ಪರಿವಿಡಿ :
ಸಾಮಾನ್ಯ ಅಧ್ಯಯನ ಪತ್ರಿಕೆ 1:
1. ವಿಶ್ವ ಆರ್ಥಿಕ ವೇದಿಕೆಯ ಜಾಗತಿಕ ಲಿಂಗ ಅಂತರ ವರದಿ.
ಸಾಮಾನ್ಯ ಅಧ್ಯಯನ ಪತ್ರಿಕೆ 2:
1. ಅಪರೂಪದ ಕಾಯಿಲೆಗಳ ರಾಷ್ಟ್ರೀಯ ನೀತಿ,
2. ಜಂಟಿ ಸಮಗ್ರ ಕ್ರಿಯಾ ಯೋಜನೆ (JCPOA).
ಸಾಮಾನ್ಯ ಅಧ್ಯಯನ ಪತ್ರಿಕೆ 3:
1. ಹರಿಯಾಣದ ಮೀಸಲಾತಿ (ಕೋಟಾ) ಕಾನೂನು.
2. ನಾಮನಿರ್ದೇಶನ ಸಂಹಿತೆಯ ಸಾಮರಸ್ಯ ವ್ಯವಸ್ಥೆ (HSN ಕೋಡ್).
3. ನಾಸಾದ ಇನ್ಸೈಟ್ ಲ್ಯಾಂಡರ್.
ಸಾಮಾನ್ಯ ಅಧ್ಯಯನ ಪತ್ರಿಕೆ : 1
ವಿಷಯಗಳು: ಮಹಿಳೆಯರು ಮತ್ತು ಮಹಿಳಾ ಸಂಘಟನೆಗಳು, ಜನಸಂಖ್ಯೆ ಮತ್ತು ಜನಸಂಖ್ಯಾ ಸಂಬಂಧಿತ ಸಮಸ್ಯೆಗಳು, ಬಡತನ ಮತ್ತು ಅಭಿವೃದ್ಧಿ ಸಮಸ್ಯೆಗಳು, ನಗರೀಕರಣ, ಅವುಗಳ ಸಮಸ್ಯೆ ಮತ್ತು ಪರಿಹಾರಗಳು.
ವಿಶ್ವ ಆರ್ಥಿಕ ವೇದಿಕೆಯ ಜಾಗತಿಕ ಲಿಂಗ ಅಂತರ ವರದಿ:
((WEF’s global gender gap report)
ಸಂದರ್ಭ:
ಇತ್ತೀಚೆಗೆ, ‘ಜಾಗತಿಕ ಲಿಂಗ ಅಂತರ ವರದಿ’, 2021 ಅನ್ನು ‘ವಿಶ್ವ ಆರ್ಥಿಕ ವೇದಿಕೆ’ ಯು (World Economic Forum) ಬಿಡುಗಡೆ ಮಾಡಿದೆ.
ವರದಿಯಲ್ಲಿ ಭಾರತಕ್ಕೆ ಸಂಬಂಧಿಸಿದ ಸಂಶೋಧನೆಗಳು:
- ಒಟ್ಟಾರೆ ಶ್ರೇಯಾಂಕ: ಭಾರತವು 28 ಸ್ಥಾನಗಳ ಕುಸಿತ ಕಾಣುವ ಮೂಲಕ – 156 ದೇಶಗಳ ‘ಜಾಗತಿಕ ಲಿಂಗ ಅಂತರ ವರದಿ’ ಯ ಪಟ್ಟಿಯಲ್ಲಿ ಭಾರತ 140 ನೇ ಸ್ಥಾನದಲ್ಲಿದೆ.
- ನೆರೆಯ ರಾಷ್ಟ್ರಗಳಲ್ಲಿನ ಪರಿಸ್ಥಿತಿ: ಭಾರತವು ದಕ್ಷಿಣ ಏಷ್ಯಾದಲ್ಲಿ ಕೆಟ್ಟ ಪ್ರದರ್ಶನ ನೀಡಿದ ದೇಶಗಳಲ್ಲಿ ಒಂದಾಗಿದೆ ಮತ್ತು ಅದರ ನೆರೆಯ ರಾಷ್ಟ್ರಗಳಾದ ಬಾಂಗ್ಲಾದೇಶ, ನೇಪಾಳ, ಭೂತಾನ್, ಶ್ರೀಲಂಕಾ ಮತ್ತು ಮ್ಯಾನ್ಮಾರ್ ಗಳಿಗಿಂತ ಹಿಂದುಳಿದಿದೆ.
- ರಾಜಕೀಯ ಸಬಲೀಕರಣ: ರಾಜಕೀಯ ಸಬಲೀಕರಣ ಸೂಚ್ಯಂಕದಲ್ಲೂ ಭಾರತದ ಸಾಧನೆ ಶೇಕಡಾ 13.5 ಅಂಕಗಳಷ್ಟು ಕುಸಿದಿದೆ.
- ಶೈಕ್ಷಣಿಕ ಸಾಧನೆಯ ಸೂಚ್ಯಂಕದಲ್ಲಿ ಭಾರತ 114 ನೇ ಸ್ಥಾನದಲ್ಲಿದೆ.
- “ಆರೋಗ್ಯ ಮತ್ತು ಬದುಕುಳಿಯುವಿಕೆ” ಸೂಚ್ಯಂಕದಲ್ಲಿ ಭಾರತದ ಸಾಧನೆ ಕೂಡ ಕಳಪೆಯಾಗಿದೆ. ಮಹಿಳೆಯರ ಲಿಂಗ ಅನುಪಾತ ಮತ್ತು ಆರ್ಥಿಕ ಭಾಗವಹಿಸುವಿಕೆಯನ್ನು ಈ ಸೂಚ್ಯಂಕದಲ್ಲಿ ಸೇರಿಸಲಾಗಿದೆ.
- ಭಾರತದಲ್ಲಿ ಮಹಿಳೆಯರ ಅಂದಾಜು ಆದಾಯವು ಪುರುಷರ ಆದಾಯದ ಐದನೇ ಒಂದು ಭಾಗಕ್ಕೆ ಸಮನಾಗಿರುತ್ತದೆ, ಈ ಕಾರಣದಿಂದಾಗಿ ಭಾರತವನ್ನು ಜಾಗತಿಕ ಸೂಚ್ಯಂಕದಲ್ಲಿ ಕೆಳ ಹತ್ತು ದೇಶಗಳ ಸ್ಥಾನದಲ್ಲಿ ನಿಲ್ಲಿಸಿದೆ.
ಜಾಗತಿಕ ಚಿತ್ರಣ:
- ಸತತ 12 ನೇ ಬಾರಿಗೆ, ಐಸ್ಲ್ಯಾಂಡ್ ಅನ್ನು ವಿಶ್ವದ ಅತ್ಯಂತ ಲಿಂಗ ಸಮಾನತೆಯ ದೇಶವೆಂದು ಘೋಷಿಸಲಾಗಿದೆ.
- ಫಿನ್ಲ್ಯಾಂಡ್, ನಾರ್ವೆ, ನ್ಯೂಜಿಲೆಂಡ್, ರುವಾಂಡಾ, ಸ್ವೀಡನ್, ಐರ್ಲೆಂಡ್ ಮತ್ತು ಸ್ವಿಟ್ಜರ್ಲೆಂಡ್ಗಳು ಅತಿ ಹೆಚ್ಚು ಲಿಂಗ ಸಮಾನತೆಯನ್ನು ಹೊಂದಿರುವ ಅಗ್ರ 10 ದೇಶಗಳಾಗಿವೆ.
- ಆರ್ಥಿಕ ಸಾಧನೆಯ ದೃಷ್ಟಿಯಿಂದ, ಕಳೆದ ವರ್ಷಕ್ಕೆ ಹೋಲಿಸಿದರೆ ಅನೇಕ ದೇಶಗಳು ಈ ವರ್ಷದ ಶ್ರೇಯಾಂಕದಲ್ಲಿ ಕಳಪೆ ಸಾಧನೆ ತೋರಿವೆ.
- ಈ ವರ್ಷದ ವರದಿಯಲ್ಲಿ, ರಾಜಕೀಯ ಸಬಲೀಕರಣದಲ್ಲಿನ ಲಿಂಗ ಅಂತರವು ಅತ್ಯಧಿಕವಾಗಿದೆ: ವಿಶ್ವದ ಅಂದಾಜು 35,500 ಸಂಸದೀಯ ಸ್ಥಾನಗಳಲ್ಲಿ ಮಹಿಳೆಯರು ಕೇವಲ 1 ಪ್ರತಿಶತವನ್ನು ಪ್ರತಿನಿಧಿಸಿದ್ದಾರೆ ಮತ್ತು ಒಟ್ಟು 3,400 ಮಂತ್ರಿಗಳಲ್ಲಿ ಮಹಿಳೆಯರು ಕೇವಲ 22.6% ಮಾತ್ರವಿದೆ.
- ಜನವರಿ 15, 2021 ರಂತೆ, 81 ದೇಶಗಳು ಮಹಿಳಾ ಅಧ್ಯಕ್ಷರು ಅಥವಾ ರಾಷ್ಟ್ರಪತಿಗಳನ್ನು ಕಂಡಿಲ್ಲ.
- ಕಳೆದ 50 ವರ್ಷಗಳಲ್ಲಿ ‘ರಾಷ್ಟ್ರದ ಮುಖ್ಯಸ್ಥರನ್ನಾಗಿ’ ಪುರುಷರಿಗಿಂತ ಮಹಿಳೆಯರನ್ನೇ ಹೆಚ್ಚಾಗಿ ಕಂಡ ಏಕೈಕ ದೇಶ ಬಾಂಗ್ಲಾದೇಶ.
- ಆರ್ಥಿಕ ಭಾಗವಹಿಸುವಿಕೆಯಲ್ಲಿ ಹೆಚ್ಚು ಲಿಂಗ ಅಂತರ ಹೊಂದಿರುವ ದೇಶಗಳಲ್ಲಿ ಇರಾನ್, ಭಾರತ, ಪಾಕಿಸ್ತಾನ, ಸಿರಿಯಾ, ಯೆಮೆನ್, ಇರಾಕ್ ಮತ್ತು ಅಫ್ಘಾನಿಸ್ತಾನ ಸೇರಿವೆ.
ಜಾಗತಿಕ ಲಿಂಗ ಅಂತರ ವರದಿಯ ಕುರಿತು:
- ಮೊದಲ ಬಾರಿಗೆ 2006 ರಲ್ಲಿ ಪ್ರಕಟಿಸಲಾಯಿತು.
- ನಾಲ್ಕು ಆಯಾಮಗಳನ್ನು ಗಮನದಲ್ಲಿಟ್ಟುಕೊಂಡು 156 ದೇಶಗಳು ಲಿಂಗ ಸಮಾನತೆಯತ್ತ ಮಾಡಿರುವ ಪ್ರಗತಿಯನ್ನು ವರದಿಯು ಮೌಲ್ಯಮಾಪನ ಮಾಡುತ್ತದೆ: ಅವುಗಳು:
- ಆರ್ಥಿಕ ಭಾಗವಹಿಸುವಿಕೆ ಮತ್ತು ಅವಕಾಶ,
- ಶೈಕ್ಷಣಿಕ ಸಾಧನೆ;
- ಆರೋಗ್ಯ ಮತ್ತು ಬದುಕುಳಿಯುವಿಕೆ; ಮತ್ತು
- ರಾಜಕೀಯ ಸಬಲೀಕರಣ.
ಸೂಚ್ಯಂಕದಲ್ಲಿ, ಅತ್ಯಧಿಕ ಸ್ಕೋರ್ 1, ಇದು ‘ಸಮಾನತೆಯ’ಗರಿಷ್ಠ ಮಟ್ಟವನ್ನು ಸೂಚಿಸುತ್ತದೆ, ಮತ್ತು ಕಡಿಮೆ ಸ್ಕೋರ್ ‘0’ ಅಂದರೆ ‘ಶೂನ್ಯ’, ಇದು ‘ಅಸಮಾನತೆ’ಯ ಗರಿಷ್ಠ ಮಟ್ಟವನ್ನು ಸೂಚಿಸುತ್ತದೆ.
ಸಾಮಾನ್ಯ ಅಧ್ಯಯನ ಪತ್ರಿಕೆ : 2
ವಿಷಯಗಳು:ಆರೋಗ್ಯ, ಶಿಕ್ಷಣ ಮತ್ತು ಮಾನವ ಸಂಪನ್ಮೂಲಕ್ಕೆ ಸಂಬಂಧಿಸಿದ ಸಾಮಾಜಿಕ ವಲಯ/ ಸೇವೆಗಳ ಅಭಿವೃದ್ಧಿ ಮತ್ತು ನಿರ್ವಹಣೆಗೆ ಸಂಬಂಧಿಸಿದ ಸಮಸ್ಯೆಗಳು.
ಅಪರೂಪದ ಕಾಯಿಲೆಗಳ ರಾಷ್ಟ್ರೀಯ ನೀತಿ, 2021:
(National Policy for Rare Diseases, 2021)
ಸಂದರ್ಭ:
‘ಅಪರೂಪದ ಕಾಯಿಲೆಯಿಂದ’ ಬಳಲುತ್ತಿರುವ ರೋಗಿಗಳ ಆರೈಕೆದಾರರು ಮತ್ತು ಇದಕ್ಕೆ ಸಂಬಂಧಿಸಿದ ಸಂಸ್ಥೆಗಳೊಂದಿಗೆ ಕಾರ್ಯನಿರ್ವಹಿಸುವವರು ಇತ್ತೀಚೆಗೆ ಬಿಡುಗಡೆಯಾದ ‘ಅಪರೂಪದ ಕಾಯಿಲೆಗಳ ರಾಷ್ಟ್ರೀಯ ನೀತಿ’, 2021 ರ ಬಗ್ಗೆ ತೃಪ್ತಿಯನ್ನು ಹೊಂದಿಲ್ಲ.
ಏನಿದು ಪ್ರಕರಣ?
- ಈ ನೀತಿಯಡಿ ‘ಅಪರೂಪದ ಕಾಯಿಲೆಗಳಿಂದ ಬಳಲುತ್ತಿರುವ ರೋಗಿಗಳಿಗೆ ಸರ್ಕಾರದ ಸಹಾಯಧನದ ಮೊತ್ತವನ್ನು 15 ಲಕ್ಷ ರೂ.ಗಳಿಂದ 20 ಲಕ್ಷ ರೂ.ಗೆ ಹೆಚ್ಚಿಸಲು ನಿರ್ದೇಶಿಸಲಾಗಿದೆ. ಆದಾಗ್ಯೂ, ಆರೈಕೆದಾರರು ಈ ನೀತಿಯು ಚಿಕಿತ್ಸೆಯ ನಿಜವಾದ ವೆಚ್ಚವನ್ನು ಪರಿಗಣಿಸುವುದಿಲ್ಲ ಎಂದು ಹೇಳುತ್ತಾರೆ.
- ಅಪರೂಪದ, ಆನುವಂಶಿಕ ಅಸ್ವಸ್ಥತೆಗಳಿಂದ ಬಳಲುತ್ತಿರುವ ರೋಗಿಗಳಿಗೆ ‘ರಾಷ್ಟ್ರೀಯ ನೀತಿ’ಯಲ್ಲಿ ಘೋಷಿಸಿರುವ ಹೊಸ ಹಣಕಾಸಿನ ನೆರವಿನಲ್ಲೂ ಕೊರತೆ ಉಂಟಾದ ಬಗ್ಗೆ ವಕಾಲತ್ತು ಗುಂಪುಗಳಿಂದ ಕಳವಳ ವ್ಯಕ್ತವಾಗಿದೆ,’ ಅವರು,ಅಪರೂಪದ ಕಾಯಿಲೆಗಳನ್ನು ಹೊಂದಿರುವ ರೋಗಿಗಳಲ್ಲಿ ಕಂಡುಬರುತ್ತಿರುವ ಏರಿಕೆಯ ಪ್ರಮಾಣವು ಮಾರಣಾಂತಿಕವಾಗಿದೆ ಎಂದಿದ್ದಾರೆ.
ಅಪರೂಪದ ಕಾಯಿಲೆಗಳ ರಾಷ್ಟ್ರೀಯ ನೀತಿಯ ಮುಖ್ಯಾಂಶಗಳು, 2021:
ಅಪರೂಪದ ಕಾಯಿಲೆಗಳ ರೋಗಿಗಳು ಶೀಘ್ರದಲ್ಲೇ ಆಯುಷ್ಮಾನ್ ಭಾರತ್ ಪ್ರಧಾನ ಮಂತ್ರಿ ಜನ ಆರೋಗ್ಯ ಯೋಜನೆ ಯ (Ayushman Bharat Pradhan Mantri Jan Arogya Yojana -AB-PMJAY) ಅಡಿಯಲ್ಲಿ ಒಂದು ಬಾರಿ ಚಿಕಿತ್ಸೆ ಪಡೆಯಲು ಅರ್ಹರಾಗಲಿದ್ದಾರೆ.
ಈ ನೀತಿಯಡಿಯಲ್ಲಿ, ಹಣಕಾಸಿನ ನೆರವು ಪಡೆಯುವ ಫಲಾನುಭವಿಗಳನ್ನು ‘ಬಡತನದ ರೇಖೆಯ ಕೆಳಗಿನ’ (BPL) ಕುಟುಂಬಗಳಿಗೆ ಸೀಮಿತಗೊಳಿಸಲಾಗಿಲ್ಲ, ಆದರೆ ಈ ಯೋಜನೆಯಡಿಯಲ್ಲಿ, ಪ್ರಧಾನ್ ಮಂತ್ರಿ ಜನ ಆರೋಗ್ಯ ಯೋಜನೆ (PMJAY) ಯ 23 ಮಾನದಂಡಗಳ ಪ್ರಕಾರ, ಮೂರನೇ ಹಂತದ ಚಿಕಿತ್ಸೆಯನ್ನು ಹೊಂದಿರುವ ಸರ್ಕಾರಿ ಆಸ್ಪತ್ರೆಯಲ್ಲಿ ಮಾತ್ರ ಚಿಕಿತ್ಸೆ ಪಡೆಯಲು ಅರ್ಹರಾದ ಸುಮಾರು 4೦% ಅರ್ಹ ಫಲಾನುಭವಿ ಜನಸಂಖ್ಯೆಗೂ ಸಹ ವಿಸ್ತರಿಸಲಾಗುವುದು.
ಈ ನೀತಿಯಡಿಯಲ್ಲಿ, ಅಪರೂಪದ ರೋಗಗಳನ್ನು ಮೂರು ವರ್ಗಗಳಾಗಿ ವಿಂಗಡಿಸಲಾಗಿದೆ:
- ಒಂದು ಬಾರಿ ಚಿಕಿತ್ಸೆಯ ಅಗತ್ಯವಿರುವ ರೋಗಗಳು,
- ದೀರ್ಘಾವಧಿಯ ಆದರೆ ಅಗ್ಗದ ಚಿಕಿತ್ಸೆಯ ಅಗತ್ಯವಿರುವ ರೋಗಗಳು ಮತ್ತು
- ದುಬಾರಿ ಮತ್ತು ದೀರ್ಘಕಾಲೀನ ಚಿಕಿತ್ಸೆಯ ಅಗತ್ಯವಿರುವ ರೋಗಗಳು.
‘ಅಪರೂಪದ ಕಾಯಿಲೆಗಳು’ ಎಂದರೇನು?
- ಅಪರೂಪದ ಕಾಯಿಲೆಗಳನ್ನು ಅನಾಥ ಕಾಯಿಲೆ (orphan disease) ಎಂದೂ ಕರೆಯುತ್ತಾರೆ. ಇವು ಜನಸಂಖ್ಯೆಯ ಒಂದು ಸಣ್ಣ ಶೇಕಡಾವಾರು ಜನರ ಮೇಲೆ ಪರಿಣಾಮ ಬೀರುವ ರೋಗಗಳಾಗಿವೆ, ಅಂದರೆ ಅವು ಸಾಮಾನ್ಯವಾಗಿ ಕಡಿಮೆ ಸಂಖ್ಯೆಯ ಜನರಲ್ಲಿ ಕಂಡುಬರುತ್ತವೆ.
- ಅಪರೂಪದ ಕಾಯಿಲೆಗಳಲ್ಲಿ ಹೆಚ್ಚಿನವು ಆನುವಂಶಿಕ. ಒಬ್ಬ ವ್ಯಕ್ತಿಯಲ್ಲಿ, ರೋಗಲಕ್ಷಣಗಳು ತಕ್ಷಣವೇ ಗೋಚರಿಸದಿದ್ದರೂ ಸಹ ಈ ರೋಗಗಳು ಕೆಲವೊಮ್ಮೆ ಜೀವನದುದ್ದಕ್ಕೂ ಕಂಡುಬರುತ್ತವೆ.
ಸಾಮಾನ್ಯವಾಗಿ ಕಂಡುಬರುವ ಅಪರೂಪದ ಕಾಯಿಲೆಗಳು:
ಹಿಮೋಫಿಲಿಯಾ, ಥಲಸ್ಸೆಮಿಯಾ, ಕುಡಗೋಲು-ಕೋಶ ರಕ್ತಹೀನತೆ ಮತ್ತು ಮಕ್ಕಳಲ್ಲಿ ಪ್ರಾಥಮಿಕ ರೋಗನಿರೋಧಕ ಸಾಮರ್ಥ್ಯದ ಕೊರತೆ, ಸ್ವಯಂ-ಪ್ರತಿರಕ್ಷಣಾ ಕಾಯಿಲೆಗಳು, ಲೈಸೋಸೋಮಲ್ ಶೇಖರಣಾ ಕಾಯಿಲೆಗಳಾದ ಪೊಂಪೈ ಕಾಯಿಲೆ, ಹಿರ್ಷ್ಸ್ಪ್ರಂಗ್ ಕಾಯಿಲೆ, ಗೌಚರ್ಸ್ ಕಾಯಿಲೆ, ಸಿಸ್ಟಿಕ್ ಫೈಬ್ರೋಸಿಸ್, ಹೆಮಾಂಜಿಯೋಮಾಸ್ ಮತ್ತು ಕೆಲವು ರೀತಿಯ ಸ್ನಾಯುವಿನ ರೋಗಶಾಸ್ತ್ರ, ಭಾರತದಲ್ಲಿ, ಸಾಮಾನ್ಯವಾಗಿ: ಸಾಮಾನ್ಯ ಅಪರೂಪದ ಕಾಯಿಲೆಗಳ ಉದಾಹರಣೆಗಳು ಕಂಡುಬರುತ್ತವೆ.
ವಿಷಯಗಳು: ಅನಿವಾಸಿ ಭಾರತೀಯರು ಮತ್ತು ಭಾರತದ ಹಿತಾಸಕ್ತಿಗಳ ಮೇಲೆ ಅಭಿವೃದ್ಧಿ ಹೊಂದಿದ ಮತ್ತು ಅಭಿವೃದ್ಧಿ ಹೊಂದುತ್ತಿರುವ ದೇಶಗಳ ನೀತಿಗಳು ಮತ್ತು ರಾಜಕೀಯದ ಪರಿಣಾಮಗಳು.
ಜಂಟಿ ಸಮಗ್ರ ಕ್ರಿಯಾ ಯೋಜನೆ (JCPOA):
(Joint Comprehensive Plan of Action)
ಸಂದರ್ಭ:
‘ಇರಾನ್ನ ಪರಮಾಣು ಕಾರ್ಯಕ್ರಮ’ವನ್ನು ಸೀಮಿತಗೊಳಿಸುವ ಒಪ್ಪಂದಕ್ಕೆ ಮತ್ತೆ ಸೇರಲು ಅಮೇರಿಕ ಸಂಯುಕ್ತ ಸಂಸ್ಥಾನ ಮತ್ತು ಇರಾನ್, ಎರಡೂ ದೇಶಗಳು ಮಧ್ಯವರ್ತಿಗಳ ಮೂಲಕ ಶೀಘ್ರದಲ್ಲೇ ಮಾತುಕತೆಗಳನ್ನು ಪ್ರಾರಂಭಿಸಲಿವೆ. ಸುಮಾರು ಮೂರು ವರ್ಷಗಳ ಹಿಂದೆ ಅಂದಿನ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಈ ಒಪ್ಪಂದದಿಂದ ಹೊರನಡೆದಿದ್ದರು.
ಏನಿದು ಸಮಸ್ಯೆ?
- 2018 ರಲ್ಲಿ ಅಧ್ಯಕ್ಷ ಟ್ರಂಪ್, ಅಮೆರಿಕವನ್ನು ಒಪ್ಪಂದದಿಂದ ಹಿಂದೆ ಸರಿಸಿದರು. ಇದಲ್ಲದೆ, ಇರಾನ್ ಮೇಲೆ ನಿರ್ಬಂಧಗಳು ಮತ್ತು ಇತರ ಕಠಿಣ ಕ್ರಮಗಳನ್ನು ಹೇರುವ ಮೂಲಕ ಇರಾನ್ ಮೇಲೆ ‘ಗರಿಷ್ಠ ಒತ್ತಡ’ವನ್ನು ಹೇರಲು ಅವರು ನಿರ್ಧರಿಸಿದರು.
- ಇದಕ್ಕೆ ಪ್ರತಿಕ್ರಿಯೆಯಾಗಿ, ಇರಾನ್ ಯುರೇನಿಯಂ ಪುಷ್ಟೀಕರಣ ಮತ್ತು ಕೇಂದ್ರಾಪಗಾಮಿ ಸಾಧನಗಳ (Centrifuges) ತಯಾರಿಕೆಯನ್ನು ತ್ವರಿತಗೊಳಿಸಿತು, ಜೊತೆಗೆ ಅದರ ಪರಮಾಣು ಅಭಿವೃದ್ಧಿ ಕಾರ್ಯಕ್ರಮವು ನಾಗರಿಕ ಉದ್ದೇಶಗಳಿಗಾಗಿಯೆ ಹೊರತು ಮಿಲಿಟರಿ ಉದ್ದೇಶಗಳಿಗಾಗಿ ಅಲ್ಲ ಎಂದು ಒತ್ತಾಯವನ್ನು ಮಂಡಿಸಿತು.
- ಇರಾನ್ನ ನಡೆಗಳು ‘ಟ್ರಂಪ್ ಆಡಳಿತ ವಿಧಿಸಿರುವ ನಿರ್ಬಂಧಗಳಿಗೆ’ ಸಂಬಂಧಿಸಿದಂತೆ ಪ್ರಮುಖ ಜಾಗತಿಕ ಶಕ್ತಿಗಳ ಮೇಲೆ ಒತ್ತಡವನ್ನು ಹೆಚ್ಚಿಸಿದವು, ಇದು ಅಮೇರಿಕಾದ ಮಿತ್ರರಾಷ್ಟ್ರಗಳು ಮತ್ತು ಪಶ್ಚಿಮ ಏಷ್ಯಾದ ಕಾರ್ಯತಂತ್ರದ ಪಾಲುದಾರ ದೇಶಗಳ ನಡುವೆ ಉದ್ವಿಗ್ನತೆಯನ್ನು ಹೆಚ್ಚಿಸಲು ಕಾರಣವಾಗಿದೆ.
ಇರಾನ್ ಪರಮಾಣು ಒಪ್ಪಂದದ ಕುರಿತು:
- ಇದನ್ನು ಜಂಟಿ ಸಮಗ್ರ ಕ್ರಿಯಾ ಯೋಜನೆ (JCPOA) ಎಂದು ಕರೆಯಲಾಗುತ್ತದೆ.
- ಈ ಒಪ್ಪಂದ, ಅಂದರೆ ‘ಜಂಟಿ ಸಮಗ್ರ ಕ್ರಿಯಾ ಯೋಜನೆ’, 2013 ರಿಂದ 2015 ರವರೆಗೆ ಇರಾನ್ ಮತ್ತು ಪಿ 5 + 1 (ಚೀನಾ, ಫ್ರಾನ್ಸ್, ರಷ್ಯಾ, ಯುನೈಟೆಡ್ ಕಿಂಗ್ಡಮ್, ಯುನೈಟೆಡ್ ಸ್ಟೇಟ್ಸ್ ಮತ್ತು ಜರ್ಮನಿ ಮತ್ತು ಯುರೋಪಿಯನ್ ಯೂನಿಯನ್) ನಡುವಿನ ಸುದೀರ್ಘ ಮಾತುಕತೆಗಳ ಫಲಿತಾಂಶವಾಗಿದೆ.
- ಜಂಟಿ ಸಮಗ್ರ ಕ್ರಿಯಾ ಯೋಜನೆ (JCPOA) ಅಡಿಯಲ್ಲಿ, ಟೆಹ್ರಾನ್ ಮಧ್ಯಮ-ಪುಷ್ಟೀಕರಿಸಿದ ಯುರೇನಿಯಂನ ಸಂಗ್ರಹವನ್ನು ಸಂಪೂರ್ಣವಾಗಿ ತೆಗೆದುಹಾಕುತ್ತದೆ, ಕಡಿಮೆ-ಸಮೃದ್ಧ ಯುರೇನಿಯಂನ ಶೇಖರಣೆಯನ್ನು 98% ರಷ್ಟು ಕಡಿಮೆ ಮಾಡುತ್ತದೆ ಮತ್ತು ಮುಂದಿನ 13 ವರ್ಷಗಳಲ್ಲಿ ಅದರ ಮೂರನೇ ಎರಡರಷ್ಟು ಅನಿಲ ಕೇಂದ್ರಾಪಗಾಮಿಗಳನ್ನು ಕಡಿಮೆ ಮಾಡಲು ಒಪ್ಪಿಕೊಂಡಿತು.
- ಒಪ್ಪಂದದ ಅನುಷ್ಠಾನವನ್ನು ಮೇಲ್ವಿಚಾರಣೆ ಮಾಡಲು ಜಂಟಿ ಆಯೋಗವನ್ನು ಸ್ಥಾಪಿಸಲಾಯಿತು.
ಪ್ರಸ್ತುತ ಇರುವ ಕಳವಳದ ವಿಷಯ:
- ಜನವರಿ 2020 ರಲ್ಲಿ, ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ನ ಕಮಾಂಡರ್ ಜನರಲ್ ಕಾಸಿಮ್ ಸುಲೇಮಾನಿ ಅವರ ಮೇಲೆ ಡ್ರೋನ್ ಮೂಲಕ ದಾಳಿ ಮಾಡಿದ ನಂತರ, ಇರಾನ್ ‘ಜಂಟಿ ಸಮಗ್ರ ಕ್ರಿಯಾ ಯೋಜನೆ’ (JCPOA) ಯ ನಿಯಮಗಳಿಗೆ ಬದ್ಧವಾಗಿರುವುದಿಲ್ಲ ಎಂದು ಘೋಷಿಸಿತು.
- JCPOA ನ ಪತನದೊಂದಿಗೆ, ಉತ್ತರ ಕೊರಿಯಾದಂತೆ ಇರಾನ್ ಕೂಡ ಪರಮಾಣು ಅಸ್ಥಿರತೆಯತ್ತ ಒಲವು ತೋರಿತು, ಇದು ಈ ಪ್ರದೇಶದಲ್ಲಿ ಮತ್ತು ಅದಕ್ಕೂ ಮೀರಿದ ಗಮನಾರ್ಹ ಭೌಗೋಳಿಕ ರಾಜಕೀಯ ಅಸ್ಥಿರತೆಗೆ ಕಾರಣವಾಯಿತು.
ಭಾರತಕ್ಕೆ ಈ ಒಪ್ಪಂದದ ಮಹತ್ವ:
- ಇರಾನ್ ಮೇಲಿನ ನಿರ್ಬಂಧಗಳನ್ನು ತೆಗೆದುಹಾಕುವುದರೊಂದಿಗೆ, ಚಬಹಾರ್ ಬಂದರು, ಬಂದರ್ ಅಬ್ಬಾಸ್ ಬಂದರು ಮತ್ತು ಪ್ರಾದೇಶಿಕ ಸಂಪರ್ಕಗಳನ್ನು ಒಳಗೊಂಡ ಇತರ ಯೋಜನೆಗಳಲ್ಲಿನ ಭಾರತದ ಹಿತಾಸಕ್ತಿಗಳನ್ನು ಪುನರುಜ್ಜೀವನಗೊಳಿಸಬಹುದು.
- ಇದು ಪಾಕಿಸ್ತಾನದ ಗ್ವಾದರ್ ಬಂದರಿನಲ್ಲಿ ಚೀನಾದ ಉಪಸ್ಥಿತಿಯನ್ನು ತಟಸ್ಥಗೊಳಿಸಲು ಭಾರತಕ್ಕೆ ಸಹಾಯ ಮಾಡುತ್ತದೆ.
- ಯುಎಸ್ ಮತ್ತು ಇರಾನ್ ನಡುವಿನ ಸಂಬಂಧಗಳ ಪುನಃ ಸ್ಥಾಪನೆಯು ಇರಾನ್ನಿಂದ ಅಗ್ಗದ ದರದಲ್ಲಿ ತೈಲವನ್ನು ಖರೀದಿಸಲು ಮತ್ತು ಇಂಧನ ಸುರಕ್ಷತೆಯನ್ನು ಸಾಧಿಸಲು ಭಾರತಕ್ಕೆ ಸಹಾಯ ಮಾಡುತ್ತದೆ.
ಸಾಮಾನ್ಯ ಅಧ್ಯಯನ ಪತ್ರಿಕೆ : 3
ವಿಷಯಗಳು: ಭಾರತೀಯ ಆರ್ಥಿಕತೆ ಮತ್ತು ಯೋಜನೆ, ಸಂಪನ್ಮೂಲಗಳ ಕ್ರೋಡೀಕರಣ , ಪ್ರಗತಿ, ಅಭಿವೃದ್ಧಿ ಮತ್ತು ಉದ್ಯೋಗಕ್ಕೆ ಸಂಬಂಧಿಸಿದ ಸಮಸ್ಯೆಗಳು.
ಹರಿಯಾಣದ ಮೀಸಲಾತಿ (ಕೋಟಾ) ಕಾನೂನು:
(Haryana’s quota law)
ಸಂದರ್ಭ:
ಹರಿಯಾಣದ ‘ಖಾಸಗಿ ವಲಯದ ಉದ್ಯೋಗ ಕಾಯ್ದಿರಿಸುವಿಕೆ ಕಾಯ್ದೆ’ ಅಡಿಯಲ್ಲಿ ಖಾಸಗಿ ವಲಯದಲ್ಲಿ ರಾಜ್ಯದ ಜನರಿಗೆ ಶೇಕಡಾ 75 ರಷ್ಟು ಉದ್ಯೋಗಾವಕಾಶಗಳನ್ನು ಒದಗಿಸುವ ಮೀಸಲಾತಿ ಕಾನೂನು ಮೇ 1 ರಿಂದ ಜಾರಿಗೆ ಬರಲಿದೆ.
ಹರಿಯಾಣ ರಾಜ್ಯ ಸ್ಥಳೀಯ ಅಭ್ಯರ್ಥಿಗಳ ಉದ್ಯೋಗ ಮಸೂದೆ,2020 ಕುರಿತು:
(Haryana State Employment of Local Candidates Bill, 2020)
- ಮಸೂದೆಯು ಹರಿಯಾಣದಲ್ಲಿ, ಖಾಸಗಿ ಕಂಪೆನಿಗಳು 75% ಉದ್ಯೋಗಗಳನ್ನು ಸ್ಥಳೀಯ ಜನರಿಗೆ ಮಾಸಿಕ 50,000 ರೂ.ಗಳವರೆಗೆ ಅಥವಾ ಕಾಲಕಾಲಕ್ಕೆ ಸರ್ಕಾರದಿಂದ ಸೂಚಿಸಬಹುದಾದ ವೇತನ ಮಿತಿಗೆ ಒಳಪಟ್ಟು ಮೀಸಲಿಡಬೇಕಾಗುತ್ತದೆ ಎಂದು ತಿಳಿಸುತ್ತದೆ.
- ಸರ್ಕಾರದಿಂದ ಸೂಚಿಸಲ್ಪಟ್ಟ ಈ ಕಾನೂನು ಎಲ್ಲಾ ಕಂಪನಿಗಳು, ಸಂಘಗಳು, ಟ್ರಸ್ಟ್ಗಳು, ಸೀಮಿತ ಹೊಣೆಗಾರಿಕೆ ಪಾಲುದಾರಿಕೆ ಸಂಸ್ಥೆಗಳು, ಪಾಲುದಾರಿಕೆ ಸಂಸ್ಥೆಗಳು ಮತ್ತು 10 ಅಥವಾ 10 ಕ್ಕಿಂತ ಹೆಚ್ಚಿನ ವ್ಯಕ್ತಿಗಳನ್ನು ನೇಮಿಸುವ ಯಾವುದೇ ವ್ಯಕ್ತಿ ಅಥವಾ ಘಟಕಗಳಿಗೆ ಅನ್ವಯಿಸುತ್ತದೆ.
ಅಂತಹ ಶಾಸನಗಳಿಗೆ ಸಂಬಂಧಿಸಿದ ಕಾನೂನು ವಿವಾದಗಳು:
- ಉದ್ಯೋಗಗಳಲ್ಲಿ ( ಸ್ಥಳೀಯ)ನಿವಾಸದ ಆಧಾರದ ಮೇಲೆ ಮೀಸಲಾತಿಯ ಪ್ರಶ್ನೆ: ಶಿಕ್ಷಣದಲ್ಲಿ ನಿವಾಸದ ಆಧಾರದ ಮೇಲೆ ಮೀಸಲಾತಿ ಸಾಕಷ್ಟು ಸಾಮಾನ್ಯವಾಗಿದ್ದರೂ, ಸಾರ್ವಜನಿಕ ಉದ್ಯೋಗ ಸಂಬಂಧಿತ ವಿಷಯಗಳಲ್ಲಿ ಇದನ್ನು ಅನ್ವಯಿಸುವುದಕ್ಕೆ ನ್ಯಾಯಾಲಯಗಳು ವಿರುದ್ಧವಾಗಿವೆ. ಇದು ನಾಗರಿಕರು ಪಡೆದ ‘ಸಮಾನತೆಯ ಮೂಲಭೂತ ಹಕ್ಕುಗಳಿ’ ಗೆ ಸಂಬಂಧಿಸಿದ ಪ್ರಶ್ನೆಗಳನ್ನು ಹುಟ್ಟುಹಾಕುತ್ತದೆ.
- ಉದ್ಯೋಗದಲ್ಲಿ ಮೀಸಲಾತಿಯನ್ನು ಒದಗಿಸಲು ಬದ್ಧವಾಗಿರುವಂತೆ ಖಾಸಗಿ ವಲಯವನ್ನು ಒತ್ತಾಯಿಸುವ ವಿಷಯ: ಸಾರ್ವಜನಿಕ ಉದ್ಯೋಗದಲ್ಲಿ ಮೀಸಲಾತಿಯನ್ನು ಜಾರಿಗೊಳಿಸಲು, ರಾಜ್ಯವು ಸಂವಿಧಾನದ 16 (4) ನೇ ವಿಧಿಯಿಂದ ಅಧಿಕಾರವನ್ನು ಪಡೆಯುತ್ತದೆ. ಆದರೆ, ಸಂವಿಧಾನದಲ್ಲಿ, ಖಾಸಗಿ ವಲಯದ ಉದ್ಯೋಗದಲ್ಲಿ ಮೀಸಲಾತಿ ಜಾರಿಗೆ ತರಲು ರಾಜ್ಯದ ಅಧಿಕಾರಗಳ ಬಗ್ಗೆ ಯಾವುದೇ ಸ್ಪಷ್ಟ ನಿಬಂಧನೆಗಳನ್ನು ಮಾಡಿಲ್ಲ.
- ಆರ್ಟಿಕಲ್ 19 (1) (ಜಿ) ಯ ಮಾನದಂಡಗಳ ಮೇಲೆ ನ್ಯಾಯಾಂಗ ಪರಿಶೀಲನೆಯನ್ನು ಎದುರಿಸಲು ಈ ಕಾನೂನು ವಿಫಲವಾಗಬಹುದು. ಅಥವಾ ಅದಕ್ಕೆ ಸಾಧ್ಯವಾಗದಿರಬಹುದು.
ಈ ರೀತಿಯ ಕಾನೂನನ್ನು ಜಾರಿಗೆ ತರುವ ಹಿಂದಿನ ಸರ್ಕಾರದ ತಾರ್ಕಿಕತೆ:
- ಎಲ್ಲಾ ಉದ್ಯೋಗಗಳಲ್ಲಿ ಸಾರ್ವಜನಿಕ ವಲಯದ ಉದ್ಯೋಗಗಳ ಅನುಪಾತವು ತುಂಬಾ ಕಡಿಮೆಯಾಗಿದೆ. ಆದ್ದರಿಂದ, ಸಂವಿಧಾನವು ಎಲ್ಲಾ ನಾಗರಿಕರಿಗೆ ಸಮಾನತೆಯನ್ನು ಒದಗಿಸುವ ಗುರಿಯನ್ನು ಹೊಂದಿದೆ, ಈ ಆಶಯವನ್ನು ಪೂರೈಸಲು, ಖಾಸಗಿ ವಲಯಕ್ಕೆ ಕಾನೂನು ರಕ್ಷಣೆಯನ್ನು ವಿಸ್ತರಿಸುವ ಬಗ್ಗೆ ಮಾತನಾಡಲಾಗುತ್ತಿದೆ.
- ಖಾಸಗಿ ಕೈಗಾರಿಕೆಗಳು ಸಾರ್ವಜನಿಕ ಮೂಲಸೌಕರ್ಯಗಳನ್ನು ಅನೇಕ ವಿಧಗಳಲ್ಲಿ ಬಳಸುವುದರಿಂದ, ಸಾರ್ವಜನಿಕ ಬ್ಯಾಂಕುಗಳಿಂದ ಸಾಲ ಪಡೆಯಲು ಸಬ್ಸಿಡಿಗಳ ಹಂಚಿಕೆಯ ಮೂಲಕ ಭೂ ಬಳಕೆ, ತೆರಿಗೆ ರಿಯಾಯಿತಿ ಮತ್ತು ಅನೇಕ ಸಂದರ್ಭಗಳಲ್ಲಿ ಇಂಧನಕ್ಕೆ ಸಹಾಯಧನ ಇತ್ಯಾದಿಗಳನ್ನು ಬಳಸಲಾಗುತ್ತದೆ. ಆದ್ದರಿಂದ, ಖಾಸಗಿ ವಲಯಗಳಲ್ಲಿ ಮೀಸಲಾತಿ ಜಾರಿಗೊಳಿಸಲು ರಾಜ್ಯಕ್ಕೆ ಅಗತ್ಯವಾದ ಕಾನೂನು ಬದ್ಧ ಅಧಿಕಾರವಿದೆ.
ಉದ್ಯೋಗದ ಸಂದರ್ಭದಲ್ಲಿ ಈ ರೀತಿಯ ದೃಢೀಕರಣದ ಕ್ರಮವನ್ನು ಇತರ ದೇಶಗಳು ತೆಗೆದುಕೊಳ್ಳುತ್ತವೆಯೇ?
ಅನೇಕ ದೇಶಗಳಲ್ಲಿ ಜನಾಂಗೀಯ ಮತ್ತು ಲಿಂಗದ ಹಿನ್ನೆಲೆಯಲ್ಲಿ ದೃಢೀಕರಣದ ಕ್ರಮವನ್ನು ಅಳವಡಿಸಿಕೊಳ್ಳಲಾಗುತ್ತದೆ.
- ಉದಾಹರಣೆಗೆ, ಅಮೇರಿಕಾ ಸಂಯುಕ್ತ ಸಂಸ್ಥಾನದಲ್ಲಿ, ಉದ್ಯೋಗದಾತರಿಗೆ ಮೀಸಲಾತಿಯನ್ನು ಅನ್ವಯಿಸಲು ಯಾವುದೇ ಶಾಸನಬದ್ಧ ಕಡ್ಡಾಯವಿಲ್ಲದಿದ್ದರೂ, ತಾರತಮ್ಯಕ್ಕೆ ಒಳಗಾದ ಬಲಿಪಶುಗಳಿಗೆ, ನ್ಯಾಯಾಲಯವು ಅಂತಹ ಸೂಕ್ತವಾದ ದೃಢೀಕರಣದ ಕ್ರಮ ಮತ್ತು ವಿತ್ತೀಯ ಹಾನಿ ಮತ್ತು ತಡೆಯಾಜ್ಞೆ ಪರಿಹಾರವನ್ನು ಆದೇಶಿಸಬಹುದು.
- ಕೆನಡಾದಲ್ಲಿ ಉದ್ಯೋಗ ಇಕ್ವಿಟಿ ಕಾಯ್ದೆಯಡಿ, ಅಲ್ಪಸಂಖ್ಯಾತ ಗುಂಪುಗಳು, ವಿಶೇಷವಾಗಿ ಬುಡಕಟ್ಟು ಜನಾಂಗದವರು / ಮೂಲನಿವಾಸಿಗಳು ಫೆಡರಲ್ ನಿಯಂತ್ರಿತ ಕೈಗಾರಿಕೆಗಳಲ್ಲಿ ಮತ್ತು ಖಾಸಗಿ ವಲಯದಲ್ಲೂ ಈ ತಾರತಮ್ಯದಿಂದ ರಕ್ಷಿಸಲ್ಪಟ್ಟಿದ್ದಾರೆ.
ಕಳವಳಗಳು ಮತ್ತು ಸವಾಲುಗಳು:
- ಈ ಕಾನೂನು ಹರಿಯಾಣದಲ್ಲಿ ಕೈಗಾರಿಕಾ ಅಭಿವೃದ್ಧಿ ಮತ್ತು ಖಾಸಗಿ ಹೂಡಿಕೆಗೆ ಸವಾಲುಗಳನ್ನು ಒಡ್ಡುತ್ತದೆ.
- ಅಸ್ತಿತ್ವದಲ್ಲಿರುವ ಉದ್ಯೋಗಿಗಳನ್ನು ತೆಗೆದುಹಾಕಲು ಇದು ಕೆಲವು ಸಂಸ್ಥೆಗಳಿಗೆ ರಕ್ಷಣಾತ್ಮಕ ಗುರಾಣಿಯನ್ನು ಸಹ ಒದಗಿಸಬಹುದು.
- ಹೂಡಿಕೆದಾರರು ಮತ್ತು ವ್ಯವಹಾರಗಳು ಅತ್ಯುತ್ತಮ ಮಾನವ ಸಂಪನ್ಮೂಲಗಳ ಹುಡುಕಾಟದಲ್ಲಿ ರಾಜ್ಯದಿಂದ ಹೊರಹೋಗಲು ಪ್ರಾರಂಭಿಸಬಹುದು.
- ಈ ಕಾನೂನು ಸಂವಿಧಾನದ ಆಶಯಕ್ಕೆ ವಿರುದ್ಧವಾಗಿದೆ, ಕಾರಣ ಸಂವಿಧಾನದಲ್ಲಿ ಭಾರತದ ನಾಗರಿಕರಿಗೆ ದೇಶದಲ್ಲಿ ಎಲ್ಲಿಯಾದರೂ ಕೆಲಸ ಮಾಡುವ ಸ್ವಾತಂತ್ರ್ಯವನ್ನು ನೀಡಲಾಗಿದೆ.
ವಿಷಯಗಳು: ಭಾರತೀಯ ಆರ್ಥಿಕತೆ ಮತ್ತು ಯೋಜನೆ, ಸಂಪನ್ಮೂಲಗಳ ಕ್ರೂಢೀಕರಣ , ಬೆಳವಣಿಗೆ, ಅಭಿವೃದ್ಧಿ ಮತ್ತು ಉದ್ಯೋಗಕ್ಕೆ ಸಂಬಂಧಿಸಿದ ವಿಷಯಗಳು.
ನಾಮನಿರ್ದೇಶನ ಸಂಹಿತೆಯ ಸಾಮರಸ್ಯ ವ್ಯವಸ್ಥೆ (HSN ಕೋಡ್):
(Harmonized System of Nomenclature Code)
ಸಂದರ್ಭ:
ಹಿಂದಿನ ಹಣಕಾಸು ವರ್ಷದಲ್ಲಿ, 5 ಕೋಟಿ ರೂ.ಗಳಿಗಿಂತ ಹೆಚ್ಚಿನ ವಹಿವಾಟು ಹೊಂದಿರುವ ಜಿಎಸ್ಟಿ ತೆರಿಗೆ ಪಾವತಿದಾರರಿಗೆ 6-ಅಂಕಿಗಳ HSN ಕೋಡ್ ಅಂದರೆ, ‘ನಾಮನಿರ್ದೇಶನ ಸಂಹಿತೆಯ ಸಾಮರಸ್ಯ ವ್ಯವಸ್ಥೆ ಕೊಡ್’ (Harmonized System of Nomenclature Code- HSN CODE) ಅನ್ನು ಸಲ್ಲಿಸುವುದು ಕಡ್ಡಾಯವಾಗಿದೆ. ಈ ನಿಬಂಧನೆಯು ಏಪ್ರಿಲ್ 1 ರಿಂದ ಜಾರಿಯಾಗಲಿದೆ.
‘ಎಚ್ಎಸ್ ಕೋಡ್’ ಎಂದರೆ ಏನು?-ಸಾಮರಸ್ಯ ವ್ಯವಸ್ಥೆಯೇ ಅಥವಾ ಸರಳ ಅರ್ಥದಲ್ಲಿ ‘HS’ ಎಂಬುದೇ:
ಇದು ಆರು ಅಂಕಿಗಳ ಗುರುತಿನ ಸಂಕೇತವಾಗಿದೆ. ಆರು-ಅಂಕಿಯ HS ಕೋಡ್ನಲ್ಲಿ, ಮೊದಲ ಎರಡು ಅಂಕೆಗಳು HS ಅಧ್ಯಾಯವನ್ನು ಪ್ರತಿನಿಧಿಸುತ್ತವೆ, ಮುಂದಿನ ಎರಡು ಅಂಕಿಗಳು HS ಶೀರ್ಷಿಕೆಯನ್ನು ನೀಡಿದರೆ, ಮತ್ತು ಕೊನೆಯ ಎರಡು ಅಂಕಿಗಳು HS ಉಪ-ಶೀರ್ಷಿಕೆಯನ್ನು ಸೂಚಿಸುತ್ತವೆ.
- ಇದನ್ನು ವಿಶ್ವ ಕಸ್ಟಮ್ಸ್ ಸಂಸ್ಥೆ (the World Customs Organization- WCO) ಅಭಿವೃದ್ಧಿಪಡಿಸಿದೆ.
- ಇದನ್ನು ಸರಕುಗಳಿಗಾಗಿ ‘ಸಾರ್ವತ್ರಿಕ ಆರ್ಥಿಕ ಭಾಷೆ’ ಎಂದು ಕರೆಯಲಾಗುತ್ತದೆ.
- ಇದು ವಿವಿಧೋದ್ದೇಶ ಅಂತರರಾಷ್ಟ್ರೀಯ ಉತ್ಪನ್ನ ಕ್ಯಾಟಲಾಗ್ / ನಾಮಕರಣವಾಗಿದೆ.
- ಪ್ರಸ್ತುತ, ಈ ವ್ಯವಸ್ಥೆಯು ಸುಮಾರು 5,000 ಸರಕುಗಳ ಗುಂಪುಗಳನ್ನು ಒಳಗೊಂಡಿದೆ.
ಅಗತ್ಯ ಮತ್ತು ಪ್ರಾಮುಖ್ಯತೆ:
- ಈ ವ್ಯವಸ್ಥೆಯನ್ನು 200 ಕ್ಕೂ ಹೆಚ್ಚು ದೇಶಗಳು ತಮ್ಮ ಕಸ್ಟಮ್ಸ್ ಸುಂಕ, ಅಂತರರಾಷ್ಟ್ರೀಯ ವ್ಯಾಪಾರ ಅಂಕಿಅಂಶಗಳನ್ನು ಸಂಗ್ರಹಿಸಲು, ವ್ಯಾಪಾರ ನೀತಿಗಳನ್ನು ರೂಪಿಸಲು ಮತ್ತು ಸರಕುಗಳನ್ನು ಮೇಲ್ವಿಚಾರಣೆ ಮಾಡಲು ಬಳಸುತ್ತವೆ.
- ಈ ವ್ಯವಸ್ಥೆಯು ಕಸ್ಟಮ್ಸ್ ಮತ್ತು ವ್ಯಾಪಾರ ಪ್ರಕ್ರಿಯೆಗಳ ಸಾಮರಸ್ಯಕ್ಕೆ ಸಹಾಯ ಮಾಡುತ್ತದೆ ಮತ್ತು ಅಂತರರಾಷ್ಟ್ರೀಯ ವ್ಯಾಪಾರದಲ್ಲಿನ ವೆಚ್ಚವನ್ನು ಕಡಿಮೆ ಮಾಡುತ್ತದೆ.
ವಿಷಯಗಳು: ಐಟಿ, ಬಾಹ್ಯಾಕಾಶ, ಕಂಪ್ಯೂಟರ್, ರೊಬೊಟಿಕ್ಸ್, ನ್ಯಾನೊ-ತಂತ್ರಜ್ಞಾನ, ಜೈವಿಕ ತಂತ್ರಜ್ಞಾನ ಮತ್ತು ಬೌದ್ಧಿಕ ಆಸ್ತಿ ಹಕ್ಕುಗಳಿಗೆ ಸಂಬಂಧಿಸಿದ ವಿಷಯಗಳಲ್ಲಿ ಜಾಗೃತಿ.
ನಾಸಾದ ಇನ್ಸೈಟ್ ಲ್ಯಾಂಡರ್:
(Nasa’s InSight lander)
ಸಂದರ್ಭ:
ನಾಸಾದ ಇನ್ಸೈಟ್ ಲ್ಯಾಂಡರ್ 2018 ರ ನವೆಂಬರ್ನಲ್ಲಿ ಕೆಂಪು ಗ್ರಹದ ಮೇಲ್ಮೈಗೆ ಸ್ಪರ್ಶ ಮಾಡಿದಾಗಿನಿಂದ ಮಂಗಳ ಗ್ರಹದಲ್ಲಿ 500 ಕ್ಕೂ ಹೆಚ್ಚು ಭೂಕಂಪಗಳನ್ನು ದಾಖಲಿಸಿದೆ.
- ಇತ್ತೀಚೆಗೆ ‘ಸೆರ್ಬರಸ್ ಫೊಸೆ’ (Cerberus Fossae) ಎಂಬ ಪ್ರದೇಶದಲ್ಲಿ 3.3 ಮತ್ತು 3.1 ತೀವ್ರತೆಯ ಎರಡು ಭೂಕಂಪಗಳು ದಾಖಲಾಗಿವೆ.
- ಈ ಸಂಶೋಧನೆಗಳು ಮಂಗಳ ಗ್ರಹವು ಇನ್ನೂ ಸಹ ಭೂಕಂಪನ ವಿದ್ಯಮಾನಗಳಿಂದ ಸಕ್ರಿಯವಾಗಿದೆ ಎಂಬುದನ್ನು ಪುಷ್ಟೀಕರಿಸುತ್ತವೆ.
‘ಇನ್ಸೈಟ್ ಮಿಷನ್’ ಕುರಿತು:
- ಇನ್ಸೈಟ್ ಮಿಷನ್ ನಾಸಾದ ಡಿಸ್ಕವರಿ ಕಾರ್ಯಕ್ರಮದ ಒಂದು ಭಾಗವಾಗಿದೆ.
- ಇದು ಮಂಗಳನ ಮೇಲ್ಮೈ ಕೆಳಗಿನ ಆಳವನ್ನು ತಲುಪುವ ಮೊದಲ ಮಿಷನ್ ಆಗಿರುತ್ತದೆ ಮತ್ತು ಇದು ಗ್ರಹದ ಆಂತರಿಕ ರಚನೆಯನ್ನು ಅದರ ಶಾಖ ಉತ್ಪಾದನೆಯನ್ನು ಅಳೆಯುವ ಮೂಲಕ ಅಧ್ಯಯನ ಮಾಡುತ್ತದೆ ಮತ್ತು ಭೂಕಂಪಗಳಿಗೆ ಹೋಲುವ ಮಂಗಳ ಗ್ರಹದ ನೆಲದ ಕಂಪಗಳನ್ನು (marsquakes) ಆಲಿಸುತ್ತದೆ.
- ಇದು ಗ್ರಹದ ಆಂತರಿಕ ರಚನೆಯನ್ನು ನಕ್ಷೆ ಮಾಡಲು ಮಂಗಳನ ಭೂಕಂಪಗಳಿಂದ ಉತ್ಪತ್ತಿಯಾಗುವ ಭೂಕಂಪನ ಅಲೆಗಳನ್ನು ಬಳಸುತ್ತದೆ.
ಈ ಇನ್ಸೈಟ್ ಮಿಷನ್ ನ ಮಹತ್ವ:
- ಮಂಗಳ ಗ್ರಹದ ರಚನೆಗೆ ಸಂಬಂಧಿಸಿದ ಸಂಶೋಧನೆಗಳು ಭೂಮಿ ಸೇರಿದಂತೆ ಕಲ್ಲಿನ ಗ್ರಹಗಳ ರಚನೆ ಅಥವಾ ಮೂಲವನ್ನು ಚೆನ್ನಾಗಿ ಅರ್ಥಮಾಡಿಕೊಳ್ಳಲು ಸಹಾಯ ಮಾಡುತ್ತದೆ.
- ಇನ್ಸೈಟ್ ಮಿಷನ್ ಮಂಗಳ ಗ್ರಹದ ಮೇಲ್ಮೈ ಕೆಳಗೆ ಆಳವಾದ ಪ್ರದೇಶಗಳನ್ನು ಪ್ರವೇಶಿಸುವ ಮೂಲಕ ಭೂ ಗ್ರಹಗಳ ರಚನೆಯ ಪ್ರಕ್ರಿಯೆಗಳ ಚಿಹ್ನೆಗಳನ್ನು ಅನ್ವೇಷಿಸುತ್ತದೆ, ಜೊತೆಗೆ ಗ್ರಹದ “ಪ್ರಮುಖ ಚಿಹ್ನೆಗಳು”: ಗ್ರಹದ ನಾಡಿ (ಭೂಕಂಪ ಶಾಸ್ತ್ರ), “ತಾಪಮಾನ” (ಶಾಖದ ಹರಿವಿನ ತನಿಖೆ) ಮತ್ತು “ಪ್ರತಿಫಲನಗಳನ್ನು” ಅಳೆಯುತ್ತದೆ (ನಿಖರವಾದ ಟ್ರ್ಯಾಕಿಂಗ್).
- ನಾಸಾದ ಇನ್ಸೈಟ್ ಮಿಷನ್, ವಿಜ್ಞಾನದ ಅತ್ಯಂತ ಮೂಲಭೂತ ಪ್ರಶ್ನೆಗಳಲ್ಲಿ ಒಂದಾದ: ಭೂ ಗ್ರಹಗಳ ರಚನೆ ಹೇಗಾಯಿತು? ಎಂಬ ಪ್ರಶ್ನೆಗೆ ಉತ್ತರಗಳನ್ನು ಹುಡುಕಲು ಪ್ರಯತ್ನಿಸುವುದಾಗಿದೆ.
