Print Friendly, PDF & Email

[ ದೈನಂದಿನ ಪ್ರಚಲಿತ ಘಟನೆಗಳು ] ದಿನಾಂಕ – 7ನೇ ಮೇ 2021

 

ಪರಿವಿಡಿ:

 ಸಾಮಾನ್ಯ ಅಧ್ಯಯನ ಪತ್ರಿಕೆ 1:

1. ಶುಕ್ರ ಗ್ರಹದ ಕುರಿತು ಇತ್ತೀಚಿನ ಸಂಶೋಧನೆಗಳು.

 

ಸಾಮಾನ್ಯ ಅಧ್ಯಯನ ಪತ್ರಿಕೆ 2:

1. ಮಾಧ್ಯಮ ವರದಿಗಳನ್ನು ತಡೆಯುವಂತೆ ಚುನಾವಣಾ ಆಯೋಗ ಮಾಡಿದ ಮನವಿಯನ್ನು ಸುಪ್ರೀಂ ಕೋರ್ಟ್ ನಿರಾಕರಿಸಿದೆ.

 

ಸಾಮಾನ್ಯ ಅಧ್ಯಯನ ಪತ್ರಿಕೆ 3:

1. ಭಾರತದಲ್ಲಿ ಕ್ರಿಪ್ಟೋಕರೆನ್ಸಿ ವಹಿವಾಟನ್ನು ನಿಷೇಧಿಸಲು ನಿರಾಕರಿಸಿದ

2. ಕೋವಿಡ್ -19 ಲಸಿಕೆ ಗಳಿಗಾಗಿ ಬೌದ್ಧಿಕ ಆಸ್ತಿ ಹಕ್ಕು ವಿನಾಯಿತಿ.

 

ಪೂರ್ವಭಾವಿ ಪರೀಕ್ಷೆಗೆ ಸಂಬಂಧಿಸಿದ ವಿದ್ಯಮಾನಗಳು:

1. ಫೇಸ್‌ಬುಕ್‌ನ ಮೇಲ್ವಿಚಾರಣಾ ಮಂಡಳಿ.

2. ದಹ್ಲಾ ಅಣೆಕಟ್ಟು (Dahla Dam).

 


ಸಾಮಾನ್ಯ ಅಧ್ಯಯನ ಪತ್ರಿಕೆ : 1


 

ವಿಷಯಗಳು: ಭೂಕಂಪಗಳು, ಸುನಾಮಿ, ಜ್ವಾಲಾಮುಖಿ ಚಟುವಟಿಕೆಗಳು ಚಂಡಮಾರುತ ಮುಂತಾದ ಪ್ರಮುಖ ಭೌಗೋಳಿಕ ವಿದ್ಯಮಾನಗಳು, ಸೌರಮಂಡಲ, ಭೌಗೋಳಿಕ ಲಕ್ಷಣಗಳು ಮತ್ತು ಅವುಗಳ ಸ್ಥಳ- ನಿರ್ಣಾಯಕ ಭೌಗೋಳಿಕ ವೈಶಿಷ್ಟ್ಯಗಳಲ್ಲಿನ ಬದಲಾವಣೆಗಳು (ಸಾಗರಗಳು ಮತ್ತು ಐಸ್-ಕ್ಯಾಪ್ಗಳು ಸೇರಿದಂತೆ) ಮತ್ತು ಸಸ್ಯ ಮತ್ತು ಪ್ರಾಣಿ ಮತ್ತು ಅಂತಹ ಬದಲಾವಣೆಗಳ ಪರಿಣಾಮಗಳು.

ಶುಕ್ರ ಗ್ರಹದ ಕುರಿತು ಇತ್ತೀಚಿನ ಸಂಶೋಧನೆಗಳು:


(Latest findings about Venus)

ಸಂದರ್ಭ:

ಇತ್ತೀಚೆಗೆ, ವಿಜ್ಞಾನಿಗಳು ಶುಕ್ರ ಗ್ರಹದ ಬಗ್ಗೆ ಹೊಸ ದತ್ತಾಂಶವನ್ನು ಶುಕ್ರ (Venus) ಗ್ರಹದಿಂದ ಪ್ರತಿಫಲಿತ ಗೊಂಡ ರೇಡಿಯೊ ತರಂಗಗಳ ಮೂಲಕ ಪಡೆದುಕೊಂಡಿದ್ದಾರೆ.

 

ಕ್ಯಾಲಿಫೋರ್ನಿಯಾದ ಮೊಜಾವೆ ಮರುಭೂಮಿ (Mojave Desert) ಯಲ್ಲಿರುವ ನಾಸಾದ ಗೋಲ್ಡ್ ಸ್ಟೋನ್ ಆಂಟೆನಾ (Goldstone Antenna) ದಿಂದ 2006 ಮತ್ತು 2020 ರ ನಡುವೆ ಸಂಶೋಧಕರು 21 ಬಾರಿ ರೇಡಿಯೋ ತರಂಗಗಳನ್ನು ಶುಕ್ರ ಗ್ರಹಕ್ಕೆ ರವಾನಿಸಿದ್ದಾರೆ ಮತ್ತು ಅಲ್ಲಿಂದ ಪ್ರತಿಫಲನಗೊಂಡ ರೇಡಿಯೊ ಅಲೆಗಳನ್ನು (radio echo) ಅಧ್ಯಯನ ಮಾಡಿದ್ದಾರೆ, ಇದರಿಂದಾಗಿ ಆ ಗ್ರಹದ ಕೆಲವು ಗುಣಲಕ್ಷಣಗಳ ಬಗ್ಗೆ ಮಾಹಿತಿಯನ್ನು ಸ್ವೀಕರಿಸಿದ್ದಾರೆ.

ಇತ್ತೀಚಿನ ಸಂಶೋಧನೆಗಳು:

  1. ಅಧ್ಯಯನದ ಸಮಯದಲ್ಲಿ, ಶುಕ್ರ ಗ್ರಹದ ಅಕ್ಷೀಯ ಓರೆ ಮತ್ತು ಗ್ರಹದ ಕೋರ್ ನ (core) ಗಾತ್ರವನ್ನು ಅಳೆಯಲಾಯಿತು.
  2. ಶುಕ್ರ ಗ್ರಹದ ತನ್ನ ಸುತ್ತ ತಿರುಗುವಿಕೆಯು (ಅಕ್ಷಭ್ರಮಣ) ಭೂಮಿಯ 243.0226 ದಿನಗಳಲ್ಲಿ ಪೂರ್ಣಗೊಳ್ಳುತ್ತದೆ. ಇದರರ್ಥ ಶುಕ್ರ ಗ್ರಹದಲ್ಲಿ ಒಂದು ದಿನ ಗ್ರಹದ ಒಂದು ವರ್ಷಕ್ಕಿಂತ ಅಧಿಕವಾಗಿರುತ್ತದೆ. ಶುಕ್ರ ಗ್ರಹವು ಭೂಮಿಯ 225 ದಿನಗಳಲ್ಲಿ ಸೂರ್ಯನ ಸುತ್ತ ಸಂಪೂರ್ಣ ಪ್ರದಕ್ಷಿಣೆಯನ್ನು(ಪರಿಭ್ರಮಣ) ಪೂರ್ಣಗೊಳಿಸುತ್ತದೆ.
  3. ಶುಕ್ರ ಗ್ರಹದ ಕೋರ್ ನ ವ್ಯಾಸವು 4,360 ಮೈಲಿ (7,000 ಕಿಮೀ) ಆಗಿದೆ ಇದನ್ನು ಭೂಮಿಯ ಕೋರ್ ಗೆ ಹೋಲಿಸಬಹುದಾಗಿದೆ.
  4. ಅಧ್ಯಯನದಲ್ಲಿ ಮಾಡಿದ ಲೆಕ್ಕಾಚಾರಗಳ ಪ್ರಕಾರ, ಶುಕ್ರ ಗ್ರಹದ ಅಕ್ಷೀಯ ಇಳಿಜಾರು ಅಥವಾ ಓರೆಯಾಗಿರುವ ಪ್ರಮಾಣ ಸುಮಾರು 2.64 ಡಿಗ್ರಿ. ಭೂಮಿಯ ಅಕ್ಷೀಯ ಓರೆಯು ಭೂ ಪಥ ಲಂಬಕ್ಕೆ ಸುಮಾರು 23.5 ಡಿಗ್ರಿ ಮತ್ತು ಭೂ ಪಥಕ್ಕೆ 5 ಡಿಗ್ರಿ.

 

ಶುಕ್ರ ಗ್ರಹದ ಕುರಿತು:

  1. ಶುಕ್ರವು ಸೌರಮಂಡಲದ ಎರಡನೇ ಗ್ರಹವಾಗಿದೆ ಮತ್ತು ರಚನೆಯಲ್ಲಿ ಭೂಮಿಯನ್ನು ಹೋಲುತ್ತದೆ, ಆದರೆ ಗಾತ್ರದಲ್ಲಿ ಭೂಮಿಗಿಂತ ಸ್ವಲ್ಪ ಚಿಕ್ಕದಾಗಿದೆ.
  2. ಅದರ ನಿರೀಕ್ಷಿತ ಭೂದೃಶ್ಯದ ಮೇಲೆ ಸ್ಥೂಲ ಮತ್ತು ವಿಷಕಾರಿ ವಾತಾವರಣದ ಒಂದು ಪದರವಿದೆ, ಇದು ಮುಖ್ಯವಾಗಿ ಇಂಗಾಲದ ಡೈಆಕ್ಸೈಡ್ ಮತ್ತು ಸಲ್ಫ್ಯೂರಿಕ್ ಆಮ್ಲದ ಮೋಡದ ಹನಿಗಳಿಂದ ಕೂಡಿದೆ. ಆದ್ದರಿಂದ ಈ ಗ್ರಹವನ್ನು ಭೂಮಿಯಿಂದ ವೀಕ್ಷಿಸಬಹುದಾಗಿದೆ.
  3. ಅನಿಯಂತ್ರಿತ ಹಸಿರುಮನೆ ಪರಿಣಾಮವನ್ನು ಒಳಗೊಂಡಂತೆ, ಅದರ ಮೇಲ್ಮೈ ತಾಪಮಾನವು 880°F (471 ° C) ತಲುಪುತ್ತದೆ, ಇದು ಸೀಸವನ್ನು ಕರಗಿಸಲು ಬೇಕಾದ ಗರಿಷ್ಠ ತಾಪಮಾನವನ್ನು ಹೊಂದಿದೆ.
  4. ಪೂರ್ವದಿಂದ ಪಶ್ಚಿಮಕ್ಕೆ, ಅಂದರೆ ಅಪ್ರದಕ್ಷಿಣಾಕಾರವಾಗಿ ತಿರುಗುವ ಎರಡು ಗ್ರಹಗಳಲ್ಲಿ ಶುಕ್ರವು ಒಂದು. ನಮ್ಮ ಸೌರವ್ಯೂಹದ ಇತರ ಎಲ್ಲ ಗ್ರಹಗಳಲ್ಲಿ ಯುರೇನಸ್ ಮತ್ತು ಶುಕ್ರ ಮಾತ್ರ ವಿರುದ್ಧ ದಿಕ್ಕಿನಲ್ಲಿ ತಿರುಗುತ್ತವೆ.
  5. ಈ ಗ್ರಹದ ಮತ್ತೊಂದು ವಿಶಿಷ್ಟತೆಯೆಂದರೆ ಅದರ ಹಗಲು-ರಾತ್ರಿ ಚಕ್ರ, ಅಂದರೆ ‘ಒಂದು ಕ್ರಾಂತಿಯಲ್ಲಿ ತೆಗೆದುಕೊಂಡ ಸಮಯಕ್ಕೆ ವಿರುದ್ಧವಾಗಿ ಸತತ ಎರಡು ಸೂರ್ಯೋದಯಗಳ ನಡುವಿನ ಸಮಯ’. ಶುಕ್ರ ಗ್ರಹದ ಮೇಲೆ ಹಗಲು-ರಾತ್ರಿ ಚಕ್ರವನ್ನು ಪೂರ್ಣಗೊಳಿಸಲು ಭೂಮಿಯ 117 ದಿನಗಳನ್ನು ತೆಗೆದುಕೊಳ್ಳುತ್ತದೆ, ಏಕೆಂದರೆ ಅದು ಸೂರ್ಯನ ಸುತ್ತ ತನ್ನ ಕಕ್ಷೆಯ ಹಾದಿಯ ವಿರುದ್ಧ ದಿಕ್ಕಿನಲ್ಲಿ ತಿರುಗುತ್ತದೆ.

 


ಸಾಮಾನ್ಯ ಅಧ್ಯಯನ ಪತ್ರಿಕೆ : 2


 

ವಿಷಯಗಳು: ಸರ್ಕಾರದ ವಿವಿಧ ಅಂಗಗಳ ನಡುವೆ ಅಧಿಕಾರ ವಿಭಜನೆ, ವಿವಾದ ಪರಿಹಾರ ಕಾರ್ಯವಿಧಾನಗಳು ಮತ್ತು ಸಂಸ್ಥೆಗಳು.

ಮಾಧ್ಯಮ ವರದಿಗಳನ್ನು ತಡೆಯುವಂತೆ ಚುನಾವಣಾ ಆಯೋಗ ಮಾಡಿದ ಮನವಿಯನ್ನು ಸುಪ್ರೀಂ ಕೋರ್ಟ್ ನಿರಾಕರಿಸಿದೆ:


(Supreme Court declines EC plea to restrain media reports)

 

ಸಂದರ್ಭ:

ಇತ್ತೀಚೆಗೆ, ಮದ್ರಾಸ್ ಹೈಕೋರ್ಟ್ ನ ವಿಭಾಗಿಯ ಪೀಠವೊಂದರ ಮೌಖಿಕ ಅಭಿಪ್ರಾಯಗಳ ಕುರಿತು ಮಾಧ್ಯಮಗಳು ವರದಿ ಮಾಡುವುದನ್ನು ತಡೆಯುವಂತೆ ಭಾರತ ಚುನಾವಣಾ ಆಯೋಗ ಸಲ್ಲಿಸಿದ್ದ ಅರ್ಜಿಯನ್ನು ಸುಪ್ರೀಂ ಕೋರ್ಟ್ ವಜಾಗೊಳಿಸಿದೆ.

 

ಏನಿದು ಸಮಸ್ಯೆ?

ತಮಿಳುನಾಡು ವಿಧಾನಸಭಾ ಚುನಾವಣೆಯ ಸಂದರ್ಭದಲ್ಲಿ ರ್ಯಾಲಿಗಳು ಮತ್ತು ಸಾಮೂಹಿಕ ಸಮಾರಂಭಗಳಿಗೆ ಅವಕಾಶ ನೀಡಿದ್ದಕ್ಕಾಗಿ ಚುನಾವಣಾ ಆಯೋಗದ ಅಧಿಕಾರಿಗಳ ಮೇಲೆ “ಕೊಲೆ” ಆರೋಪ ಹರಿಸಬೇಕೆಂದು ಹೈಕೋರ್ಟ್ ನ್ಯಾಯಾಧೀಶರು ಹೇಳಿದ್ದರು.ಕೋವಿಡ್ ಸಾಂಕ್ರಾಮಿಕದ ತೀವ್ರತರ ಉಲ್ಬಣಕ್ಕೆ ಚುನಾವಣಾ ಆಯೋಗ ಮಾತ್ರ ಕಾರಣವಾಗಿದೆ ಎಂದು ನ್ಯಾಯಾಧೀಶರು ಟೀಕಿಸಿದ್ದರು.

 

ಸುಪ್ರೀಂ ಕೋರ್ಟ್ ಮಾಡಿದ ಅವಲೋಕನಗಳು:

 ನ್ಯಾಯಾಲಯದ ಪ್ರಕ್ರಿಯೆಗಳನ್ನು ವರದಿ ಮಾಡುವ ವಿಚಾರದಲ್ಲಿ ಪತ್ರಿಕಾ ಸ್ವಾತಂತ್ರ್ಯದ ಪ್ರಬಲ ಪ್ರತಿಪಾದಕನಾಗಿ ಈ ನ್ಯಾಯಾಲಯವು ನಿಲ್ಲುತ್ತದೆ. ಇದು ವಾಕ್‌ ಸ್ವಾತಂತ್ರ್ಯ ಮತ್ತು ಮಾತನಾಡುವ ವ್ಯಕ್ತಿಯ ಅಭಿವ್ಯಕ್ತಿ ಸ್ವಾತಂತ್ರ್ಯ‌, ಕೇಳಲು ಮತ್ತು ಕೇಳಿಸಿಕೊಳ್ಳಲು ಬಯಸುವವರ ಸ್ವಾತಂತ್ರ್ಯದ ಅವಿಭಾಜ್ಯ ಅಂಗ. ಎಲ್ಲಕ್ಕಿಂತ ಮುಖ್ಯವಾಗಿ ಇದು ನ್ಯಾಯಾಂಗವನ್ನು ಉತ್ತರದಾಯಿಯಾಗಿಸುತ್ತದೆ’ ಎಂದು ಪೀಠವು ಹೇಳಿದೆ.

  1. ನ್ಯಾಯಾಧೀಶರು ಮತ್ತು ವಕೀಲರ ನಡುವಿನ ಮೌಖಿಕ ವಿನಿಮಯ ಸೇರಿದಂತೆ ನ್ಯಾಯಾಲಯದ ಸಭಾಂಗಣಗಳಲ್ಲಿನ ವಿಚಾರಣೆಯನ್ನು ಸಮಯೋಚಿತವಾಗಿ / ನೈಜ ಸಮಯದಲ್ಲಿ ವರದಿ ಮಾಡುವುದು ಅಭಿವ್ಯಕ್ತಿ ಸ್ವಾತಂತ್ರ್ಯದ ಹಕ್ಕಿನ ಭಾಗವಾಗಿದೆ.
  2. ತಂತ್ರಜ್ಞಾನದ ಮುನ್ನಡೆಯಿಂದಾಗಿ ನ್ಯಾಯಾಲಯದ ಪ್ರಕ್ರಿಯೆಗಳು ಸಾಮಾಜಿಕ ಜಾಲ ತಾಣಗಳು ಮತ್ತು ಇತರ ವೇದಿಕೆಗಳಲ್ಲಿ ನೇರವಾಗಿಯೇ ಪ್ರಸಾರ ಆಗುತ್ತಿವೆ. ಇದು ಕಳವಳಕ್ಕೆ ಕಾರಣವಲ್ಲ, ಬದಲಿಗೆ, ನಮ್ಮ ಸಂವಿಧಾನದ ವೈಶಿಷ್ಟ್ಯ ಎಂದು ಸಂಭ್ರಮಿಸಬೇಕಾದ ವಿಚಾರ ಎಂದು ಕೋರ್ಟ್‌ ಅಭಿಪ್ರಾಯಪಟ್ಟಿದೆ. ಇದು ಮಾಧ್ಯಮವು ಹೊಂದಿರುವ ವಾಕ್ ಮತ್ತು ಅಭಿವ್ಯಕ್ತಿ ಸ್ವಾತಂತ್ರದ ವಿಸ್ತರಣೆಯಾಗಿದೆ ಹಾಗೂ ಮುಕ್ತ ನ್ಯಾಯಾಲಯದ ವಾಸ್ತವ ವಿಸ್ತರಣೆ ಕೂಡ ಆಗಿದೆ ಎಂದು ನ್ಯಾಯಪೀಠವು ಅಭಿಪ್ರಾಯಪಟ್ಟಿದೆ.
  3. ನ್ಯಾಯಾಲಯದ ವಿಚಾರಣೆಯ ಇಂತಹ ನೇರ ವರದಿ ಮಾಡುವಿಕೆಯು ಒಂದು ರೀತಿಯ ಆತಂಕಕ್ಕಿಂತ ಆಚರಣೆಗೆ ಒಂದು ಕಾರಣವಾಗಿದೆ.
  4. ಮಕ್ಕಳ ಮೇಲಿನ ಲೈಂಗಿಕ ದೌರ್ಜನ್ಯ ಮತ್ತು ವೈವಾಹಿಕ ಸಮಸ್ಯೆಗಳನ್ನು ಹೊರತುಪಡಿಸಿ, ಮುಕ್ತ ಪತ್ರಿಕಾ ವಿದ್ಯಮಾನವನ್ನು ನ್ಯಾಯಾಲಯದ ಇತರ ವಿಚಾರಣೆಗಳಿಗೆ ವಿಸ್ತರಿಸಬೇಕು.
  5. ವಿಚಾರಣೆಯ ಸಮಯದಲ್ಲಿ ಮಾಡಿದ ಮೌಖಿಕ ಅಭಿಪ್ರಾಯಗಳು ಪಕ್ಷಗಳನ್ನು ಬಂಧಿಸುವುದಿಲ್ಲ ಮತ್ತು ತೀರ್ಪಿನ ಭಾಗವಾಗುವುದಿಲ್ಲ ಎಂದು ನ್ಯಾಯಾಲಯ ಹೇಳಿದೆ. ಆಲೋಚನೆಗಳ ವಿನಿಮಯವು ಮನಸ್ಸಿನ ಅನ್ವಯಿಸುವಿಕೆ ಮತ್ತು ನ್ಯಾಯ ನಿರ್ಣಯದ ಪ್ರಕ್ರಿಯೆಗೆ ಅಂತರ್ಗತವಾಗಿರುತ್ತದೆ.
  6. ಮದ್ರಾಸ್ ಹೈಕೋರ್ಟ್ ಮಾಡಿದ ಟೀಕೆಗಳ ಸ್ವರೂಪದ ಬಗ್ಗೆ ಸುಪ್ರೀಂ ಕೋರ್ಟ್ “ಕೆಲವು ಜಾಗರೂಕತೆ ಮತ್ತು ಎಚ್ಚರಿಕೆಯಿಂದ ಪ್ರಸ್ತುತ ಪ್ರಕರಣದಲ್ಲಿನ ಸಮಸ್ಯೆಗಳನ್ನು ಪರಿಹರಿಸಬಹುದಿತ್ತು” ಎಂದು ಹೇಳಿದೆ.
  7. ಮದ್ರಾಸ್‌ ಹೈಕೋರ್ಟ್‌ನ ಮೌಖಿಕ ಅಭಿಪ್ರಾಯಗಳು ‘ಕಠಿಣ’ವಾಗಿದ್ದವು, ‘ಅಸಮರ್ಪಕ’ವಾಗಿದ್ದವು ಎಂದು ಪೀಠವು ಹೇಳಿದೆ. ಸ್ವಲ್ಪ ಎಚ್ಚರ ವಹಿಸಿದ್ದರೆ, ವಿವೇಚನೆ ತೋರಿದ್ದರೆ ಆಯೋಗವು ಸುಪ್ರೀಂ ಕೋರ್ಟ್‌ನಲ್ಲಿ ಅರ್ಜಿ ಹಾಕುವ ಸ್ಥಿತಿ ಉಂಟಾಗುತ್ತಿರಲಿಲ್ಲ ಎಂದಿದೆ.
  8. ಮದ್ರಾಸ್‌ ಹೈಕೋರ್ಟ್‌ನ ನ್ಯಾಯಮೂರ್ತಿಗಳ ಮೌಖಿಕ ಅಭಿಪ್ರಾಯವು ಚುನಾವಣಾ ಆಯೋಗಕ್ಕೆ ಶಿಕ್ಷೆ ವಿಧಿಸುವ ಉದ್ದೇಶವನ್ನು ಹೊಂದಿರಲಿಲ್ಲ ಎಂದೂ ಪೀಠ ಹೇಳಿದೆ. ಕೋವಿಡ್‌ ಸಾಂಕ್ರಾಮಿಕದ ಸಂದರ್ಭದಲ್ಲಿ ಹೈಕೋರ್ಟ್‌ಗಳು ನಿರ್ವಹಿಸಿದ ಪಾತ್ರವನ್ನು ಪೀಠವು ಶ್ಲಾಘಿಸಿದೆ. ಆದರೆ, ಸಂದರ್ಭಕ್ಕೆ ಅನುಸಾರವಾದ ಅಭಿಪ್ರಾಯಗಳನ್ನು ವ್ಯಕ್ತಪಡಿಸುವಾಗ ಅವು ತಪ್ಪು ವ್ಯಾಖ್ಯಾನಕ್ಕೆ ಒಳಗಾಗಬಾರದು ಎಂಬ ಎಚ್ಚರವು ನ್ಯಾಯಮೂರ್ತಿಗಳಲ್ಲಿ ಇರಬೇಕು ಎಂದೂ ಸುಪ್ರೀಂ ಕೋರ್ಟ್‌ ಹೇಳಿದೆ.
  9. ನ್ಯಾಯಾಂಗ ಪ್ರಕ್ರಿಯೆಯ ವರದಿಗಾರಿಕೆಯು ಪತ್ರಿಕಾ ಸ್ವಾತಂತ್ರ್ಯ ಮತ್ತು ಮುಕ್ತ ನ್ಯಾಯಾಲಯ ತತ್ವಗಳ ಮುಂದುವರಿಕೆ ಎಂದು ನ್ಯಾಯಪೀಠ ಹೇಳಿದೆ.

 

ಸಮಯದ ಬೇಡಿಕೆ:

‘ವಿಚಾರಣೆ ಸಂದರ್ಭದಲ್ಲಿ ಮತ್ತು ತೀರ್ಪುಗಳಲ್ಲಿ ಬಳಕೆಯಾಗುವ ಭಾಷೆಯು ನ್ಯಾಯಾಂಗೀಯ ಔಚಿತ್ಯಕ್ಕೆ ಅನುಗುಣವಾಗಿರಬೇಕು. ನ್ಯಾಯಾಂಗ ಪ್ರಕ್ರಿಯೆಯಲ್ಲಿ ಭಾಷೆಯು ಬಹಳ ಮುಖ್ಯವಾದ ಸಾಧನವಾಗಿದೆ’ ಎಂದು ಪೀಠ ಅಭಿಪ್ರಾಯಪಟ್ಟಿದೆ. ಭಾಷೆ ನ್ಯಾಯಾಂಗ ಪ್ರಕ್ರಿಯೆಯ ಒಂದು ಪ್ರಮುಖ ಸಾಧನವಾಗಿದೆ, ಇದು ಸಾಂವಿಧಾನಿಕ ಮೌಲ್ಯಗಳಿಗೆ ಸಹ ಸೂಕ್ಷ್ಮವಾಗಿರುತ್ತದೆ.

 


ಸಾಮಾನ್ಯ ಅಧ್ಯಯನ ಪತ್ರಿಕೆ : 3


 

ವಿಷಯಗಳು: ಮಾಹಿತಿ ತಂತ್ರಜ್ಞಾನ, ಬಾಹ್ಯಾಕಾಶ, ಕಂಪ್ಯೂಟರ್, ರೊಬೊಟಿಕ್ಸ್, ನ್ಯಾನೊ-ತಂತ್ರಜ್ಞಾನ, ಜೈವಿಕ ತಂತ್ರಜ್ಞಾನ ಮತ್ತು ಬೌದ್ಧಿಕ ಆಸ್ತಿ ಹಕ್ಕುಗಳಿಗೆ ಸಂಬಂಧಿಸಿದ ವಿಷಯಗಳಲ್ಲಿ ಜಾಗೃತಿ.

ಭಾರತದಲ್ಲಿ ಕ್ರಿಪ್ಟೋಕರೆನ್ಸಿ ವಹಿವಾಟನ್ನು ನಿಷೇಧಿಸಲು ನಿರಾಕರಿಸಿದ NPCI:


(NPCI refuses to ban cryptocurrency trades in India)

 

ಸಂದರ್ಭ:

ಇತ್ತೀಚೆಗೆ, ಭಾರತೀಯ ರಾಷ್ಟ್ರೀಯ ಪಾವತಿ ನಿಗಮವು (National Payments Corporation of India- NPCI) ಕ್ರಿಪ್ಟೋಕರೆನ್ಸಿ ವಹಿವಾಟುಗಳನ್ನು ನಿಷೇಧಿಸಲು ನಿರಾಕರಿಸಿದೆ.

ಇದಲ್ಲದೆ, ಕ್ರಿಪ್ಟೋಕರೆನ್ಸಿ ವಹಿವಾಟಿನ ವಿನಿಮಯವನ್ನು ನಿಷೇಧಿಸಬೇಕೆ ಅಥವಾ ಬೇಡವೇ ಎಂಬುದನ್ನು ನಿರ್ಧರಿಸಲು NPCI ಬ್ಯಾಂಕುಗಳ ಆಯ್ಕೆಗೆ ಬಿಟ್ಟಿದೆ ಮತ್ತು ಬ್ಯಾಂಕುಗಳು ತಮ್ಮ ಕಾನೂನು ಮತ್ತು ಅನುಸರಣೆ ಇಲಾಖೆಗಳ ಸಲಹೆಯ ಆಧಾರದ ಮೇಲೆ ನಿರ್ಧಾರ ತೆಗೆದುಕೊಳ್ಳುವಂತೆ ಕೇಳಿಕೊಂಡಿದೆ.

 

ಏನಿದು ಭಾರತೀಯ ರಾಷ್ಟ್ರೀಯ ಪಾವತಿ ನಿಗಮ (NPCI)?

  1.  ಭಾರತೀಯ ರಾಷ್ಟ್ರೀಯ ಪಾವತಿ ನಿಗಮ (NPCI) ದೇಶದಲ್ಲಿ ಚಿಲ್ಲರೆ ಪಾವತಿ ವ್ಯವಸ್ಥೆಗಳ ಕಾರ್ಯಾಚರಣೆಗೆ ಒಂದು ನಿಗದಿತ ಮಾನದಂಡಗಳನ್ನು ಹೊಂದಿರುವ ಸಂಸ್ಥೆ (anumbrella body)ಯಾಗಿ ಕಾರ್ಯನಿರ್ವಹಿಸುತ್ತದೆ.
  2. ಇದನ್ನು ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾವು (RBI) ಭಾರತೀಯ ಬ್ಯಾಂಕುಗಳ ಸಂಘ (Indian Bank’s Association ) ದ ಸಹಯೋಗದೊಂದಿಗೆ ಪಾವತಿ ಮತ್ತು ತೀರುವೆ ವ್ಯವಸ್ಥೆಗಳ ಕಾಯ್ದೆ’, 2007 (The Payment and Settlement Systems Act, 2007) ರ ಅಡಿಯಲ್ಲಿ ಸ್ಥಾಪಿಸಿತು.
  3. ಪ್ರಸ್ತುತ, ‘ಭಾರತೀಯ ರಾಷ್ಟ್ರೀಯ ಪಾವತಿ ನಿಗಮ (NPCI) ವನ್ನು ಹತ್ತು ಪ್ರಮುಖ ಪ್ರವರ್ತಕ ಬ್ಯಾಂಕುಗಳು ಉತ್ತೇಜಿಸುತ್ತಿವೆ.

 

ಕೆಳಗಿನ ಪಾವತಿ ವ್ಯವಸ್ಥೆಗಳನ್ನು ನಿರ್ವಹಿಸುವ ಅಧಿಕಾರವನ್ನು NPCI ಹೊಂದಿದೆ:

  1. ರಾಷ್ಟ್ರೀಯ ಹಣಕಾಸು ಸ್ವಿಚ್ (National Financial Switch (NFS).
  2. ತಕ್ಷಣದ ಪಾವತಿ ಸೇವಾ ವ್ಯವಸ್ಥೆ (Immediate Payment System (IMPS).
  3. ಬ್ಯಾಂಕುಗಳು ನೀಡುವ RuPay ಕಾರ್ಡ್‌ಗಳ (ಡೆಬಿಟ್ ಕಾರ್ಡ್‌ಗಳು / ಪ್ರಿಪೇಯ್ಡ್ ಕಾರ್ಡ್‌ಗಳು) ಮತ್ತು ಬ್ಯಾಂಕೇತರ ಹಣಕಾಸು ಕಂಪನಿಗಳು (NBFC) ನೀಡುವ ಕೋ-ಬ್ರಾಂಡೆಡ್ ಕ್ರೆಡಿಟ್ ಕಾರ್ಡ್‌ಗಳು ಅಥವಾ ರಿಸರ್ವ್ ಬ್ಯಾಂಕ್ ಅನುಮೋದಿಸಿದ ಯಾವುದೇ ಘಟಕ.
  4. ರಾಷ್ಟ್ರೀಯ ಸ್ವಯಂಚಾಲಿತ ಕ್ಲಿಯರಿಂಗ್ ಹೌಸ್ (National Automatic Clearing House (ACH).
  5. ಆಧಾರ್ ಸಕ್ರಿಯಗೊಳಿಸಿದ ಪಾವತಿ ವ್ಯವಸ್ಥೆ (Aadhaar Enabled Payments System -AEPS).
  6. ಚೆಕ್ಕುಗಳ ಮೊಟಕುಗೊಳಿಸುವಿಕೆ ವ್ಯವಸ್ಥೆಯ ಕಾರ್ಯಾಚರಣೆ (Operation of Cheque Truncation System).

 

ಭಾರತೀಯ ರಾಷ್ಟ್ರೀಯ ಪಾವತಿ ನಿಗಮ (NPCI) ದ ಉತ್ಪನ್ನಗಳು:

  1. RuPay ಕಾರ್ಡ್.
  2. ರಾಷ್ಟ್ರೀಯ ಸಾಮಾನ್ಯ ಚಲನಶೀಲತೆ ಕಾರ್ಡ್ (National Common Mobility Card).
  3. ಹಣಕ್ಕಾಗಿ ಭಾರತ್ ಇಂಟರ್ಫೇಸ್ (Bharat Interface for Money (BHIM).
  4. ಏಕೀಕೃತ ಪಾವತಿ ವ್ಯವಸ್ಥೆ (Unified Payments Interface (UPI).
  5. ಭಾರತ್ ಬಿಲ್ ಪಾವತಿ ವ್ಯವಸ್ಥೆ (Bharat Bill Payment System).

 

ಕ್ರಿಪ್ಟೋಕರೆನ್ಸಿ ವಹಿವಾಟುಗಳನ್ನು ನಿಷೇಧಿಸಲು NPCI ಏಕೆ ನಿರಾಕರಿಸಿದೆ?

ನ್ಯಾಷನಲ್ ಪೇಮೆಂಟ್ಸ್ ಕಾರ್ಪೊರೇಶನ್ ಆಫ್ ಇಂಡಿಯಾದ ಈ ನಿರ್ಧಾರವು 2020ರ ಮಾರ್ಚ್ ನಲ್ಲಿ  ಸುಪ್ರೀಂ ಕೋರ್ಟ್ ನೀಡಿದ ತೀರ್ಪಿಗೆ ಅನುಗುಣವಾಗಿದೆ.

ಬ್ಯಾಂಕುಗಳು ಮತ್ತು ಹಣಕಾಸು ಕಂಪನಿಗಳಿಗೆ ಕ್ರಿಪ್ಟೋಕರೆನ್ಸಿಯಲ್ಲಿ ವ್ಯವಹರಿಸುವ ಯಾರಿಗೆ ಆದರೂ ವರ್ಚುವಲ್ ಕರೆನ್ಸಿಗಳಲ್ಲಿ ಅಥವಾ ಅಂತಹ ಡಿಜಿಟಲ್ ಕರೆನ್ಸಿಗಳಲ್ಲಿ  ವ್ಯವಹರಿಸಲು ಅಥವಾ ಸೇವೆಗಳನ್ನು ಒದಗಿಸುವುದನ್ನು ಭಾರತೀಯ ರಿಸರ್ವ್ ಬ್ಯಾಂಕ್ ನಿಷೇಧಿಸಿತ್ತು. ಸುಪ್ರೀಂ ಕೋರ್ಟ್ ತನ್ನ ತೀರ್ಪಿನಲ್ಲಿ, ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ (RBI) 2018 ರ ಏಪ್ರಿಲ್‌ನಲ್ಲಿ ಹೊರಡಿಸಿದ ನಿರ್ದೇಶನವನ್ನು ರದ್ದುಗೊಳಿಸಿತು.

ಸುಪ್ರೀಂ ಕೋರ್ಟ್‌ನ ತೀರ್ಪಿನ ನಂತರ ಆರ್‌ಬಿಐ ಯಾವುದೇ ಹೊಸ ನಿರ್ದೇಶನಗಳನ್ನು ನೀಡಿಲ್ಲ. ಆದ್ದರಿಂದ ಕ್ರಿಪ್ಟೋಕರೆನ್ಸಿಗಳ ವ್ಯಾಪಾರವನ್ನು NPCI ಇನ್ನೂ ನಿಷೇಧಿಸಿಲ್ಲ.

 

‘ಕ್ರಿಪ್ಟೋಕರೆನ್ಸಿ’ ಎಂದರೇನು?

ಕ್ರಿಪ್ಟೋಕರೆನ್ಸಿಗಳು (Cryptocurrencies) ಒಂದು ರೀತಿಯ ಡಿಜಿಟಲ್ ಕರೆನ್ಸಿಯಾಗಿದ್ದು, ಇದನ್ನು ಕ್ರಿಪ್ಟೋಗ್ರಫಿ ನಿಯಮಗಳ ಆಧಾರದ ಮೇಲೆ ನಿರ್ವಹಿಸಲಾಗುತ್ತದೆ ಮತ್ತು ರಚಿಸಲಾಗುತ್ತದೆ. ಕ್ರಿಪ್ಟೋಗ್ರಫಿ ಎನ್ನುವುದು ಕೋಡಿಂಗ್ ಭಾಷೆಯನ್ನು ಪರಿಹರಿಸುವ ಕಲೆ. ಇದು ಎಲೆಕ್ಟ್ರಾನಿಕ್ ನಗದು ವ್ಯವಸ್ಥೆಯಾಗಿದ್ದು, ಇದರಲ್ಲಿ ಯಾವುದೇ ಹಣಕಾಸು ಸಂಸ್ಥೆ ಇಲ್ಲದೆ ಒಂದು ಪಕ್ಷವು ಇನ್ನೊಂದು ಪಕ್ಷಕ್ಕೆ ಆನ್‌ಲೈನ್ ಪಾವತಿ ಮಾಡುತ್ತದೆ. ಅಥವಾ

ಕ್ರಿಪ್ಟೋಕರೆನ್ಸಿ ಎನ್ನುವುದು ಸದ್ಯ ಚಲಾವಣೆಯಲ್ಲಿರುವ ಸ್ವತಂತ್ರ ಡಿಜಿಟಲ್ ದುಡ್ಡುಗಳಲ್ಲಿ ಒಂದಾಗಿದ್ದು, ಈ ದುಡ್ಡಿಗೆ ಯಾವುದೇ ದೇಶದ ಕೇಂದ್ರೀಯ ಬ್ಯಾಂಕ್ ನ ಖಾತರಿ ಇರುವುದಿಲ್ಲ. ಬಳಕೆದಾರರ ಸಮುದಾಯವೇ ಇದಕ್ಕೆ ಖಾತರಿ ನೀಡುತ್ತದೆ.ಸರಳವಾಗಿ ಹೇಳುವುದಾದರೆ ಇದು ಯಾವುದೇ ಸರ್ಕಾರದ ನಿಯಂತ್ರಣದಲ್ಲಿಲ್ಲದ ಪ್ರಪಂಚದ ಯಾವುದೇ ಭಾಗದಲ್ಲಿಯೂ ಚಲಾವಣೆ ಮಾಡಬಹುದಾದ ದುಡ್ಡು ಆಗಿದೆ.

ಉದಾಹರಣೆ: ಬಿಟ್‌ಕಾಯಿನ್, ಎಥೆರಿಯಮ್  (Ethereum) ಇತ್ಯಾದಿಗಳು.

 

ಕ್ರಿಪ್ಟೋಕರೆನ್ಸಿ ಬೇಡಿಕೆಗೆ ಕಾರಣಗಳು:

  1. ಕ್ರೆಡಿಟ್ / ಡೆಬಿಟ್ ಕಾರ್ಡ್ ಅಥವಾ ಬ್ಯಾಂಕುಗಳಂತಹ ಮೂರನೇ ವ್ಯಕ್ತಿಯ ಅಗತ್ಯವಿಲ್ಲದೆ ಎರಡು ಪಕ್ಷಗಳ ನಡುವೆ ಸುಲಭವಾಗಿ ಹಣದ ವರ್ಗಾವಣೆಯನ್ನು ಮಾಡಬಹುದು.
  2. ಇತರ ಆನ್‌ಲೈನ್ ವಹಿವಾಟುಗಳಿಗಿಂತ ಅಗ್ಗದ ಆಯ್ಕೆಯಾಗಿದೆ.
  3. ಪಾವತಿಗಳನ್ನು ಸುರಕ್ಷಿತ ಮತ್ತು ಖಾತರಿಪಡಿಸಲಾಗುತ್ತದೆ ಮತ್ತು ಅನಾಮಧೇಯತೆಯ ವಿಶಿಷ್ಟ ಸೌಲಭ್ಯವಿದೆ.
  4. ಆಧುನಿಕ ಕ್ರಿಪ್ಟೋಕರೆನ್ಸಿ ವ್ಯವಸ್ಥೆಗಳು ಬಳಕೆದಾರರ “ವ್ಯಾಲೆಟ್” ಅಥವಾ ಖಾತೆ ವಿಳಾಸದ ಆಯ್ಕೆಯನ್ನು ಹೊಂದಿವೆ, ಇದನ್ನು ಸಾರ್ವಜನಿಕ ಕೀ ಮತ್ತು ಪೈರೇಟ್ ಕೀಲಿಯಿಂದ ಮಾತ್ರ ತೆರೆಯಬಹುದಾಗಿದೆ.
  5. ಖಾಸಗಿ ಕೀಲಿಯು ವ್ಯಾಲೆಟ್ ಮಾಲೀಕರಿಗೆ ಮಾತ್ರ ತಿಳಿದಿರುತ್ತದೆ.
  6. ಹಣದ ವರ್ಗಾವಣೆಗೆ ಸಂಸ್ಕರಣಾ ಶುಲ್ಕಗಳು ಕಡಿಮೆ.

 

ಕ್ರಿಪ್ಟೋಕರೆನ್ಸಿಯ ಅನನುಕೂಲಗಳು:

  1. ಕ್ರಿಪ್ಟೋಕರೆನ್ಸಿ ವಹಿವಾಟಿನ ಬಹುತೇಕ ರಹಸ್ಯ ಸ್ವರೂಪದಿಂದಾಗಿ, ಇದು ಅಕ್ರಮ ಹಣದ ವರ್ಗಾವಣೆ, ತೆರಿಗೆ-ವಂಚನೆ ಮತ್ತು ಭಯೋತ್ಪಾದಕ-ಹಣಕಾಸು ಮುಂತಾದ ಕಾನೂನುಬಾಹಿರ ಚಟುವಟಿಕೆಗಳಿಗೆ ಸುಲಭವಾಗಿಸುತ್ತದೆ.
  2. ಇದರ ಅಡಿಯಲ್ಲಿ ಮಾಡಿದ ಪಾವತಿಗಳನ್ನು ಬದಲಾಯಿಸಲಾಗುವುದಿಲ್ಲ / ಹಿಂಪಡೆಯಲಾಗುವುದಿಲ್ಲ.
  3. ಕ್ರಿಪ್ಟೋಕರೆನ್ಸಿಯನ್ನು ಎಲ್ಲೆಡೆ ಸ್ವೀಕರಿಸಲಾಗುವುದಿಲ್ಲ ಮತ್ತು ಅದರ ಮೌಲ್ಯವು ಬೇರೆಡೆ ಸೀಮಿತವಾಗಿದೆ.
  4. ಈ ಬಿಟ್‌ಕಾಯಿನ್‌ನಂತಹ ಕ್ರಿಪ್ಟೋಕರೆನ್ಸಿಯು ಯಾವುದೇ ಭೌತಿಕ ವಸ್ತುವಿನೊಂದಿಗೆ ಸಂಬಂಧ ಹೊಂದಿಲ್ಲ ಎಂಬ ಕಳವಳವನ್ನು ವ್ಯಕ್ತಪಡಿಸಲಾಗಿದೆ, ಆದಾಗ್ಯೂ, ಕೆಲವು ಸಂಶೋಧನೆಗಳು ಹೆಚ್ಚಿನ ಪ್ರಮಾಣದ ಶಕ್ತಿಯ ಅಗತ್ಯವಿರುವ ಬಿಟ್‌ಕಾಯಿನ್‌ನ ಉತ್ಪಾದನಾ ವೆಚ್ಚವು ಅದರ ಮಾರುಕಟ್ಟೆ ಮೌಲ್ಯಕ್ಕೆ ನೇರವಾಗಿ ಸಂಬಂಧ ಹೊಂದಿದೆ ಎಂದು ಗುರುತಿಸಿದೆ.

 

ವಿಷಯಗಳು: ಮಾಹಿತಿ ತಂತ್ರಜ್ಞಾನ, ಬಾಹ್ಯಾಕಾಶ, ಕಂಪ್ಯೂಟರ್, ರೊಬೊಟಿಕ್ಸ್, ನ್ಯಾನೊ-ತಂತ್ರಜ್ಞಾನ, ಜೈವಿಕ ತಂತ್ರಜ್ಞಾನ ಮತ್ತು ಬೌದ್ಧಿಕ ಆಸ್ತಿ ಹಕ್ಕುಗಳಿಗೆ ಸಂಬಂಧಿಸಿದ ವಿಷಯಗಳಲ್ಲಿ ಜಾಗೃತಿ.

ಕೋವಿಡ್ -19 ಲಸಿಕೆ ಗಳಿಗಾಗಿ ಬೌದ್ಧಿಕ ಆಸ್ತಿ ಹಕ್ಕು ವಿನಾಯಿತಿ:


(Intellectual property waiver for Covid-19 vaccines)

ಸಂದರ್ಭ:

ಇತ್ತೀಚೆಗೆ, ಕೋವಿಡ್ -19 ಲಸಿಕೆಗಳಿಗೆ ಬೌದ್ಧಿಕ ಆಸ್ತಿ ಸಂರಕ್ಷಣೆಯಲ್ಲಿ ವಿನಾಯಿತಿ ನೀಡಲು ಯುನೈಟೆಡ್ ಸ್ಟೇಟ್ಸ್ ತನ್ನ ಬೆಂಬಲವನ್ನು ಘೋಷಿಸಿದೆ, ‘ಅಸಾಧಾರಣ ಸನ್ನಿವೇಶಗಳನ್ನು ಅಸಾಧಾರಣ ವಿಧಾನದಿಂದಲೇ ನಿಭಾಯಿಸಬೇಕಾಗಿದೆ’ ಎಂದು ಹೇಳಿದೆ. ಇದೊಂದು ಜಾಗತಿಕ ಆರೋಗ್ಯ ಬಿಕ್ಕಟ್ಟು ಆಗಿರುವ ಕಾರಣ ಅಮೆರಿಕವು ಬೌದ್ಧಿಕ ಆಸ್ತಿ ಹಕ್ಕನ್ನು ಪ್ರಬಲವಾಗಿ ಪ್ರತಿಪಾದಿಸುತ್ತಿದ್ದರೂ ಕೋವಿಡ್ ಲಸಿಕೆಯ ಮೇಲಿನ ಬೌದ್ಧಿಕ ಆಸ್ತಿ ಹಕ್ಕನ್ನು ನಿವಾರಿಸುವ ಮೂಲಕ ಈ ಸಾಂಕ್ರಾಮಿಕವನ್ನು ನಿಯಂತ್ರಿಸಲು ಬಯಸುತ್ತದೆ ಎಂದು ಹೇಳಿದೆ.

ವಿಶ್ವ ವಾಣಿಜ್ಯ ಸಂಸ್ಥೆ (World Trade Organization- WTO) ನಲ್ಲಿ ಯುಎಸ್ ‘ಪಠ್ಯ ಆಧಾರಿತ ಮಾತುಕತೆ ಅಥವಾ ಸಂಧಾನಗಳನ್ನು’ (text-based negotiations) ಮುಂದುವರೆಸಲಿದೆ.

ಪಠ್ಯ ಆಧಾರಿತ ಮಾತುಕತೆ/ಸಂಧಾನ’ ಎಂದರೇನು?

‘ಪಠ್ಯ-ಆಧಾರಿತ ಮಾತುಕತೆಗಳ’ ಅಡಿಯಲ್ಲಿ, ಸಮಾಲೋಚಕರು ತಮ್ಮ ಆದ್ಯತೆಯ ಪದಗಳನ್ನು ಬಳಸಿಕೊಂಡು ಪ್ರಸ್ತಾಪಗಳನ್ನು ಮತ್ತು ಲೇಖನಗಳನ್ನು ವಿನಿಮಯ ಮಾಡಿಕೊಳ್ಳುತ್ತಾರೆ ಮತ್ತು ನಂತರ ಕೆಲಸದ ಬಗ್ಗೆ ಒಮ್ಮತವನ್ನು ಹೊಂದುವ ಮೂಲಕ ದೀರ್ಘಕಾಲದ ವಿಷಯಗಳನ್ನು ಪರಿಹರಿಸುತ್ತಾರೆ.

 

ಕೋವಿಡ್ -19 ಲಸಿಕೆಗೆ ‘ಬೌದ್ಧಿಕ ಆಸ್ತಿ’ ವಿನಾಯಿತಿಯು ಏನನ್ನು ಸೂಚಿಸುತ್ತದೆ?

ಕೋವಿಡ್ ಲಸಿಕೆಗಳಾದ, ಫಿಜರ್, ಮಾಡರ್ನಾ, ಅಸ್ಟ್ರಾಜೆನೆಕಾ, ನೊವಾವಾಕ್ಸ್, ಜಾನ್ಸನ್ ಮತ್ತು ಜಾನ್ಸನ್ ಮತ್ತು ಭಾರತ್ ಬಯೋಟೆಕ್ ಅಭಿವೃದ್ಧಿಪಡಿಸಿದ ಕೋವಿಡ್ ಲಸಿಕೆಗಳು, ತುರ್ತು ಬಳಕೆಯ ಹಕ್ಕುಗಳ ದೃಢೀಕರಣದೊಂದಿಗೆ (emergency use authorisations- EUA) ಮಧ್ಯಮ-ಆದಾಯದ ದೇಶಗಳಲ್ಲಿ ದೊಡ್ಡ ಪ್ರಮಾಣದಲ್ಲಿ ಉತ್ಪಾದಿಸಲು ‘ಬೌದ್ಧಿಕ ಆಸ್ತಿ’ ವಿನಾಯಿತಿ (Intellectual Property Waiver- IP waiver) ನೀಡಬಹುದು.

  1. ಪ್ರಸ್ತುತ, ಈ ಲಸಿಕೆಗಳ ಉತ್ಪಾದನೆಯು ಹೆಚ್ಚಾಗಿ ಹೆಚ್ಚಿನ ಆದಾಯದ ದೇಶಗಳಲ್ಲಿ ಕೇಂದ್ರೀಕೃತವಾಗಿರುತ್ತದೆ; ಮತ್ತು ಮಧ್ಯಮ-ಆದಾಯದ ದೇಶಗಳಲ್ಲಿ, ಈ ಲಸಿಕೆಗಳನ್ನು ಪರವಾನಗಿ ಅಥವಾ ತಂತ್ರಜ್ಞಾನ ವರ್ಗಾವಣೆ ಒಪ್ಪಂದಗಳ ಮೂಲಕ ಉತ್ಪಾದಿಸಲಾಗುತ್ತಿದೆ.

 

ಈ ಮೊದಲು ಭಾರತ ಮತ್ತು ದಕ್ಷಿಣ ಆಫ್ರಿಕಾ ಮಂಡಿಸಿದ ಪ್ರಸ್ತಾಪ ಏನು?

ಅಕ್ಟೋಬರ್ 2020 ರಲ್ಲಿ, ಭಾರತ ಮತ್ತು ದಕ್ಷಿಣ ಆಫ್ರಿಕಾಗಳು ಕೋವಿಡ್ -19 ರೋಗವನ್ನು ಎದುರಿಸಲು ಅಗ್ಗದ ವೈದ್ಯಕೀಯ ಉತ್ಪನ್ನಗಳಿಗೆ ಸಮಯೋಚಿತ ಪ್ರವೇಶವನ್ನು ತಡೆಯುವಂತಹ ಬೌದ್ಧಿಕ ಆಸ್ತಿ ಹಕ್ಕುಗಳ ವ್ಯಾಪಾರ ಸಂಬಂಧಿತ ಅಂಶಗಳ’ (Trade Related Aspects of Intellectual Property Rights-TRIPS) ಒಪ್ಪಂದದ ಕೆಲವು ಷರತ್ತುಗಳಿಗೆ ವಿನಾಯಿತಿ ನೀಡುವಂತೆ ವಿಶ್ವ ವ್ಯಾಪಾರ ಸಂಸ್ಥೆಯನ್ನು ಕೋರಿದ್ದವು.

  1. ಈ ಒಪ್ಪಂದದ ಎರಡನೇ ಭಾಗದಲ್ಲಿ ನಾಲ್ಕು ವಿಭಾಗಗಳ ಅನುಷ್ಠಾನ, ಬಳಕೆ ಮತ್ತು ಜಾರಿಗೊಳಿಸುವಿಕೆಯಿಂದ ವಿನಾಯಿತಿ ನೀಡಲು “ಸಾಧ್ಯವಾದಷ್ಟು ಬೇಗ” ಶಿಫಾರಸು ಮಾಡುವಂತೆ ಈ ದೇಶಗಳು TRIPS ಮಂಡಳಿಯನ್ನು ಕೇಳಿಕೊಂಡಿವೆ.
  2. ಈ ನಾಲ್ಕು ವಿಭಾಗಗಳು – TRIPS ಒಪ್ಪಂದದ 1, 4, 5 ಮತ್ತು 7 – ಕೃತಿಸ್ವಾಮ್ಯ ಮತ್ತು ಸಂಬಂಧಿತ ಹಕ್ಕುಗಳ ರಕ್ಷಣೆ, ಕೈಗಾರಿಕಾ ವಿನ್ಯಾಸ, ಪೇಟೆಂಟ್‌ಗಳು ಮತ್ತು ಬಹಿರಂಗಪಡಿಸದ ಮಾಹಿತಿಯ ರಕ್ಷಣೆಗೆ ಸಂಬಂಧಿಸಿವೆ.

 

ಪೇಟೆಂಟ್ ಮತ್ತು ‘ಬೌದ್ಧಿಕ ಆಸ್ತಿ ಹಕ್ಕುಗಳು’ ಎಂದರೇನು?

ಪೇಟೆಂಟ್ ಎನ್ನುವುದು ಬಲವಾದ ಬೌದ್ಧಿಕ ಆಸ್ತಿ ಹಕ್ಕನ್ನು ಪ್ರತಿನಿಧಿಸುತ್ತದೆ, ಮತ್ತು ಒಂದು ನಿರ್ದಿಷ್ಟ ಮತ್ತು ಪೂರ್ವ ನಿಗದಿತ ಸಮಯಕ್ಕೆ ದೇಶದ ಸರ್ಕಾರವು ಆವಿಷ್ಕಾರಕನಿಗೆ ನೀಡುವ ವಿಶಿಷ್ಟ ಏಕಸ್ವಾಮ್ಯವಾಗಿದೆ. ಆವಿಷ್ಕಾರವನ್ನು   ಇತರರು ನಕಲು ಮಾಡದಂತೆ ತಡೆಯಲು ಇದು ಜಾರಿಗೊಳಿಸಬಹುದಾದ ಕಾನೂನು ಹಕ್ಕನ್ನು ಒದಗಿಸುತ್ತದೆ.

ಪೇಟೆಂಟ್ ನ ಪ್ರಕಾರಗಳು:

ಪೇಟೆಂಟ್‌ಗಳಲ್ಲಿ ಮುಖ್ಯವಾಗಿ ಎರಡು ವಿಧಗಳಿವೆ:   ಪ್ರಕ್ರಿಯೆ ಪೇಟೆಂಟ್‌ಗಳು (Process Patents) ಅಥವಾ ಉತ್ಪನ್ನ ಪೇಟೆಂಟ್‌ಗಳು (Product Patents).

 

  1. ಉತ್ಪನ್ನದ ಪೇಟೆಂಟ್ (Product Patents) ಅಂತಿಮ ಉತ್ಪನ್ನದ ಹಕ್ಕಿನ ರಕ್ಷಣೆಯನ್ನು ಖಾತ್ರಿಗೊಳಿಸುತ್ತದೆ ಮತ್ತು ಅದರ ಅಡಿಯಲ್ಲಿ, ‘ಪೇಟೆಂಟ್ ಪಡೆದ ವಸ್ತುವಿನ’ ಉತ್ಪಾದನೆಯನ್ನು ನಿಗದಿತ ಅವಧಿಯಲ್ಲಿ ಪೇಟೆಂಟ್ ಹೊಂದಿರುವವರನ್ನು ಹೊರತುಪಡಿಸಿ ಬೇರೆ ಯಾರಾದರೂ ಮಾಡುತ್ತಿದ್ದರೆ ನಿಷೇಧಿಸಬಹುದು, ಬೇರೆ ಯಾರೇ ಆಗಲಿ ವಿಭಿನ್ನ ಪ್ರಕ್ರಿಯೆಯನ್ನು ಬಳಸಿ ಪೇಟೆಂಟ್ ಹೊಂದಿದ ವಸ್ತುವಿನ ಉತ್ಪಾದನೆಯನ್ನು ಮಾಡುತ್ತಿದ್ದರು ಸಹ ಈ ನಿಷೇಧವು ಅನ್ವಯಿಸುತ್ತದೆ.
  2. ಪ್ರಕ್ರಿಯೆ ಪೇಟೆಂಟ್‌ಗಳು (Process Patents) ಪ್ರಕ್ರಿಯೆ ಪೇಟೆಂಟ್‌ಗಳ ಅಡಿಯಲ್ಲಿ, ಉತ್ಪಾದನಾ ಪ್ರಕ್ರಿಯೆಯಲ್ಲಿ ಕೆಲವು ಮಾರ್ಪಾಡುಗಳನ್ನು ಮಾಡುವ ಮೂಲಕ ಪೇಟೆಂಟ್ ಹೊಂದಿರುವವರನ್ನು ಹೊರತುಪಡಿಸಿ ಬೇರೆಯವರಿಗೆ ಪೇಟೆಂಟ್ ಪಡೆದ ಉತ್ಪನ್ನವನ್ನು ತಯಾರಿಸಲು ಅನುವು ಮಾಡಿಕೊಡಲಾಗುತ್ತದೆ.

 

ಭಾರತದಲ್ಲಿ ಪೇಟೆಂಟ್ ಆಡಳಿತ:

ಭಾರತವು 1970 ರ ದಶಕದಲ್ಲಿ  ‘ಉತ್ಪನ್ನ ಪೇಟೆಂಟ್’ ನಿಂದ ಪ್ರಚಲಿತದಲ್ಲಿರುವ ‘ಪ್ರಕ್ರಿಯೆ ಪೇಟೆಂಟ್’ಗೆ ಬದಲಾವಣೆಗೊಂಡಿತು, ಈ ಕಾರಣದಿಂದಾಗಿ, ಭಾರತವು ಜಾಗತಿಕವಾಗಿ ಜೆನೆರಿಕ್  ಔಷಧಿಗಳ ಗಮನಾರ್ಹ ಉತ್ಪಾದಕನಾಯಿತು, ಮತ್ತು 1990 ರ ದಶಕದಲ್ಲಿ, ಸಿಪ್ಲಾದಂತಹ ಕಂಪನಿಗಳಿಗೆ ಆಫ್ರಿಕಾಕ್ಕೆ ಎಚ್ಐವಿ-ವಿರೋಧಿ  ಔಷಧಗಳನ್ನು ಒದಗಿಸಲು ಅನುಮತಿ ನೀಡಲಾಯಿತು.

  1. ಆದರೆ TRIPS ಒಪ್ಪಂದದ ನಿಬಂಧನೆಗಳ ಪ್ರಕಾರ, ಭಾರತವು 2005 ರಲ್ಲಿ ಪೇಟೆಂಟ್ ಕಾಯ್ದೆಯನ್ನು ತಿದ್ದುಪಡಿ ಮಾಡಬೇಕಾಗಿತ್ತು ಮತ್ತು ಫಾರ್ಮಾ, ರಾಸಾಯನಿಕ ಮತ್ತು ಬಯೋಟೆಕ್ ಕ್ಷೇತ್ರಗಳಲ್ಲಿ ಉತ್ಪನ್ನ ಪೇಟೆಂಟ್’ ಆಡಳಿತವನ್ನು ಜಾರಿಗೆ ತರಬೇಕಾಯಿತು.

 


ಪೂರ್ವಭಾವಿ ಪರೀಕ್ಷೆಗೆ ಸಂಬಂಧಿಸಿದ ವಿದ್ಯಮಾನಗಳು:


ಫೇಸ್‌ಬುಕ್‌ನ ಮೇಲ್ವಿಚಾರಣಾ ಮಂಡಳಿ:

(Facebook’s Oversight Board)

  1.  ಈ ಮೇಲ್ವಿಚಾರಣಾ ಮಂಡಳಿಯನ್ನು ಸ್ವತಂತ್ರ ಸಂಸ್ಥೆಯಾಗಿ ಸ್ಥಾಪಿಸಲಾಗಿದೆ, ವೇದಿಕೆಯಲ್ಲಿ ಯಾವ ವಿಷಯವನ್ನು ಪೋಸ್ಟ್ ಮಾಡಲು ಅನುಮತಿಸಬಹುದು ಮತ್ತು ಅದನ್ನು ತೆಗೆದುಹಾಕಬೇಕು ಎಂಬುದನ್ನು ಕಂಡುಹಿಡಿಯಲು ಇದು ಫೇಸ್‌ಬುಕ್‌ಗೆ ಸಹಾಯ ಮಾಡುತ್ತದೆ.
  2. ಫೇಸ್‌ಬುಕ್‌ನ ಹೊರತಾಗಿ, ಅದರ ಬಳಕೆದಾರರು ಪ್ರಕರಣಗಳನ್ನು ಈ ಮಂಡಳಿಗೆ ಸಹ ಉಲ್ಲೇಖಿಸಬಹುದು. ಮಂಡಳಿಯ ನಿರ್ಧಾರಗಳು ಫೇಸ್‌ಬುಕ್‌ನ ಮೇಲೆ ಬಾಧ್ಯಸ್ಥವಾಗಿವೆ.
  3. ಈ ಮಂಡಳಿಯನ್ನು 2018 ರಲ್ಲಿ ಘೋಷಿಸಲಾಯಿತು ಮತ್ತು ಅಧಿಕೃತವಾಗಿ 2020 ಅಕ್ಟೋಬರ್ 22 ರಂದು ತನ್ನ ಕೆಲಸವನ್ನು ಪ್ರಾರಂಭಿಸಿತು.
  4. ಮೇಲ್ವಿಚಾರಣಾ ಮಂಡಳಿಯ ಸ್ವಾತಂತ್ರ್ಯವನ್ನು ಖಚಿತಪಡಿಸಿಕೊಳ್ಳಲು, ಫೇಸ್‌ಬುಕ್ ಬದಲಾಯಿಸಲಾಗದ ಟ್ರಸ್ಟ್ ಅನ್ನು $130 ಮಿಲಿಯನ್ ಆರಂಭಿಕ ಹಣದೊಂದಿಗೆ ರೂಪಿಸಿತು, ಈ ಮೊತ್ತವು ಅರ್ಧ ದಶಕಕ್ಕೂ ಹೆಚ್ಚು ಕಾಲ ಮಂಡಳಿಯ ನಿರ್ವಹಣಾ ವೆಚ್ಚವನ್ನು ಭರಿಸಲು ಸಾಕಾಗಬಹುದು ಎಂದು ನಿರೀಕ್ಷಿಸಲಾಗಿದೆ.
  5. ಅಮೆರಿಕದ ಕಾನೂನು ಸಂಸ್ಥೆಯಾದ ಬೇಕರ್ ಮೆಕೆಂಜಿ (Baker McKenzie) ನಿರ್ವಹಿಸುತ್ತಿರುವ ಶಿಫಾರಸು ಪೋರ್ಟಲ್ ಮೂಲಕ ಈ ಮಂಡಳಿಯ ಸದಸ್ಯತ್ವಕ್ಕಾಗಿ ಯಾರಾದರೂ ಅಭ್ಯರ್ಥಿಯನ್ನು ನಾಮನಿರ್ದೇಶನ ಮಾಡಬಹುದು.

 

ಸುದ್ದಿಯಲ್ಲಿರಲು ಕಾರಣ?

ಜನವರಿ 7 ರಂದು ಸಾಮಾಜಿಕ ಮಾಧ್ಯಮ ನೆಟ್‌ವರ್ಕ್, ಅಂದಿನ ಯು.ಎಸ್. ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ರನ್ನು ತಮ್ಮ ವೇದಿಕೆಯಿಂದ ನಿರ್ಬಂಧಿಸಲು ತೆಗೆದುಕೊಂಡ ನಿರ್ಧಾರವನ್ನು ಫೇಸ್‌ಬುಕ್‌ನ ಮೇಲ್ವಿಚಾರಣಾ ಮಂಡಳಿಯು ಎತ್ತಿಹಿಡಿದಿದೆ.

ದಹ್ಲಾ ಅಣೆಕಟ್ಟು (Dahla Dam):

  1. ಇದು ಅಫ್ಘಾನಿಸ್ತಾನದ ಎರಡನೇ ಅತಿದೊಡ್ಡ ಅಣೆಕಟ್ಟು.
  2. ತಿಂಗಳುಗಳ ಭೀಕರ ಹೋರಾಟದ ನಂತರ ತಾಲಿಬಾನ್ ಅದನ್ನು ವಶಪಡಿಸಿಕೊಂಡಿದೆ.
  3. ಇದು ಅಫ್ಘಾನಿಸ್ತಾನದ ಕಂದಹಾರ್ ಪ್ರಾಂತ್ಯದಲ್ಲಿದೆ.
  4. ಅರ್ಗಂಡಾಬ್ ನದಿಗೆ (Arghandab River) ಅಡ್ಡಲಾಗಿ ದಹ್ಲಾ ಅಣೆಕಟ್ಟುನ್ನು ನಿರ್ಮಿಸಲಾಗಿದೆ.


  • Join our Official Telegram Channel HERE for Motivation and Fast Updates
  • Subscribe to our YouTube Channel HERE to watch Motivational and New analysis videos