Print Friendly, PDF & Email

[ ದೈನಂದಿನ ಪ್ರಚಲಿತ ಘಟನೆಗಳು ] ದಿನಾಂಕ – 2ನೇ ಜೂನ್ 2021

 

ಪರಿವಿಡಿ:

 ಸಾಮಾನ್ಯ ಅಧ್ಯಯನ ಪತ್ರಿಕೆ 2:

1. ಹಕ್ಕಿ ಜ್ವರದ H10 N3 ತಳಿ.

2. ಮಕ್ಕಳ ಹಕ್ಕುಗಳ ರಕ್ಷಣೆಯ ರಾಷ್ಟ್ರೀಯ ಆಯೋಗ (NCPCR).

3. ಪೋಷಕರು ಮತ್ತು ಹಿರಿಯ ನಾಗರಿಕರ ನಿರ್ವಹಣೆ ಮತ್ತು ಕಲ್ಯಾಣ ಕಾಯ್ದೆ, 2007.

4. ಚೀನಾ ಮತ್ತು ಮಧ್ಯ ಹಾಗೂ ಪೂರ್ವ ಯುರೋಪಿಯನ್ (CEE) 17 + 1 ಕಾರ್ಯವಿಧಾನ.

 

ಸಾಮಾನ್ಯ ಅಧ್ಯಯನ ಪತ್ರಿಕೆ 3:

1. ಐಪಿಒ ಗ್ರೇ ಮಾರುಕಟ್ಟೆ ಎಂದರೇನು?

2. ರಾಷ್ಟ್ರೀಯ ಭದ್ರತಾ ಕಾಯ್ದೆ (NSA), 1980.

 

ಪೂರ್ವಭಾವಿ ಪರೀಕ್ಷೆಗೆ ಸಂಬಂಧಿಸಿದ ವಿದ್ಯಮಾನಗಳು:

1. ಸಿನೋವಾಕ್ COVID-19 ಲಸಿಕೆ.

2. ವಿಶ್ವಸಂಸ್ಥೆಯ ವಿಶೇಷ ವರದಿಗಾರರು ಯಾರು?

3. NHRC ಮುಖ್ಯಸ್ಥರಾಗಿ ಆಯ್ಕೆಯಾದ,ನ್ಯಾಯಮೂರ್ತಿ ಎ.ಕೆ. ಮಿಶ್ರಾ.

4. ಅಂಬಿ ಟ್ಯಾಗ್.

 


ಸಾಮಾನ್ಯ ಅಧ್ಯಯನ ಪತ್ರಿಕೆ : 2


 

ವಿಷಯಗಳು: ಆರೋಗ್ಯ, ಶಿಕ್ಷಣ, ಸಾಮಾಜಿಕ ವಲಯ / ಸೇವೆಗಳ ಅಭಿವೃದ್ಧಿ ಮತ್ತು ನಿರ್ವಹಣೆಗೆ ಸಂಬಂಧಿಸಿದ ಮಾನವ ಸಂಪನ್ಮೂಲ ಸಂಬಂಧಿತ ವಿಷಯಗಳು.

ಹಕ್ಕಿ ಜ್ವರದ H10 N3 ತಳಿ:


(H10N3 bird flu strain)

 ಸಂದರ್ಭ:

ಇತ್ತೀಚೆಗೆ, ವಿಶ್ವದ ಮೊದಲ ಮಾನವ ಸೋಂಕಿನ ಹೆಚ್ 10 ಎನ್ 3 ಬರ್ಡ್ ಫ್ಲೂ ಸ್ಟ್ರೈನ್ (ಹಕ್ಕಿ ಜ್ವರದ H10 N3 ತಳಿ) (H10N3 bird flu strain) ಪ್ರಕರಣ ಚೀನಾದಲ್ಲಿ ವರದಿಯಾಗಿದೆ.

 

H10 N3  ಹಕ್ಕಿಜ್ವರದ ಬಗ್ಗೆ:

H10 N3 ಒಂದು ರೀತಿಯ ಪಕ್ಷಿ ಜ್ವರ (bird flu or avian flu). ಈ ರೋಗಗಳು ಸಾಮಾನ್ಯವಾಗಿ ಪ್ರಪಂಚದಾದ್ಯಂತದ ಕಾಡು ಜಲ ಪಕ್ಷಿಗಳಲ್ಲಿ ಕಂಡುಬರುತ್ತವೆ ಮತ್ತು ದೇಶೀಯ ಕೋಳಿ ಪ್ರಭೇದಗಳು ಮತ್ತು ಇತರ ಪಕ್ಷಿ ಮತ್ತು ಪ್ರಾಣಿ ಪ್ರಭೇದಗಳಿಗೆ ಸೋಂಕು ಉಂಟುಮಾಡುತ್ತವೆ.

 

ಪ್ರಸರಣ ಮತ್ತು ಹರಡುವಿಕೆ:

ಏವಿಯನ್ ಫ್ಲೂ ವೈರಸ್ ಸೋಂಕಿತ ಪಕ್ಷಿಗಳ ಲಾಲಾರಸ(Saliva), ಲೋಳೆ(Mucus) ಮತ್ತು ಮಲದ (Poop) ಮೂಲಕ ಹರಡುತ್ತದೆ, ಮತ್ತು ಈ ವೈರಸ್ ಮನುಷ್ಯನ ಕಣ್ಣು, ಮೂಗು ಅಥವಾ ಬಾಯಿಯ ಸಂಪರ್ಕಕ್ಕೆ ಸಾಕಷ್ಟು ಪ್ರಮಾಣದಲ್ಲಿ ಬಂದಾಗ ಅಥವಾ ಉಸಿರಾಟದ ಪ್ರಕ್ರಿಯೆಯಲ್ಲಿ  ಈ ಸೋಂಕಿತ ವಸ್ತುಗಳನ್ನು ಉಸಿರಾಡುವ ಮೂಲಕ ಮಾನವರು ಸೋಂಕಿಗೆ ಒಳಗಾಗಬಹುದು.

 

ಇದು ಕಳವಳಕ್ಕೆ ಕಾರಣವೇ?

ಏಕಾಏಕಿ ಹರಡುವಿಕೆಯ ಭೀತಿಯನ್ನು ನಿರಾಕರಿಸಿದ ಆರೋಗ್ಯ ಅಧಿಕಾರಿಗಳು, ಈ ಪ್ರಕರಣವು ಕೋಳಿಗಳಿಂದ ಮನುಷ್ಯರಿಗೆ ವಿರಳವಾಗಿ ಹರಡುತ್ತದೆ ಮತ್ತು ಸಾಂಕ್ರಾಮಿಕ ರೋಗ ಹರಡುವ ಅಪಾಯ ತೀರಾ ಕಡಿಮೆ ಎಂದು ಹೇಳಿದ್ದಾರೆ.

  1. ಎಚ್ 10 ಎನ್ 3 ಕೋಳಿಗಳಲ್ಲಿ ಕಂಡುಬರುವ ಕಡಿಮೆ ರೋಗಕಾರಕ ಅಥವಾ ಕಡಿಮೆ ತೀವ್ರತೆಯ ವೈರಸ್ ಆಗಿದೆ, ಮತ್ತು ಇದು ವ್ಯಾಪಕವಾಗಿ ಹರಡುವ ಅಪಾಯವು ತುಂಬಾ ಕಡಿಮೆಯಾಗಿದೆ.

 

ಮಾನವರಲ್ಲಿ ಎಚ್ 10 ಎನ್ 3 ಹರಡುವುದನ್ನು ತಡೆಯುವ ಕ್ರಮಗಳು:

  1. ವ್ಯಕ್ತಿಗಳು ಅನಾರೋಗ್ಯಪೀಡಿತ ಅಥವಾ ಸತ್ತ ಕೋಳಿ ಗಳೊಂದಿಗೆ ಸಂಪರ್ಕವನ್ನು ತಪ್ಪಿಸಬೇಕು ಮತ್ತು ಸಾಧ್ಯವಾದಷ್ಟು ಜೀವಂತ ಕೋಳಿಗಳೊಂದಿಗಿನ ನೇರ ಸಂಪರ್ಕವನ್ನು ತಪ್ಪಿಸಬೇಕು.
  2. ಈ ಸಮಯದಲ್ಲಿ ಜನರು ಆಹಾರ ನೈರ್ಮಲ್ಯದ ಬಗ್ಗೆ ಗಮನ ಹರಿಸಬೇಕು.ಚನ್ನಾಗಿ ಬೇಯಿಸಿದ ಕೋಳಿ ಮಾಂಸದ ಸೇವನೆಯು ಸುರಕ್ಷಿತವೆಂದು ಪರಿಗಣಿಸಲಾಗಿದೆ.
  3. ಜ್ವರ ಮತ್ತು ಉಸಿರಾಟದ ರೋಗಲಕ್ಷಣಗಳನ್ನು ಆಗಾಗ್ಗೆ ಮೇಲ್ವಿಚಾರಣೆ ಮಾಡುವ ಮೂಲಕ ಜನರು ಮುಖವಾಡಗಳನ್ನು (ಮುಖಗವಸುಗಳನ್ನು) ಧರಿಸಬೇಕು ಮತ್ತು ಸ್ವರಕ್ಷಣೆಯ ಬಗ್ಗೆ ಜಾಗೃತರಾಗಿರಬೇಕು.

 

ಪಕ್ಷಿ ಜ್ವರದ ವಿವಿಧ ತಳಿಗಳು:

  1. ಚೀನಾದಲ್ಲಿ ಪ್ರಾಣಿಗಳಲ್ಲಿ ಹಲವಾರು ಪಕ್ಷಿ ಜ್ವರಗಳು ಕಂಡುಬಂದಿವೆ, ಆದರೆ ಮಾನವರಲ್ಲಿ ಇನ್ನೂ ದೊಡ್ಡ ಪ್ರಮಾಣದ ಅಥವಾ ಸಾಮೂಹಿಕವಾಗಿ ಏಕಾಏಕಿ ಹರಡುವಿಕೆಯು ಸಂಭವಿಸಿಲ್ಲ.
  2. ಚೀನಾದಲ್ಲಿ ಪಕ್ಷಿ ಜ್ವರದಿಂದ ಉಂಟಾದ ಕೊನೆಯ ಮಾನವ ಸಾಂಕ್ರಾಮಿಕ ರೋಗವು 2016–2017ರ ಅವಧಿಯಲ್ಲಿ H7N9 ವೈರಸ್‌ನಿಂದ ಉಂಟಾಗಿದೆ.
  3. H5N8 ‘ಇನ್ಫ್ಲುಯೆನ್ಸ ಎ’ ವೈರಸ್‌ನ ಉಪವಿಭಾಗವಾಗಿದೆ (ಇದನ್ನು ಪಕ್ಷಿ ಜ್ವರ ವೈರಸ್ ಎಂದೂ ಕರೆಯುತ್ತಾರೆ). H5N8, ಮಾನವರಿಗೆ ಕಡಿಮೆ ಅಪಾಯಕಾರಿಯಾದರೂ, ಕಾಡು ಪಕ್ಷಿಗಳು ಮತ್ತು ದೇಶೀಯ ಕೋಳಿಗಳಿಗೆ ಹೆಚ್ಚು ಮಾರಕವಾಗಿದೆ. ಪ್ಯಾರಿಸ್ ಮೂಲದ ವರ್ಲ್ಡ್ ಆರ್ಗನೈಸೇಶನ್ ಫಾರ್ ಅನಿಮಲ್ ಹೆಲ್ತ್ ಪ್ರಕಾರ, H5N8 ಏವಿಯನ್ ಇನ್ಫ್ಲುಯೆನ್ಸವು ಪಕ್ಷಿಗಳ ಕಾಯಿಲೆಯಾಗಿದ್ದು, ಇದು Type “A” influenza viruse ಗಳಿಂದ ಉಂಟಾಗುತ್ತದೆ, ಇದು ಕೋಳಿಗಳು, ಟರ್ಕಿ ಕೋಳಿಗಳು, ಕ್ವಿಲ್ಗಳು, ಗಿನಿಯಿಲಿ ಮತ್ತು ಬಾತುಕೋಳಿಗಳು ಸೇರಿದಂತೆ ಅನೇಕ ಜಾತಿಗಳ ದೇಶೀಯ ಕೋಳಿಗಳ ಮೇಲೆ ಪರಿಣಾಮ ಬೀರುತ್ತದೆ. , ಹಾಗೆಯೇ ಸಾಕುಪ್ರಾಣಿಗಳು, ಕಾಡು ವಲಸೆ ಹಕ್ಕಿಗಳು ಮತ್ತು ನೀರು ಹಕ್ಕಿಗಳನ್ನು ಒಳಗೊಂಡಂತೆ ಪರಿಣಾಮ ಬೀರುತ್ತದೆ.
  4. ಏಪ್ರಿಲ್ ನಲ್ಲಿ, ಈಶಾನ್ಯ ಚೀನಾದ ಶೆನ್ಯಾಂಗ್ ನಗರದ, ಕಾಡು ಪಕ್ಷಿಗಳಲ್ಲಿ ಹೆಚ್ಚು ರೋಗಕಾರಕ H5N6 ಏವಿಯನ್ ಫ್ಲೂ ಸೋಂಕು ಪತ್ತೆಯಾಗಿದೆ.

 

ವರ್ಗೀಕರಣ:

ಇನ್ಫ್ಲುಯೆನ್ಸ ಎ ವೈರಸ್‌ಗಳನ್ನು ಎರಡು ವಿಧದ ಪ್ರೋಟೀನ್‌ಗಳಾದ ಹೆಮಗ್ಗ್ಲುಟಿನಿನ್ (Hemagglutinin (HA) ಮತ್ತು ನ್ಯೂರಾಮಿನಿದೇಸ್ (Neuraminidase (NA) ಆಧರಿಸಿ ಉಪವಿಭಾಗಗಳಾಗಿ ವರ್ಗೀಕರಿಸಲಾಗಿದೆ. ಉದಾಹರಣೆಗೆ, HA 7 ಪ್ರೋಟೀನ್ ಮತ್ತು NA 9 ಪ್ರೋಟೀನ್ ಹೊಂದಿರುವ ವೈರಸ್ ಅನ್ನು ‘H7N9’ ವೈರಸ್ ನ ಉಪ ವಿಭಾಗ (Subtype) ಎಂದು ಕರೆಯಲಾಗುತ್ತದೆ.

 

ವಿಷಯಗಳು:ಶಾಸನಬದ್ಧ ನಿಯಂತ್ರಕ ಮತ್ತು ವಿವಿಧ ಅರೆ- ನ್ಯಾಯಿಕ ಸಂಸ್ಥೆಗಳು.

ರಾಷ್ಟ್ರೀಯ ಮಕ್ಕಳ ಹಕ್ಕುಗಳ ರಕ್ಷಣಾ ಆಯೋಗ (NCPCR):


(National commission for protection of Child Rights)

ಸಂದರ್ಭ:

ಸುಪ್ರೀಂ ಕೋರ್ಟ್‌ ಸ್ವಯಂ ಪ್ರೇರಿತವಾಗಿ (Suo motu), ಸಾಂಕ್ರಾಮಿಕ ರೋಗದಿಂದಾಗಿ ತಮ್ಮ ಪಾಲಕರು ಮತ್ತು ಆತ್ಮೀಯರನ್ನು ಕಳೆದುಕೊಂಡಿರುವ ಮಕ್ಕಳಿಗೆ ರಕ್ಷಣೆ ನೀಡುವ ವಿಧಾನಗಳನ್ನು ಪರಿಶೀಲಿಸುತ್ತಿದೆ.

  1. ಈ ನಿಟ್ಟಿನಲ್ಲಿ ಸಾಂಕ್ರಾಮಿಕ ರೋಗದಿಂದಾಗಿ ಅನಾಥವಾಗಿರುವ ಮಕ್ಕಳ ಕಲ್ಯಾಣ ಕಾರ್ಯಕ್ರಮಗಳನ್ನು ಕೈಗೊಳ್ಳುವಂತೆ ನ್ಯಾಯಾಲಯವು ಮೇ 28 ರಂದು ಕೇಂದ್ರ ಸರ್ಕಾರಕ್ಕೆ ನಿರ್ದೇಶನ ನೀಡಿತ್ತು.
  2. ತುರ್ತು ಆರೈಕೆಯ ಅಗತ್ಯವಿರುವ ಮಕ್ಕಳನ್ನು ಗುರುತಿಸುವ ಸಂಬಂಧಿತ ಮಾಹಿತಿಯನ್ನು ಸಂಗ್ರಹಿಸಲು ರಾಷ್ಟ್ರೀಯ ಮಕ್ಕಳ ಹಕ್ಕುಗಳ ರಕ್ಷಣಾ ಆಯೋಗ (NCPCR) ಮತ್ತು ರಾಜ್ಯಗಳಿಗೆ ಆದೇಶಿಸಿತು.

 

ಬಾಲ್ ಸ್ವರಾಜ್’ ಹೆಸರಿನ ಆನ್‌ಲೈನ್ ಟ್ರ್ಯಾಕಿಂಗ್ ಪೋರ್ಟಲ್‌ನಲ್ಲಿ ಸಂಗ್ರಹಿಸಿದ ಮಾಹಿತಿಯ ಆಧಾರದ ಮೇಲೆ, NCPCR ಈ ಕೆಳಗಿನ ಮಾಹಿತಿಯನ್ನು ಸಲ್ಲಿಸಿದೆ:

  1. ದೇಶದಲ್ಲಿ ಸುಮಾರು 10,000 ಮಕ್ಕಳಿಗೆ ತಕ್ಷಣದ ಆರೈಕೆ ಮತ್ತು ರಕ್ಷಣೆ ಅಗತ್ಯವಾಗಿದೆ.
  2. ಮಾರ್ಚ್ 2020 ರಿಂದ COVID-19 ಸಾಂಕ್ರಾಮಿಕ ಸಮಯದಲ್ಲಿ, ‘ಶೂನ್ಯ’ದಿಂದ 17 (0-17) ವರ್ಷದೊಳಗಿನ ಅನಾಥ ಅಥವಾ ಪರಿತ್ಯಕ್ತ ಮಕ್ಕಳು ಇದರಲ್ಲಿ ಸೇರಿದ್ದಾರೆ.
  3. ಈ ಮಕ್ಕಳು ಕಳ್ಳಸಾಗಣೆ ಮತ್ತು ಬಲವಂತದ ವೇಶ್ಯಾವಾಟಿಕೆಗೆ ಒಳಗಾಗುವ ಅಪಾಯವನ್ನು ಎದುರಿಸುತ್ತಿದ್ದಾರೆ.

 

ವಿಶೇಷ ಗಮನದ ಅಗತ್ಯವಿದೆ:

ವಿನಾಶಕಾರಿ COVID-19 ಸಾಂಕ್ರಾಮಿಕವು ಸಮಾಜದ ದುರ್ಬಲ ವರ್ಗಗಳನ್ನು ಧ್ವಂಸ ಮಾಡಿದೆ. ಕುಟುಂಬದಲ್ಲಿ ದುಡಿಯುವ ವ್ಯಕ್ತಿಯು ಸಾವನ್ನಪ್ಪಿದ ಕಾರಣ ಅಥವಾ ತಮ್ಮ ಇಬ್ಬರು ಪೋಷಕರನ್ನು ಕಳೆದುಕೊಂಡು ಅನಾಥರಾದ ಅನೇಕ ಮಕ್ಕಳು ಇದ್ದಾರೆ. ಈ ಮಕ್ಕಳಿಗೆ ಸಂಬಂಧಿಸಿದ ಪ್ರಾಧಿಕಾರಗಳಿಂದ ತಕ್ಷಣದ ಮತ್ತು ವಿಶೇಷ ಗಮನದ ಅಗತ್ಯವಿದೆ.

 

NCPCR ಬಗ್ಗೆ:

ರಾಷ್ಟ್ರೀಯ ಮಕ್ಕಳ ಹಕ್ಕುಗಳ ರಕ್ಷಣಾ ಆಯೋಗವನ್ನು (NCPCR) ಮಾರ್ಚ್ 2007 ರಲ್ಲಿ ಮಕ್ಕಳ ಹಕ್ಕುಗಳ ಸಂರಕ್ಷಣಾ ಕಾಯ್ದೆ, 2005’ ಅಡಿಯಲ್ಲಿ ಸ್ಥಾಪಿಸಲಾಯಿತು.

  1. ಇದು ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಸಚಿವಾಲಯದ ಆಡಳಿತ ನಿಯಂತ್ರಣದಲ್ಲಿ ಕಾರ್ಯನಿರ್ವಹಿಸುತ್ತದೆ.
  2. ಆಯೋಗದ ಕಾರ್ಯವು ಭಾರತದ ಸಂವಿಧಾನದಲ್ಲಿ ಪ್ರತಿಪಾದಿಸಿರುವಂತೆ ದೇಶದಲ್ಲಿ ರೂಪಿಸಿದ ಎಲ್ಲಾ ಕಾನೂನುಗಳು, ನೀತಿಗಳು, ಕಾರ್ಯಕ್ರಮಗಳು ಮತ್ತು ಆಡಳಿತ ಕಾರ್ಯವಿಧಾನಗಳು ಮತ್ತು ಮಕ್ಕಳ ಹಕ್ಕುಗಳ ಕುರಿತ ವಿಶ್ವಸಂಸ್ಥೆಯ ಸಮಾವೇಶದಲ್ಲಿ ವಿವರಿಸಿರುವಂತೆ ಅವರು ಮಗುವಿನ ಹಕ್ಕುಗಳ ದೃಷ್ಟಿಗೆ ಅನುಗುಣವಾಗಿರುವುದನ್ನು ಖಚಿತಪಡಿಸಿಕೊಳ್ಳುವುದು.

 

ಶಿಕ್ಷಣ ಹಕ್ಕು ಕಾಯ್ದೆ’ 2009 ಕ್ಕೆ ಸಂಬಂಧಿಸಿದಂತೆ NCPCR ನ ಅಧಿಕಾರಗಳು:

  1. ಕಾನೂನಿನ ಉಲ್ಲಂಘನೆಗೆ ಸಂಬಂಧಿಸಿದ ದೂರುಗಳನ್ನು ತನಿಖೆ ಮಾಡಬಹುದು.
  2. ಯಾವುದೇ ವ್ಯಕ್ತಿಯನ್ನು ವಿಚಾರಣೆ ಮಾಡಲು ಕರೆಸಬಹುದು ಮತ್ತು ಸಾಕ್ಷ್ಯವನ್ನು ಕೋರಬಹುದು.
  3. ಮ್ಯಾಜಿಸ್ಟ್ರೇಟ್ ವಿಚಾರಣೆಗೆ ಆದೇಶಿಸಬಹುದು.
  4. ರಿಟ್ ಅರ್ಜಿಯನ್ನು ಹೈಕೋರ್ಟ್ ಅಥವಾ ಸುಪ್ರೀಂ ಕೋರ್ಟ್‌ನಲ್ಲಿ ಸಲ್ಲಿಸಬಹುದು.
  5. ಅಪರಾಧಿಯ ವಿರುದ್ಧ ಕಾನೂನು ಕ್ರಮ ಜರುಗಿಸಲು ಸರ್ಕಾರವನ್ನು ಸಂಪರ್ಕಿಸಬಹುದು.
  6. ಪೀಡಿತ ಜನರಿಗೆ ಮಧ್ಯಂತರ ಪರಿಹಾರವನ್ನು ನೀಡುವಂತೆ ಶಿಫಾರಸು ಮಾಡಬಹುದು.

 

ಸಂಯೋಜನೆ:

  1. ಆಯೋಗವು ಅಧ್ಯಕ್ಷರು ಮತ್ತು ಆರು ಸದಸ್ಯರನ್ನು ಒಳಗೊಂಡಿದೆ, ಅವರಲ್ಲಿ ಕನಿಷ್ಠ ಇಬ್ಬರು ಮಹಿಳೆಯರು ಇರಬೇಕು.
  2. ಎಲ್ಲಾ ಸದಸ್ಯರನ್ನು ಕೇಂದ್ರ ಸರ್ಕಾರವು ನೇಮಿಸುತ್ತದೆ, ಮತ್ತು ಅವರ ಅಧಿಕಾರಾವಧಿ ಮೂರು ವರ್ಷಗಳು.
  3. ಆಯೋಗದಲ್ಲಿ ಸೇವೆ ಸಲ್ಲಿಸಲು ಅಧ್ಯಕ್ಷರ ಗರಿಷ್ಠ ವಯಸ್ಸು 65 ವರ್ಷಗಳು ಮತ್ತು ಸದಸ್ಯರ ಗರಿಷ್ಠ ವಯಸ್ಸು 60 ವರ್ಷಗಳು.

 

ವಿಷಯಗಳು: ಕೇಂದ್ರ ಮತ್ತು ರಾಜ್ಯಗಳಿಂದ  ದುರ್ಬಲ ವರ್ಗದ ಜನಸಮುದಾಯದವರಿಗೆ ಇರುವ ಕಲ್ಯಾಣ ಯೋಜನೆಗಳು ಮತ್ತು ಈ ಯೋಜನೆಗಳ ಕಾರ್ಯಕ್ಷಮತೆ; ಕಾರ್ಯವಿಧಾನಗಳು,ಕಾನೂನುಗಳು, ಸಂಸ್ಥೆಗಳು ಮತ್ತು ಈ ದುರ್ಬಲ ವಿಭಾಗಗಳ ರಕ್ಷಣೆ ಮತ್ತು ಸುಧಾರಣೆಗಾಗಿ ರಚಿಸಲಾದ ಸಂಸ್ಥೆಗಳು.

ಪೋಷಕರು ಮತ್ತು ಹಿರಿಯ ನಾಗರಿಕರ ನಿರ್ವಹಣೆ ಮತ್ತು ಕಲ್ಯಾಣ ಕಾಯ್ದೆ, 2007.


(Maintenance and Welfare of Parents and Senior Citizens Act, 2007)

ಸಂದರ್ಭ:

ಕರ್ನಾಟಕ ಹೈಕೋರ್ಟ್, ಪೋಷಕರು ಮತ್ತು ಹಿರಿಯ ನಾಗರಿಕರ ನಿರ್ವಹಣೆ ಮತ್ತು ಕಲ್ಯಾಣ ಕಾಯ್ದೆ, 2007, (Maintenance and Welfare of Parents and Senior Citizens Act, 2007) ರ ನಿಬಂಧನೆಗಳಿಗೆ ಅನುಗುಣವಾಗಿ ವೃದ್ಧಾಶ್ರಮಗಳನ್ನು ಸ್ಥಾಪಿಸುವ ತನ್ನ ಶಾಸನಬದ್ಧ ಬಾಧ್ಯತೆಯನ್ನು ಪೂರೈಸುವಲ್ಲಿ ರಾಜ್ಯ ಸರ್ಕಾರ ತನ್ನ ಕಡೆಯಿಂದ ಸಂಪೂರ್ಣವಾಗಿ ವಿಫಲವಾಗಿದೆ ಎಂದು ಹೇಳಿದೆ.

 

ಕಾನೂನಿನ ಪ್ರಕಾರ ರಾಜ್ಯವು ‘ವೃದ್ಧಾಶ್ರಮಗಳನ್ನು’ ಸ್ಥಾಪಿಸುವುದು ಕಡ್ಡಾಯವೇ?

ಕಾಯಿದೆಯ ಸೆಕ್ಷನ್ 19 ರ ಪ್ರಕಾರ-

ರಾಜ್ಯ ಸರ್ಕಾರವು ಹಂತಹಂತವಾಗಿ, ಪ್ರವೇಶಿಸಬಹುದಾದ ಸ್ಥಳಗಳಲ್ಲಿ ಅಗತ್ಯವೆಂದು ಪರಿಗಣಿಸಬಹುದಾದಷ್ಟು ವೃದ್ಧಾಶ್ರಮಗಳನ್ನು ಸ್ಥಾಪಿಸಿ ಮತ್ತು ನಿರ್ವಹಿಸಬಹುದು ಮತ್ತು ಆರಂಭದಲ್ಲಿ ಪ್ರತಿ ಜಿಲ್ಲೆಯಲ್ಲಿ ಕನಿಷ್ಠ ಒಂದು ವೃದ್ಧಾಶ್ರಮವನ್ನಾದರು ಸ್ಥಾಪಿಸಬೇಕು.

 

  1. ವೃದ್ಧಾಶ್ರಮಗಳ ನಿರ್ವಹಣೆಗಾಗಿ ರಾಜ್ಯ ಸರ್ಕಾರವು ಯೋಜನೆಯನ್ನು ರೂಪಿಸಬಹುದು.

ಈ ವಿಷಯದ ಬಗ್ಗೆ ಹೈಕೋರ್ಟ್‌ ಹೇಳಿರುವುದೇನು?

ರಾಜ್ಯ ಸರ್ಕಾರಗಳು ವೃದ್ಧಾಶ್ರಮಗಳನ್ನು ‘ಸ್ಥಾಪಿಸಬಹುದು ಮತ್ತು ನಿರ್ವಹಿಸಬಹುದು’ ಎಂದು ಕಾಯಿದೆಯಲ್ಲಿ ಹೇಳಲಾಗಿದ್ದು, ಇದಕ್ಕಾಗಿ ‘May’ ಎಂಬ ಇಂಗ್ಲಿಷ್ ಪದವನ್ನು ಬಳಸಲಾಗಿದೆ, ಕಾನೂನನ್ನು ವಿವಿಧ ಅಂಶಗಳ ಆಧಾರದ ಮೇಲೆ ವ್ಯಾಖ್ಯಾನಿಸುವಾಗ, ಮಾಡಬಹುದು ಎಂಬ ಅರ್ಥವನ್ನು ನೀಡುವ ‘May’ ಎಂಬ ಪದವನ್ನು ಮಾಡಬೇಕಾಗುತ್ತದೆ’ ಎಂಬ ಅರ್ಥವನ್ನು ನೀಡುವ ‘Shall’ ಎಂದೂ ವ್ಯಾಖ್ಯಾನಿಸಬಹುದು, ಮತ್ತು ಸಂದರ್ಭಕ್ಕೆ ತಕ್ಕಂತೆ ಎರಡು ಪದಗಳನ್ನು ಅದಲು-ಬದಲು ಮಾಡಬಹುದು ಎಂದು ನ್ಯಾಯಾಲಯವು ಹೇಳಿದೆ.

 

ವೃದ್ಧಾಶ್ರಮಗಳ ಅವಶ್ಯಕತೆ:

ಜೀವನದ ಕಠಿಣ ವಾಸ್ತವವನ್ನು ಗಮನಿಸಿದರೆ, ಬಡ ಅಥವಾ ಆದಾಯದ ಮೂಲವಿಲ್ಲದ ಹಿರಿಯ ನಾಗರಿಕರಿಗೆ ರಕ್ಷಣೆ ಬೇಕು. ಅವಿಭಕ್ತ ಕುಟುಂಬ ವ್ಯವಸ್ಥೆಯು ಕ್ಷೀಣಿಸುತ್ತಿರುವುದರಿಂದಾಗಿ, ಹೆಚ್ಚಿನ ಸಂಖ್ಯೆಯ ವೃದ್ಧರನ್ನು ಅವರ ಕುಟುಂಬಗಳು ನೋಡಿಕೊಳ್ಳುವುದಿಲ್ಲ. ಇದಲ್ಲದೆ, ವಯಸ್ಸಾಗುವಿಕೆಯು ಅಥವಾ ಮುದಿತನವು ಒಂದು ದೊಡ್ಡ ಸಾಮಾಜಿಕ ಸವಾಲಾಗಿ ಮಾರ್ಪಟ್ಟಿದೆ.

 

ಪೋಷಕರು ಮತ್ತು ಹಿರಿಯ ನಾಗರಿಕರ ನಿರ್ವಹಣೆ ಕಾಯಿದೆ, 2007 ರ ಅವಲೋಕನ:

  1. ಈ ಕಾಯಿದೆಯಡಿ, ವಯಸ್ಕ ಮಕ್ಕಳು ಮತ್ತು ಉತ್ತರಾಧಿಕಾರಿಗಳಿಗೆ ಪೋಷಕರಿಗೆ ಮಾಸಿಕ ಭತ್ಯೆಯ ರೂಪದಲ್ಲಿ ನಿರ್ವಹಣೆ ವೆಚ್ಚವನ್ನು ಒದಗಿಸುವುದನ್ನು ಕಾನೂನುಬದ್ಧವಾಗಿ ಮಾಡಲಾಗಿದೆ.
  2. ಈ ಕಾಯಿದೆಯು ‘ಪೋಷಕರು ಮತ್ತು ಹಿರಿಯ ನಾಗರಿಕರಿಗೆ ಮಾಸಿಕ ನಿರ್ವಹಣೆಯನ್ನು ಪಡೆಯಲು ಕೈಗೆಟುಕುವ ಮತ್ತು ತ್ವರಿತ ಪ್ರಕ್ರಿಯೆಯನ್ನು’ ಒದಗಿಸುತ್ತದೆ.
  3. ಈ ಕಾಯಿದೆಯ ಪ್ರಕಾರ, ಪೋಷಕರನ್ನು ಜೈವಿಕ ಅಂದರೆ ಜನ್ಮ ನೀಡಿದವರು, ದತ್ತು ಪಡೆದ ಪೋಷಕರು ಅಥವಾ ಮಲ – ತಂದೆತಾಯಿಗಳು ಎಂದು ಅರ್ಥೈಸಬಹುದು.
  4. ಅಂತಹ ವ್ಯಕ್ತಿಗಳ (ವೃದ್ಧರ) ಜೀವ ಮತ್ತು ಆಸ್ತಿಯನ್ನು ರಕ್ಷಿಸಲು ಈ ಕಾಯ್ದೆಯಡಿ ಅವಕಾಶ ಕಲ್ಪಿಸಲಾಗಿದೆ.

 

ವಿಷಯಗಳು: ಪ್ರಮುಖ ಅಂತರರಾಷ್ಟ್ರೀಯ ಸಂಸ್ಥೆಗಳು, ಏಜೆನ್ಸಿಗಳು ಮತ್ತು ವೇದಿಕೆಗಳು, ಅವುಗಳ ರಚನೆ, ಮತ್ತು ಆದೇಶ.

ಚೀನಾ ಮತ್ತು ಮಧ್ಯ ಹಾಗೂ ಪೂರ್ವ ಯುರೋಪಿಯನ್ (CEE) 17 + 1 ಕಾರ್ಯವಿಧಾನ:


(China and Central & Eastern European (CEE) 17+1 mechanism)

ಸಂದರ್ಭ:

ಚೀನಾ ಮತ್ತು ಯುರೋಪಿಯನ್ ಒಕ್ಕೂಟದೊಳಗಿನ   ಚೀನಾ ಪರ ದೇಶಗಳ ಗುಂಪಾಗಿ ಕಂಡುಬರುವ ಚೀನಾ ಮತ್ತು ಮಧ್ಯ ಹಾಗೂ ಪೂರ್ವ ಯುರೋಪಿಯನ್’ 17 + 1 ಕಾರ್ಯವಿಧಾನ (China and Central & Eastern European (CEE) 17+1 mechanism) ದಿಂದ ನಿರ್ಗಮಿಸುವ ತನ್ನ ನಿರ್ಧಾರವನ್ನು ಲಿಥುವೇನಿಯಾ ಸಮರ್ಥಿಸಿಕೊಂಡಿದೆ.

ಅಮೆರಿಕದ ಒತ್ತಡದಿಂದಾಗಿ ಈ ನಿರ್ಧಾರ ತೆಗೆದುಕೊಂಡಿಲ್ಲ ಎಂದು ಲಿಥುವೇನಿಯಾ ಸ್ಪಷ್ಟಪಡಿಸಿದೆ.

 

ಈ ನಿರ್ಧಾರಕ್ಕೆ ಮುಖ್ಯ ಕಾರಣಗಳು:

  1. ಲಿಥುವೇನಿಯಾ ಪ್ರಕಾರ, ಈ ’17 ಪ್ಲಸ್ ಒನ್ ‘ಸ್ವರೂಪವು ವಿಭಜಕ ವೇದಿಕೆಯಾಗಿ ಮಾರ್ಪಟ್ಟಿದೆ; ಆದರೆ ಅದು ಯುರೋಪಿನ ಬಲವಾದ ಧ್ವನಿಯಾಗಿ (Europe’s one strong voice) ಕಾರ್ಯನಿರ್ವಹಿಸಬೇಕಾಗಿತ್ತು.
  2. ಚೀನಾ ಮತ್ತು ಲಿಥುವೇನಿಯಾ ನಡುವೆ ಹಲವಾರು ವಿಷಯಗಳ ಬಗ್ಗೆ ಉದ್ವಿಗ್ನತೆ ಹೆಚ್ಚುತ್ತಿದೆ: ತೈವಾನ್‌ನೊಂದಿಗಿನ ಲಿಥುವೇನಿಯಾ ಹೊಸ ಸಂಬಂಧಗಳು, ಉಯಿಘರ್‌ಗಳ ಬಗ್ಗೆ ಲಿಥುವೇನಿಯನ್ ಸಂಸತ್ತಿನ ನಿರ್ಣಯ, ಮತ್ತು ನಂತರ ಲಿಥುವೇನಿಯನ್ ಮತ್ತು ಯುರೋಪಿಯನ್ ಒಕ್ಕೂಟದ ರಾಜಕಾರಣಿಗಳ ಮೇಲೆ ಚೀನಾ ವಿಧಿಸಿರುವ ನಿರ್ಬಂಧಗಳು.
  3. ಕೆಲವು ಯುರೋಪಿಯನ್ ರಾಜಕಾರಣಿಗಳು ಮತ್ತು ಶಿಕ್ಷಣ ತಜ್ಞರ ವಿರುದ್ಧ ಪ್ರವೇಶ ನಿಷೇಧ ಮತ್ತು ಇತರ ನಿರ್ಬಂಧಗಳನ್ನು ವಿಧಿಸಲು ಚೀನಾ ನಿರ್ಧರಿಸಿದೆ ಮತ್ತು ಇದು ಯುರೋಪಿಯನ್ ಒಕ್ಕೂಟ-ಚೀನಾ ಸಂಬಂಧಗಳ ಮೇಲೆ ಪರಿಣಾಮ ಬೀರಿದೆ.

 

ಏನಿದು 17 + 1 ಉಪಕ್ರಮ?

’17 +1 ‘ಉಪಕ್ರಮವು, ಚೀನಾದ ನಾಯಕತ್ವದಲ್ಲಿ ರೂಪುಗೊಂಡ ಒಂದು ವೇದಿಕೆಯಾಗಿದ್ದು, ಇದನ್ನು 2012 ರಲ್ಲಿ ಬುಡಾಪೆಸ್ಟ್‌ನಲ್ಲಿ ಸ್ಥಾಪಿಸಲಾಯಿತು.

ಮಧ್ಯ ಮತ್ತು ಪೂರ್ವ ಯುರೋಪಿಯನ್(Central and Eastern European- CEE)  ಪ್ರದೇಶದ ಅಭಿವೃದ್ಧಿಗೆ ಹೂಡಿಕೆ ಮತ್ತು ವ್ಯಾಪಾರಕ್ಕಾಗಿ ‘ಮಧ್ಯ ಮತ್ತು ಪೂರ್ವ ಯುರೋಪ್’ ಸದಸ್ಯ ರಾಷ್ಟ್ರಗಳು ಮತ್ತು ಬೀಜಿಂಗ್‌ನ ನಡುವೆ ಸಹಕಾರವನ್ನು ವಿಸ್ತರಿಸುವುದು ಇದರ ಉದ್ದೇಶವಾಗಿತ್ತು.

  1. ಈ ಚೌಕಟ್ಟಿನಡಿಯಲ್ಲಿ, ಸೇತುವೆಗಳ ಆಧುನೀಕರಣ, ಮೋಟಾರು ಮಾರ್ಗಗಳು, ರೈಲ್ವೆ ಮಾರ್ಗಗಳು ಮತ್ತು ಸಹ ಸದಸ್ಯ ರಾಷ್ಟ್ರಗಳಲ್ಲಿನ ಬಂದರುಗಳ ಆಧುನೀಕರಣದ ಬಗ್ಗೆಯೂ ಮೂಲಸೌಕರ್ಯ ಯೋಜನೆಗಳು ಕೇಂದ್ರೀಕೃತವಾಗಿವೆ.

  

 

 

ಇದರಿಂದ ಚೀನಾಕ್ಕೆ ಆಗುವ ಲಾಭಗಳೇನು?

ಚೀನಾದ ಪ್ರಕಾರ, 17 + 1 ಉಪಕ್ರಮವನ್ನು ಪಶ್ಚಿಮದ ಯುರೋಪಿಯನ್ ದೇಶಗಳಿಗೆ ಹೋಲಿಸಿದರೆ ಕಡಿಮೆ ಅಭಿವೃದ್ಧಿ ಹೊಂದಿದ ಯುರೋಪಿಯನ್ ದೇಶಗಳೊಂದಿಗಿನ ತನ್ನ ಸಂಬಂಧವನ್ನು ಸುಧಾರಿಸಲು ಪ್ರಾರಂಭಿಸಲಾಗಿದೆ ಎಂಬುದು ಅದರ ವಾದವಾಗಿದೆ.

  1. ಈ ವೇದಿಕೆಯು ಚೀನಾದ ಮಹತ್ವಾಕಾಂಕ್ಷೆಯ ಬೆಲ್ಟ್ ಮತ್ತು ರಸ್ತೆ ಉಪಕ್ರಮ (Belt and Road initiative- BRI) ಯೋಜನೆಯ ವಿಸ್ತರಣೆಯಾಗಿ ವ್ಯಾಪಕವಾಗಿ ನೋಡಲಾಗುತ್ತಿದೆ.

 

ಸಂಯೋಜನೆ:

ಈ ಉಪಕ್ರಮವು ಹನ್ನೆರಡು ಐರೋಪ್ಯ ಒಕ್ಕೂಟದ ಸದಸ್ಯ ರಾಷ್ಟ್ರಗಳು ಮತ್ತು ಐದು ಬಾಲ್ಕನ್ ರಾಷ್ಟ್ರಗಳನ್ನು ಒಳಗೊಂಡಿದೆ – ಅಲ್ಬೇನಿಯಾ, ಬೋಸ್ನಿಯಾ ಮತ್ತು ಹರ್ಜೆಗೋವಿನಾ, ಬಲ್ಗೇರಿಯಾ, ಕ್ರೊಯೇಷಿಯಾ, ಜೆಕ್ ರಿಪಬ್ಲಿಕ್, ಎಸ್ಟೋನಿಯಾ, ಗ್ರೀಸ್, ಹಂಗೇರಿ, ಲಾಟ್ವಿಯಾ, ಲಿಥುವೇನಿಯಾ, ಮ್ಯಾಸೆಡೋನಿಯಾ, ಮಾಂಟೆನೆಗ್ರೊ, ಪೋಲೆಂಡ್, ರೊಮೇನಿಯಾ, ಸೆರ್ಬಿಯಾ, ಸ್ಲೋವಾಕಿಯಾ ಮತ್ತು ಸ್ಲೊವೇನಿಯಾ ಗಳನ್ನು ಒಳಗೊಂಡಿದೆ.

 


ಸಾಮಾನ್ಯ ಅಧ್ಯಯನ ಪತ್ರಿಕೆ : 3


 

ವಿಷಯಗಳು: ಭಾರತೀಯ ಆರ್ಥಿಕತೆ ಮತ್ತು ಯೋಜನೆ, ಸಂಪನ್ಮೂಲಗಳ ಕ್ರೋಡೀಕರಣ , ಪ್ರಗತಿ, ಅಭಿವೃದ್ಧಿ ಮತ್ತು ಉದ್ಯೋಗಕ್ಕೆ ಸಂಬಂಧಿಸಿದ ಸಮಸ್ಯೆಗಳು.

ಐಪಿಒ ಗ್ರೇ ಮಾರುಕಟ್ಟೆ ಎಂದರೇನು?


(IPO Grey Market)

ಸಂದರ್ಭ:

ಇತ್ತೀಚಿನ ನಾಲ್ಕು ದಿನಗಳಲ್ಲಿ, ಬೂದು (grey market) ಮಾರುಕಟ್ಟೆಯಲ್ಲಿ Paytm ನ ಸ್ಟಾಕ್ ,₹ 11,500 ರಿಂದ, ₹ 21,000 ಕ್ಕೆ ಏರಿಕೆ ಕಂಡಿದೆ.

ಕೆಲವು ದಿನಗಳ ಹಿಂದೆ Paytm ಈ ವರ್ಷದ ಅಂತ್ಯದ ವೇಳೆಗೆ US $ 3 ಬಿಲಿಯನ್  ‘ಆರಂಭಿಕ ಸಾರ್ವಜನಿಕ ಕೊಡುಗೆ’ (Initial Public Offer- IPO) ನೀಡುವುದಾಗಿ ಘೋಷಿಸಿತ್ತು, ಇದಕ್ಕೆ ಪ್ರತಿಕ್ರಿಯೆಯಾಗಿ ಪೇಟಿಎಂ ನ ಸ್ಟಾಕ್ ಬಲವಾಗಿ ಹೆಚ್ಚಾಗಿದೆ.

 

‘IPO ಗ್ರೇ ಮಾರುಕಟ್ಟೆ’ ಎಂದರೇನು?

ಸಾಮಾನ್ಯವಾಗಿ, ಕಂಪನಿಗಳು ತಮ್ಮ ಬೆಳವಣಿಗೆಯನ್ನು ವೇಗಗೊಳಿಸಲು ಹಣವನ್ನು ಸಂಗ್ರಹಿಸಲು ಬಯಸಿದಾಗ, ಅವರು ತಮ್ಮ ಷೇರುಗಳ ಒಂದು ಭಾಗವನ್ನು ಷೇರು ಮಾರುಕಟ್ಟೆಯಲ್ಲಿ ಮಾರಾಟ ಮಾಡುತ್ತಾರೆ. ಈ ಪ್ರಕ್ರಿಯೆಯನ್ನು ಆರಂಭಿಕ ಸಾರ್ವಜನಿಕ ಕೊಡುಗೆ’ ಅಥವಾ ‘ಐಪಿಒ’ ಎಂದು ಕರೆಯಲಾಗುತ್ತದೆ.

  1. ಆದರೆ, ‘ಐಪಿಒ ಬೂದು ಮಾರುಕಟ್ಟೆ’ (IPO grey market) ಅನೌಪಚಾರಿಕ ಅಥವಾ ಅನಧಿಕೃತ ಮಾರುಕಟ್ಟೆಯಾಗಿದ್ದು, ಇದರಲ್ಲಿ ‘ಐಪಿಒ ಷೇರುಗಳು ಅಥವಾ ಅಪ್ಲಿಕೇಶನ್‌ಗಳು ಷೇರು ಮಾರುಕಟ್ಟೆಯಲ್ಲಿ ವ್ಯಾಪಾರಕ್ಕೆ ಲಭ್ಯವಾಗುವ ಮೊದಲು ಅವುಗಳನ್ನು ಖರೀದಿಸಿ ಮಾರಾಟ ಮಾಡಲಾಗುತ್ತದೆ.
  2. ಇದನ್ನು ಸಮಾನಾಂತರ ಮಾರುಕಟ್ಟೆ’(Parallel Market) ಅಥವಾ ‘ಓವರ್-ದಿ-ಕೌಂಟರ್ ಮಾರುಕಟ್ಟೆ’ (Over-the-Counter Market) ಎಂದೂ ಕರೆಯಲಾಗುತ್ತದೆ.

 

ಇದು ಕಾನೂನುಬದ್ಧವೇ? ಇದನ್ನು ನಿಯಂತ್ರಿಸುವ ಬಗೆ ಯಾವುದು?

  1. ‘ಐಪಿಒ ಬೂದು ಮಾರುಕಟ್ಟೆ’ಅನೌಪಚಾರಿಕ ಮಾರುಕಟ್ಟೆಯಾಗಿರುವುದರಿಂದ, ಅದನ್ನು ನಿಯಂತ್ರಿಸಲು ಯಾವುದೇ ನಿಯಮಗಳಿಲ್ಲ ಎಂಬುದು ಸಹಜ. ಭಾರತೀಯ ಷೇರುಪೇಟೆ ನಿಯಂತ್ರಣ ಮಂಡಳಿ (SEBI), ಷೇರು ವಿನಿಮಯ ಕೇಂದ್ರಗಳು ಮತ್ತು ದಲ್ಲಾಳಿಗಳಿಗೆ ಇದರಲ್ಲಿ ಯಾವುದೇ ಪಾತ್ರವಿಲ್ಲ.
  2. ಅವುಗಳನ್ನು ನಗದು ರೂಪದಲ್ಲಿ ಖಾಸಗಿಯಾಗಿ ಖರೀದಿಸಿ ಮಾರಾಟ ಮಾಡಲಾಗುತ್ತದೆ.

 

ಕೋಸ್ಟಾಕ್ ದರ’ ಎಂದರೇನು?

‘ವೆಚ್ಚದ ದರ’ ಐಪಿಒ ಅಪ್ಲಿಕೇಶನ್‌ (IPO application)ಗೆ ಸಂಬಂಧಿಸಿದೆ. ಆದ್ದರಿಂದ, ಹೂಡಿಕೆ ಮಾಡುವವರು ಪಟ್ಟಿ ಮಾಡುವ ಮೊದಲು ‘ಐಪಿಒ ಅಪ್ಲಿಕೇಶನ್‌ಗಳನ್ನು’ ಖರೀದಿಸುವ ದರವನ್ನು ‘ಕೋಸ್ಟಾಕ್ ದರ’(Kostal rate) ಅಥವಾ ‘ಕೋಸ್ಟಾಕ್ ರೇಟ್’ ಎಂದು ಕರೆಯಲಾಗುತ್ತದೆ.

 

ಹೂಡಿಕೆದಾರರು ‘ಗ್ರೇ ಮಾರುಕಟ್ಟೆಯಲ್ಲಿ’ ಏಕೆ ವ್ಯಾಪಾರ ಮಾಡುತ್ತಾರೆ? 

  1. ಕಂಪನಿಯ ಷೇರುಗಳ ಬೆಲೆ ಏರಿಕೆಯಾಗಲಿದೆ ಎಂದು ಹೂಡಿಕೆದಾರರು ಭಾವಿಸಿದಾಗ, ಕಂಪನಿಯ ಷೇರುಗಳನ್ನು ಪಟ್ಟಿ ಮಾಡುವ ಮೊದಲೇ ಅದನ್ನು ಖರೀದಿಸಲು ಇದು ಅತ್ಯುತ್ತಮ ಅವಕಾಶವಾಗಿದೆ.
  2. ಹೂಡಿಕೆದಾರರು ಐಪಿಒ ಅರ್ಜಿಯ ಗಡುವನ್ನು ತಪ್ಪಿಸಿಕೊಂಡರೆ ಅಥವಾ ಹೆಚ್ಚಿನ ಷೇರುಗಳನ್ನು ಖರೀದಿಸಲು ಬಯಸಿದರೆ, ಆಗ ಅವರು IPO ಗ್ರೇ (ಬೂದು) ಮಾರುಕಟ್ಟೆಯನ್ನು ಸಂಪರ್ಕಿಸಬಹುದು.

 

ಇದರಲ್ಲಿ ಕಂಪನಿಗಳಿಗೆ ಏನು ಲಾಭ?

  1. ಕಂಪನಿಗಳಿಗೆ, ಬೂದು ಮಾರುಕಟ್ಟೆಯು ಅವರ ಷೇರುಗಳು ಹೇಗೆ ಬೇಡಿಕೆಯಲ್ಲಿವೆ ಮತ್ತು ಕಂಪನಿಯ ಷೇರುಗಳನ್ನು ಪಟ್ಟಿ ಮಾಡಿದ ನಂತರ ಹೇಗೆ ಕಾರ್ಯನಿರ್ವಹಿಸುತ್ತವೆ ಎಂಬುದನ್ನು ಅರಿತುಕೊಳ್ಳಲು ಉತ್ತಮ ಮಾರ್ಗವಾಗಿದೆ.
  2. ಇದಲ್ಲದೆ, ಕಂಪನಿಯ ಷೇರುಗಳನ್ನು ಪಟ್ಟಿ ಮಾಡಿದ ನಂತರ ಅದರ ಕಾರ್ಯಕ್ಷಮತೆಯ ಬಗ್ಗೆ ತಿಳಿಯಲು ‘ಐಪಿಒ ಬೂದು ಮಾರುಕಟ್ಟೆ’ ಯನ್ನು ಬಳಸಬಹುದು.

 

ಕಳವಳಗಳು:

  1. ಅನಧೀಕೃತ ಮಾರುಕಟ್ಟೆಯಾದ ಐಪಿಒ ಬೂದು ಮಾರುಕಟ್ಟೆಯು, ಸೆಬಿಯ ವ್ಯಾಪ್ತಿಗೆ ಹೊರತಾಗಿ ಕಾರ್ಯನಿರ್ವಹಿಸುತ್ತದೆ. ಆದ್ದರಿಂದ ಇದರಲ್ಲಿ ಯಾವುದೇ ಗ್ಯಾರಂಟಿ ನೀಡಲಾಗುವುದಿಲ್ಲ.

ಎಲ್ಲಾ ವಹಿವಾಟುಗಳನ್ನು ನಂಬಿಕೆ ಮತ್ತು ಪ್ರತಿಪಕ್ಷದ ಅಪಾಯದ ಆಧಾರದ ಮೇಲೆ ನಿರ್ವಹಿಸಲಾಗುತ್ತದೆ.

  1. ಆದ್ದರಿಂದ, ಸ್ಟಾಕ್ ಟ್ಯಾಂಕ್ ಆದರೆ, ಅಂದರೆ ಸ್ಟಾಕ್ ಕಾರ್ಯನಿರ್ವಹಿಸದಿದ್ದಲ್ಲಿ ಪಕ್ಷಗಳಿಗೆ ಕೆಲವೇ ಕೆಲವು ಕಾನೂನು ರಕ್ಷಣೆಗಳು ಲಭ್ಯವಿವೆ.

 

ವಿಷಯಗಳು: ಸಂವಹನ ಜಾಲಗಳ ಮೂಲಕ ಆಂತರಿಕ ಭದ್ರತೆಗೆ ಸವಾಲು ಹಾಕುವುದು, ಆಂತರಿಕ ಭದ್ರತಾ ಸವಾಲುಗಳಲ್ಲಿ ಮಾಧ್ಯಮ ಮತ್ತು ಸಾಮಾಜಿಕ ಜಾಲತಾಣಗಳ ಪಾತ್ರ, ಸೈಬರ್ ಭದ್ರತೆಯ ಮೂಲಭೂತ ಅಂಶಗಳು, ಅಕ್ರಮ ಹಣ ವರ್ಗಾವಣೆ ಮತ್ತು ಅದನ್ನು ತಡೆಯುವುದು.

ರಾಷ್ಟ್ರೀಯ ಭದ್ರತಾ ಕಾಯ್ದೆ (NSA), 1980:


(National Security Act (NSA), 1980)

 ಸಂದರ್ಭ:

ಔಷಧಿಗಳು ಮತ್ತು ವೈದ್ಯಕೀಯ ಸಲಕರಣೆಗಳು ಸೇರಿದಂತೆ COVID-19 ಚಿಕಿತ್ಸೆಗಾಗಿ ಅಗತ್ಯ ವಸ್ತುಗಳ ಸಂಗ್ರಹಣೆ, ಲಾಭೋದ್ದೇಶದಿಂದ ಕಲಬೆರಕೆ ಮತ್ತು ಕಾಳಸಂತೆಯಲ್ಲಿ ಮಾರುವವರ ವಿರುದ್ಧ  ‘ರಾಷ್ಟ್ರೀಯ ಭದ್ರತಾ ಕಾಯ್ದೆ’ (National Security Act-NSA) ಯಡಿ  ಕ್ರಮ ಜರುಗಿಸುವಂತೆ ಸುಪ್ರೀಂ ಕೋರ್ಟ್‌ನಲ್ಲಿ ಅರ್ಜಿ ಸಲ್ಲಿಸಲಾಗಿದೆ.

 

ಹಿನ್ನೆಲೆ:

ಆರ್ಥಿಕವಾಗಿ ದುರ್ಬಲ ವರ್ಗದವರು (EWS) ಮತ್ತು ‘ಬಡತನದ ರೇಖೆಗಿಂತ ಕೆಳಗೆ ಇರುವ’ (BPL) ಸಾವಿರಾರು ನಾಗರಿಕರು, ಆಸ್ಪತ್ರೆಯ ಹಾಸಿಗೆಗಳನ್ನು ಕಾಯ್ದಿರಿಸುವಿಕೆಯಂತಹ ಬೆಡ್ ಬ್ಲಾಕಿಂಗ್ ದಂದೆಯಿಂದಾಗಿ, ಕಲಬೆರಕೆ ಮಾಡಿದ ಕೋವಿಡ್  ಔಷಧಗಳ ನೀಡುವಿಕೆ ಯಿಂದಾಗಿ, ಆಮ್ಲಜನಕ ಸಿಲಿಂಡರ್‌ಗಳು ಮತ್ತು ಜೀವ ಉಳಿಸುವ ಚುಚ್ಚುಮದ್ದುಗಳಾದ ರೆಮ್‌ಡೆಸಿವಿರ್, ತೋಸಿಲಿಜುಮಬ್ ಮುಂತಾದ ವೈದ್ಯಕೀಯ ಸಲಕರಣೆಗಳನ್ನು ಕಾಳಸಂತೆಯಲ್ಲಿ ಭಾರಿ ಲಾಭದ ಉದ್ದೇಶದಿಂದ ಮಾರತ್ತಿರುವುದರಿಂದಾಗಿ  ಬೀದಿಗಳಲ್ಲಿ, ವಾಹನಗಳಲ್ಲಿ, ಆಸ್ಪತ್ರೆ ಆವರಣದಲ್ಲಿ ಮತ್ತು ಅವರ ಮನೆಗಳಲ್ಲಿ ಸಾಯುತ್ತಿದ್ದಾರೆ.

ಆದ್ದರಿಂದ ಈ ಕೃತ್ಯಗಳನ್ನು ಗಂಭೀರವಾಗಿ ಪರಿಗಣಿಸಬೇಕು ಮತ್ತು ತಪ್ಪಿತಸ್ಥರಿಗೆ ಶಿಕ್ಷೆಯಾಗಬೇಕು ಎಂದು ಅರ್ಜಿಯಲ್ಲಿ ಕೋರಲಾಗಿದೆ.

 

ರಾಷ್ಟ್ರೀಯ ಭದ್ರತಾ ಕಾಯ್ದೆ (NSA) ಕುರಿತು:

ರಾಷ್ಟ್ರೀಯ ಭದ್ರತಾ ಕಾಯ್ದೆ’ NSA ಒಂದು ತಡೆಗಟ್ಟುವ ಬಂಧನ ಕಾನೂನು ಆಗಿದೆ.

  1. ತಡೆಗಟ್ಟುವ ಬಂಧನವು (Preventive Detention) ವ್ಯಕ್ತಿಯನ್ನು ಭವಿಷ್ಯದಲ್ಲಿ ಅಪರಾಧ ಮಾಡುವುದನ್ನು ತಡೆಯಲು ಮತ್ತು / ಅಥವಾ ಭವಿಷ್ಯದಲ್ಲಿ ಕಾನೂನು ಕ್ರಮದಿಂದ ತಪ್ಪಿಸಿಕೊಳ್ಳದಂತೆ ತಡೆಯಲು ಬಂಧನ (ಜೈಲುವಾಸ) ವನ್ನು ಒಳಗೊಂಡಿರುತ್ತದೆ.

ಸಂವಿಧಾನದ 22 (3) (ಬಿ) ವಿಧಿಯು, ರಾಜ್ಯದ ಭದ್ರತೆ ಮತ್ತು ಸಾರ್ವಜನಿಕ ಸುವ್ಯವಸ್ಥೆಗೆ ಸಂಬಂಧಿಸಿದ ಕಾರಣಗಳಿಗಾಗಿ ತಡೆಗಟ್ಟುವ ಬಂಧನ ಮತ್ತು ವೈಯಕ್ತಿಕ ಸ್ವಾತಂತ್ರ್ಯದ ಮೇಲೆ ನಿರ್ಬಂಧಗಳನ್ನು ವಿಧಿಸಲು ಅನುಮತಿಸುತ್ತದೆ.

 

ಸಂವಿಧಾನದ ವಿಧಿ 22 (4) ಪ್ರಕಾರ:

ತಡೆಗಟ್ಟುವ ಬಂಧನಕ್ಕೆ ಯಾವುದೇ ಕಾನೂನು ಆಧಾರ ಒದಗಿಸದ ಹೊರತು ಯಾವುದೇ ವ್ಯಕ್ತಿಯನ್ನು ಮೂರು ತಿಂಗಳು ಮೀರಿದ ಅವಧಿಗೆ ಬಂಧಿಸಲು ಅಧಿಕಾರ ನೀಡುವುದಿಲ್ಲ. ಹೊರತು

ಮೂರು ತಿಂಗಳ ಅವಧಿಯನ್ನು ಮೀರಿ ಬಂಧನವನ್ನು ವಿಸ್ತರಿಸಲು ಸಲಹಾ ಮಂಡಳಿಯು ಸಾಕಷ್ಟು ಕಾರಣಗಳನ್ನು ವರದಿ ಮಾಡಬೇಕಾಗುತ್ತದೆ.

 

1978 ರ 44 ನೇ ತಿದ್ದುಪಡಿ ಕಾಯ್ದೆಯ ಪ್ರಕಾರ, ‘ಸಲಹಾ ಮಂಡಳಿಯ’ ಅಭಿಪ್ರಾಯವನ್ನು ಪಡೆಯದೆ ಬಂಧನದ ಅವಧಿಯನ್ನು ಮೂರು ತಿಂಗಳಿಂದ ಎರಡು ತಿಂಗಳಿಗೆ ಇಳಿಸಲಾಗಿದೆ. ಆದಾಗ್ಯೂ, ಈ ನಿಬಂಧನೆಯನ್ನು ಇನ್ನೂ ಜಾರಿಗೆ ತರಲಾಗಿಲ್ಲ, ಆದ್ದರಿಂದ, ಮೂರು ತಿಂಗಳ ಮೂಲ ಅವಧಿಯ ಅವಕಾಶ ಇನ್ನೂ ಜಾರಿಯಲ್ಲಿದೆ.

 

ಬಂಧನದ ಅವಧಿ:

  1.  ರಾಷ್ಟ್ರೀಯ ಭದ್ರತಾ ಕಾಯ್ದೆಯಡಿ ವ್ಯಕ್ತಿಯನ್ನು 12 ತಿಂಗಳವರೆಗೆ ಯಾವುದೇ ಆಧಾರವಿಲ್ಲದೆ ಬಂಧಿಸಬಹುದು. ಆದರೆ ಸರ್ಕಾರವು ಕೆಲವು ಹೊಸ ಪುರಾವೆಗಳನ್ನು ಪಡೆದುಕೊಂಡರೆ, ಈ ಅವಧಿಯನ್ನು ಮತ್ತಷ್ಟು ವಿಸ್ತರಿಸಬಹುದು.
  2. ರಾಷ್ಟ್ರೀಯ ಭದ್ರತಾ ಕಾಯ್ದೆಯಡಿ, ಬಂಧನಕ್ಕೊಳಗಾದ ವ್ಯಕ್ತಿಯನ್ನು ತನ್ನ ವಿರುದ್ಧದ ಆರೋಪಗಳನ್ನು ಹೇಳದೆ 10 ದಿನಗಳ ಕಾಲ ಬಂಧಿಸಬಹುದು. ಬಂಧಿತ ವ್ಯಕ್ತಿಯು ಹೈಕೋರ್ಟ್‌ನ ಸಲಹಾ ಮಂಡಳಿಯ ಮುಂದೆ ಮೇಲ್ಮನವಿ ಸಲ್ಲಿಸಬಹುದು ಆದರೆ ವಿಚಾರಣೆಯ ಸಮಯದಲ್ಲಿ ಅವನಿಗೆ ವಕೀಲರ ಸಹಾಯವನ್ನು ಪಡೆಯಲು ಅನುಮತಿ ಇಲ್ಲ.

 

ಈ ಕಾನೂನಿನ ದುರುಪಯೋಗದ ಬಗ್ಗೆ ಕಳವಳಗಳು:

  1. ಭಾರತೀಯ ಸಂವಿಧಾನದ 22 (1) ನೇ ವಿಧಿಯ ಪ್ರಕಾರ, ಬಂಧಿಸಲ್ಪಟ್ಟ ಯಾವುದೇ ವ್ಯಕ್ತಿಯು ಸಮಾಲೋಚಿಸುವ ಹಕ್ಕನ್ನು ಕಳೆದುಕೊಳ್ಳುವುದಿಲ್ಲ ಅಥವಾ ಆತನ ಸಮಾಲೋಚಿಸುವ ಹಕ್ಕನ್ನು ನಿರಾಕರಿಸುವಂತಿಲ್ಲ ಮತ್ತು ಅವನ ಆಸಕ್ತಿಯ ವಕೀಲರಿಂದ ರಕ್ಷಿಸಲ್ಪಡುತ್ತಾನೆ.
  2. ಅಪರಾಧ ದಂಡ ಪ್ರಕ್ರಿಯೆ ಸಂಹಿತೆ (CRPC) ಯ ಸೆಕ್ಷನ್ 50 ರ ಪ್ರಕಾರ, ಬಂಧನಕ್ಕೊಳಗಾದ ಯಾವುದೇ ವ್ಯಕ್ತಿಗೆ ಆತನನ್ನು ಯಾವ ಆಧಾರದ ಮೇಲೆ ಬಂಧಿಸಲಾಗಿದೆ ಎಂದು ತಿಳಿಸಬೇಕು ಮತ್ತು ಆತನಿಗೆ ಜಾಮೀನು ಪಡೆಯುವ ಹಕ್ಕಿದೆ.

ಆದಾಗ್ಯೂ, ರಾಷ್ಟ್ರೀಯ ಭದ್ರತಾ ಕಾಯ್ದೆಯಡಿ, ಬಂಧನಕ್ಕೊಳಗಾದ ವ್ಯಕ್ತಿಗೆ ಈ ಯಾವುದೇ ಹಕ್ಕುಗಳು  ಲಭ್ಯವಿಲ್ಲ. ಈ ಕಾನೂನಿನಡಿಯಲ್ಲಿ, ಸರ್ಕಾರವು ಮಾಹಿತಿಯನ್ನು ಬಹಿರಂಗಪಡಿಸುವುದು ಸಾರ್ವಜನಿಕ ಹಿತಾಸಕ್ತಿಗೆ ವಿರುದ್ಧವೆಂದು ಪರಿಗಣಿಸಿದರೆ ಮಾಹಿತಿಯನ್ನು ತಡೆಹಿಡಿಯುವ ಅಥವಾ ಮರೆಮಾಚುವ ಹಕ್ಕನ್ನು ಸರ್ಕಾರ ಹೊಂದಿದೆ.  

 


ಪೂರ್ವಭಾವಿ ಪರೀಕ್ಷೆಗೆ ಸಂಬಂಧಿಸಿದ ವಿದ್ಯಮಾನಗಳು:


ಸಿನೋವಾಕ್ COVID-19 ಲಸಿಕೆ:

(Sinovac COVID-19 vaccine)

  1. ತುರ್ತು ಬಳಕೆಗಾಗಿ ಸಿನೋವಾಕ್ COVID -19 ಲಸಿಕೆಯನ್ನು ವಿಶ್ವ ಆರೋಗ್ಯ ಸಂಸ್ಥೆ ಅನುಮೋದಿಸಿದೆ. ಇದು, ವಿಶ್ವ ಆರೋಗ್ಯ ಸಂಸ್ಥೆಯಿಂದ ಹಸಿರು ನಿಶಾನೆ ಪಡೆದ ಚೀನಾ ತಯಾರಿಸಿದ ಎರಡನೇ ಲಸಿಕೆ ಯಾಗಿದೆ.
  2. ಕಳೆದ ತಿಂಗಳು, ಸಿನೊಫಾರ್ಮ್(Sinopharm) WHO ಅನುಮೋದಿಸಿದ ಚೀನೀ ನಿರ್ಮಿತ ಮೊದಲ ಲಸಿಕೆಯಾಗಿದೆ.
  3. ವಿವಿಧ ದೇಶಗಳಿಗೆ, ವಿಶೇಷವಾಗಿ ತಮ್ಮದೇ ಆದ ಅಂತರರಾಷ್ಟ್ರೀಯ ಗುಣಮಟ್ಟದ ನಿಯಂತ್ರಕವನ್ನು ಹೊಂದಿರದ ದೇಶಗಳಿಗೆ, ತುರ್ತು ಬಳಕೆಯ ಪಟ್ಟಿಯಲ್ಲಿ ಸೇರ್ಪಡೆ ಮಾಡುವುದು ಲಸಿಕೆಯನ್ನು ತ್ವರಿತವಾಗಿ ಆಮದು ಮಾಡಿಕೊಳ್ಳಲು ಮತ್ತು ವಿತರಿಸಲು ದಾರಿ ಮಾಡಿಕೊಡುತ್ತದೆ.

 

ವಿಶ್ವಸಂಸ್ಥೆಯ ವಿಶೇಷ ವರದಿಗಾರರು ಯಾರು?

(UN Special Rapporteurs)

ಇವರು ವಿಶ್ವಸಂಸ್ಥೆಯ ಪರವಾಗಿ ಕೆಲಸ ಮಾಡುವ ಸ್ವತಂತ್ರ ತಜ್ಞರು. ಅವರು ವಿಶ್ವಸಂಸ್ಥೆಯ ಮಾನವ ಹಕ್ಕುಗಳ ಮಂಡಳಿಯು ನಿರ್ದಿಷ್ಟಪಡಿಸಿದ ದೇಶ ಅಥವಾ ವಿಷಯಾಧಾರಿತ ಆದೇಶದ ಮೇಲೆ ಕಾರ್ಯನಿರ್ವಹಿಸುತ್ತಾರೆ.

  1. ವಿಷಯಾಧಾರಿತ ಅಥವಾ ದೇಶ-ನಿರ್ದಿಷ್ಟ ದೃಷ್ಟಿಕೋನದಿಂದ ಮಾನವ ಹಕ್ಕುಗಳ ಬಗ್ಗೆ (ನಾಗರಿಕ, ಸಾಂಸ್ಕೃತಿಕ, ಆರ್ಥಿಕ, ರಾಜಕೀಯ ಮತ್ತು ಸಾಮಾಜಿಕ) ವರದಿ ಮಾಡಲು ಮತ್ತು ಸಲಹೆ ನೀಡಲು ಅವರಿಗೆ ಆದೇಶವಿದೆ.
  2. ಈ ವರದಿಗಾರರು ವಿಶ್ವಸಂಸ್ಥೆಯಿಂದ ತಮ್ಮ ಕಾರ್ಯಗಳಿಗಾಗಿ ಯಾವುದೇ ಹಣಕಾಸಿನ ಪರಿಹಾರವನ್ನು ಪಡೆಯುವುದಿಲ್ಲ.

 

NHRC ಮುಖ್ಯಸ್ಥರಾಗಿ ಆಯ್ಕೆಯಾದ,ನ್ಯಾಯಮೂರ್ತಿ ಎ.ಕೆ. ಮಿಶ್ರಾ:


ಸುಪ್ರೀಂ ಕೋರ್ಟ್‌ನ ಮಾಜಿ ನ್ಯಾಯಾಧೀಶ ಅರುಣ್ ಕುಮಾರ್ ಮಿಶ್ರಾ ಅವರು ರಾಷ್ಟ್ರೀಯ ಮಾನವ ಹಕ್ಕುಗಳ ಆಯೋಗದ (NHRC) ಹೊಸ ಅಧ್ಯಕ್ಷರಾಗಲಿದ್ದಾರೆ.

  1. ಪ್ರಧಾನಿ, ಗೃಹ ಸಚಿವರು, ರಾಜ್ಯಸಭೆಯ ಉಪಸಭಾಪತಿ, ಲೋಕಸಭಾ ಸ್ಪೀಕರ್ ಮತ್ತು ಪ್ರತಿಪಕ್ಷದ ನಾಯಕರನ್ನು ಒಳಗೊಂಡ ಆಯ್ಕೆ ಸಮಿತಿಯು ಅವರನ್ನು ನೇಮಕ ಮಾಡಿದೆ.
  2.  1993 ರಲ್ಲಿ ಸ್ಥಾಪನೆಯಾದ ರಾಷ್ಟ್ರೀಯ ಮಾನವ ಹಕ್ಕುಗಳ ಆಯೋಗ (NHRC), ಮಾನವ ಹಕ್ಕುಗಳ ಸಂರಕ್ಷಣಾ ಕಾಯ್ದೆ, 1993 ನಿಬಂಧನೆಗಳಿಗೆ ಅನುಗುಣವಾಗಿ ಒಂದು ಸ್ವತಂತ್ರ ಶಾಸನಬದ್ಧ ಸಂಸ್ಥೆಯಾಗಿದೆ.

NHRC ಕುರಿತು ಹೆಚ್ಚಿನ ಮಾಹಿತಿಗಾಗಿ:ಇಲ್ಲಿ ನೋಡಿ,

https://www.insightsonindia.com/2020/09/18/national-human-rights-commission-nhrc/

 

ಅಂಬಿ ಟ್ಯಾಗ್ (AmbiTAG):

  1. AmbiTAG, ಕೋಲ್ಡ್ ಚೈನ್ ನಿರ್ವಹಣೆಗೆ ತಾಪಮಾನವನ್ನು ದಾಖಲಿಸಿದ ಭಾರತದ ಮೊದಲ ಸ್ಥಳೀಯ ಸಾಧನವಾಗಿದೆ.
  2. ಅದು ಹಾಳಾಗುವ ಉತ್ಪನ್ನಗಳು, ಲಸಿಕೆಗಳು ಮತ್ತು ದೇಹದ ಅಂಗಗಳು ಮತ್ತು ರಕ್ತ ಸಾಗಣೆಯ ಸಮಯದಲ್ಲಿ  ಅವುಗಳ ಸುತ್ತಮುತ್ತಲಿನ ನೈಜ-ಸಮಯದ ತಾಪಮಾನವನ್ನು ದಾಖಲಿಸುವ ಮೊದಲ ಅತ್ಯಾಧುನಿಕ ಇಂಟರ್ನೆಟ್ ಆಫ್ ಥಿಂಗ್ಸ್ (IOT) ಸಾಧನವಾಗಿದೆ.
  3. ಇದನ್ನು IIT ರೋಪರ್ ಅಭಿವೃದ್ಧಿಪಡಿಸಿದೆ.

  • Join our Official Telegram Channel HERE for Motivation and Fast Updates
  • Subscribe to our YouTube Channel HERE to watch Motivational and New analysis videos