Print Friendly, PDF & Email

[ ದೈನಂದಿನ ಪ್ರಚಲಿತ ಘಟನೆಗಳು ] ದಿನಾಂಕ – 1ನೇ ಏಪ್ರಿಲ್ 2021

 

ಪರಿವಿಡಿ :

 ಸಾಮಾನ್ಯ ಅಧ್ಯಯನ ಪತ್ರಿಕೆ 1:

1. ವಿವಾಹ ವಿಚ್ಛೇದನ ಮತ್ತು ಜೀವನಾಂಶದ ಬಗ್ಗೆ ಏಕರೂಪದ ನಾಗರಿಕ ಕಾನೂನಿನ ವಿರುದ್ಧ ವರಿಷ್ಠ ನ್ಯಾಯಾಲಯದಲ್ಲಿ ಅರ್ಜಿ.

 

ಸಾಮಾನ್ಯ ಅಧ್ಯಯನ ಪತ್ರಿಕೆ 2:

1. ಎಮರ್ಜೆನ್ಸಿ ಕ್ರೆಡಿಟ್ ಲೈನ್ ಗ್ಯಾರಂಟಿ ಸ್ಕೀಮ್ (ECLGS).

2. ಲಸಿಕೆ ಪೋಲು ಎಂದರೇನು, ಅದನ್ನು ಹೇಗೆ ತಡೆಯಬಹುದು?

 

ಸಾಮಾನ್ಯ ಅಧ್ಯಯನ ಪತ್ರಿಕೆ 3:

1. ಹಣದುಬ್ಬರ ಗುರಿ.

2. ಕೃಷಿ ಕಾನೂನುಗಳ ಕುರಿತ ವರದಿಯನ್ನು ಸರ್ವೋಚ್ಛ ನ್ಯಾಯಾಲಯಕ್ಕೆ ಸಲ್ಲಿಸಿದ ಸಮಿತಿ.

3. ಆಹಾರ ಕ್ಷೇತ್ರಕ್ಕೆ ಪ್ರೋತ್ಸಾಹಧನ ನೀಡಲು ಅನುಮೋದನೆ ನೀಡಿದ ಕೇಂದ್ರ ಮಂತ್ರಿಮಂಡಲ.

 

ಪೂರ್ವಭಾವಿ ಪರೀಕ್ಷೆಗೆ ಸಂಬಂಧಿಸಿದ ವಿದ್ಯಮಾನಗಳು:

1. ಮಿಲಿಟರಿ ಪಶು-ಸಂಗೋಪನಾ ಕೇಂದ್ರಗಳು.

2. ಎಐಎಂ-ಪ್ರೈಮ್.

 


ಸಾಮಾನ್ಯ ಅಧ್ಯಯನ ಪತ್ರಿಕೆ : 2


 

ವಿಷಯಗಳು: ಮಹಿಳಾ ಸಂಬಂಧಿತ ಸಮಸ್ಯೆಗಳು.

ವಿವಾಹ ವಿಚ್ಛೇದನ ಮತ್ತು ಜೀವನಾಂಶದ ಬಗ್ಗೆ ಏಕರೂಪದ ನಾಗರಿಕ ಕಾನೂನಿನ ವಿರುದ್ಧ ವರಿಷ್ಠ ನ್ಯಾಯಾಲಯದಲ್ಲಿ ಅರ್ಜಿ:


(Plea in SC against uniform civil law on divorce and alimony)

 ಸಂದರ್ಭ:

ಇತ್ತೀಚೆಗೆ, ಎಲ್ಲಾ ಧರ್ಮಗಳಿಗೆ ‘ಏಕರೂಪದ ಕಾನೂನು’ ನೀಡುವ ವಿಚಾರದ ವಿರುದ್ಧ ಸುಪ್ರೀಂ ಕೋರ್ಟ್‌ನಲ್ಲಿ ಅರ್ಜಿ ಸಲ್ಲಿಸಲಾಗಿದೆ. ಈ ಅರ್ಜಿಯು “ಏಕರೂಪದ ಕಾನೂನು” ಒದಗಿಸುವ ಸೋಗಿನಲ್ಲಿ ಮುಸ್ಲಿಂ ಮಹಿಳೆಯರು ತಮ್ಮ ಧರ್ಮವನ್ನು ಆಚರಿಸುವ ಧಾರ್ಮಿಕ ಮೂಲಭೂತ ಹಕ್ಕನ್ನು ಕಸಿದುಕೊಳ್ಳುವ “ನಿರ್ದಯ ಪ್ರಯತ್ನ”(blatant attempt) ವಾಗಿದೆ ಎಂದು ಇದರ ವಿರುದ್ಧ ಸುಪ್ರೀಂ ಕೋರ್ಟ್‌ನಲ್ಲಿ ಅರ್ಜಿ ಸಲ್ಲಿಸಲಾಗಿದೆ.

ಏನಿದು ಸಮಸ್ಯೆ?

ವಿಚ್ಛೇದನ, ನಿರ್ವಹಣೆ ಮತ್ತು ಜೀವನಾಂಶಕ್ಕೆ ಸಂಬಂಧಿಸಿದಂತೆ ‘ಏಕರೂಪದ ನಾಗರಿಕ ಕಾನೂನು’ ಜಾರಿಗೆ ತರುವ ಮೂಲಕ ತನ್ನಂತಹ ಮುಸ್ಲಿಂ ಮಹಿಳೆಯರ ಜೀವನ ಸುಧಾರಣೆಯ ಬಗ್ಗೆ ತೀರ್ಮಾನ ತೆಗೆದುಕೊಳ್ಳುವ ಮೊದಲು ನ್ಯಾಯಾಲಯವು ತನ್ನ ವಾದವನ್ನು ಆಲಿಸಬೇಕು ಎಂದು ಅರ್ಜಿದಾರರು ಸುಪ್ರೀಂ ಕೋರ್ಟ್‌ಗೆ ಮನವಿ ಸಲ್ಲಿಸಿದ್ದಾರೆ.

  • ಕಳೆದ ವರ್ಷದ ಡಿಸೆಂಬರ್‌ನಲ್ಲಿ ಸುಪ್ರೀಂ ಕೋರ್ಟ್, ವಕೀಲ ಎ.ಕೆ. ಉಪಾಧ್ಯಾಯ ಅವರು ಎಲ್ಲಾ ಧರ್ಮಗಳಿಗೂ ಸಂಬಂಧಿಸಿದಂತೆ ವಿಚ್ಛೇದನ, ನಿರ್ವಹಣೆ ಮತ್ತು ಜೀವನಾಂಶಕ್ಕಾಗಿ ಏಕರೂಪದ ಕಾನೂನು ಜಾರಿಗೆ ತರುವಂತೆ ಕೋರಿ ಸಲ್ಲಿಸಿದ್ದ ಅರ್ಜಿಯನ್ನು ಆಲಿಸಲು ಒಪ್ಪಿಗೆ ಸೂಚಿಸಿತ್ತು.
  • ವಕೀಲ ಎ.ಕೆ. ಉಪಾಧ್ಯಾಯ ಅವರು, ಕೆಲವು ಧರ್ಮಗಳಲ್ಲಿ, ವಿಚ್ಛೇದನ, ನಿರ್ವಹಣೆ ಮತ್ತು ಜೀವನಾಂಶಕ್ಕೆ ಸಂಬಂಧಿಸಿದ ಕಾನೂನುಗಳು ಮಹಿಳೆಯರ ವಿರುದ್ಧ ತಾರತಮ್ಯವನ್ನುಂಟುಮಾಡುತ್ತವೆ ಮತ್ತು ಅವರನ್ನು ಅಂಚಿನಲ್ಲಿಡುತ್ತವೆ ಅಥವಾ ಸಮಾಜದ ಕಟ್ಟಕಡೆಯ ಸ್ಥಾನದಲ್ಲಿ ನಿಲ್ಲಿಸುತ್ತದೆ ಎಂದು ವಾದಿಸಿದ್ದರು.

ಏಕರೂಪದ ಕಾನೂನಿನ’ ಅಗತ್ಯತೆ:

ಅಸ್ತಿತ್ವದಲ್ಲಿರುವ ವಿಭಿನ್ನ ವ್ಯತ್ಯಾಸಗಳು ಒಂದು ಧರ್ಮದಿಂದ ಇನ್ನೊಂದು ಧರ್ಮಕ್ಕೆ ಬದಲಾಗುತ್ತವೆ. ಇವುಗಳು, ಸಮಾನತೆಯ ಹಕ್ಕನ್ನು (ಸಂವಿಧಾನದ 14 ನೇ ವಿಧಿ ಪ್ರಕಾರ) ಮತ್ತು ಧರ್ಮ ಮತ್ತು ಲಿಂಗದ ಆಧಾರದ ಮೇಲೆ ತಾರತಮ್ಯವನ್ನು (ಸಂವಿಧಾನದ 15 ನೇ ವಿಧಿ ಪ್ರಕಾರ) ಮತ್ತು ಘನತೆಯಿಂದ ಬದುಕುವ ಹಕ್ಕನ್ನು ಉಲ್ಲಂಘಿಸುತ್ತವೆ (ಪರಿಚ್ಛೇದ 21 ರ ಪ್ರಕಾರ).

  • ಆದ್ದರಿಂದ, ವಿಚ್ಛೇದನ, ನಿರ್ವಹಣೆ ಮತ್ತು ಜೀವನಾಂಶಕ್ಕೆ ಸಂಬಂಧಿಸಿದ ಕಾನೂನುಗಳು ಲಿಂಗ-ತಟಸ್ಥ ಮತ್ತು ಧರ್ಮ-ತಟಸ್ಥ’ (gender-neutral and religion-neutral) ಆಗಿರಬೇಕು.

ಭಾರತದಲ್ಲಿ ‘ವೈಯಕ್ತಿಕ ಕಾನೂನು’ ಯ ಸ್ಥಿತಿ:

ವೈಯಕ್ತಿಕ ಕಾನೂನಿಗೆ ಸಂಬಂಧಿಸಿದ ವಿಷಯಗಳಾದ ಮದುವೆ, ವಿಚ್ಛೇದನ, ಆನುವಂಶಿಕತೆ ಇತ್ಯಾದಿಗಳು ಸಂವಿಧಾನದ ಸಮವರ್ತಿ ಪಟ್ಟಿಯಲ್ಲಿ ಕಂಡುಬರುತ್ತವೆ.

  • ಶಾಸನಬದ್ಧ ಕಾನೂನನ್ನು ಜಾರಿಗೆ ತರುವ ಮೂಲಕ ಹಿಂದೂ ವೈಯಕ್ತಿಕ ಕಾನೂನನ್ನು ಸಾಮಾನ್ಯವಾಗಿ ಜಾತ್ಯತೀತ ಮತ್ತು ಆಧುನಿಕಗೊಳಿಸಲಾಗಿದೆ (ಹಿಂದೂ ವಿವಾಹ ಕಾಯ್ದೆ, 1955).
  • ಮತ್ತೊಂದೆಡೆ, ‘ಮುಸ್ಲಿಂ ವೈಯಕ್ತಿಕ ಕಾನೂನು’ (ಉದಾ., 1937 ರ ಷರಿಯಾ ಕಾನೂನು) ಇನ್ನೂ ಸಾಂಪ್ರದಾಯಿಕವಾಗಿದೆ ಮತ್ತು ಅದರ ವಿಷಯ ಮತ್ತು ದೃಷ್ಟಿಕೋನದಲ್ಲಿ ಯಾವುದೇ ಬದಲಾವಣೆಯಾಗಿಲ್ಲ.
  • ಇದಲ್ಲದೆ, ಕ್ರಿಶ್ಚಿಯನ್ ಮತ್ತು ಯಹೂದಿ ಧರ್ಮಗಳು ಸಹ ವಿಭಿನ್ನ ವೈಯಕ್ತಿಕ ಕಾನೂನುಗಳನ್ನು ಹೊಂದುವ ಮೂಲಕ ತಮ್ಮ ಜನಾಂಗದವರನ್ನು ನಿಯಂತ್ರಿಸುತ್ತವೆ.

ಸಂವಿಧಾನದ 142ನೇ ವಿಧಿಯ ಪ್ರಕಾರ:

ಪರಿಚ್ಛೇದ 142 ರ ಅಡಿಯಲ್ಲಿ, ಪಕ್ಷಗಳ ನಡುವೆ (ಎರಡು ಕಡೆಯ ವಾದಿ ಪ್ರತಿವಾದಿಗಳ ನಡುವೆ) ‘ಪೂರ್ಣ ನ್ಯಾಯದಾನ’ ಮಾಡಲು ವಿಶಿಷ್ಟ ಅಧಿಕಾರವನ್ನು ಸುಪ್ರೀಂ ಕೋರ್ಟ್‌ಗೆ ನೀಡಲಾಗಿದೆ, ಅಂದರೆ, ಕೆಲವೊಮ್ಮೆ ಸ್ಥಾಪಿತ ನಿಯಮಗಳು ಮತ್ತು ಕಾನೂನುಗಳ ಅಡಿಯಲ್ಲಿ ಪರಿಹಾರವು ಕಂಡುಬರದಿದ್ದಾಗ, ನ್ಯಾಯಾಲಯವು ವಾಸ್ತವದಲ್ಲಿ ಪ್ರಕರಣದ ಸತ್ಯಾಸತ್ಯತೆಗಳನ್ನು ಎರಡು ಪಕ್ಷದವರಿಗೆ ಸರಿಹೊಂದುವ ರೀತಿಯಲ್ಲಿ ವಿವರಿಸಬಹುದು. ಇದರ ಪ್ರಕಾರ, ವಿವಾದದ ಬಗ್ಗೆ ‘ಅಂತಿಮ ತೀರ್ಪು’ ನೀಡಬಹುದು.

ಜೀವನಾಂಶ: (Alimony)

 ಎಲ್ಲಾ ಸಮುದಾಯಗಳಿಗೆ ಅನ್ವಯವಾಗುವ 1973 ರ ಅಪರಾಧ ದಂಡ ಪ್ರಕ್ರಿಯಾ ಸಂಹಿತೆಯ ಸೆಕ್ಷನ್ 125 , ಹೆಂಡತಿಯರು, ಮಕ್ಕಳು ಮತ್ತು ಪೋಷಕರು ತಮ್ಮ ಜೀವನ ನಿರ್ವಹಣೆಗೆ ಸಾಕಷ್ಟು ಮತ್ತು ಸೂಕ್ತವಾದ ಆದಾಯವನ್ನು ಗಳಿಸಲು ಅಥವಾ ಸಂಪಾದನೆಯ ಮಾರ್ಗಗಳನ್ನು ಹುಡುಕಲು ಅಸಮರ್ಥರಾಗಿದ್ದರೆ ಅಥವಾ ದೈಹಿಕವಾಗಿ ಅಥವಾ ಮಾನಸಿಕವಾಗಿ ಅಸಮರ್ಥರಾಗಿದ್ದಾರೆ ಅಂತಹವರು ಜೀವನಾಂಶ ಭತ್ಯೆಯನ್ನು ಪಡೆಯಲು ಅವಕಾಶ ಕಲ್ಪಿಸಿದೆ.  ಈ ವಿಭಾಗದ ಅಡಿಯಲ್ಲಿ, ಪತಿಯಿಂದ ವಿಚ್ಛೇದನ ಪಡೆಯದ ಹೆಂಡತಿಗೂ ಕೂಡ ತನ್ನ ಗಂಡನಿಂದ ಜೀವನಾಂಶ ಪಡೆಯುವ ಹಕ್ಕಿದೆ.

 


ಸಾಮಾನ್ಯ ಅಧ್ಯಯನ ಪತ್ರಿಕೆ : 2


 

ವಿಷಯಗಳು: ಕೇಂದ್ರ ಮತ್ತು ರಾಜ್ಯಗಳಿಂದ ಜನಸಂಖ್ಯೆಯ ಅತ್ಯಂತ ದುರ್ಬಲ ವರ್ಗದವರಿಗೆ ಇರುವ ಕಲ್ಯಾಣ ಯೋಜನೆಗಳು ಮತ್ತು ಈ ಯೋಜನೆಗಳ ಕಾರ್ಯಕ್ಷಮತೆ; ಈ ದುರ್ಬಲ ವರ್ಗದವರ ರಕ್ಷಣೆ ಮತ್ತು ಸುಧಾರಣೆಗಾಗಿ ಸ್ಥಾಪಿಸಲಾದ ಕಾರ್ಯವಿಧಾನಗಳು, ಕಾನೂನುಗಳು, ಮತ್ತು ಸಂಸ್ಥೆಗಳು.

ಎಮರ್ಜೆನ್ಸಿ ಕ್ರೆಡಿಟ್ ಲೈನ್ ಗ್ಯಾರಂಟಿ ಸ್ಕೀಮ್ (ECLGS).


(Emergency Credit Line Guarantee Scheme (ECLGS)

 ಸಂದರ್ಭ:

ಇತ್ತೀಚೆಗೆ, ಸರ್ಕಾರವು 3 ಲಕ್ಷ ಕೋಟಿ ರೂ.ಗಳ ತುರ್ತು ಸಾಲ ನೀಡುವ ಖಚಿತ ಯೋಜನೆಯನ್ನು (Emergency Credit Line Guarantee Scheme (ECLGS), ಇನ್ನೂ ಮೂರು ತಿಂಗಳ ಅವಧಿಗೆ ಅಂದರೆ ಜೂನ್ 30 ರವರೆಗೆ ವಿಸ್ತರಿಸಿದೆ, ಮತ್ತು ಆತಿಥ್ಯ, ಪ್ರಯಾಣ ಮತ್ತು ಪ್ರವಾಸೋದ್ಯಮ ದಂತಹ  ಹೊಸ ಕ್ಷೇತ್ರಗಳನ್ನು ಸೇರಿಸುವ ಮೂಲಕ ಯೋಜನೆಯ ವ್ಯಾಪ್ತಿಯನ್ನು ವಿಸ್ತರಿಸಿದೆ.

ವಿವರಗಳು:

  • ECLGS0 ಅಡಿಯಲ್ಲಿ, ಎಲ್ಲಾ ಸಾಲ ನೀಡುವ ಸಂಸ್ಥೆಗಳ ಒಟ್ಟು ಬಾಕಿ ಸಾಲದ 40 ಪ್ರತಿಶತದವರೆಗಿನ ವಿಸ್ತರಣೆಯನ್ನು ಫೆಬ್ರವರಿ 29, 2020 ರಲ್ಲಿದ್ದಂತೆ ಒಳಗೊಂಡಿರುತ್ತದೆ.
  • ECLGS0 ರ ಅಡಿಯಲ್ಲಿ ನೀಡಲಾಗುವ ಸಾಲಗಳು 2 ವರ್ಷಗಳ ಗ್ರೇಸ್ ಅವಧಿ ಸೇರಿದಂತೆ 6 ವರ್ಷಗಳ ಅವಧಿಯನ್ನು ಹೊಂದಿರುತ್ತವೆ.

ಈ ಯೋಜನೆಯ ಕುರಿತು:

  • ತುರ್ತು ಕ್ರೆಡಿಟ್ ಲೈನ್ ಗ್ಯಾರಂಟಿ ಸ್ಕೀಮ್ (ECLGS) ಅನ್ನು 2020 ರ ಮೇ ತಿಂಗಳಲ್ಲಿ ಘೋಷಿಸಲಾದ ಆತ್ಮ ನಿರ್ಭರ ಭಾರತ ಅಭಿಯಾನದ ಪ್ಯಾಕೇಜಿನ ಭಾಗವಾಗಿ ಪ್ರಾರಂಭಿಸಲಾಯಿತು. ಕೊರೊನೊವೈರಸ್ ಕಾರಣದಿಂದಾಗಿ ವಿಧಿಸಲಾದ ಲಾಕ್‌ಡೌನ್‌ನಿಂದ ಉಂಟಾಗುವ ಬಿಕ್ಕಟ್ಟನ್ನು ತಗ್ಗಿಸಲು, ನಿರ್ದಿಷ್ಟವಾಗಿ ಸೂಕ್ಷ್ಮ, ಸಣ್ಣ ಮತ್ತು ಮಧ್ಯಮ ಉದ್ಯಮಗಳಿಗೆ (MSME) ಸಾಲ ನೀಡುವುದು ಇದರ ಉದ್ದೇಶವಾಗಿತ್ತು.
  • ಇದರ ಅಡಿಯಲ್ಲಿ, 100% ಗ್ಯಾರಂಟಿ ವ್ಯಾಪ್ತಿಯನ್ನು ನ್ಯಾಷನಲ್ ಕ್ರೆಡಿಟ್ ಗ್ಯಾರಂಟಿ ಟ್ರಸ್ಟೀ ಕಂಪನಿ ಲಿಮಿಟೆಡ್ (NCGTC) ಒದಗಿಸಿದರೆ, ಸಾಲಗಳನ್ನು ಬ್ಯಾಂಕುಗಳು ಮತ್ತು ಬ್ಯಾಂಕೇತರ ಹಣಕಾಸು ಸಂಸ್ಥೆಗಳು (NBFC) ಒದಗಿಸುತ್ತವೆ.
  • ಸಾಲವನ್ನು ಖಾತರಿಪಡಿಸಿದ ತುರ್ತು ಕ್ರೆಡಿಟ್ ಲೈನ್- (Guaranteed Emergency Credit Line- GECL) ಸೌಲಭ್ಯದ ರೂಪದಲ್ಲಿ ಒದಗಿಸಲಾಗುವುದು.
  • ಯೋಜನೆಯಡಿಯಲ್ಲಿ, NCGTCಯಿಂದ ಸಾಲ ನೀಡುವ ಸದಸ್ಯ ಸಂಸ್ಥೆಗಳಿಗೆ- (Member Lending Institutions- MLI) ಯಾವುದೇ ಗ್ಯಾರಂಟಿ ಶುಲ್ಕವನ್ನು ವಿಧಿಸಲಾಗುವುದಿಲ್ಲ.
  • ಈ ಯೋಜನೆಯು ಬ್ಯಾಂಕುಗಳು ಮತ್ತು ಹಣಕಾಸು ಸಂಸ್ಥೆಗಳಿಗೆ 9.25% ಬಡ್ಡಿದರವನ್ನು ಮತ್ತು ಬ್ಯಾಂಕೇತರ ಹಣಕಾಸು ಸಂಸ್ಥೆಗಳಿಗೆ (NBFC) 14% ಬಡ್ಡಿದರವನ್ನು ನಿಗದಿಪಡಿಸುತ್ತದೆ.

ಅರ್ಹತೆ:

  • 2020ರ ಫೆಬ್ರವರಿ 29 ಕ್ಕೆ ಒಳಪಟ್ಟು 50 ಕೋಟಿ ರೂ. ಸಾಲ ಹೊಂದಿರುವ ಸಾಲಗಾರರು ಮತ್ತು ವಾರ್ಷಿಕ 250 ಕೋಟಿ ರೂ.ಗಳ ವಹಿವಾಟು ನಡೆಸುವ ವಹಿವಾಟುದಾರರು ಯೋಜನೆಯನ್ನು ಪಡೆಯಲು ಅರ್ಹರಾಗಿರುತ್ತಾರೆ.
  • 1 ಆಗಸ್ಟ್ 2020 ರಂದು 3 ಲಕ್ಷ ಕೋಟಿ ರೂ.ಗಳ ತುರ್ತು ಕ್ರೆಡಿಟ್ ಲೈನ್ ಗ್ಯಾರಂಟಿ ಸ್ಕೀಮ್ (ECLGS) ವ್ಯಾಪ್ತಿಯನ್ನು ಸರ್ಕಾರ ವಿಸ್ತರಿಸಿತು. ಬಾಕಿ ಇರುವ ಸಾಲದ ಮಿತಿಯನ್ನು ದ್ವಿಗುಣಗೊಳಿಸುವುದು ಮತ್ತು ವ್ಯಾಪಾರ ಉದ್ದೇಶಗಳಿಗಾಗಿ ವೈದ್ಯರು, ವಕೀಲರು ಮತ್ತು ಚಾರ್ಟರ್ಡ್ ಅಕೌಂಟೆಂಟ್‌ಗಳಂತಹ ವೃತ್ತಿಪರರಿಗೆ ನೀಡಲಾದ ಕೆಲವು ಸಾಲಗಳು ಇದರಲ್ಲಿ ಸೇರಿವೆ.

ಯೋಜನೆಯ ಪ್ರಯೋಜನಗಳು:

  • ಈ ಯೋಜನೆಯ ಮೂಲಕ ಈ ಕ್ಷೇತ್ರಗಳಿಗೆ ಕಡಿಮೆ ವೆಚ್ಚದಲ್ಲಿ ಸಾಲಗಳನ್ನು ನೀಡುವ ನಿರೀಕ್ಷೆಯಿದೆ, ಆ ಮೂಲಕ MSME ಗಳು ತಮ್ಮ ಕಾರ್ಯಾಚರಣೆಯ ಜವಾಬ್ದಾರಿಗಳನ್ನು ಪೂರೈಸಲು ಮತ್ತು ತಮ್ಮ ವ್ಯವಹಾರಗಳನ್ನು ಪುನರಾರಂಭಿಸಲು ಅನುವು ಮಾಡಿಕೊಡುತ್ತದೆ.
  • ಪ್ರಸ್ತುತ ಅಭೂತಪೂರ್ವ ಪರಿಸ್ಥಿತಿಯಲ್ಲಿ ತಮ್ಮ ಕೆಲಸವನ್ನು ಮುಂದುವರಿಸಲು ಎಂಎಸ್‌ಎಂಇಗಳಿಗೆ ಬೆಂಬಲ ನೀಡುವ ಮೂಲಕ, ಈ ಯೋಜನೆಯು ಆರ್ಥಿಕತೆಯ ಮೇಲೆ ಸಕಾರಾತ್ಮಕ ಪರಿಣಾಮ ಬೀರುತ್ತದೆ ಮತ್ತು ಅದರ ಪುನರುಜ್ಜೀವನಕ್ಕೆ ಸಹಾಯ ಮಾಡುತ್ತದೆ ಎಂದು ನಿರೀಕ್ಷಿಸಲಾಗಿದೆ.

 

ವಿಷಯಗಳು: ಆರೋಗ್ಯ, ಶಿಕ್ಷಣ ಮತ್ತು ಮಾನವ ಸಂಪನ್ಮೂಲಕ್ಕೆ ಸಂಬಂಧಿಸಿದ ಸಾಮಾಜಿಕ ವಲಯ/ ಸೇವೆಗಳ ಅಭಿವೃದ್ಧಿ ಮತ್ತು ನಿರ್ವಹಣೆಗೆ ಸಂಬಂಧಿಸಿದ ಸಮಸ್ಯೆಗಳು.

ಲಸಿಕೆ ಪೋಲು ಎಂದರೇನು, ಅದನ್ನು ಹೇಗೆ ತಡೆಯಬಹುದು?


(What is vaccine wastage, and how can it be prevented?)

 ಸಂದರ್ಭ:

ಕೇಂದ್ರ ಆರೋಗ್ಯ ಸಚಿವಾಲಯವು ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಿಗೆ ಎರಡನೇ ಡೋಸ್‌ ನೀಡಲು ಲಸಿಕೆಗಳನ್ನು ಸಂರಕ್ಷಿಸುವುದರಲ್ಲಿ ಯಾವುದೇ ಅರ್ಥವಿಲ್ಲ ಎಂದು ತಿಳಿಸಿದೆ ಮತ್ತು ಬೇಡಿಕೆ ಇರುವ ಎಲ್ಲ ಸರ್ಕಾರಿ ಮತ್ತು ಖಾಸಗಿ ಆಸ್ಪತ್ರೆಗಳಿಗೆ ತ್ವರಿತ ಪೂರೈಕೆಯನ್ನು ಖಚಿತಪಡಿಸಿಕೊಳ್ಳಲು ಸೂಚನೆಗಳನ್ನು ನೀಡಿದೆ.

ಕೇಂದ್ರದಿಂದ ರಾಜ್ಯಗಳಿಗೆ ಮಾರ್ಗಸೂಚಿಗಳು:

  • ಈ ವರೆಗೆ ರಾಷ್ಟ್ರಮಟ್ಟದಲ್ಲಿ ಲಸಿಕೆ ಪೋಲು ಪ್ರಮಾಣವು 6% ರಷ್ಟಿದೆ. ಈ ಪ್ರಮಾಣವನ್ನು ಶೇಕಡ ಒಂದಕ್ಕಿಂತ ಕಡಿಮೆ ಇರುವಂತೆ ನೋಡಿಕೊಳ್ಳಬೇಕು ಹಾಗೂ ನಿಯಮಿತವಾಗಿ ಪರಿಶೀಲಿಸಬೇಕು.
  • ಲಸಿಕೆಗಳ ಬಳಕೆಯಿಲ್ಲದೆ, ಲಭ್ಯವಿರುವ ಲಸಿಕೆಗಳ ಸ್ಟಾಕ್ ಅನ್ನು ಅವುಗಳ ಅವಧಿ ಮುಗಿಯುವುದನ್ನು ತಪ್ಪಿಸಲು ಸಮಯೋಚಿತವಾಗಿ ಬಳಸುವುದನ್ನು ಖಚಿತಪಡಿಸಿಕೊಳ್ಳುವುದು.
  • ಆರೋಗ್ಯ ರಕ್ಷಣೆ ಮತ್ತು ಮುಂಚೂಣಿ ಕೋವಿಡ್ ಕಾರ್ಯಕರ್ತರ ವಿಭಾಗದಲ್ಲಿ ಅರ್ಹ ಫಲಾನುಭವಿಗಳನ್ನು ಮಾತ್ರ ನೋಂದಾಯಿಸಿ ಲಸಿಕೆ ಹಾಕಬೇಕು.

ಲಸಿಕೆ ಪೋಲು ಎಂದರೇನು?

ಯಾವುದೇ ಲಸಿಕೆ ನೀಡಿಕೆ ಕಾರ್ಯಕ್ರಮದಲ್ಲಿ, ಲಸಿಕೆ ನೀಡುವಲ್ಲಿ ಹಲವು ಡೋಸ್‌ಗಳು ಪೋಲಾಗುತ್ತವೆ. ಲಸಿಕಾ ಕೇಂದ್ರಗಳಿಗೆ ಪೂರೈಕೆಯಾದ ಡೋಸ್‌ಗಳು ಮತ್ತು ಜನರಿಗೆ ನೀಡಲಾದ ಡೋಸ್‌ಗಳ ನಡುವಣ ವ್ಯತ್ಯಾಸವೇ ವ್ಯಾಕ್ಸಿನ್ ವೇಸ್ಟೆಜ್‌ ಅಥವಾ ಲಸಿಕೆ ಪೋಲು. ಕೋವಿಡ್‌-19 ಲಸಿಕೆ ಕಾರ್ಯಕ್ರಮದಲ್ಲಿ ವಿಪರೀತ ಪ್ರಮಾಣದಲ್ಲಿ ಲಸಿಕೆ ಪೋಲಾಗುತ್ತಿದೆ.

  • ಯಾವುದೇ ಲಸಿಕೆ ಕಾರ್ಯಕ್ರಮದಲ್ಲೂ ಅಗತ್ಯವಿರುವಷ್ಟು ಡೋಸ್‌ಗಳಿಗಿಂತ, ಹೆಚ್ಚು ಡೋಸ್‌ಗಳನ್ನು ಒದಗಿಸಲಾಗುತ್ತದೆ. ಡೋಸ್‌ಗಳು ವ್ಯರ್ಥವಾದರೆ, ಅಗತ್ಯವಿರುವಷ್ಟು ಮಂದಿಗೆ ಲಸಿಕೆ ನೀಡಲು ಸಾಧ್ಯವಾಗುವುದಿಲ್ಲ. ಹೀಗೆ ಪೋಲಾಗುವ ಡೋಸ್‌ ಪ್ರಮಾಣವನ್ನು ಮೊದಲೇ ಅಂದಾಜು ಮಾಡಲಾಗುತ್ತದೆ. ಇದನ್ನು ಲಸಿಕೆ ಪೋಲು ಅಂದಾಜು ಎಂದು ಕರೆಯಲಾಗುತ್ತದೆ. ಈ ಅಂದಾಜಿನಷ್ಟು ಡೋಸ್‌ಗಳನ್ನು ಹೆಚ್ಚುವರಿಯಾಗಿ ನೀಡಲಾಗುತ್ತದೆ.
  • ಎಲ್ಲಾ ಲಸಿಕೆ ಕಾರ್ಯಕ್ರಮದಲ್ಲಿ ಇದು ಸಾಮಾನ್ಯ. ಆದರೆ, ಈ ಅಂದಾಜನ್ನೂ ಮೀರಿ ಹೆಚ್ಚುವರಿ ಡೋಸ್‌ಗಳು ಪೋಲಾದರೆ ಅದು ಕಳವಳಕಾರಿ ವಿಷಯ. ಇದರಿಂದ ಹಣ, ಮಾನವ ಶ್ರಮ, ಸಮಯ ವ್ಯರ್ಥವಾಗುತ್ತದೆ. ಎಲ್ಲಕ್ಕಿಂತ ಮುಖ್ಯವಾಗಿ ಲಸಿಕೆ ಕಾರ್ಯಕ್ರಮವು ನಿರೀಕ್ಷಿತ ಮಟ್ಟದಲ್ಲಿ ಅನುಷ್ಠಾನಕ್ಕೆ ಬರುವುದಿಲ್ಲ.

ಪೋಲು ಸಂಭವಿಸುವ ವಿವಿಧ ಹಂತಗಳು:

  • ಕೋಲ್ಡ್ ಚೈನ್ ಪಾಯಿಂಟ್ ಗಳು.
  • ಜಿಲ್ಲಾ ಲಸಿಕೆ ಮಳಿಗೆಗಳು.
  • ಲಸಿಕೆ ಅಭಿಯಾನದ ಸ್ಥಳಗಳು.

ಇವುಗಳೊಂದಿಗೆ –

  • ತೆರೆಯದ ಬಾಟಲಿಯ ಲಸಿಕೆಯು ಪೋಲಾಗಲು ಹಲವು ಕಾರಣಗಳಿವೆ. ಲಸಿಕೆಯು ಎಕ್ಸ್‌ಪೈರಿ (ಮುಕ್ತಾಯ ದಿನ) ಆಗಿದ್ದರೆ; ಲಸಿಕೆಯು ಶಾಖಕ್ಕೆ ಒಡ್ಡಿಕೊಂಡಿದ್ದರೆ; ಲಸಿಕೆ ಹೆಪ್ಪುಗಟ್ಟಿದ್ದರೆ; ಲಸಿಕೆಯ ಬಾಟಲಿ ಒಡೆದಿದ್ದರೆ; ಲಸಿಕೆಯು ಕಳ್ಳತನವಾಗಿದ್ದರೆ ಲಸಿಕೆಯು ಪೋಲಾಗುತ್ತದೆ.
  • ಬಾಟಲಿ ಮುಚ್ಚಳ ತೆರೆದ ಲಸಿಕೆಯು ಪೋಲಾಗಲೂ ಕಾರಣಗಳಿವೆ. ಲಸಿಕೆ ನೀಡುವ ಅಂದಿನ ಅವಧಿಯು (ಸೆಷನ್) ಕೊನೆಯಾಗಿದ್ದಲ್ಲಿ; ಬಾಟಲಿಯಿಂದ ಪೂರ್ಣ ಪ್ರಮಾಣದ ಡೋಸ್‌ ಅನ್ನು ತೆಗೆಯಲು ಸಾಧ್ಯವಾಗದಿದ್ದಲ್ಲಿ; ತೆರೆದ ಬಾಟಲುಗಳು ನೀರಿನಲ್ಲಿ ಮುಳುಗಿದಾಗ; ಲಸಿಕೆಯು ಕಲಬೆರಕೆ ಆಗಿದೆ ಎಂಬ ಶಂಕೆ ಉಂಟಾದಲ್ಲಿ; ಲಸಿಕೆ ನೀಡುವ ಪ್ರಕ್ರಿಯೆಯಲ್ಲಿನ ಲೋಪಗಳಿಂದ ಲಸಿಕೆಯು ಪೋಲಾಗುವ ಸಾಧ್ಯತೆಯಿರುತ್ತದೆ.

ಲಸಿಕೆ ಪೋಲನ್ನು’ ತಡೆಗಟ್ಟುವ ಮಾರ್ಗಗಳು:

  • ಸರಿಯಾದ ಯೋಜನೆ ರೂಪಿಸುವುದು.
  • ಪ್ರತಿ ಲಸಿಕೆ ಅಧಿವೇಶನದಲ್ಲಿ ಗರಿಷ್ಠ 100 ಫಲಾನುಭವಿಗಳಿಗೆ ಲಸಿಕೆ ನೀಡಬೇಕು.
  • ಲಸಿಕೆ ಸಿಬ್ಬಂದಿಗೆ ಸರಿಯಾದ ತರಬೇತಿ ನೀಡಿಕೆ.

 


ಸಾಮಾನ್ಯ ಅಧ್ಯಯನ ಪತ್ರಿಕೆ : 3


 

ವಿಷಯಗಳು: ಭಾರತೀಯ ಆರ್ಥಿಕತೆ ಮತ್ತು ಯೋಜನೆ, ಸಂಪನ್ಮೂಲಗಳ ಕ್ರೂಢೀಕರಣ , ಬೆಳವಣಿಗೆ, ಅಭಿವೃದ್ಧಿ ಮತ್ತು ಉದ್ಯೋಗಕ್ಕೆ ಸಂಬಂಧಿಸಿದ ವಿಷಯಗಳು.

ಹಣದುಬ್ಬರ ಗುರಿ:


(Inflation targeting)

 ಸಂದರ್ಭ:

ಮುಂಬರುವ ಐದು ವರ್ಷಗಳವರೆಗೆ RBIನ ಹಣಕಾಸು ನೀತಿ ಸಮಿತಿಗೆ (Monetary Policy Committee) ಹಣದುಬ್ಬರ ಗುರಿಯನ್ನು 4% +/- 2  (ಅಂದರೆ, ಹಣದುಬ್ಬರವನ್ನು ನಿಯಂತ್ರಿಸುವ ಗುರಿಯನ್ನು ನಿಗದಿಪಡಿಸಿದ ಪ್ರತಿಶತ 4 ಕಿಂತ ಎರಡು ಅಂಶ ಹೆಚ್ಚು ಅಥವಾ ಎರಡು ಅಂಶ ಕಡಿಮೆ ಇರುವಂತೆ ನೋಡಿಕೊಳ್ಳುವ ಜವಾಬ್ದಾರಿ) ಶೇಕಡಾವಾರು ಅಂಕಗಳ ಸಹಿಷ್ಣುತೆಯೊಂದಿಗೆ ಕಾಯ್ದುಕೊಳ್ಳುವಂತೆ ಗುರಿ ನೀಡಲು ಕೇಂದ್ರ ಸರ್ಕಾರವು ನಿರ್ಧರಿಸಿದೆ.

ಹಣದುಬ್ಬರ ಗುರಿ’ ಎಂದರೇನು?

  •  ಇದು ನಿಗದಿತ ವಾರ್ಷಿಕ ಹಣದುಬ್ಬರ ದರವನ್ನು ಸಾಧಿಸಲು ವಿತ್ತೀಯ ನೀತಿಯ ಸಂಯೋಜನೆಯ ಆಧಾರದ ಮೇಲೆ ಕೇಂದ್ರ ಬ್ಯಾಂಕ್ ನೀತಿಯಾಗಿದೆ.
  • ಹಣದುಬ್ಬರ ಗುರಿಯ ತತ್ವವು ದೀರ್ಘಕಾಲೀನ ಆರ್ಥಿಕ ಬೆಳವಣಿಗೆಯನ್ನು ಬೆಲೆಯ ಸ್ಥಿರತೆಯನ್ನು ಕಾಪಾಡಿಕೊಳ್ಳುವ ಮೂಲಕ ಉತ್ತಮವಾಗಿ ಸಾಧಿಸಬಹುದು ಮತ್ತು ಹಣದುಬ್ಬರವನ್ನು ನಿಯಂತ್ರಿಸುವ ಮೂಲಕ ‘ಬೆಲೆ ಸ್ಥಿರತೆ’ ಸಾಧಿಸಬಹುದು ಎಂಬ ನಂಬಿಕೆಯನ್ನು ಆಧರಿಸಿದೆ.

ಹಣದುಬ್ಬರ ಗುರಿ ಚೌಕಟ್ಟು:

ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ (RBI) ಕಾಯ್ದೆ 1934 ರ ತಿದ್ದುಪಡಿಯಿಂದ 2016 ರಲ್ಲಿ ಭಾರತದಲ್ಲಿ ‘ಹೊಂದಿಕೊಳ್ಳುವ ಹಣದುಬ್ಬರ ಗುರಿ ಚೌಕಟ್ಟು’   (Flexible Inflation Targeting Framework)  ಜಾರಿಯಲ್ಲಿದೆ.

ಭಾರತದಲ್ಲಿ ಹಣದುಬ್ಬರ ಗುರಿಯನ್ನು ಯಾರು ನಿಗದಿಪಡಿಸುತ್ತಾರೆ?

ತಿದ್ದುಪಡಿ ಮಾಡಿದ ರಿಸರ್ವ್ ಬ್ಯಾಂಕ್ ಕಾಯ್ದೆಯ ನಿಬಂಧನೆಗಳ ಪ್ರಕಾರ, ಭಾರತ ಸರ್ಕಾರವು ಪ್ರತಿ ಐದು ವರ್ಷಗಳಿಗೊಮ್ಮೆ ಹಣದುಬ್ಬರ ಗುರಿಯನ್ನು ರಿಸರ್ವ್ ಬ್ಯಾಂಕಿನೊಂದಿಗೆ ಸಮಾಲೋಚಿಸಿ ನಿಗದಿಪಡಿಸುತ್ತದೆ.

ಪ್ರಸ್ತುತ ಹಣದುಬ್ಬರ ಗುರಿ:

2016 ರ ಆಗಸ್ಟ್ 5 ರಿಂದ 2021 ರ ಮಾರ್ಚ್ 31 ರವರೆಗೆ    ಪ್ರತಿಶತ 4 ರಷ್ಟು ಗ್ರಾಹಕ ಬೆಲೆ ಸೂಚ್ಯಂಕ (Consumer Price Index) ಹಣದುಬ್ಬರವನ್ನು ಕಾಯ್ದುಕೊಳ್ಳುವಂತೆ ಕೇಂದ್ರ ಸರ್ಕಾರ ತಿಳಿಸಿದೆ. ಇದರೊಂದಿಗೆ, ಹಣದುಬ್ಬರದ ಗರಿಷ್ಠ ಮಿತಿಯನ್ನು 6 ಪ್ರತಿಶತ ಮತ್ತು ಕನಿಷ್ಠ ಮಿತಿಯನ್ನು 2 ಪ್ರತಿಶತದಷ್ಟು ನಿಗದಿಪಡಿಸಲಾಗಿದೆ.

 

ವಿಷಯಗಳು: ನೇರ ಮತ್ತು ಪರೋಕ್ಷ ಕೃಷಿ ನೆರವು ಮತ್ತು ಕನಿಷ್ಠ ಬೆಂಬಲ ಬೆಲೆಗೆ ಸಂಬಂಧಿಸಿದ ವಿಷಯಗಳು; ಸಾರ್ವಜನಿಕ ವಿತರಣಾ ವ್ಯವಸ್ಥೆ – ಉದ್ದೇಶಗಳು, ಕಾರ್ಯಗಳು, ಮಿತಿಗಳು, ಸುಧಾರಣೆಗಳು; ಬಫರ್ ಸ್ಟಾಕ್ ಮತ್ತು ಆಹಾರ ಭದ್ರತೆಗೆ ಸಂಬಂಧಿಸಿದ ವಿಷಯಗಳು; ತಂತ್ರಜ್ಞಾನ ಮಿಷನ್; ಪಶುಸಂಗೋಪನೆಗೆ ಸಂಬಂಧಿಸಿದ ಅರ್ಥಶಾಸ್ತ್ರ.

ಕೃಷಿ ಕಾನೂನುಗಳ ಕುರಿತ ವರದಿಯನ್ನು ಸರ್ವೋಚ್ಛ ನ್ಯಾಯಾಲಯಕ್ಕೆ ಸಲ್ಲಿಸಿದ ಸಮಿತಿ:


(Panel submits report on farm laws to SC)

 ಸಂದರ್ಭ:

ಕೇಂದ್ರದ ‘ಮೂರು ವಿವಾದಾತ್ಮಕ ಕೃಷಿ ಕಾಯ್ದೆಗಳನ್ನು ಅಧ್ಯಯನ ಮಾಡಲು ಸುಪ್ರೀಂಕೋರ್ಟ್ ನೇಮಿಸಿದ್ದ ನಾಲ್ವರು ಸದಸ್ಯರು ಅಧ್ಯಯನ ಸಮಿತಿಯು ನ್ಯಾಯಾಲಯಕ್ಕೆ ತನ್ನ ವರದಿಯನ್ನು ಮುಚ್ಚಿದ ಲಕೋಟೆಯಲ್ಲಿ ಸಲ್ಲಿಸಿದೆ’. ಈ ವರದಿಯ ವಿವರಗಳನ್ನು ಪ್ರಕರಣದ ಮುಂದಿನ ವಿಚಾರಣೆಯ ಸಂದರ್ಭದಲ್ಲಿ ಬಹಿರಂಗ ಪಡಿಸಲಾಗುವುದು.

ಹಿನ್ನೆಲೆ:

ಸೆಪ್ಟೆಂಬರ್ ತಿಂಗಳಲ್ಲಿ, ಸಂಸತ್ತು ಅಂಗೀಕರಿಸಿದ ಮತ್ತು ರೈತ ಸಂಘಟನೆಗಳು ವಿರೋಧಿಸಿರುವ ಈ ಕೆಳಗಿನ ಮೂರು ಕಾನೂನುಗಳು:

  • ಕೃಷಿ ಉತ್ಪನ್ನ ವ್ಯಾಪಾರ ಮತ್ತು ವಾಣಿಜ್ಯ (ಪ್ರಚಾರ ಮತ್ತು ಸೌಲಭ್ಯ) ಕಾಯ್ದೆ.
  • ಅಗತ್ಯ ಸರಕುಗಳ (ತಿದ್ದುಪಡಿ) ಕಾಯ್ದೆ.
  • ರೈತರು (ಸಬಲೀಕರಣ ಮತ್ತು ಸಂರಕ್ಷಣೆ) ಬೆಲೆ ಭರವಸೆ ಮತ್ತು ಕೃಷಿ ಸೇವೆಗಳ ಕಾಯ್ದೆ ಒಪ್ಪಂದ.

ಜನವರಿ 12 ರಂದು, ಸುಪ್ರೀಂ ಕೋರ್ಟ್ ಮೂರು ಕಾನೂನುಗಳ ಅನುಷ್ಠಾನವನ್ನು ಸ್ಥಗಿತಗೊಳಿಸಿತು ಮತ್ತು ‘ರೈತರ ಕುಂದುಕೊರತೆಗಳನ್ನು ಮತ್ತು ಕೃಷಿ ಕಾನೂನುಗಳ ಬಗ್ಗೆ ಸರ್ಕಾರದ ಅಭಿಪ್ರಾಯಗಳನ್ನು ತಿಳಿದುಕೊಳ್ಳಲು ಮತ್ತು ಸೂಕ್ತ ಶಿಫಾರಸುಗಳನ್ನು ಮಾಡಲು ನಾಲ್ವರು ಸದಸ್ಯರ ತಜ್ಞರ ಸಮಿತಿಯನ್ನು ನೇಮಿಸಿತು.

ಏನಿದು ಸಮಸ್ಯೆ?

  • ಈ ಕೃಷಿ ಕಾನೂನುಗಳ ಉದ್ದೇಶ ಭಾರತದ ವಿಶಾಲ ಕೃಷಿ ಕ್ಷೇತ್ರವನ್ನು ನಿಯಂತ್ರಿಸುವುದು. ಈ ಕಾನೂನುಗಳು ಮಧ್ಯವರ್ತಿಗಳ ಕಿರುಕುಳದಿಂದ ರೈತರನ್ನು ಮುಕ್ತಗೊಳಿಸುತ್ತವೆ’ ಎಂದು ಸರ್ಕಾರ ಹೇಳುತ್ತದೆ.
  • ಆದರೆ, ಅನೇಕ ರೈತರು ಈ ಹೊಸ ಕಾನೂನುಗಳಿಂದ  ಪಡೆದುಕೊಳ್ಳುವುದಕ್ಕಿಂತ ಹೆಚ್ಚಾಗಿ ಕಳೆದುಕೊಳ್ಳುವ ಭಯವನ್ನು ಹೊಂದಿದ್ದಾರೆ ಮತ್ತು ಬೃಹತ್ ಆರ್ಥಿಕ ಅಧಿಕಾರ ಹೊಂದಿರುವ ಕೃಷಿ ನಿಗಮಗಳು ಮುಖ್ಯ ಫಲಾನುಭವಿಗಳಾಗಿರುತ್ತವೆ ಎಂದು ದುಗುಡದಿಂದ ಹೇಳುತ್ತಾರೆ.

ಹೊಸ ಕೃಷಿ ಕಾನೂನುಗಳ ಉದ್ದೇಶವೇನು?

  • ಈ ಕಾನೂನುಗಳು ರೈತರಿಗೆ ಸರ್ಕಾರಿ-ನಿಯಂತ್ರಿತ ಮಾರುಕಟ್ಟೆಗಳನ್ನು ನಿರ್ಲಕ್ಷಿಸಿ (ಸ್ಥಳೀಯವಾಗಿ ಮಂಡಿಗಳು ಎಂದು ಕರೆಯಲಾಗುತ್ತದೆ) ಮತ್ತು ತಮ್ಮ ಉತ್ಪನ್ನಗಳನ್ನು ನೇರವಾಗಿ ಖಾಸಗಿ ಖರೀದಿದಾರರಿಗೆ ಮಾರಾಟ ಮಾಡಲು ಅನುವು ಮಾಡಿಕೊಡುತ್ತದೆ.
  • ರೈತರು ಈಗ ಖಾಸಗಿ ಕಂಪನಿಗಳೊಂದಿಗೆ ಒಪ್ಪಂದ ಮಾಡಿಕೊಳ್ಳಬಹುದು, ಭಾರತದಲ್ಲಿ ಇದನ್ನು ಗುತ್ತಿಗೆ ಕೃಷಿ (Contract Farming) ಎಂದು ಕರೆಯಲಾಗುತ್ತದೆ. ಅಲ್ಲದೆ, ನಿಮ್ಮ ಉತ್ಪನ್ನಗಳನ್ನು ನೀವು ರಾಜ್ಯದ ಹೊರಗೆ ಮಾರಾಟ ಮಾಡಬಹುದು. ಇದು ಭಾರತದಲ್ಲಿ ಗುತ್ತಿಗೆ ಕೃಷಿ ಎಂದು ಕರೆಯಲ್ಪಡುವ ಅಭ್ಯಾಸವಾಗಿದೆ ಮತ್ತು ರಾಜ್ಯದ ಗಡಿಯುದ್ದಕ್ಕೂ ಮಾರಾಟ ಮಾಡಬಹುದು.
  • ಹೊಸ ಕಾನೂನುಗಳು ವ್ಯಾಪಾರಿಗಳಿಗೆ ಆಹಾರ ಧಾನ್ಯಗಳನ್ನು ಸಂಗ್ರಹಿಸಲು ಅಥವಾ ದಾಸ್ತಾನು ಮಾಡಲು ಅನುವು ಮಾಡಿಕೊಡುತ್ತದೆ. ಇದು ಹೋರ್ಡಿಂಗ್ ವಿರುದ್ಧ ವಿಧಿಸಿರುವ ನಿರ್ಬಂಧಗಳಿಗೆ ವಿರುದ್ಧವಾಗಿದೆ, ಮತ್ತು ಇದು ಸಾಂಕ್ರಾಮಿಕ-ದಂತಹ ಸಂದರ್ಭಗಳಲ್ಲಿ ಬೆಲೆ ಹೆಚ್ಚಳದ ಲಾಭವನ್ನು ವ್ಯಾಪಾರಿಗಳಿಗೆ ಸುಲಭಗೊಳಿಸುತ್ತದೆ. ಹಳೆಯ ನಿಯಮಗಳ ಪ್ರಕಾರ, ಈ ರೀತಿಯ ಅಭ್ಯಾಸಗಳನ್ನು ಅಪರಾಧ ಕೃತ್ಯವೆಂದು ಘೋಷಿಸಲಾಗಿದೆ.

ರೈತರ ಕಳವಳಗಳು:

ಭಾರತದಲ್ಲಿ ಕೃಷಿಯೋಗ್ಯ ಭೂಮಿಯ ಶೇಕಡಾ 86 ಕ್ಕಿಂತಲೂ ಹೆಚ್ಚು ಭಾಗದಲ್ಲಿ ಸಣ್ಣ ರೈತರು ಕೃಷಿ ಮಾಡುತ್ತಾರೆ, ಪ್ರತಿಯೊಬ್ಬರೂ ಎರಡು ಹೆಕ್ಟೇರ್‌ಗಿಂತ ಕಡಿಮೆ (ಐದು ಎಕರೆ) ಭೂಮಿಯನ್ನು ಹೊಂದಿದ್ದಾರೆ.

  • ಹೊಸ ಕಾನೂನುಗಳು ಈ ಮುಂಚೆ ರೈತರಿಗೆ ಒದಗಿಸಲಾದ ರಕ್ಷಣಾತ್ಮಕ ಕ್ರಮಗಳನ್ನು ರದ್ದುಗೊಳಿಸುತ್ತವೆ. ಸಣ್ಣ ರೈತರು ತಮ್ಮ ಉತ್ಪನ್ನಗಳನ್ನು ದೊಡ್ಡ ಕಂಪನಿಗಳಿಗೆ ಮಾರಾಟ ಮಾಡುವಾಗ ತಮ್ಮ ಜೀವನ ಮಟ್ಟವನ್ನು ಸುಧಾರಿಸಲು ಉತ್ಪನ್ನಗಳಿಗೆ ಯೋಗ್ಯ ಬೆಲೆಯನ್ನು ಪಡೆಯಲು ಸಾಕಷ್ಟು ಚೌಕಾಶಿ ಮಾಡುವ ಶಕ್ತಿಯನ್ನು ಹೊಂದಿಲ್ಲ ಎಂದು ಭಯಪಡುತ್ತಾರೆ.
  • ಹೊಸ ಕಾನೂನುಗಳು ಲಿಖಿತ ಒಪ್ಪಂದಗಳನ್ನು    ಕಡ್ಡಾಯಗೊಳಿಸುವುದಿಲ್ಲ. ಒಪ್ಪಂದದ ನಿಯಮಗಳನ್ನು ಉಲ್ಲಂಘಿಸಿದರೆ ರೈತರು ತಮ್ಮ ಕಷ್ಟ ನಷ್ಟಗಳನ್ನು ಸಾಬೀತುಪಡಿಸುವುದು ಬಹಳ ಕಷ್ಟಕರವಾಗಬಹುದು ಮತ್ತು ಕಾನೂನು ಸಣ್ಣ ಪರಿಹಾರ ಕ್ರಮಗಳನ್ನು ಒದಗಿಸುತ್ತದೆ.
  • ಹೊಸ ನಿಯಮಗಳು ಯಾವುದೇ ಉತ್ಪನ್ನಗಳಿಗೆ ಕನಿಷ್ಠ ಬೆಂಬಲ ಬೆಲೆಯನ್ನು ಖಾತರಿಪಡಿಸುವುದಿಲ್ಲ, ಪ್ರಸ್ತುತ ಕನಿಷ್ಠ ಬೆಂಬಲ ಬೆಲೆ (MSP) ಯನ್ನು ಯಾವುದೇ ಸಮಯದಲ್ಲಿ ರದ್ದುಗೊಳಿಸಬಹುದು ಎಂದು ರೈತರು ಚಿಂತಿತರಾಗಿದ್ದಾರೆ.

 

ವಿಷಯಗಳು: ನೇರ ಮತ್ತು ಪರೋಕ್ಷ ಕೃಷಿ ನೆರವು ಮತ್ತು ಕನಿಷ್ಠ ಬೆಂಬಲ ಬೆಲೆಗೆ ಸಂಬಂಧಿಸಿದ ವಿಷಯಗಳು; ಸಾರ್ವಜನಿಕ ವಿತರಣಾ ವ್ಯವಸ್ಥೆ – ಉದ್ದೇಶಗಳು, ಕಾರ್ಯಗಳು, ಮಿತಿಗಳು, ಸುಧಾರಣೆಗಳು; ಬಫರ್ ಸ್ಟಾಕ್ ಮತ್ತು ಆಹಾರ ಭದ್ರತೆಗೆ ಸಂಬಂಧಿಸಿದ ವಿಷಯಗಳು; ತಂತ್ರಜ್ಞಾನ ಮಿಷನ್; ಪಶುಸಂಗೋಪನೆಗೆ ಸಂಬಂಧಿಸಿದ ಅರ್ಥಶಾಸ್ತ್ರ.

ಆಹಾರ ಕ್ಷೇತ್ರಕ್ಕೆ ಪ್ರೋತ್ಸಾಹಧನ ನೀಡಲು ಅನುಮೋದನೆ ನೀಡಿದ ಕೇಂದ್ರ ಮಂತ್ರಿಮಂಡಲ:


(Food sector incentive gets Cabinet nod)

ಸಂದರ್ಭ:

ಇತ್ತೀಚೆಗೆ ಕೇಂದ್ರ ಸಚಿವ ಸಂಪುಟವು 10,900 ಕೋಟಿ ರೂ.ಗಳ ವೆಚ್ಚದೊಂದಿಗೆ ‘ಆಹಾರ ಸಂಸ್ಕರಣಾ ಉದ್ಯಮಕ್ಕಾಗಿ ಉತ್ಪಾದನಾ-ಸಂಬಂಧಿತ ಪ್ರೋತ್ಸಾಹ ಧನ ನೀಡುವ ಯೋಜನೆಗೆ’ ಅನುಮೋದನೆ ನೀಡಿದೆ.

ಯೋಜನೆಯ ಉದ್ದೇಶಗಳು:

  • ಜಾಗತಿಕವಾಗಿ ಆಹಾರ ಕ್ಷೇತ್ರದಲ್ಲಿ ಆಹಾರ ಉತ್ಪಾದನಾ ಚಾಂಪಿಯನ್ ಗಳ ಸೃಷ್ಟಿಗೆ ಬೆಂಬಲ ನೀಡುವುದು.
  • ಆಯ್ದ ಭಾರತೀಯ ಆಹಾರ ಉತ್ಪನ್ನಗಳನ್ನು ಜಾಗತಿಕವಾಗಿ ಉತ್ತೇಜಿಸಿ ಮತ್ತು ಅವುಗಳನ್ನು ಅಂತರರಾಷ್ಟ್ರೀಯ ಮಟ್ಟದಲ್ಲಿ ವ್ಯಾಪಕವಾಗಿ ಸ್ವೀಕರಿಸುವಂತೆ ಮಾಡುವುದು.
  • ಕೃಷಿ ಕ್ಷೇತ್ರದ ಹೊರಗೆ ಉದ್ಯೋಗಾವಕಾಶಗಳನ್ನು ಹೆಚ್ಚಿಸುವುದು.
  • ಕೃಷಿ ಉತ್ಪನ್ನಗಳಿಗೆ ಸೂಕ್ತವಾದ ಸಂಭಾವನೆ ಮತ್ತು ರೈತರಿಗೆ ಹೆಚ್ಚಿನ ಆದಾಯವನ್ನು ಖಾತರಿಪಡಿಸುವುದು.

 ಅನ್ವಯಿಸುವಿಕೆ:

  • ಯೋಜನೆಯಲ್ಲಿ ಅಡುಗೆ ಮಾಡಲು ಸಿದ್ಧ / ತಿನ್ನಲು ಸಿದ್ಧ ವಿರುವ (ready-to-cook and ready-to-eat foods) ಆಹಾರ, ಸಂಸ್ಕರಿಸಿದ ಹಣ್ಣುಗಳು ಮತ್ತು ತರಕಾರಿಗಳು, ಸಾವಯವ ಉತ್ಪನ್ನಗಳು, ಮುಕ್ತ-ಶ್ರೇಣಿಯ ಮೊಟ್ಟೆಗಳು, ಕೋಳಿ ಮಾಂಸ ಮತ್ತು ಮೊಟ್ಟೆಯ ಉತ್ಪನ್ನಗಳನ್ನು ಒಳಗೊಂಡಿರುತ್ತದೆ.
  • ಯೋಜನೆಗೆ ಆಯ್ಕೆಯಾದ ಅರ್ಜಿದಾರರು ಮೊದಲ ಎರಡು ವರ್ಷಗಳಲ್ಲಿ ಸಸ್ಯ ಮತ್ತು ಯಂತ್ರೋಪಕರಣಗಳಲ್ಲಿ ಹೂಡಿಕೆ ಮಾಡಬೇಕಾಗುತ್ತದೆ.

 ಹಿನ್ನೆಲೆ:

ಒಟ್ಟಾರೆಯಾಗಿ, 13 ‘ಉತ್ಪಾದನಾ-ಸಂಬಂಧಿತ ಪ್ರೋತ್ಸಾಹಕ ಯೋಜನೆಗಳು’ (PLI ಯೋಜನೆಗಳು) ರೂಪಿಸಲಾಗುತ್ತಿದೆ; ಇವುಗಳಲ್ಲಿ ಲ್ಯಾಪ್‌ಟಾಪ್‌ಗಳು, ಮೊಬೈಲ್ ಫೋನ್‌ಗಳು ಮತ್ತು ದೂರಸಂಪರ್ಕ ಉಪಕರಣಗಳು, ಬಿಳಿ ಸರಕುಗಳು, ರಾಸಾಯನಿಕ ಕೋಶಗಳು ಮತ್ತು ಜವಳಿಗಳು, ವಾಹನಗಳು,  ಔಷಧಗಳು, ಐಟಿ ಯಂತ್ರಾಂಶ ಇತ್ಯಾದಿಗಳು ಸೇರಿವೆ.

 


ಪೂರ್ವಭಾವಿ ಪರೀಕ್ಷೆಗೆ ಸಂಬಂಧಿಸಿದ ವಿದ್ಯಮಾನಗಳು:


ಮಿಲಿಟರಿ ಪಶು-ಸಂಗೋಪನಾ ಕೇಂದ್ರಗಳು:

(Military farms)

132 ವರ್ಷಗಳಿಂದ ಸೇನೆಯ ಸೇವೆಯಲ್ಲಿದ್ದ ಮಿಲಿಟರಿ ಪಶುಸಂಗೋಪನಾ ಕೇಂದ್ರಗಳನ್ನು ಔಪಚಾರಿಕವಾಗಿ ಮುಚ್ಚಲಾಗಿದೆ. ಇದಕ್ಕಾಗಿ ಇತ್ತೀಚೆಗೆ  ಔಪಚಾರಿಕ ಸಮಾರೋಪ ಸಮಾರಂಭವನ್ನು ನಡೆಸಲಾಯಿತು.

ಮಿಲಿಟರಿ ಫಾರ್ಮ್’ ಎಂದರೇನು?

  • ಬ್ರಿಟಿಷ್ ಭಾರತದ ಕೋಟೆ ಅಥವಾ ನಗರಗಳನ್ನು ಕಾಪಾಡುವ ಸೈನಿಕರಿಗೆ ಹಸುವಿನ ಆರೋಗ್ಯಕರ ಹಾಲು ನೀಡುವ ಉದ್ದೇಶದಿಂದ ಈ ಮಿಲಿಟರಿ ಸಾಕಣೆ ಕೇಂದ್ರಗಳನ್ನು ಸ್ಥಾಪಿಸಲಾಯಿತು. ಮೊದಲ ಮಿಲಿಟರಿ ಫಾರ್ಮ್ ಅನ್ನು ಫೆಬ್ರವರಿ 1, 1889 ರಂದು ಅಲಹಾಬಾದ್ ನಲ್ಲಿ ಸ್ಥಾಪಿಸಲಾಯಿತು.
  • ಸ್ವಾತಂತ್ರ್ಯದ ನಂತರ, ಭಾರತದಾದ್ಯಂತ 30 ಸಾವಿರ ದನಗಳನ್ನು ಹೊಂದಿರುವ 130 ಮಿಲಿಟರಿ ಸಾಕಣೆ ಕೇಂದ್ರಗಳನ್ನು ನಿರ್ಮಿಸಲಾಯಿತು. 1990 ರ ದಶಕದ ಉತ್ತರಾರ್ಧದಲ್ಲಿ ಮಿಲಿಟರಿ ಫಾರ್ಮ್‌ಗಳನ್ನು ಲೇಹ್ ಮತ್ತು ಕಾರ್ಗಿಲ್‌ನಲ್ಲಿ ಸಹ ಸ್ಥಾಪಿಸಲಾಯಿತು.
  • ಒಂದು ಶತಮಾನಕ್ಕೂ ಹೆಚ್ಚು ಕಾಲ ಮಿಲಿಟರಿ ಫಾರ್ಮ್ ಗಳು 3.5 ಕೋಟಿ ಲೀಟರ್ ಹಾಲು ಮತ್ತು 25,000 ಟನ್ ಹುಲ್ಲು ಪೂರೈಸಿವೆ.

ಮಿಲಿಟರಿ ಫಾರ್ಮ್ ಗಳನ್ನು ಮುಚ್ಚುವ ಸಲಹೆಗಳು:

  • 2012 ರಲ್ಲಿ, ಮಿಲಿಟರಿ ಫಾರ್ಮ್‌ಗಳನ್ನು ಮುಚ್ಚಲು ಕ್ವಾರ್ಟರ್ ಮಾಸ್ಟರ್ ಜನರಲ್ ಶಾಖೆ ಶಿಫಾರಸು ಮಾಡಿತು.
  • ಡಿಸೆಂಬರ್ 2016 ರಲ್ಲಿ, ಸಶಸ್ತ್ರ ಪಡೆಗಳ ಯುದ್ಧ ಸಾಮರ್ಥ್ಯವನ್ನು ಹೆಚ್ಚಿಸಲು ಮತ್ತು ರಕ್ಷಣಾ ವೆಚ್ಚವನ್ನು ಮರು ಸಮತೋಲನ ಗೊಳಿಸುವ ಕ್ರಮಗಳನ್ನು ಶಿಫಾರಸು ಮಾಡಲು ರಚಿಸಲ್ಪಟ್ಟ ಲೆಫ್ಟಿನೆಂಟ್ ಜನರಲ್ ಡಿ.ಬಿ ಶೆಕಾಟ್ಕರ್ (ನಿವೃತ್ತ) ಸಮಿತಿಯು ಸಹ ಈ ಮಿಲಿಟರಿ ಫಾರ್ಮ್ ಗಳನ್ನು ಮುಚ್ಚಲು ಶಿಫಾರಸು ಮಾಡಿತು.

ಎಐಎಂ-ಪ್ರೈಮ್:

(AIM-PRIME)

  • ಈ ಕಾರ್ಯಕ್ರಮವನ್ನು ಅಟಲ್ ಇನ್ನೋವೇಶನ್ ಮಿಷನ್, ಬಿಲ್ & ಮೆಲಿಂಡಾ ಗೇಟ್ಸ್ ಫೌಂಡೇಶನ್ (ಬಿಎಂಜಿಎಫ್) ಮತ್ತು ವೆಂಚರ್ ಸೆಂಟರ್ ಸಹಭಾಗಿತ್ವದಲ್ಲಿ ಪ್ರಾರಂಭಿಸಿದೆ.
  • AIM-PRIME (ನಾವೀನ್ಯತೆ, ಮಾರುಕಟ್ಟೆ ಮತ್ತು ಉದ್ಯಮಶೀಲತೆ ಕುರಿತ ಸಂಶೋಧನಾ ಕಾರ್ಯಕ್ರಮ) ಭಾರತದಾದ್ಯಂತ ವಿಜ್ಞಾನ ಮತ್ತು ತಂತ್ರಜ್ಞಾನ ಆಧಾರಿತ ಉದ್ಯಮಗಳು ಮತ್ತು ಉದ್ಯಮಶೀಲತಾ ಸಂಸ್ಥೆಗಳನ್ನು (support science-based deep-tech startups) ಪ್ರೋತ್ಸಾಹಿಸಲು ಮತ್ತು ಬೆಂಬಲಿಸಲು ಪ್ರಾರಂಭಿಸಲಾದ ಒಂದು ಉಪಕ್ರಮವಾಗಿದೆ.

  • Join our Official Telegram Channel HERE for Motivation and Fast Updates
  • Subscribe to our YouTube Channel HERE to watch Motivational and New analysis videos