ಶೋಷಣೆ’ ಯ ವ್ಯಾಖ್ಯಾನವು ಇತರರ ವೇಶ್ಯಾವಾಟಿಕೆ ಅಥವಾ ಇತರ ರೀತಿಯ ಲೈಂಗಿಕ ಶೋಷಣೆಯಾದ ಅಶ್ಲೀಲತೆ, ಯಾವುದೇ ದೈಹಿಕ ಕಿರುಕುಳ, ಬಲವಂತದ ದುಡಿಮೆ, ಗುಲಾಮಗಿರಿ ಅಥವಾ ಗುಲಾಮಗಿರಿಯಂತಹ ಅಭ್ಯಾಸಗಳು, ಗುಲಾಮಗಿರಿ ಅಥವಾ ಅಂಗಗಳನ್ನು ಬಲವಂತವಾಗಿ ತೆಗೆಯುವುದು ಇತ್ಯಾದಿಗಳನ್ನು ಒಳಗೊಂಡಿದೆ.

 

ಅನ್ವಯಿಸುವಿಕೆ:

ಈ ಕಾನೂನು ಈ ಕೆಳಗಿನ ಎಲ್ಲ ವ್ಯಕ್ತಿಗಳಿಗೆ ಅನ್ವಯಿಸುತ್ತದೆ-

  1. ಭಾರತದ ಗಡಿಯ ಒಳಗೆ ಮತ್ತು ಹೊರಗೆ ವಾಸಿಸುವ ಎಲ್ಲಾ ನಾಗರಿಕರು.
  2. ಭಾರತದಲ್ಲಿ ನೋಂದಾಯಿಸಲ್ಪಟ್ಟ ಯಾವುದೇ ಹಡಗು ಅಥವಾ ವಿಮಾನದಲ್ಲಿರುವ ವ್ಯಕ್ತಿಗಳು, ಅವರು ಎಲ್ಲಿದ್ದರೂ ಅಥವಾ ಅದು ಎಲ್ಲಿದ್ದರೂ ಭಾರತೀಯ ಪ್ರಜೆಗಳನ್ನು ಹೊತ್ತೊಯ್ಯುತ್ತದೆ.
  3. ಈ ಕಾಯ್ದೆಯಡಿ ಅಪರಾಧ ಮಾಡುವ ಸಮಯದಲ್ಲಿ ಭಾರತದಲ್ಲಿ ವಾಸಿಸುತ್ತಿರುವ ಯಾವುದೇ ವಿದೇಶಿ ನಾಗರಿಕ ಅಥವಾ ರಾಷ್ಟ್ರೀಯತೆಯಿಲ್ಲದ ಯಾವುದೇ ವ್ಯಕ್ತಿ.
  4. ಗಡಿಯಾಚೆಗಿನ ಪರಿಣಾಮಗಳೊಂದಿಗೆ ಮಾನವ ಕಳ್ಳಸಾಗಣೆಯ ಪ್ರತಿಯೊಂದು ಅಪರಾಧ.
  5. ರಕ್ಷಣಾ ಸಿಬ್ಬಂದಿ ಮತ್ತು ಸರ್ಕಾರಿ ನೌಕರರು, ವೈದ್ಯರು ಮತ್ತು ಅರೆವೈದ್ಯಕೀಯ ಸಿಬ್ಬಂದಿ ಅಥವಾ ಅಧಿಕಾರ ಹೊಂದಿರುವ ಯಾವುದೇ ವ್ಯಕ್ತಿ.

 

ಭಾರತದಲ್ಲಿ ಕಳ್ಳಸಾಗಣೆಗೆ ಸಂಬಂಧಿಸಿದ ಸಾಂವಿಧಾನಿಕ ಮತ್ತು ಶಾಸಕಾಂಗ ನಿಬಂಧನೆಗಳು:

  1. ಆರ್ಟಿಕಲ್ 23 (1) ರ ಅಡಿಯಲ್ಲಿ ಭಾರತೀಯ ಸಂವಿಧಾನದಡಿಯಲ್ಲಿ ಮಾನವರ ಅಥವಾ ವ್ಯಕ್ತಿಗಳ ಕಳ್ಳಸಾಗಣೆಯನ್ನು ನಿಷೇಧಿಸಲಾಗಿದೆ.
  2. ಅನೈತಿಕ ಸಂಚಾರ (ತಡೆಗಟ್ಟುವಿಕೆ) ಕಾಯ್ದೆ, 1956 (Immoral Traffic (Prevention) Act – ITPA) ವಾಣಿಜ್ಯ ಲೈಂಗಿಕ ಶೋಷಣೆಗಾಗಿ ಕಳ್ಳಸಾಗಣೆ ತಡೆಗಟ್ಟುವ ಪ್ರಮುಖ ಕಾನೂನು ಆಗಿದೆ.
  3. ಕ್ರಿಮಿನಲ್ ಕಾನೂನು (ತಿದ್ದುಪಡಿ) ಕಾಯ್ದೆ 2013 ರ ಅಡಿಯಲ್ಲಿ ಭಾರತೀಯ ದಂಡ ಸಂಹಿತೆಯ ಸೆಕ್ಷನ್ 370 ಅನ್ನು IPC 370 ಮತ್ತು 370 A ವಿಧಿಯ ಮೂಲಕ ಬದಲಾಯಿಸಲಾಗಿದೆ.ಇದರಲ್ಲಿ ಮಾನವ ಕಳ್ಳಸಾಗಣೆಯ ಭೀತಿಯನ್ನು ಎದುರಿಸಲು ಸಮಗ್ರ ನಿಬಂಧನೆಗಳನ್ನು ಮಾಡಲಾಗಿದೆ.

 

ವಿಷಯಗಳು: ಸರ್ಕಾರದ ನೀತಿಗಳು ಮತ್ತು ವಿವಿಧ ಕ್ಷೇತ್ರಗಳಲ್ಲಿನ ಅಭಿವೃದ್ಧಿಯ ಅಡಚಣೆಗಳು ಮತ್ತು ಅವುಗಳ ವಿನ್ಯಾಸ ಮತ್ತು ಅನುಷ್ಠಾನದಿಂದ ಉಂಟಾಗುವ ಸಮಸ್ಯೆಗಳು.

ಮೇಕೆಡಾಟು ಅಣೆಕಟ್ಟು ಯೋಜನೆ:


(Mekedatu dam project)

 ಸಂದರ್ಭ:

ಇತ್ತೀಚೆಗೆ ಕೇಂದ್ರ ಸರ್ಕಾರವು,  ಕರ್ನಾಟಕ ಸಲ್ಲಿಸಿದ ‘ವಿವರವಾದ ಯೋಜನಾ ವರದಿ’ (Detailed Project Report – DPR) ಯನ್ನು ಕಾವೇರಿ ಜಲ ನಿರ್ವಹಣಾ ಪ್ರಾಧಿಕಾರ (Cauvery Water Management Authority -CWMA) ವು, ಅನುಮೋದಿಸದ ಹೊರತು, ಕಾವೇರಿ ನದಿಯಲ್ಲಿ ‘ಮೇಕೆಡಾಟು ಅಣೆಕಟ್ಟು ಯೋಜನೆ’ ಯಲ್ಲಿ ಯಾವುದೇ ನಿರ್ಮಾಣ ಕಾರ್ಯ ಕೈಗೊಳ್ಳಲು ಕರ್ನಾಟಕಕ್ಕೆ ಅನುಮತಿ ನೀಡುವುದಿಲ್ಲ ಎಂದು ಭರವಸೆ ನೀಡಿದೆ.

 

ಹಿನ್ನೆಲೆ:

ಕಾವೇರಿ ನದಿಯಲ್ಲಿ ಪ್ರಸ್ತಾವಿತ ‘ಮೇಕೆಡಾಟು ಅಣೆಕಟ್ಟು ಯೋಜನೆ’ ಬಗ್ಗೆ ಕರ್ನಾಟಕ ಮತ್ತು ತಮಿಳುನಾಡು ನಡುವೆ ಭಿನ್ನಾಭಿಪ್ರಾಯಗಳಿವೆ.

 

ಮೇಕೆದಾಟು ಎಲ್ಲದೆ?

ಮೇಕೆಡಾಟು ಎಂದರೆ ಮೇಕೆಯ ಜಿಗಿತ ಎಂದರ್ಥ (goat’s leap) ಎಂದರ್ಥ. ಕಾವೇರಿ ಮತ್ತು ಅದರ ಉಪನದಿ ಅರ್ಕಾವತಿ ನದಿಗಳ ಸಂಗಮದಲ್ಲಿ ನೆಲೆಗೊಂಡಿರುವ ಆಳವಾದ ಕಮರಿಯೇ (gorge) ಮೇಕೆಡಾಟು.

 

ಮೇಕೆದಾಟು ಯೋಜನೆಗೆ ಸಂಬಂಧಿಸಿದ ವಿವಾದಗಳು:

ಈ ಯೋಜನೆಯ ಉದ್ದೇಶವು, ಬೆಂಗಳೂರು ನಗರಕ್ಕೆ ಕುಡಿಯುವ ಉದ್ದೇಶಕ್ಕಾಗಿ ನೀರನ್ನು ಸಂಗ್ರಹಿಸಿ ಪೂರೈಕೆ ಮಾಡುವುದು. ಈ ಯೋಜನೆಯ ಮೂಲಕ ಸುಮಾರು 400 ಮೆಗಾವ್ಯಾಟ್ (megawatts) ವಿದ್ಯುತ್ತನ್ನು ಸಹ ಉತ್ಪಾದಿಸಲು ಉದ್ದೇಶಿಸಲಾಗಿದೆ.

ಆದರೆ, ಈ ಯೋಜನೆಯು ತಮಿಳುನಾಡಿಗೆ ಕಾವೇರಿ ನದಿ ನೀರಿನ ಹರಿವಿನ ಮೇಲೆ ಪರಿಣಾಮ ಬೀರುತ್ತದೆ ಎಂದು ತಮಿಳುನಾಡು ಆಕ್ಷೇಪ ವ್ಯಕ್ತಪಡಿಸಿದೆ. ಈ ಯೋಜನೆಯು ಕಾವೇರಿ ನದಿ ನೀರು ವಿವಾದ ನ್ಯಾಯಾಧಿಕರಣ (CWDT) ದ ಅಂತಿಮ ಆದೇಶಕ್ಕೆ ವಿರುದ್ಧವಾಗಿದೆ ಎಂದು ವಾದಿಸುತ್ತದೆ, ಅಂತೆಯೇ ಸರ್ವೋಚ್ಚ ನ್ಯಾಯಾಲಯವು ಯಾವುದೇ ರಾಜ್ಯವು ಅಂತರರಾಜ್ಯ ನದಿಗಳ ನೀರಿನ ಮೇಲೆ ವಿಶೇಷ ಮಾಲೀಕತ್ವವನ್ನು ಪಡೆಯಲು ಸಾಧ್ಯವಿಲ್ಲ ಅಥವಾ ಇತರ ರಾಜ್ಯಗಳ ನ್ಯಾಯಯುತ ನೀರಿನ ಹಕ್ಕುಗಳನ್ನು ಕಸಿದುಕೊಳ್ಳುವ ಅಧಿಕಾರ ಹೊಂದಿಲ್ಲ ಎಂದು   ಅಭಿಪ್ರಾಯಪಟ್ಟಿದೆ.

./

 

ಕಾವೇರಿ ನದಿಯ ಕುರಿತು:

ಉಗಮ: ಕಾವೇರಿ ನದಿಯು ಕರ್ನಾಟಕ ರಾಜ್ಯದ ನೈರುತ್ಯ ಭಾಗದಲ್ಲಿನ ಪಶ್ಚಿಮ ಘಟ್ಟದ ​​ಬ್ರಹ್ಮಗಿರಿ ಬೆಟ್ಟದ ಮೇಲೆ ಉಗಮವಾಗುತ್ತದೆ.

ನದಿಯ ಜಲಾನಯನ ಪ್ರದೇಶವು ಮೂರು ರಾಜ್ಯಗಳು ಮತ್ತು ಒಂದು ಕೇಂದ್ರ ಪ್ರದೇಶವನ್ನು ಒಳಗೊಂಡಿದೆ: ತಮಿಳುನಾಡು, 43,868 ಚದರ ಕಿಲೋಮೀಟರ್, ಕರ್ನಾಟಕ, 34,273 ಚದರ ಕಿಲೋಮೀಟರ್, ಕೇರಳ, 2,866 ಚದರ ಕಿಲೋಮೀಟರ್ ಮತ್ತು ಪುದುಚೇರಿ.

ಪ್ರಮುಖ ಉಪನದಿಗಳು: ಹೇಮಾವತಿ, ಲಕ್ಷ್ಮಣ ತೀರ್ಥ, ಕಬಿನಿ, ಅಮರಾವತಿ, ಸುವರ್ಣಾವತಿ, ನೊಯಿಲ್ ಮತ್ತು ಭವಾನಿ ನದಿಗಳು.

ಕಾವೇರಿ ನದಿಯ ಜಲಪಾತಗಳು: ಕರ್ನಾಟಕದಲ್ಲಿ ಗಗನಚುಕ್ಕಿ-ಭರಚುಕ್ಕಿ ಎಂಬ ಜಲಪಾತಗಳನ್ನು ನಿರ್ಮಿಸಿದರೆ ತಮಿಳುನಾಡಿಗೆ ಪ್ರವೇಶಿಸಿದ ನಂತರ,  ಹೊಗೆನಕಲ್ ಜಲಪಾತವನ್ನು ಸೃಷ್ಟಿಸುತ್ತದೆ.

ಅಣೆಕಟ್ಟುಗಳು: ಕರ್ನಾಟಕದಲ್ಲಿ ವಿಶ್ವಪ್ರಸಿದ್ಧ ಕೃಷ್ಣರಾಜಸಾಗರ ಅಣೆಕಟ್ಟು ಮತ್ತು ತಮಿಳುನಾಡಿನಲ್ಲಿ ನೀರಾವರಿ ಮತ್ತು ಜಲ ವಿದ್ಯುತ್ ಉದ್ದೇಶಗಳಿಗಾಗಿ ಮೆಟ್ಟೂರು ಅಣೆಕಟ್ಟು ನಿರ್ಮಿಸಲಾಗಿದೆ.

 


ಸಾಮಾನ್ಯ ಅಧ್ಯಯನ ಪತ್ರಿಕೆ : 3


 

ವಿಷಯಗಳು: ಮಾಹಿತಿ ತಂತ್ರಜ್ಞಾನ, ಬಾಹ್ಯಾಕಾಶ, ಕಂಪ್ಯೂಟರ್, ರೊಬೊಟಿಕ್ಸ್, ನ್ಯಾನೊ-ತಂತ್ರಜ್ಞಾನ, ಜೈವಿಕ ತಂತ್ರಜ್ಞಾನ ಮತ್ತು ಬೌದ್ಧಿಕ ಆಸ್ತಿ ಹಕ್ಕುಗಳಿಗೆ ಸಂಬಂಧಿಸಿದ ವಿಷಯಗಳ ಬಗ್ಗೆ ಜಾಗೃತಿ.

ಚೀನಾದ ಜುರಾಂಗ್ ಮಾರ್ಸ್ ರೋವರ್:


(China’s Zhurong Mars rover)

 

ಸಂದರ್ಭ:

ಚೀನಾದ ‘ಜುರಾಂಗ್’ ರೋವರ್ ಇದುವರೆಗೆ ಮಂಗಳ ಗ್ರಹದ ಮೇಲ್ಮೈಯಲ್ಲಿ 509 ಮೀಟರ್ ದೂರವನ್ನು ಕ್ರಮಿಸಿದೆ.

  1. ಜುರಾಂಗ್ ರೋವರ್ ಕೆಂಪು ಗ್ರಹ ಎಂದು ಕರೆಯಲ್ಪಡುವ ಮಂಗಳ ಗ್ರಹದಲ್ಲಿ 63 ದಿನಗಳಿಂದ ಕಾರ್ಯನಿರ್ವಹಿಸುತ್ತಿದೆ. ಮಂಗಳನ ಒಂದು ‘ದಿನ’ ಭೂಮಿಯ ‘ಒಂದು ದಿನ ಕ್ಕಿಂತ ಸುಮಾರು 40 ನಿಮಿಷಗಳು ಅಧಿಕವಾಗಿರುತ್ತದೆ.

 

ಹಿನ್ನೆಲೆ:

  1. ಚೀನಾದ ‘ಟಿಯಾನ್ವೆನ್ -1’ ಮಿಷನ್ ಅನ್ನು ಜುಲೈ 23, 2020 ರಂದು ಪ್ರಾರಂಭಿಸಲಾಯಿತು. ಈ ಮಿಷನ್/ ಕಾರ್ಯಾಚರಣೆಯಲ್ಲಿ ಆರ್ಬಿಟರ್, ಲ್ಯಾಂಡರ್ ಮತ್ತು ರೋವರ್ ಅನ್ನು ಮಂಗಳಕ್ಕೆ ಕಳುಹಿಸಲಾಗಿದೆ.
  2. ರೋವರ್ ಅನ್ನು ಹೊತ್ತ ಲ್ಯಾಂಡರ್ ಈ ವರ್ಷ ಮೇ 15 ರಂದು ಮಂಗಳ ಗ್ರಹದ ಉತ್ತರ ಗೋಳಾರ್ಧದಲ್ಲಿ ನೆಲೆಗೊಂಡಿರುವ ‘ಯುಟೋಪಿಯಾ ಪ್ಲಾನಿಟಿಯಾ’ (Utopia Planitia)  ಎಂಬ ವಿಶಾಲ ಬಯಲಿನ ದಕ್ಷಿಣ ಭಾಗದಲ್ಲಿ ಇಳಿಯಿತು.

 

ಅಭಿಯಾನದ 5 ಪ್ರಮುಖ ವೈಜ್ಞಾನಿಕ ಉದ್ದೇಶಗಳು:

  1. ಮಂಗಳ ಗ್ರಹದ ಭೂವೈಜ್ಞಾನಿಕ ನಕ್ಷೆಯನ್ನು ರಚಿಸುವುದು.
  2. ಮಂಗಳ ಗ್ರಹದ ಮಣ್ಣಿನ ಗುಣಲಕ್ಷಣಗಳನ್ನು ಅನ್ವೇಷಿಸುವುದು ಮತ್ತು ನೀರು-ಮಂಜುಗಡ್ಡೆಯ ಸಂಭಾವ್ಯ ನಿಕ್ಷೇಪಗಳನ್ನು ಅನ್ವೇಷಿಸಲು.
  3. ಮಂಗಳ ಗ್ರಹದ ಮೇಲ್ಮೈ ವಸ್ತುವಿನ ಸಂಯೋಜನೆಯನ್ನು ವಿಶ್ಲೇಷಿಸುವುದು.
  4. ಮಂಗಳ ಗ್ರಹದ ವಾತಾವರಣ ಮತ್ತು ಹವಾಮಾನವನ್ನು ಮೇಲ್ಮೈಯಲ್ಲಿ ಪರಿಶೀಲಿಸುವುದು.
  5. ಮಂಗಳನ ವಿದ್ಯುತ್ಕಾಂತೀಯ ಮತ್ತು ಗುರುತ್ವಾಕರ್ಷಣ ಕ್ಷೇತ್ರಗಳನ್ನು ಅರ್ಥ ಮಾಡಿಕೊಳ್ಳಲು.

 

ಟಿಯಾನ್ವೆನ್ -1 ಬಗ್ಗೆ: ( About Tianwen-1)

  1. ಚೀನಾದ ಮೊದಲ ಮಂಗಳ ಗ್ರಹದ ಶೋಧವನ್ನು ಟಿಯಾನ್ವೆನ್ -1 ಎಂದು ಕರೆಯಲಾಗುತ್ತಿದ್ದು , ಇದನ್ನು ಮೊದಲು ಹುಕ್ಸಿಂಗ್ 1 (Huoxing 1)ಎಂದು ಕರೆಯಲಾಗುತ್ತು.
  2. ಈ ಬಾಹ್ಯಾಕಾಶ ನೌಕೆಯು ಆರ್ಬಿಟರ್, ಲ್ಯಾಂಡರ್ ಮತ್ತು ರೋವರ್ ಅನ್ನು ಒಳಗೊಂಡಿದೆ.
  3. ಚೀನಾದ ಕ್ಸಿಚಾಂಗ್ (Xichang Satellite Launch Center) ಉಪಗ್ರಹ ಉಡಾವಣಾ ಕೇಂದ್ರದಿಂದ ಲಾಂಗ್ ಮಾರ್ಚ್ 5 ರಾಕೆಟ್ ಮೂಲಕ ಇದನ್ನು ಉಡಾವಣೆ ಮಾಡಲಾಯಿತು.
  4. ಲ್ಯಾಂಡಿಂಗ್ ಸೈಟ್: ಈ ಬಾಹ್ಯಾಕಾಶ ನೌಕೆ ಮಂಗಳ ಗ್ರಹದ ಉತ್ತರ ಅಕ್ಷಾಂಶಗಳಲ್ಲಿರುವ ‘ಯುಟೋಪಿಯಾ ಪ್ಲಾನಿಟಿಯಾ’ ಎಂಬ ವಿಶಾಲ ಬಯಲಿನಲ್ಲಿ ಇಳಿಯಲಿದೆ, 1970 ರ ದಶಕದಲ್ಲಿ ನಾಸಾ ಕಳುಹಿಸಿದ ವೈಕಿಂಗ್ 2 ಮಿಷನ್ ಸಹ ಇಳಿದ ಸ್ಥಳ ಅದೇ ಆಗಿದೆ.

 

ಟಿಯಾನ್ವೆನ್ -1 ಮಿಷನ್‌ನ ಮಹತ್ವ:

  1. ಮೊದಲನೆಯದಾಗಿ, ‘ಜುರಾಂಗ್’ ರೋವರ್ ಅನ್ನು ಮಂಗಳನ ಅಂಗಳದಲ್ಲಿ ಯಶಸ್ವಿಯಾಗಿ ಇಳಿಸುವುದರೊಂದಿಗೆ ಚೀನಾ ದೇಶವು, ಸೋವಿಯತ್ ಒಕ್ಕೂಟ ಮತ್ತು ಯುನೈಟೆಡ್ ಸ್ಟೇಟ್ಸ್ ನಂತರ ಮಂಗಳ ಗ್ರಹದಲ್ಲಿ ಯಶಸ್ವಿಯಾಗಿ ಸಾಫ್ಟ್ ಲ್ಯಾಂಡಿಂಗ್ ಅನ್ನು ಮಾಡಿದ ಮೂರನೇ ರಾಷ್ಟ್ರವಾಗಿದೆ.
  2. ಎರಡನೆಯದಾಗಿ, ಮಂಗಳ ಗ್ರಹದ ಮೇಲೆ ರೋವರ್ ಅನ್ನು ಯಶಸ್ವಿಯಾಗಿ ನಿಯೋಜಿಸುವುದರೊಂದಿಗೆ, ಚೀನಾವು, USA ನಂತರ ಮಂಗಳ ಗ್ರಹದ ಮೇಲ್ಮೈಗೆ ರೋವರ್ ಕಳುಹಿಸಿದ ಎರಡನೇ ದೇಶವಾಗಿದೆ.
  3. ಮೂರನೆಯದಾಗಿ, ಚೀನಾ ಮಂಗಳ ಗ್ರಹಕ್ಕೆ ತನ್ನ ಚೊಚ್ಚಲ ಕಾರ್ಯಾಚರಣೆಯ ಸಮಯದಲ್ಲಿ ಕಕ್ಷೆ, ಇಳಿಯುವಿಕೆ ಮತ್ತು ಪರಿಭ್ರಮಿಸುವ ಚಟುವಟಿಕೆಗಳನ್ನು ಮಾಡಿದ ಮೊದಲ ದೇಶವಾಗಿದೆ.

             ಅಥವಾ

ಚೀನಾ ದೇಶವು, ತನ್ನ ಮೊದಲ ಮಂಗಳ ಕಾರ್ಯಾಚರಣೆಯ ಸಮಯದಲ್ಲಿಯೇ, ಮಂಗಳ ಗ್ರಹವನ್ನು ಯಶಸ್ವಿಯಾಗಿ ಪರಿಭ್ರಮಿಸಿದ, ಅದರ ಮೇಲ್ಮೈಯಲ್ಲಿ ಬಾಹ್ಯಾಕಾಶ ನೌಕೆಯನ್ನು ಇಳಿಸಿದ ಮತ್ತು ರೋವರ್ ಅನ್ನು ನಿಯೋಜಿಸಿದ (Offload) ಮೊದಲ ಯಶಸ್ವಿ ದೇಶವಾಗಿದೆ.

 

ಮಂಗಳಕ್ಕೆ ರೋವರ್ ಕಳುಹಿಸುವಲ್ಲಿ ಇತರ ಯಾವ ದೇಶಗಳು ಯಶಸ್ವಿಯಾಗಿವೆ?

ಚೀನಾದ ಹೊರತಾಗಿ, ಯುನೈಟೆಡ್ ಸ್ಟೇಟ್ಸ್‌ ಮಾತ್ರ  ಕೆಂಪು ಗ್ರಹದ ಮೇಲ್ಮೈಯನ್ನು ಅಧ್ಯಯನ ಮಾಡಲು ರೋವರ್‌ಗಳನ್ನು ಯಶಸ್ವಿಯಾಗಿ ನಿಯೋಜಿಸಿದ ಸಮರ್ಥ ದೇಶವಾಗಿದೆ.

ಜುಲೈ 1976 ರಲ್ಲಿ, ಮಂಗಳ ಗ್ರಹದ ಮೇಲೆ ಮೊದಲ ಯಶಸ್ವಿ ಲ್ಯಾಂಡಿಂಗ್ ಅನ್ನು ಅಮೇರಿಕಾದ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆಯಾದ ನಾಸಾ ಮಾಡಿದೆ. ಈ ಕಾರ್ಯಾಚರಣೆಯಲ್ಲಿ, ವೈಕಿಂಗ್ 1 ರೋವರ್ ಮಂಗಳನ ಮೇಲ್ಮೈಗೆ ಇಳಿಯಿತು.

ಸ್ವಲ್ಪ ಸಮಯದ ನಂತರ, ವೈಕಿಂಗ್ 2 ಅನ್ನು ರೆಡ್ ಪ್ಲಾನೆಟ್ ಗೆ ಕಳುಹಿಸಲಾಯಿತು.

ನಂತರದ ದಶಕಗಳಲ್ಲಿ, ಮಂಗಳ ಗ್ರಹವನ್ನು ಅನ್ವೇಷಿಸಲು ಅಮೆರಿಕಾ ಸಂಯುಕ್ತ ಸಂಸ್ಥಾನವು ಸ್ಪಿರಿಟ್ ಮತ್ತು ಆಪರ್ಚುನಿಟಿ ರೋವರ್‌ಗಳನ್ನು ಕಳುಹಿಸಿತು.

  1. ಈ ವರ್ಷದ ಫೆಬ್ರವರಿಯಲ್ಲಿ, ನಾಸಾದ ‘ಪರ್ಸೇವೆರನ್ಸ್ ರೋವರ್’ (Perseverance rover) ಮಂಗಳನ ಮೇಲ್ಮೈಯಲ್ಲಿರುವ ‘ಜೆಜೆರೊ ಕ್ರೇಟರ್’ (Jezero Crater) ಗೆ ಇಳಿಯಿತು ಮತ್ತು ಗ್ರಹದಲ್ಲಿ ಹಿಂದೆ ಇದ್ದಿರಬಹುದಾದ ಜೀವಿಗಳ ಕುರುಹುಗಳನ್ನು ಕಂಡುಹಿಡಿಯುವ ಕೆಲಸವನ್ನು ಪ್ರಾರಂಭಿಸಿದೆ.
  2. UAE ಯ ಹೋಪ್ ಮಾರ್ಸ್ ಮಿಷನ್ (ಇದು UAE ಯ ಮೊದಲ ಅಂತರಗ್ರಹ ಮಿಷನ್ ಆಗಿದೆ)
  3. ಭಾರತದ ಮಾರ್ಸ್ ಆರ್ಬಿಟರ್ ಮಿಷನ್ (MOM) ಅಥವಾ ಮಂಗಳಯಾನ್.

 

ವಿಷಯಗಳು: ಸಂವಹನ ಜಾಲಗಳ ಮೂಲಕ ಆಂತರಿಕ ಭದ್ರತೆಗೆ ಸವಾಲು ಹಾಕುವುದು, ಆಂತರಿಕ ಭದ್ರತಾ ಸವಾಲುಗಳಲ್ಲಿ ಮಾಧ್ಯಮ ಮತ್ತು ಸಾಮಾಜಿಕ ಜಾಲತಾಣಗಳ ಪಾತ್ರ, ಸೈಬರ್ ಭದ್ರತೆಯ ಮೂಲಭೂತ ಅಂಶಗಳು, ಅಕ್ರಮ ಹಣ ವರ್ಗಾವಣೆ ಮತ್ತು ಅದನ್ನು ತಡೆಯುವುದು.

ಏನದು ಇಸ್ರೇಲಿ ಸ್ಪೈವೇರ್ ಪೆಗಾಸಸ್?


(What is Israeli spyware Pegasus?)

 ಸಂದರ್ಭ:

ಇತ್ತೀಚೆಗೆ ಬಿಡುಗಡೆಯಾದ ವರದಿಗಳು ‘ಪೆಗಾಸಸ್ ಸ್ಪೈವೇರ್’ (Pegasus spyware) ನ ನಿರಂತರ ಬಳಕೆಯನ್ನು ಖಚಿತಪಡಿಸುತ್ತವೆ. ಈ ‘ಸ್ಪೈವೇರ್’ ಅನ್ನು ಇಸ್ರೇಲಿ ಕಂಪನಿಯೊಂದು ವಿಶ್ವದ ಹಲವು ದೇಶಗಳ ಸರ್ಕಾರಗಳಿಗೆ ಮಾರಾಟ ಮಾಡುತ್ತದೆ. ಈ ‘ಪೆಗಾಸಸ್ ಸ್ಪೈವೇರ್’ ನಿಂದ ಗುರಿಪಡಿಸಲಾಗುವ ಫೋನ್‌ಗಳಂತೆ, ಈ ‘ಸ್ಪೈವೇರ್’ ಅನ್ನು ಸಹ ನವೀಕರಿಸಲಾಗಿದೆ ಮತ್ತು ಈಗ ಹೊಸ ಬೇಹುಗಾರಿಕೆ ಅಥವಾ ಕಣ್ಗಾವಲು ಸಾಮರ್ಥ್ಯಗಳೊಂದಿಗೆ ಬಂದಿದೆ.

 

ಪೆಗಾಸಸ್’ ಎಂದರೇನು?

ಇದು ‘NSO ಗ್ರೂಪ್’ ಎಂಬ ಇಸ್ರೇಲಿ ಸಂಸ್ಥೆಯು ಅಭಿವೃದ್ಧಿಪಡಿಸಿದ  ‘ಸ್ಪೈವೇರ್ ಟೂಲ್’ ಅಂದರೆ ಬೇಹುಗಾರಿಕೆ ಸಾಧನವಾಗಿದೆ.

ಈ ಸ್ಪೈವೇರ್, ಜನರ ಮೇಲೆ ಅವರು ಬಳಸುವ ಫೋನ್‌ಗಳ ಮೂಲಕವೇ ಕಣ್ಣಿಡುತ್ತದೆ.

  1. ಪೆಗಾಸಸ್ ಬಳಕೆದಾರರ ಫೋನ್‌ಗೆ ‘ಎಕ್ಸ್ ಪ್ಲಾಯ್ಟ್ ಲಿಂಕ್’ (exploit link) ಅನ್ನು ಕಳುಹಿಸುತ್ತದೆ, ಮತ್ತು ಆ ಲಿಂಕ್‌ ಅನ್ನು ಆ ಗುರಿಯಾಗಿಸಲ್ಪಟ್ಟ ಬಳಕೆದಾರರು ಅಥವಾ ಉದ್ದೇಶಿತ ಬಳಕೆದಾರರು ಕ್ಲಿಕ್ ಮಾಡಿದರೆ, ಅವರ ಫೋನ್‌ಗೆ ‘ಮಾಲ್‌ವೇರ್’ (malware) ಅಥವಾ ‘ಬೇಹುಗಾರಿಕೆ-ಸಾಮರ್ಥ್ಯ’ ಕೋಡ್ ಸ್ಥಾಪನೆಯಾಗುತ್ತದೆ ಅಥವಾ ಇನ್ಸ್ಟಾಲ್ ಆಗುತ್ತದೆ.
  2. ಪೆಗಾಸಸ್ ಅನ್ನು ಸ್ಥಾಪಿಸಿದ ನಂತರ, ಆಕ್ರಮಣಕಾರನು ‘ಉದ್ದೇಶೀತ’ ಬಳಕೆದಾರರ ಫೋನ್‌ ಮೇಲೆ ನಿಯಂತ್ರಣ ಮತ್ತು ಪ್ರವೇಶವನ್ನು ಪಡೆಯುತ್ತಾನೆ.

 

ಪೆಗಾಸಸ್‌ನ ಸಾಮರ್ಥ್ಯಗಳು:

  1.  ಪೆಗಾಸಸ್, “ಜನಪ್ರಿಯ ಮೊಬೈಲ್ ಸಂದೇಶ ಅಪ್ಲಿಕೇಶನ್‌ಗಳಿಂದ, ಉದ್ದೇಶಿತ ಅಥವಾ ಗುರಿಯಾಗಿ ಸಲ್ಪಟ್ಟ ವ್ಯಕ್ತಿಯ ಖಾಸಗಿ ಡೇಟಾ, ಅವನ ಪಾಸ್‌ವರ್ಡ್, ಸಂಪರ್ಕ ಪಟ್ಟಿ, ಕ್ಯಾಲೆಂಡರ್ ಈವೆಂಟ್‌ಗಳು, ಪಠ್ಯ ಸಂದೇಶಗಳು, ಲೈವ್ ಧ್ವನಿ ಕರೆಗಳು ಇತ್ಯಾದಿಗಳನ್ನು ಆಕ್ರಮಣಕಾರರಿಗೆ ರವಾನಿಸಬಹುದು”.
  2. ಇದು ಕಣ್ಗಾವಲಿನ ವ್ಯಾಪ್ತಿಯನ್ನು ವಿಸ್ತರಿಸುವ ಮೂಲಕ ಫೋನ್‌ನ ಸುತ್ತಲಿನ ಎಲ್ಲಾ ಚಲನೆಯನ್ನು ಸೆರೆಹಿಡಿಯಲು ಉದ್ದೇಶಿತ ವ್ಯಕ್ತಿಯ ಫೋನ್ ಕ್ಯಾಮೆರಾ ಮತ್ತು ಮೈಕ್ರೊಫೋನ್ ಅನ್ನು ಪ್ರಚೋದಿಸುತ್ತದೆ ಮತ್ತು ಆನ್ ಮಾಡುತ್ತದೆ.

 

ಶೂನ್ಯ ಕ್ಲಿಕ್’/ ಝೀರೋ ಕ್ಲಿಕ್ ದಾಳಿ ಎಂದರೇನು?

 ‘ಝೀರೋ ಕ್ಲಿಕ್ ದಾಳಿ’,(zero-click attack) ಪೆಗಾಸಸ್‌ನಂತಹ ಸ್ಪೈವೇರ್ ಯಾವುದೇ ಮಾನವ ಸಂವಹನ ಅಥವಾ ಮಾನವ ದೋಷವಿಲ್ಲದೆ ಗುರಿ ಯಾಗಿಸಲ್ಪಟ್ಟ ಸಾಧನದ ಮೇಲೆ ನಿಯಂತ್ರಣವನ್ನು ಸಾಧಿಸಲು ಸಹಾಯ ಮಾಡುತ್ತದೆ.

  1. ಆದ್ದರಿಂದ, ಸಾಧನವೇ ಉದ್ದೇಶಿತ ‘ಗುರಿ’ ಆಗಿರುವಾಗ (if the target is the system itself), ‘ಫಿಶಿಂಗ್ ದಾಳಿಯನ್ನು’ ತಪ್ಪಿಸುವುದು ಹೇಗೆ, ಅಥವಾ ಯಾವ ಲಿಂಕ್‌ಗಳನ್ನು ಕ್ಲಿಕ್ ಮಾಡಬಾರದು, ಈ ಬಗ್ಗೆ ಎಲ್ಲಾ ಅರಿವು ವ್ಯರ್ಥವಾಗಿದೆ ಎಂದು ಸಾಬೀತುಪಡಿಸುತ್ತದೆ.
  2. ಈ ಹೆಚ್ಚಿನ ದಾಳಿಗಳು ಇಮೇಲ್ ಕ್ಲೈಂಟ್‌ನಂತೆ ಬರುತ್ತಿರುವುದರಿಂದ ಅವು ವಿಶ್ವಾಸಾರ್ಹವೇ ಅಥವಾ ಇಲ್ಲವೇ ಎಂಬುದನ್ನು ನಿರ್ಧರಿಸುವ ಮೊದಲೇ ಡೇಟಾವನ್ನು ಸ್ವೀಕರಿಸುವ ಸಾಫ್ಟ್‌ವೇರ್ ಅನ್ನು ಬಳಸಿಕೊಳ್ಳುತ್ತದೆ.

 

ಮಾಲ್ವೇರ್, ಟ್ರೋಜನ್, ವೈರಸ್ ಮತ್ತು ವರ್ಮ್ ನಡುವಿನ ವ್ಯತ್ಯಾಸ:

 ಮಾಲ್ವೇರ್ ಎನ್ನುವುದು ಕಂಪ್ಯೂಟರ್ ನೆಟ್‌ವರ್ಕ್‌ಗಳ ಮೂಲಕ ಅನಗತ್ಯ ಕಾನೂನುಬಾಹಿರ ಕ್ರಮಗಳನ್ನು ನಿರ್ವಹಿಸಲು ವಿನ್ಯಾಸಗೊಳಿಸಲಾದ ಸಾಫ್ಟ್‌ವೇರ್ ಆಗಿದೆ. ಇದನ್ನು ದುರುದ್ದೇಶಪೂರಿತ ಉದ್ದೇಶದ ಸಾಫ್ಟ್‌ವೇರ್ ಎಂದೂ ವ್ಯಾಖ್ಯಾನಿಸಬಹುದು.

ಮಾಲ್ವೇರ್ ಅನ್ನು ಅವುಗಳ ಕಾರ್ಯಗತಗೊಳಿಸುವಿಕೆ, ಹರಡುವಿಕೆ ಮತ್ತು ಕಾರ್ಯಗಳ ಆಧಾರದ ಮೇಲೆ ವರ್ಗೀಕರಿಸಬಹುದು. ಅದರ ಕೆಲವು ಪ್ರಕಾರಗಳನ್ನು ಕೆಳಗೆ ಚರ್ಚಿಸಲಾಗಿದೆ.

ವೈರಸ್(Virus): ಇದು ಸ್ವತಃ ಅಭಿವೃದ್ಧಿಪಡಿಸಿದ ನಕಲನ್ನು ಕಂಪ್ಯೂಟರ್ನಲ್ಲಿ ಸೇರಿಸುವ ಮೂಲಕ ಕಂಪ್ಯೂಟರ್‌ನಲ್ಲಿರುವ ಇತರ ಪ್ರೋಗ್ರಾಂಗಳನ್ನು ಮಾರ್ಪಡಿಸುವ ಮತ್ತು ಸೋಂಕು ತರುವಂತಹ ಒಂದು ಪ್ರೋಗ್ರಾಂ ಆಗಿದೆ.

ವರ್ಮ್ಸ್(Worms): ಇವು ಕಂಪ್ಯೂಟರ್ ನೆಟ್‌ವರ್ಕ್‌ಗಳ ಮೂಲಕ ಹರಡುತ್ತವೆ. ಇದರಲ್ಲಿ, ಕಂಪ್ಯೂಟರ್ ವರ್ಮ್ ಗಳು, ವೈರಸ್‌ಗಳಿಗಿಂತ ಭಿನ್ನವಾಗಿ, ಕಾನೂನುಬದ್ಧ ಫೈಲ್‌ಗಳಿಗೆ ಒಳನುಸುಳುವ ಬದಲು ತಮ್ಮನ್ನು ಒಂದು ವ್ಯವಸ್ಥೆಯಿಂದ ಇನ್ನೊಂದಕ್ಕೆ ನಕಲಿಸುವ ದುರುದ್ದೇಶಪೂರಿತ ಕಾರ್ಯಕ್ರಮಗಳಾಗಿವೆ.

ಟ್ರೋಜನ್‌ಗಳು(Trojans): ಟ್ರೋಜನ್ ಅಥವಾ ಟ್ರೋಜನ್ ಹಾರ್ಸ್ ಎನ್ನುವುದು ಒಂದು ವ್ಯವಸ್ಥೆಯಾಗಿದ್ದು ಅದು ಸಾಮಾನ್ಯವಾಗಿ ವ್ಯವಸ್ಥೆಯ ಸುರಕ್ಷತೆಯನ್ನು ಕುಂಠಿತಗೊಳಿಸುತ್ತದೆ ಅಥವಾ ತಡೆಯುತ್ತದೆ. ಸುರಕ್ಷಿತ ನೆಟ್‌ವರ್ಕ್‌ಗಳಿಗೆ ಸೇರಿದ ಕಂಪ್ಯೂಟರ್‌ಗಳಲ್ಲಿ ಹಿಂಬಾಗಿಲುಗಳನ್ನು ರಚಿಸಲು ಟ್ರೋಜನ್‌ಗಳನ್ನು ಬಳಸಲಾಗುತ್ತದೆ, ಇದರಿಂದಾಗಿ ಹ್ಯಾಕರ್‌ಗಳು ಸುರಕ್ಷಿತ ನೆಟ್‌ವರ್ಕ್‌ಗಳಿಗೆ ಪ್ರವೇಶವನ್ನು ಪಡೆಯಬಹುದು.

ವಂಚನೆ(HOAX): ಇದು ಇ-ಮೇಲ್ ರೂಪದಲ್ಲಿರುತ್ತದೆ, ಮತ್ತು ತನ್ನ ಕಂಪ್ಯೂಟರ್‌ಗೆ ಹಾನಿ ಉಂಟಾಗುತ್ತಿರುವ ಬಗ್ಗೆ ನಿರ್ದಿಷ್ಟ ವ್ಯವಸ್ಥೆಯ ಬಳಕೆದಾರರಿಗೆ ಎಚ್ಚರಿಕೆ ನೀಡುತ್ತದೆ. ಅದರ ನಂತರ, ಈ ಇ-ಮೇಲ್ ಸಂದೇಶವು ಹಾನಿಗೊಳಗಾದ ವ್ಯವಸ್ಥೆಯನ್ನು ಸರಿಪಡಿಸಲು ‘ಪ್ರೋಗ್ರಾಂ’ ಅನ್ನು (ಸಾಮಾನ್ಯವಾಗಿ ಡೌನ್‌ಲೋಡ್ ಮಾಡಲು) ಪ್ರಾರಂಭಿಸಲು ಬಳಕೆದಾರರಿಗೆ ಸೂಚಿಸುತ್ತದೆ. ಈ ಪ್ರೋಗ್ರಾಂ ಅನ್ನು ಪ್ರಾರಂಭಿಸಿದ ತಕ್ಷಣ ಅಥವಾ ‘ರನ್’ ಮಾಡಿದ ನಂತರ, ಅದು ಸಿಸ್ಟಮ್ ಅನ್ನು ಆಕ್ರಮಿಸುತ್ತದೆ ಮತ್ತು ಪ್ರಮುಖ ಫೈಲ್‌ಗಳನ್ನು ಅಳಿಸುತ್ತದೆ.

 

ಸ್ಪೈವೇರ್(Spyware): ಇವು ಕಂಪ್ಯೂಟರ್‌ಗಳ ಮೇಲೆ ಆಕ್ರಮಣ ಮಾಡುವ ಕಾರ್ಯಕ್ರಮಗಳು, ಮತ್ತು ಅದರ ಹೆಸರೇ ಸೂಚಿಸುವಂತೆ, ಬಳಕೆದಾರರ ಚಟುವಟಿಕೆಗಳನ್ನು ಒಪ್ಪಿಗೆಯಿಲ್ಲದೆ ಮೇಲ್ವಿಚಾರಣೆ ಮಾಡುತ್ತದೆ. ‘ಸ್ಪೈವೇರ್’ ಅನ್ನು ಸಾಮಾನ್ಯವಾಗಿ ನಿಜವಾದ ಇ-ಮೇಲ್ ಐಡಿ ಅಥವಾ ಬೋನಾಫೈಡ್ ಇ-ಮೇಲ್ನೊಂದಿಗೆ, ಅನುಮಾನಾಸ್ಪದ ಇ-ಮೇಲ್ ಮೂಲಕ ರವಾನಿಸಲಾಗುತ್ತದೆ. ಸ್ಪೈವೇರ್ ಪ್ರಪಂಚದಾದ್ಯಂತ ಲಕ್ಷಾಂತರ ಕಂಪ್ಯೂಟರ್‌ಗಳಿಗೆ ಸೋಂಕು ತಗುಲಿಸುತ್ತಿದೆ.

 

ಪೆಗಾಸಸ್‌ ಎಂಬ ಪೆಡಂಭೂತ:

 ಇಸ್ರೇಲಿನ ಎನ್ಎಸ್ಒ ಗ್ರೂಪ್ ಟೆಕ್ನಾಲಜೀಸ್ ಎಂಬ ತಂತ್ರಜ್ಞಾನ ಕಂಪನಿಯೊಂದು ಹೊರಬಿಟ್ಟಿರುವ ತಂತ್ರಾಂಶವೇ ಪೆಗಾಸಸ್. ಕೇವಲ ಒಂದು ಮಿಸ್ಡ್ ಕಾಲ್ ಮೂಲಕವೇ (ಕರೆ ಸ್ವೀಕರಿಸಿದರೂ, ಸ್ವೀಕರಿಸದಿದ್ದರೂ) ವ್ಯಕ್ತಿಯೊಬ್ಬನ ಮೊಬೈಲ್ ಫೋನ್‌ನೊಳಗೆ ಕುಳಿತುಕೊಳ್ಳಬಲ್ಲ ಕು-ತಂತ್ರಾಂಶ (ಮಾಲ್‌ವೇರ್). ಸಂಪರ್ಕ ಸಂಖ್ಯೆಗಳು, ಕರೆ, ಎಸ್ಸೆಮ್ಮೆಸ್, ವಾಟ್ಸ್‌ಆ್ಯಪ್‌ ಸಂದೇಶಗಳು, ಫೋಟೊ-ವೀಡಿಯೊಗಳು ಮಾತ್ರವೇ ಅಲ್ಲ, ಆತನ ಮಾತುಗಳನ್ನು ಕೇಳಿಸಿಕೊಂಡು, ಎಲ್ಲಿ ಹೋದನೆಂಬುದನ್ನು ತಿಳಿದುಕೊಂಡು, ಎಲ್ಲ ಮಾಹಿತಿಯನ್ನು ನಿಗದಿತ ವ್ಯಕ್ತಿಗೆ ರವಾನಿಸುವ ಸಾಮರ್ಥ್ಯವುಳ್ಳ ಸ್ಪೈವೇರ್ ಅಥವಾ ಗೂಢಚರ್ಯೆ ತಂತ್ರಾಂಶವಿದು.

  1. ‘ಪೆಗಾಸಸ್’ ಗೂಢಚರ್ಯೆ ತಂತ್ರಾಂಶ ಬಳಸಿಕೊಂಡು 40 ಪತ್ರಕರ್ತರು ಹಾಗೂ ಭೀಮಾ ಕೋರೆಗಾಂವ್‌ ಪ್ರಕರಣದ ಆರೋಪಿಗಳು ಸೇರಿದಂತೆ 12 ಕಾರ್ಯಕರ್ತರ ಫೋನ್‌ಗಳನ್ನು ಹ್ಯಾಕ್‌ ಮಾಡಿ, ಅವರ ಮೇಲೆ ಕಣ್ಗಾವಲು ಇಡಲಾಗಿದೆ ಎಂಬ ಮಾಹಿತಿ ಬಹಿರಂಗವಾಗಿದೆ. ಸೈಬರ್‌ ಅಸ್ತ್ರಗಳನ್ನು ಸೃಷ್ಟಿಸುತ್ತಿರುವ ಇಸ್ರೇಲ್‌ ಮೂಲದ ಕಂಪನಿಯು ಪೆಗಾಸಸ್‌ ಕು–ತಂತ್ರಾಂಶವನ್ನೂ ಅಭಿವೃದ್ಧಿ ಪಡಿಸಿದೆ. 2016ರಿಂದ ಹೆಚ್ಚು ಚರ್ಚೆಗೆ ಬಂದಿರುವ ಆ ಸೈಬರ್‌ ಸೆಕ್ಯುರಿಟಿ ಕಂಪನಿಯ ಕುರಿತಾದ ವಿವರ ಇಲ್ಲಿದೆ.
  2. ಪೆಗಾಸಸ್! ಜಗತ್ತಿನಲ್ಲಿ ಇಂಟರ್ನೆಟ್ಟಿಗರನ್ನು ಪ್ರೈವೆಸಿ ಹೆಸರಲ್ಲಿ ಬೆಚ್ಚಿ ಬೀಳಿಸಿರುವ ಇನ್ನೊಂದು ಹೆಸರು. ಜಾಗತಿಕವಾಗಿ ರಾಜಕೀಯ ಮುಖಂಡರು, ಪತ್ರಕರ್ತರು, ಮಾನವ ಹಕ್ಕುಗಳ ಹೋರಾಟಗಾರರು ಮಾತ್ರವೇ ಅಲ್ಲ, ಉಗ್ರಗಾಮಿಗಳ ಕಿವಿ ಕೂಡ ಪೆಗಾಸಸ್ ಕಡೆ ನೆಟ್ಟಿರುವುದು ಸುಳ್ಳಲ್ಲ.
  3. ಇಸ್ರೇಲಿನ ಎನ್ಎಸ್ಒ ಗ್ರೂಪ್ ಟೆಕ್ನಾಲಜೀಸ್ ಎಂಬ ತಂತ್ರಜ್ಞಾನ ಕಂಪನಿಯೊಂದು ಹೊರಬಿಟ್ಟಿರುವ ತಂತ್ರಾಂಶವೇ ಪೆಗಾಸಸ್. ಕೇವಲ ಒಂದು ಮಿಸ್ಡ್ ಕಾಲ್ ಮೂಲಕವೇ (ಕರೆ ಸ್ವೀಕರಿಸಿದರೂ, ಸ್ವೀಕರಿಸದಿದ್ದರೂ) ವ್ಯಕ್ತಿಯೊಬ್ಬನ ಮೊಬೈಲ್ ಫೋನ್‌ನೊಳಗೆ ಕುಳಿತುಕೊಳ್ಳಬಲ್ಲ ಕು-ತಂತ್ರಾಂಶ (ಮಾಲ್‌ವೇರ್). ಸಂಪರ್ಕ ಸಂಖ್ಯೆಗಳು, ಕರೆ, ಎಸ್ಸೆಮ್ಮೆಸ್, ವಾಟ್ಸ್‌ಆ್ಯಪ್‌ ಸಂದೇಶಗಳು, ಫೋಟೊ-ವೀಡಿಯೊಗಳು ಮಾತ್ರವೇ ಅಲ್ಲ, ಆತನ ಮಾತುಗಳನ್ನು ಕೇಳಿಸಿಕೊಂಡು, ಎಲ್ಲಿ ಹೋದನೆಂಬುದನ್ನು ತಿಳಿದುಕೊಂಡು, ಎಲ್ಲ ಮಾಹಿತಿಯನ್ನು ನಿಗದಿತ ವ್ಯಕ್ತಿಗೆ ರವಾನಿಸುವ ಸಾಮರ್ಥ್ಯವುಳ್ಳ ಸ್ಪೈವೇರ್ ಅಥವಾ ಗೂಢಚರ್ಯೆ ತಂತ್ರಾಂಶವಿದು.
  4. ಜತೆಗೆ, ಕಳೆದ ವರ್ಷದ ಅ. 2ರಂದು ‘ವಾಷಿಂಗ್ಟನ್ ಪೋಸ್ಟ್’ ಪತ್ರಕರ್ತ ಜಮಾಲ್ ಅಹಮದ್ ಖಶೋಗಿಯು ಹತ್ಯೆಗೀಡಾಗಿರುವುದಕ್ಕೂ ಆತನ ಮೊಬೈಲ್‌ನೊಳಗೆ ಕುಳಿತಿದ್ದ ಪೆಗಾಸಸ್ ಪ್ರಭಾವ ಇತ್ತೆಂಬುದು ಮತ್ತೆ ಚರ್ಚೆಯಾಗತೊಡಗಿದೆ. ಈ ಪೆಗಾಸಸ್ ಖರೀದಿಸಿದ್ದು ಸೌದಿ ಸರಕಾರ.
  5. ನಮ್ಮದು ಎಂಡ್-ಟು-ಎಂಡ್ ಎನ್‌ಕ್ರಿಪ್ಷನ್ ಇರುವ ಸಂದೇಶವಾಹಕ ಸೇವೆ ಎಂದು ಹೇಳಿಕೊಳ್ಳುತ್ತಾ, ‘ನಿಮ್ಮ ಎಲ್ಲ ಸಂದೇಶಗಳು ಗೌಪ್ಯವಾಗಿಯೇ ರವಾನೆಯಾಗುತ್ತವೆ.ಮೂರನೇ ವ್ಯಕ್ತಿಗಳು ಇದನ್ನು ನೋಡಲು ಸಾಧ್ಯವೇ ಇಲ್ಲ’ ಎಂದು ಭರವಸೆ ನೀಡಿ ನಂಬಿಸಿದ್ದ ವಾಟ್ಸ್ ಆ್ಯಪ್ (ಫೇಸ್‌ಬುಕ್ ಮಾಲೀಕತ್ವ) ಕೂಡ ಒಮ್ಮೆಗೇ ಬೆಚ್ಚಿಬಿದ್ದು, ಕ್ಯಾಲಿಫೋರ್ನಿಯಾ ಫೆಡರಲ್ ನ್ಯಾಯಾಲಯಕ್ಕೆ ‘ನಮಗೇ ಗೊತ್ತಿಲ್ಲದಂತೆ ನಮ್ಮ ವೇದಿಕೆ ಬಳಸಿ ಗೂಢಚರ್ಯೆ ನಡೆಸಿದ್ದಾರೆ’ ಎಂದು ಎನ್‌ಎಸ್ಒ ವಿರುದ್ಧ ದೂರು ನೀಡಿದೆ ಅಂತಾದರೆ, ಇಂಟರ್ನೆಟ್ ಯುಗದಲ್ಲಿ ನಮ್ಮ ಖಾಸಗಿತನದ ರಕ್ಷಣೆ ಎಷ್ಟರ ಮಟ್ಟಿಗೆ ದುರ್ಬಲವಾಗಿದೆ ಎಂಬುದು ವೇದ್ಯವಾಗುತ್ತದೆ. ಈ ಡಿಜಿಟಲ್ ಯುಗದಲ್ಲಿ ತಂತ್ರಾಂಶಕ್ಕೆ ಪ್ರತಿಯಾಗಿ ಕುತಂತ್ರಾಂಶಗಳೂ ಬೆಳೆಯುತ್ತಿವೆ ಎಂಬುದು ಗಮನಿಸಬೇಕಾದ ವಿಚಾರ.
  6. ‘ಜಗತ್ತಿನಲ್ಲಿ ಸಾವಿರಾರು ಜನರ ರಕ್ಷಣೆಗಾಗಿ, ಭಯೋತ್ಪಾದನೆ ಮತ್ತು ಅಪರಾಧ ಕೃತ್ಯಗಳ ತಡೆ ಹಾಗೂ ತನಿಖೆಗಾಗಿ, ಸರಕಾರಿ ಏಜೆನ್ಸಿಗಳಿಗೆ ನೆರವಾಗಲು ನಾವು ತಂತ್ರಜ್ಞಾನವನ್ನು ಅಭಿವೃದ್ಧಿಪಡಿಸುತ್ತಿದ್ದೇವೆ’ ಎಂಬುದು ಎನ್‌ಎಸ್ಒ ಗ್ರೂಪ್‌ನ ಘೋಷ ವಾಕ್ಯ. ಪೆಗಾಸಸ್ ವಿಚಾರ ಬಯಲಾದಾಗ, ‘ಅವುಗಳನ್ನು ಸರ್ಕಾರಿ ಏಜೆನ್ಸಿಗಳಿಗೆ ಮಾತ್ರವೇ ನಾವು ಮಾರಾಟ ಮಾಡುತ್ತೇವೆ’ ಅಂತ ಎನ್‌ಎಸ್ಒ ಹೇಳಿಕೆ ನೀಡಿ ಕೈತೊಳೆದುಕೊಂಡಿತು.
  7. ಈ ಇಸ್ರೇಲಿ ಕಂಪನಿಯ ಮೂಲ ಕೆದಕಿದರೆ ಭಾರತೀಯನ ಜಾಡು ಕೂಡ ಸಿಗುತ್ತದೆ. 1999ರಲ್ಲಿ ಭಾರತೀಯ ಮೂಲದ ದೀಪಾಂಜನ್ ‘ಡಿಜೆ’ ದೇಬ್, ಸ್ಯಾನ್‌ಫರ್ಡ್ ರಾಬರ್ಟ್‌ಸನ್, ಬೆಂಜಮಿನ್ ಬಾಲ್ ಹಾಗೂ ನೀಲ್ ಗಾರ್ಫಿಂಕೆಲ್ ಎಂಬವರು ಸೇರಿಕೊಂಡು, ಅಮೆರಿಕದ ಸ್ಯಾನ್‌ಫ್ರಾನ್ಸಿಸ್ಕೊದಲ್ಲಿ, ಫ್ರಾನ್ಸಿಸ್ಕೊ ಪಾರ್ಟ್‌ನರ್ಸ್ ಎಂಬ ತಂತ್ರಜ್ಞಾನ ಕಂಪನಿಯೊಂದನ್ನು ಹುಟ್ಟು ಹಾಕುತ್ತಾರೆ. ಈ ಕಂಪನಿಯ ಮುಖ್ಯ ಉದ್ದೇಶವೆಂದರೆ, ತಂತ್ರಜ್ಞಾನವನ್ನು ವಿಶೇಷವಾಗಿ ಗೂಢಚರ್ಯೆ ತಂತ್ರಜ್ಞಾನವನ್ನು ಅಭಿವೃದ್ಧಿಪಡಿಸುವ ಸಣ್ಣಪುಟ್ಟ ಕಂಪನಿಗಳ ಕೈಹಿಡಿದು ಮೇಲೆತ್ತುವುದು ಅಂದರೆ, ತೀರಾ ಕಡಿಮೆ ಮೊತ್ತಕ್ಕೆ ಅವನ್ನು ಖರೀದಿಸಿ, ಬೆಳೆಸಿ, ಮರು ಮಾರಾಟ ಮಾಡುವುದು.
  8. ಈಕ್ವಿಟಿ ಕಂಪನಿಗಳಲ್ಲಿ ಇಂಥ ಪ್ರಕ್ರಿಯೆ ಸರ್ವೇಸಾಮಾನ್ಯ. 2010ರಲ್ಲಿ ಹುಟ್ಟಿಕೊಂಡು, ಪುಟ್ಟ ಕಂಪನಿಯಾಗಿದ್ದ ಎನ್‌ಎಸ್ಒ ಗ್ರೂಪ್ ಅನ್ನು ಫ್ರಾನ್ಸಿಸ್ಕೊ ಪಾರ್ಟ್‌ನರ್ಸ್ ಕಂಪನಿಯು 2014ರಲ್ಲಿ ಸುಮಾರು 12 ಕೋಟಿ ಡಾಲರ್‌ಗೆ ಖರೀದಿಸಿ, ಬೆಳೆಸಿತು. 2019ರ ಫೆಬ್ರವರಿ ತಿಂಗಳಲ್ಲಿ 100 ಕೋಟಿ ಡಾಲರ್‌ಗೆ ಅದೇ ಕಂಪನಿಯ ಸಹಸಂಸ್ಥಾಪಕರಾಗಿದ್ದ ಶಾಲೆವ್ ಹುಲಿಯೊ ಹಾಗೂ ಒಮ್ರಿ ಲಾವಿ ಅವರಿಗೆ ಮಾರಿತು. ಯೂರೋಪಿನ ಬಂಡವಾಳ ಕಂಪನಿ ನೋವಾಲ್ಪಿನಾ ಕ್ಯಾಪಿಟಲ್‌ನ ಹಣಕಾಸು ಬೆಂಬಲ ಇದಕ್ಕಿತ್ತು. ಎನ್‌ಎಸ್ಒ ಸಂಸ್ಥಾಪಕರಾದ ನಿವ್ ಕಾರ್ಮಿ, ಒಮ್ರಿ ಲಾವಿ ಹಾಗೂ ಶಾಲೊವ್ ಹುಲಿಯೊ ಅವರು, ಇಸ್ರೇಲ್ ರಕ್ಷಣಾ ಇಲಾಖೆಗಾಗಿ ಸಂಕೇತಾಕ್ಷರ ಗೂಢಚರ್ಯೆ ಸಂಗ್ರಹಿಸುವ ಹೊಣೆ ಹೊತ್ತಿದ್ದ ‘ಇಸ್ರೇಲಿ ಇಂಟಲಿಜೆನ್ಸ್ ಕಾರ್ಪ್ಸ್‌’ನ ಘಟಕವಾಗಿರುವ ‘ಯುನಿಟ್ 8200’ ಎಂಬ ಕಂಪನಿಯ ಸದಸ್ಯರಾಗಿದ್ದವರು ಎಂಬುದು ಗಮನಿಸಬೇಕಾದ ವಿಚಾರ.
  9. 25 ಮೊಬೈಲ್ ಫೋನ್‌ಗಳ ಮೇಲೆ ಹದ್ದಿನ ಕಣ್ಣಿಡಲು ಬಳಸುವ ಪೆಗಾಸಸ್‌ಗಾಗಿ ಎನ್‌ಎಸ್‌ಒ ಗ್ರೂಪ್‌ಗೆ ವರ್ಷವೊಂದಕ್ಕೆ ನೀಡಬೇಕಾಗಿರುವ ಹಣ ಸುಮಾರು 80 ಲಕ್ಷ ಡಾಲರ್. ಆದರೆ ಇಷ್ಟು ಮೊತ್ತ ನೀಡಿ ಇದನ್ನು ಭಯೋತ್ಪಾದಕರು, ಕ್ರಿಮಿನಲ್‌ಗಳು ವಶಪಡಿಸಿಕೊಳ್ಳಲಾರರು ಎಂಬುದಕ್ಕೇನಿದೆ ಗ್ಯಾರಂಟಿ? ಕಂಪನಿಯೊಳಗಿನವರೇ ಅಕ್ರಮವಾಗಿ ಮಾರಲು ಯತ್ನಿಸಿ ಸಿಕ್ಕಿಬಿದ್ದ ಘಟನೆ ಕಣ್ಣ ಮುಂದಿರುವಾಗ, ನಾವೆಷ್ಟು ಸುರಕ್ಷಿತರು? ಇವು ಉತ್ತರ ಸಿಗದ ಪ್ರಶ್ನೆಗಳು.
  10. ಈಗ, ಫೇಸ್‌ಬುಕ್ ಒಡೆತನದ ವಾಟ್ಸ್ಆ್ಯಪ್, ಕ್ಯಾಲಿಫೋರ್ನಿಯಾದ ಫೆಡರಲ್ ನ್ಯಾಯಾಲಯಕ್ಕೆ ದೂರು ನೀಡಿದೆ. ‘ಎನ್‌ಎಸ್ಒ ಗ್ರೂಪ್ ನಮ್ಮ ಆ್ಯಪ್ ಬಳಸಿ ನಮ್ಮ ಬಳಕೆದಾರರ ಮೇಲೆ ಗೂಢ ಚರ್ಯೆ ನಡೆಸುತ್ತಿದೆ’ ಅಂತ. ಆದರೆ ಇದನ್ನು ಖಡಾಖಂಡಿತವಾಗಿ ತಳ್ಳಿ ಹಾಕಿರುವ ಎನ್‌ಎಸ್ಒ ಗ್ರೂಪ್, ‘ನಾವು ಪರವಾನಗಿ ಪಡೆದಿರುವ ಅಧಿಕೃತ ಸರಕಾರಿ ಏಜೆನ್ಸಿಗಳಿಗೆ ಅಥವಾ ಗುಪ್ತಚರ ಸಂಸ್ಥೆಗಳಿಗೆ ಮಾತ್ರವೇ ಪೆಗಾಸಸ್ ಮಾರಾಟ ಮಾಡುತ್ತೇವೆ. ನಮ್ಮದೇನಿದ್ದರೂ ಭಯೋತ್ಪಾದನೆ ತಡೆ ಹಾಗೂ ಅಪರಾಧ ತಡೆಯಲು ಯತ್ನಿಸುವ ತಂತ್ರಾಂಶ ಅಭಿವೃದ್ಧಿಯ ಕೆಲಸ’ ಎಂದು ಹೇಳುತ್ತಿದೆ.
  11. 2016ರಲ್ಲಿ ಬೆಳಕಿಗೆ ಬಂದ ಈ ಪೆಗಾಸಸ್ ಎಂಬ ತಂತ್ರಜ್ಞಾನದ ಪಿಡುಗಿಗೆ 1400 ಮಂದಿ ಸಿಲುಕಿದ್ದಾರೆ ಎನ್ನುವುದು ವಾಟ್ಸ್ಆ್ಯಪ್ ಮೂಲಕ ಇನ್‌ಸ್ಟಾಲ್ ಆದ ಸ್ಮಾರ್ಟ್ ಫೋನ್‌ಗಳ ಲೆಕ್ಕಾಚಾರ ಮಾತ್ರ. ಒಟ್ಟು 45 ದೇಶಗಳಲ್ಲಿ ವಾಟ್ಸ್ಆ್ಯಪ್ ಮಾತ್ರವೇ ಅಲ್ಲದೆ ಟೆಲಿಗ್ರಾಂ, ಫೇಸ್‌ಬುಕ್ ಮುಂತಾದ ಇತರ ಸಂವಹನ ಆ್ಯಪ್‌ಗಳ ಮೂಲಕ ಈ ಗೂಢಚಾರಿ ತಂತ್ರಾಂಶ ಕಾರ್ಯ ನಿರ್ವಹಿಸುತ್ತಿದೆ ಎಂಬುದನ್ನು ಅಮೆರಿಕದ ಸಿಟಿಜನ್ ಲ್ಯಾಬ್ ಕಂಡುಕೊಂಡಿದೆ.
  12. ಪೆಗಾಸಸ್ ಇನ್‌ಸ್ಟಾಲ್ ಆದ ಬಳಿಕ ಐಒಎಸ್ ಹಾಗೂ ಗೂಗಲ್‌ನ ಆಂಡ್ರಾಯ್ಡ್ ಕಾರ್ಯಾಚರಣಾ ವ್ಯವಸ್ಥೆಗಳಿಗೆ ಸೆಕ್ಯುರಿಟಿ ಪ್ಯಾಚ್ (ಮಾಲ್‌ವೇರ್ ಬಾಧೆಗೆ ತಡೆಯೊಡ್ಡುವ ತಂತ್ರಾಂಶದ ಅಪ್‌ಡೇಟ್) ನೀಡಲಾಗಿದೆ. ಈ ಕಾರಣಕ್ಕಾಗಿ, ಯಾವುದೇ ಮಾಲ್‌ವೇರ್‌ಗಳು ನಮ್ಮನ್ನು ಬಾಧಿಸದಂತಿರಲು, ಕಾಲಕಾಲಕ್ಕೆ ಬರುವ ಸೆಕ್ಯುರಿಟಿ ಅಪ್‌ಡೇಟ್‌ಗಳನ್ನು ನಾವು ನಮ್ಮ ಮೊಬೈಲ್‌ನಲ್ಲಿ ಇನ್‌ಸ್ಟಾಲ್ ಮಾಡಿಕೊಳ್ಳಬೇಕಾಗುತ್ತದೆ. ಸ್ವಲ್ಪ ಮಟ್ಟಿಗೆ ಇದರಿಂದ ಸುರಕ್ಷಿತವಾಗಿರಬಹುದು ನಾವು.

 

ಡಿಜಿಟಲ್ ಜಗತ್ತಿನಲ್ಲಿ ಯಾವುದೂ ಖಾಸಗಿಯಾಗಿ ಉಳಿದಿಲ್ಲ, ಉಳಿಯುವುದೂ ಇಲ್ಲ ಎಂಬುದಂತೂ ಅಲಿಖಿತ ವೇದವಾಕ್ಯ. ಹೀಗಿರುವಾಗ ನಮ್ಮ ಗೌಪ್ಯತೆ, ಖಾಸಗಿತನದ ರಕ್ಷಣೆ ನಮ್ಮದೇ ಕೈಯಲ್ಲಿದೆ ಎಂಬುದು ನಮಗೆ ಮನದಟ್ಟಾದರೆ ಸಾಕು.

 


ಪೂರ್ವಭಾವಿ ಪರೀಕ್ಷೆಗೆ ಸಂಬಂಧಿಸಿದ ವಿದ್ಯಮಾನಗಳು:


ಕದಂಬಿನಿ ಗಂಗೂಲಿ:

ಜುಲೈ 18 ರಂದು ದೇಶದ ಮೊದಲ ಮಹಿಳಾ ವೈದ್ಯರಾದ ಕದಂಬಿನಿ ಗಂಗೂಲಿಯವರನ್ನು ಅವರ 160 ನೇ ಜನ್ಮ ದಿನಾಚರಣೆಯ ಸಂದರ್ಭದಲ್ಲಿ ಗೂಗಲ್ ವಿಶೇಷ ಡೂಡಲ್‌ನೊಂದಿಗೆ ನೆನಪಿಸಿಕೊಂಡಿದೆ.

  1. ಜುಲೈ 18, 1861 ರಂದು ಬ್ರಹ್ಮ ಕುಟುಂಬದಲ್ಲಿ ಜನಿಸಿದ ಕದಂಬಿನಿ ಗಂಗೂಲಿ, ಚಂದ್ರಮುಖಿ ಬಸು ಅವರೊಂದಿಗೆ ಕೋಲ್ಕತ್ತಾದ ಬೆಥೂನ್ ಕಾಲೇಜಿನಿಂದ ಭಾರತದ ಮೊದಲ ಮಹಿಳಾ ಪದವೀಧರರಾದರು.
  2. ಮಹಿಳಾ ಹಕ್ಕುಗಳ ಬೆಂಬಲಿಗರಾದ, ಕದಂಬಿನಿ ಗಂಗೂಲಿ 1889 ರಲ್ಲಿ ರೂಪುಗೊಂಡ ಭಾರತೀಯ ರಾಷ್ಟ್ರೀಯ ಕಾಂಗ್ರೆಸ್ಸಿನ ಮೊದಲ ‘ಸರ್ವ ಮಹಿಳಾ ನಿಯೋಗ’ದ ಆರು ಸದಸ್ಯರಲ್ಲಿ ಒಬ್ಬರಾಗಿದ್ದರು.

 

ಬುಧ ಗ್ರಹದ ಕೋರ್ ನಲ್ಲಿ ಹೊಸ ಸಂಶೋಧನೆಗಳು:

(New findings on Mercury’s core)

 ಮೇರಿಲ್ಯಾಂಡ್ ವಿಶ್ವವಿದ್ಯಾಲಯದ ಸಂಶೋಧಕರು ಬುಧ ಗ್ರಹದ ಸಂಯೋಜನೆಯ ಕುರಿತು ಮಾಡಿದ ಇತ್ತೀಚಿನ ಅಧ್ಯಯನವು ಬುಧ ಗ್ರಹದ ‘ಕೋರ್’ ಅದರ ನಿಲುವಂಗಿಗೆ ಹೋಲಿಸಿದರೆ ಹೆಚ್ಚು ದೊಡ್ಡದಾಗಿದೆ (Mercury has a big-sized core relative to its mantle) ಎಂದು ಬಹಿರಂಗಪಡಿಸಿದೆ.

ಇದಕ್ಕೆ ಮುಖ್ಯ ಕಾರಣ ಸೂರ್ಯನ ಕಾಂತೀಯತೆ.

  1. ಸೌರವ್ಯೂಹದ ಆರಂಭಿಕ ರಚನೆಯ ಸಮಯದಲ್ಲಿ, ಯುವ ಸೂರ್ಯನು ಧೂಳು ಮತ್ತು ಅನಿಲದ ಮೋಡಗಳಿಂದ ಸುತ್ತುವರೆಯಲ್ಪಟ್ಟಾಗ, ಸೂರ್ಯನ ಕಾಂತಕ್ಷೇತ್ರದಿಂದಾಗಿ ಕಬ್ಬಿಣದ ಕಣಗಳು ಸೂರ್ಯನ ಕೇಂದ್ರದ ಕಡೆಗೆ ಆಕರ್ಷಿತವಾದವು ಮತ್ತು ಒಟ್ಟುಗೂಡಿದವು.
  2. ಧೂಳು ಮತ್ತು ಅನಿಲ ಸಮೂಹಗಳಿಂದ ಗ್ರಹಗಳು ರೂಪುಗೊಳ್ಳಲು ಪ್ರಾರಂಭಿಸಿದಾಗ,ಸೂರ್ಯನ ಹತ್ತಿರ ರೂಪುಗೊಂಡ ಗ್ರಹಗಳ ಕೋರ್ ಗಳು ದೂರದ ಗ್ರಹಗಳಿಗಿಂತ ಹೆಚ್ಚು ಕಬ್ಬಿಣದ ಕಣಗಳನ್ನು ಕೇಂದ್ರೀಕರಿಸಿಕೊಂಡಿವೆ.

  • Join our Official Telegram Channel HERE for Motivation and Fast Updates
  • Subscribe to our YouTube Channel HERE to watch Motivational and New analysis videos