Print Friendly, PDF & Email

[ ದೈನಂದಿನ ಪ್ರಚಲಿತ ಘಟನೆಗಳು ] ದಿನಾಂಕ – 17 ಮಾರ್ಚ್ 2021

 

ಪರಿವಿಡಿ :

 ಸಾಮಾನ್ಯ ಅಧ್ಯಯನ ಪತ್ರಿಕೆ 1:

1. ಒರುನುದೊಯ್(ಅರುಣೋದಯ) ಯೋಜನೆ.

 

ಸಾಮಾನ್ಯ ಅಧ್ಯಯನ ಪತ್ರಿಕೆ 2:

1. ನಾಮನಿರ್ದೇಶಿತ ಸಂಸದರಿಗೆ ಪಕ್ಷಾಂತರ ವಿರೋಧಿ ಕಾಯ್ದೆಯ ಅನ್ವಯಿಸುವಿಕೆ.

 2. ಮುಲ್ಲಪೆರಿಯಾರ್ ಆಣೆಕಟ್ಟು ವಿವಾದ.

  

ಸಾಮಾನ್ಯ ಅಧ್ಯಯನ ಪತ್ರಿಕೆ 3: 

1. ಖಾಸಗಿ ವಲಯದಲ್ಲಿ 75% ಉದ್ಯೋಗಗಳನ್ನು ಸ್ಥಳೀಯರಿಗಾಗಿ ಕಾಯ್ದಿರಿಸುವ ಜಾರ್ಖಂಡ್ ಮಸೂದೆ.

2. ‘ವಿಶ್ವ ವಾಯು ಗುಣಮಟ್ಟ ವರದಿ 2020’.

3. ಅಭಿವೃದ್ಧಿ ಹಣಕಾಸು ಸಂಸ್ಥೆ (DFI) ಯನ್ನು ಸ್ಥಾಪಿಸುವ ಮಸೂದೆಗೆ ಅನುಮೋದನೆ ನೀಡಿದ ಕೇಂದ್ರ ಸಚಿವ ಸಂಪುಟ.

 

ಪೂರ್ವಭಾವಿ ಪರೀಕ್ಷೆಗೆ ಸಂಬಂಧಿಸಿದ ವಿದ್ಯಮಾನಗಳು:

1. ವಿಶ್ವದ ಅತಿ ಎತ್ತರದ ರೈಲ್ವೆ ಸೇತುವೆ.

2. ಯುರೋಪಿಯನ್ ಒಕ್ಕೂಟವನ್ನು ‘LGBTIQ ಸ್ವಾತಂತ್ರ್ಯ ವಲಯ’ ಎಂದು ಘೋಷಿಸಲಾಗಿದೆ.

3. ಅಂತರರಾಷ್ಟ್ರೀಯ ನವೀಕರಿಸಬಹುದಾದ ಇಂಧನ ಸಂಸ್ಥೆ (IRENA).

 


ಸಾಮಾನ್ಯ ಅಧ್ಯಯನ ಪತ್ರಿಕೆ – 1


 

ವಿಷಯಗಳು: ಮಹಿಳಾ ಸಂಬಂಧಿತ ಸಮಸ್ಯೆಗಳು.

ಒರುನುದೊಯ್(ಅರುಣೋದಯ) ಯೋಜನೆ:


(Orunudoi scheme)

 ಸಂದರ್ಭ:

ಅಸ್ಸಾಂ ಸರ್ಕಾರವು 2020 ರ ಡಿಸೆಂಬರ್‌ನಲ್ಲಿ ಪ್ರಾರಂಭಿಸಿದ ಒರುನುದೊಯ್ ಯೋಜನೆ ರಾಜ್ಯದ ಅತ್ಯಂತ ಜನಪ್ರಿಯ ಯೋಜನೆಗಳಲ್ಲಿ ಒಂದಾಗಿದೆ.

ಈ ಯೋಜನೆಯ ಬಗ್ಗೆ:

  • ಈ ಯೋಜನೆಯಡಿ ಅಸ್ಸಾಂನ ಬಡ ಕುಟುಂಬಗಳ ಮಹಿಳಾ ಸದಸ್ಯರಿಗೆ ಮಾಸಿಕ 830 ರೂ. ಗಳ ಸಹಾಯಧನವನ್ನು ನೇರ ವರ್ಗಾವಣೆ ವಿಧಾನದ ಮೂಲಕ ನೀಡಲಾಗುತ್ತದೆ.
  • ಇದು, ನೇರ ಲಾಭ ವರ್ಗಾವಣೆ (Direct Benefit Transfer- DBT) ಯೋಜನೆಯಾಗಿರುವುದರಿಂದ, ಬೆಂಬಲದ ಮೊತ್ತವನ್ನು ನೇರವಾಗಿ ಕುಟುಂಬದ ಮಹಿಳಾ ಮುಖ್ಯಸ್ಥರ ಖಾತೆಗೆ ಜಮೆ ಮಾಡಲಾಗುತ್ತದೆ, ಏಕೆಂದರೆ ಅವರು “ಕುಟುಂಬದ ಮುಖ್ಯ ಮತ್ತು ಪ್ರಾಥಮಿಕ ಉಸ್ತುವಾರಿ” ಆಗಿರುತ್ತಾರೆ.
  • ಈ ಯೋಜನೆಯು ‘ಬಡ ಮತ್ತು ನಿರ್ಗತಿಕ ಕುಟುಂಬಗಳಿಗೆ’ ತಮ್ಮ ಹಣವನ್ನು ಹೇಗೆ ಖರ್ಚು ಮಾಡಲು ಬಯಸುತ್ತಾರೆ ಎಂಬುದರ ಕುರಿತು ಒಂದು ಆಯ್ಕೆಯನ್ನು ಒದಗಿಸುತ್ತದೆ.

ಅರ್ಹತೆ:

  •  ಈ ಯೋಜನೆಯ ಲಾಭವನ್ನು ಪಡೆಯಲು, ಅರ್ಜಿದಾರ ಮಹಿಳೆಯು ಅಸ್ಸಾಂನ ಖಾಯಂ ನಿವಾಸಿ ಯಾಗಿರಬೇಕು ಮತ್ತು ಅರ್ಜಿದಾರರ ಇಡೀ ಕುಟುಂಬದ ಆದಾಯವು ವರ್ಷಕ್ಕೆ 2 ಲಕ್ಷ ರೂ.ಗಿಂತ ಕಡಿಮೆಯಿರಬೇಕು.
  • ಯೋಜನೆಯಡಿಯಲ್ಲಿ, ಅಂಗವಿಕಲ ಸದಸ್ಯರು, ವಿಚ್ಛೇದಿತರು / ವಿಧವೆ / ಬೇರ್ಪಟ್ಟ / ಅವಿವಾಹಿತ ಮಹಿಳೆಯರನ್ನು ಹೊಂದಿರುವ ಕುಟುಂಬಗಳಿಗೆ ವಿಶೇಷ ಆದ್ಯತೆ ನೀಡಲಾಗುತ್ತದೆ. ಇದರ ಅಡಿಯಲ್ಲಿ, ರಾಷ್ಟ್ರೀಯ ಆಹಾರ ಭದ್ರತಾ ಕಾಯ್ದೆಯಿಂದ (NFSA) ವಂಚಿತರಾಗಿರುವ ಮತ್ತು ಪಡಿತರ ಚೀಟಿ ಇಲ್ಲದ ಬಡ ಕುಟುಂಬಗಳಿಗೂ ಆದ್ಯತೆ ನೀಡಲಾಗುತ್ತದೆ.
  • ಮಹಿಳಾ ಸದಸ್ಯರು ಇಲ್ಲದ ಕುಟುಂಬಗಳು, ಸಂಸದರು, ಶಾಸಕರು (ಹಿಂದಿನ ಮತ್ತು ಪ್ರಸ್ತುತ), ಪಂಚಾಯತಿ ರಾಜ್ ಸಂಸ್ಥೆಗಳ ಸದಸ್ಯರು ಮತ್ತು ನಗರ ಸ್ಥಳೀಯ ಸಂಸ್ಥೆಗಳ ಸದಸ್ಯರು, ಸರ್ಕಾರಿ ಅಧಿಕಾರಿಗಳು ಮತ್ತು ಸಹಕಾರಿ ನೌಕರರನ್ನು ಈ ಯೋಜನೆಯಿಂದ ಹೊರಗಿಡಲಾಗಿದೆ.
  • ನಾಲ್ಕು ಚಕ್ರಗಳು, ಯಾಂತ್ರಿಕೃತ ದೋಣಿಗಳು, ಟ್ರಾಕ್ಟರುಗಳು ಅಥವಾ ರೆಫ್ರಿಜರೇಟರ್‌ಗಳು, ಎಸಿಗಳು ಮತ್ತು ಬಟ್ಟೆ ತೊಳೆಯುವ ಯಂತ್ರಗಳು ಅಥವಾ 15 ಕ್ಕೂ ಹೆಚ್ಚು ದೊಡ್ಡ ಕೃಷಿ ಭೂಮಿಯನ್ನು ಹೊಂದಿರುವ ಕುಟುಂಬಗಳು ಈ ಯೋಜನೆಯ ಲಾಭವನ್ನು ಪಡೆಯಲು ಅರ್ಹವಲ್ಲ.

 


ಸಾಮಾನ್ಯ ಅಧ್ಯಯನ ಪತ್ರಿಕೆ – 2


 

ವಿಷಯಗಳು: ಭಾರತೀಯ ಸಂವಿಧಾನ- ಐತಿಹಾಸಿಕ ಆಧಾರಗಳು, ವಿಕಸನ, ವೈಶಿಷ್ಟ್ಯಗಳು, ತಿದ್ದುಪಡಿಗಳು, ಮಹತ್ವದ ನಿಬಂಧನೆಗಳು ಮತ್ತು ಮೂಲ ರಚನೆ.

ನಾಮನಿರ್ದೇಶಿತ ಸಂಸದರಿಗೆ ಪಕ್ಷಾಂತರ ವಿರೋಧಿ ಕಾಯ್ದೆಯ ಅನ್ವಯಿಸುವಿಕೆ:


(Applicability of Anti-defection law for nominated MPs)

 ಸಂದರ್ಭ:

ಇತ್ತೀಚೆಗೆ, ನಾಮನಿರ್ದೇಶಿತ ಸಂಸದ ಸ್ವಪನ್ ದಾಸ್‌ಗುಪ್ತಾ ಅವರ ಅವಧಿ ಪೂರ್ಣಗೊಳ್ಳುವ ಒಂದು ವರ್ಷದ ಮೊದಲು ರಾಜ್ಯಸಭೆಗೆ ರಾಜೀನಾಮೆ ನೀಡಿದ್ದಾರೆ.

ಏನಿದು ಸಮಸ್ಯೆ?

ಪಶ್ಚಿಮ ಬಂಗಾಳ ವಿಧಾನಸಭಾ ಚುನಾವಣೆಯಲ್ಲಿ ಸ್ವಪನ್ ದಾಸ್‌ಗುಪ್ತಾ ಅವರನ್ನು ತಾರಕೇಶ್ವರ ಕ್ಷೇತ್ರದ ತನ್ನ ಅಭ್ಯರ್ಥಿಯಾಗಿ ಬಿಜೆಪಿ ಕಣಕ್ಕಿಳಿಸಿದೆ, ಈ ಕುರಿತು ಪಕ್ಷಾಂತರ ವಿರೋಧಿ ಕಾನೂನಿನಡಿಯಲ್ಲಿ ರಾಜ್ಯಸಭೆಯಿಂದ ಅನರ್ಹ ಎಂದು ಘೋಷಿಸಬೇಕು ಎಂಬ ವಿಷಯವನ್ನು ಪ್ರತಿಪಕ್ಷಗಳು ಎತ್ತಿವೆ.

ನಾಮನಿರ್ದೇಶಿತ ಸದಸ್ಯರು’ ಯಾರು?

  • ರಾಜ್ಯಸಭೆಯು ವಿವಿಧ ವರ್ಗದ 12 ನಾಮನಿರ್ದೇಶಿತ ಸದಸ್ಯರನ್ನು ಹೊಂದಿರುತ್ತದೆ.
  • ರಾಜ್ಯಸಭೆಗೆ ನಾಮನಿರ್ದೇಶನ ಮಾಡುವ ವಿಶಾಲ ಮಾನದಂಡವೆಂದರೆ ಸದಸ್ಯರಿಗೆ ಸಾಹಿತ್ಯ, ವಿಜ್ಞಾನ, ಕಲೆ ಮತ್ತು ಸಾಮಾಜಿಕ ಸೇವೆಯಂತಹ ಕ್ಷೇತ್ರಗಳಲ್ಲಿ ವಿಶೇಷ ಜ್ಞಾನ ಅಥವಾ ಪ್ರಾಯೋಗಿಕ ಅನುಭವ ಮತ್ತು ನಿರ್ದಿಷ್ಟ ಮಾನ್ಯತೆ ಇರಬೇಕು.
  • ಈ ಸದಸ್ಯರನ್ನು ಕೇಂದ್ರ ಸರ್ಕಾರದ ಶಿಫಾರಸಿನ ಮೇರೆಗೆ ರಾಷ್ಟ್ರಪತಿಗಳು ನಾಮಕರಣ ಮಾಡುತ್ತಾರೆ.
  • ನಾಮನಿರ್ದೇಶಿತ ಸದಸ್ಯರಿಗೆ, ಒಂದು ಗಮನಾರ್ಹ ವ್ಯತ್ಯಾಸವನ್ನು ಹೊರತುಪಡಿಸಿ, ಚುನಾಯಿತ ಸದಸ್ಯರಿಗೆ ಇರುವಂತಹ ಒಂದೇ ರೀತಿಯ ಹಕ್ಕುಗಳು ಮತ್ತು ಸವಲತ್ತುಗಳಿವೆ – ಆದರೆ, ಅವರು ರಾಷ್ಟ್ರಪತಿಗಳ ಚುನಾವಣೆಯಲ್ಲಿ ಮತ ಚಲಾಯಿಸಲು ಸಾಧ್ಯವಿಲ್ಲ.

ಪಕ್ಷಾಂತರ ನಿಷೇಧ ಕಾನೂನು ಎಂದರೇನು?

What is Anti-defection law?

  • 1985 ರಲ್ಲಿ, ಸಂವಿಧಾನ 52 ನೆಯ ತಿದ್ದುಪಡಿ ಕಾಯ್ದೆಯ ಮೂಲಕ 10 ನೇ ಅನುಸೂಚಿಯನ್ನು ಸಂವಿಧಾನದಲ್ಲಿ ಸೇರಿಸಲಾಯಿತು.
  • ಇದರಲ್ಲಿ, ಸದನದ ಸದಸ್ಯರು ಒಂದು ರಾಜಕೀಯ ಪಕ್ಷದಿಂದ ಇನ್ನೊಂದಕ್ಕೆ ಸೇರಿದಾಗ ‘ಪಕ್ಷಾಂತರದ’ ಆಧಾರದ ಮೇಲೆ ಶಾಸಕರ ಅನರ್ಹತೆಯ ಬಗ್ಗೆ ನಿರ್ಧರಿಸಲು ಅವಕಾಶ ಕಲ್ಪಿಸಲಾಗಿದೆ.
  • ಸದನದ ಮತ್ತೊಬ್ಬ ಸದಸ್ಯರು ಸದನದ ಅಧ್ಯಕ್ಷರಿಗೆ ಪಕ್ಷಾಂತರದ ಕುರಿತು ಸಲ್ಲಿಸಿದ ಅರ್ಜಿಯ ಆಧಾರದ ಮೇಲೆ ಶಾಸಕರು ಮತ್ತು ಸಂಸದರನ್ನು ಅನರ್ಹಗೊಳಿಸುವ ಪ್ರಕ್ರಿಯೆಯನ್ನು ಇದು ತಿಳಿಸುತ್ತದೆ.
  • ಪಕ್ಷಾಂತರ ವಿರೋಧಿ ಕಾನೂನನ್ನು ಜಾರಿಗೆ ತರುವ ಎಲ್ಲ ಅಧಿಕಾರಗಳನ್ನು ಸ್ಪೀಕರ್ ಅಥವಾ ಸದನದ ಅಧ್ಯಕ್ಷರಿಗೆ ನೀಡಲಾಗಿದೆ ಮತ್ತು ಅವರ ನಿರ್ಧಾರ ಅಂತಿಮವಾಗಿರುತ್ತದೆ.
  • ಸಂಸದರು ಮತ್ತು ಶಾಸಕರು ತಮ್ಮ ಮೂಲ ರಾಜಕೀಯ ಪಕ್ಷವನ್ನು ಅಂದರೆ ಯಾವ ಪಕ್ಷದ ಟಿಕೆಟ್ ಆಧರಿಸಿ ಆಯ್ಕೆಯಾಗಿರುತ್ತಾರೋ ಅದನ್ನು ಹೊರತುಪಡಿಸಿ ಬೇರೆ ಪಕ್ಷಗಳಿಗೆ ಸೇರುವುದನ್ನು ನಿಷೇಧಿಸುವ ಮೂಲಕ ಸರ್ಕಾರಗಳಲ್ಲಿ ಸ್ಥಿರತೆಯನ್ನು ತರುವ ಉದ್ದೇಶದಿಂದ ಈ ತಿದ್ದುಪಡಿಯನ್ನು ತರಲಾಗಿದೆ.
  • ಇದರ ಅಡಿಯಲ್ಲಿ ರಾಜಕೀಯ ನಿಷ್ಠೆಯನ್ನು ಬದಲಿಸಿದರೆ ವಿಧಿಸುವ ದಂಡವೆಂದರೆ ಸಂಸದೀಯ ಸದಸ್ಯತ್ವದಿಂದ ಅನರ್ಹಗೊಳಿಸುವುದು ಮತ್ತು ಮಂತ್ರಿಗಳಾಗದಂತೆ ನಿಷೇಧಿಸುವುದಾಗಿದೆ.

ರಾಜಕೀಯ ಪಕ್ಷವನ್ನು ಬದಲಾಯಿಸಿದರೆ ಶಾಸಕರು / ಸಂಸದರು ಕಾನೂನಿನಡಿಯಲ್ಲಿ ಯಾವ ಕ್ರಮಗಳನ್ನು ಎದುರಿಸಬೇಕಾಗಬಹುದು ಎಂಬುದನ್ನು ಈ ಕಾನೂನು ನಿರ್ದಿಷ್ಟಪಡಿಸುತ್ತದೆ. ಪಕ್ಷಾಂತರ ಮಾಡುವ ಸಂಸದರ ಸಂದರ್ಭದಲ್ಲಿ ಈ ಕಾನೂನು ಮೂರು ರೀತಿಯ ಸನ್ನಿವೇಶಗಳನ್ನು ರೂಪಿಸುತ್ತದೆ:

  • ಸದನದ ಸದಸ್ಯನೊಬ್ಬ ರಾಜಕೀಯ ಪಕ್ಷವೊಂದಕ್ಕೆ ಸೇರಿದವನಾಗಿದ್ದರೆ,ಸ್ವಯಂಪ್ರೇರಣೆಯಿಂದ ಅವರ ರಾಜಕೀಯ ಪಕ್ಷದ ಸದಸ್ಯತ್ವವನ್ನು ತ್ಯಜಿಸಿದರೆ, ಅಥವಾ ಅವರು ತಮ್ಮ ರಾಜಕೀಯ ಪಕ್ಷದ ಸೂಚನೆಗಳಿಗೆ ವಿರುದ್ಧವಾಗಿ ಸದನದಲ್ಲಿ ಮತ ಚಲಾಯಿಸಿದರೆ.
  • ಸ್ವತಂತ್ರ ಅಭ್ಯರ್ಥಿಯು ಚುನಾವಣೆಯ 6 ತಿಂಗಳ ನಂತರ ರಾಜಕೀಯ ಪಕ್ಷವೊಂದಕ್ಕೆ ಸೇರಿದರೆ.
  • ನಾಮನಿರ್ದೇಶಿತ ಸದಸ್ಯರೊಬ್ಬರು ಶಾಸಕಾಂಗದ ಸದಸ್ಯರಾದ ಆರು ತಿಂಗಳ ಒಳಗೆ ಅವರು ರಾಜಕೀಯ ಪಕ್ಷವೊಂದನ್ನು ಸೇರಬಹುದು ಎಂದು ಕಾನೂನು ತಿಳಿಸುತ್ತದೆ ಅದರ ನಂತರ ನಂತರ ಪಕ್ಷವೊಂದಕ್ಕೆ ಸೇರಿದರೆ ವಿಧಾನಮಂಡಲ ಅಥವಾ ಸಂಸತ್ತಿನಲ್ಲಿ ಆ ನಾಮನಿರ್ದೇಶಿತ ಸದಸ್ಯರು ತಮ್ಮ ಸ್ಥಾನವನ್ನು ಕಳೆದುಕೊಳ್ಳುತ್ತಾರೆ.

 

ವಿಷಯಗಳು: ಸರ್ಕಾರದ ವಿವಿಧ ಅಂಗಗಳ ನಡುವೆ ಅಧಿಕಾರ ವಿಭಜನೆ ವಿವಾದ ಪರಿಹಾರ ಕಾರ್ಯವಿಧಾನಗಳು ಮತ್ತು ಸಂಸ್ಥೆಗಳು.

ಮುಲ್ಲಪೆರಿಯಾರ್ ಆಣೆಕಟ್ಟು ವಿವಾದ:


(Mullaperiyar Dam Issue)

ಸಂದರ್ಭ:

ಇತ್ತೀಚೆಗೆ,ಮುಲ್ಲಾಪೆರಿಯಾರ್ ಪ್ರಕರಣದಲ್ಲಿ ಸುಪ್ರೀಂ ಕೋರ್ಟ್ ತಮಿಳುನಾಡಿಗೆ ಎಚ್ಚರಿಕೆ ನೀಡಿದೆ.

ನ್ಯಾಯಾಲಯದ ಹೇಳುವುದೇನು?

  • ಸುಪ್ರೀಂ ಕೋರ್ಟ್ ನೇಮಿಸಿದ ಮೇಲ್ವಿಚಾರಣಾ ಸಮಿತಿಗೆ ಮುಲ್ಲಪೆರಿಯಾರ್ ಅಣೆಕಟ್ಟಿನ ‘ರೂಲ್ ಕರ್ವ್’ ಬಗ್ಗೆ ಮಾಹಿತಿ ನೀಡಲು ವಿಫಲವಾದರೆ, ತಮಿಳುನಾಡಿನ ಮುಖ್ಯ ಕಾರ್ಯದರ್ಶಿ ‘ವೈಯಕ್ತಿಕವಾಗಿ ಜವಾಬ್ದಾರರು’ ಮತ್ತು ಅದರ ವಿರುದ್ಧ ‘ಸೂಕ್ತ ಕ್ರಮ ಕೈಗೊಳ್ಳಲಾಗುವುದು’ ಎಂದು ನ್ಯಾಯಾಲಯ ಹೇಳಿದೆ .
  • ಮೂರು ಪ್ರಮುಖ ಸುರಕ್ಷತಾ ಸಮಸ್ಯೆಗಳನ್ನು ಪರಿಹರಿಸಲು ಮೇಲ್ವಿಚಾರಣಾ ಸಮಿತಿಯಿಂದ ಸೂಚನೆಗಳು ಅಥವಾ ಸೂಕ್ತ ಕ್ರಮಗಳನ್ನು ಹೊರಡಿಸಬೇಕು ಅಣೆಕಟ್ಟು ಸಲಕರಣೆಗಳ ಮೇಲ್ವಿಚಾರಣೆ ಮತ್ತು ಕಾರ್ಯಕ್ಷಮತೆ, ‘ರೂಲ್ ಕರ್ವ್’ ಅನ್ನು ನಿರ್ಧರಿಸುವುದು ಮತ್ತು ಅಣೆಕಟ್ಟು ಬಾಗಿಲುಗಳ ಕಾರ್ಯಾಚರಣೆಯ ವೇಳಾಪಟ್ಟಿಯನ್ನು ಸರಿಪಡಿಸುವುದು – ಮತ್ತು ನಾಲ್ಕು ವಾರಗಳೊಳಗೆ ಅನುಸರಣೆ ವರದಿಯನ್ನು ಸಲ್ಲಿಸುವುದು.

ಏನಿದು ಪ್ರಕರಣ?

ತಮಿಳುನಾಡು ಸರ್ಕಾರವು 1939 ರಷ್ಟು ಹಳೆಯಬಳಕೆಯಲ್ಲಿಲ್ಲದ” ಅಣೆಕಟ್ಟು-ಬಾಗಿಲು ಕಾರ್ಯಾಚರಣೆ ಕಾರ್ಯಕ್ರಮವನ್ನು (gate operation schedule) ಪ್ರಾರಂಭಿಸಿದೆ ಎಂದು ಕೇರಳವು ಆರೋಪಿಸಿದೆ. ಪೆರಿಯಾರ್ ಹುಲಿ ಮೀಸಲು ಪ್ರದೇಶದ ಬಳಿಯ ಅಣೆಕಟ್ಟೆಯಲ್ಲಿನ ನೀರಿನ ಮಟ್ಟವನ್ನು ಸರಿಯಾಗಿ ಮೇಲ್ವಿಚಾರಣೆ ಮಾಡದಿರುವ ಬಗ್ಗೆ ಕೇರಳ ಆತಂಕ ವ್ಯಕ್ತಪಡಿಸಿದೆ.

ರೂಲ್ ಕರ್ವ್’ ಎಂದರೇನು?

ಅಣೆಕಟ್ಟೆಯ / ಜಲಾಶಯದಲ್ಲಿನ ನೀರಿನ ಏರಿಳಿತದ ಶೇಖರಣಾ ಮಟ್ಟವನ್ನು ನಿಯಮ ಕರ್ವ್ (rule curve) ನಿರ್ಧರಿಸುತ್ತದೆ. ಅಣೆಕಟ್ಟೆಯ ಗೇಟ್ ತೆರೆಯುವ ವೇಳಾಪಟ್ಟಿಯು ‘ರೂಲ್ ಕರ್ವ್’ ಅನ್ನು ಆಧರಿಸಿದೆ. ಇದು ಅಣೆಕಟ್ಟೆಯ ‘ಮುಖ್ಯ ರಕ್ಷಣೆ’ ಕಾರ್ಯವಿಧಾನದ ಭಾಗವಾಗಿದೆ.

ಮುಲ್ಲಪೆರಿಯಾರ್ ಆಣೆಕಟ್ಟೆಯ ಕುರಿತು ತಿಳಿದುಕೊಳ್ಳಬೇಕಾದ ಸಂಗತಿಗಳೇನು?

ಮುಲ್ಲಾಪೇರಿಯಾರ್ ಅಣೆಕಟ್ಟು ಕೇರಳದಲ್ಲಿದ್ದರೂ, 1886 ರ ಗುತ್ತಿಗೆ ಒಪ್ಪಂದದ  ನಂತರ ಪೆರಿಯಾರ್ ನೀರಾವರಿ ಕಾರ್ಯಗಳಿಗಾಗಿ 999 ವರ್ಷಗಳ ಗುತ್ತಿಗೆ ಅವಧಿಗೆ (lease indenture),  ಇದನ್ನು ತಮಿಳುನಾಡು ನಿರ್ವಹಿಸುತ್ತದೆ. ಇದನ್ನು “ಪೆರಿಯಾರ್ ಸರೋವರ ಗುತ್ತಿಗೆ ಒಪ್ಪಂದ” ಎಂದೂ ಕರೆಯುತ್ತಾರೆ, ಇದು 1886 ರಲ್ಲಿ  ತಿರುವಾಂಕೂರಿನ ಮಹಾರಾಜ ಮತ್ತು ಭಾರತದ ರಾಜ್ಯ ಕಾರ್ಯದರ್ಶಿ ನಡುವೆ ಆದ ಒಪ್ಪಂದವಾಗಿದೆ.

  • ಈ ಅಣೆಕಟ್ಟೆಯನ್ನು 1887 ಮತ್ತು 1895 ರ ನಡುವೆ ನಿರ್ಮಿಸಲಾಗಿದ್ದು ಅರೇಬಿಯನ್ ಸಮುದ್ರದ ಕಡೆಗೆ ಹರಿಯುವ ಹೊಳೆಯನ್ನು ಬಂಗಾಳಕೊಲ್ಲಿಯ ಕಡೆಗೆ

ತಿರುಗಿಸಲಾಯಿತು. ಆ ಮೂಲಕ  ಮದ್ರಾಸ್ ಪ್ರೆಸಿಡೆನ್ಸಿಯ ಮಧುರೈನ ಒಣ ಮಳೆ ಪ್ರದೇಶಕ್ಕೆ ಅಥವಾ ಮಳೆಯಾಶ್ರಿತ ಪ್ರದೇಶಕ್ಕೆ ನೀರಾವರಿ ಸೌಲಭ್ಯವನ್ನು ಒದಗಿಸುವ ಉದ್ದೇಶವನ್ನು ಹೊಂದಿತ್ತು.

  • ಈ ಅಣೆಕಟ್ಟು ಕೇರಳದ ಇಡುಕ್ಕಿ ಜಿಲ್ಲೆಯ ಮುಲ್ಲಯಾರ್ ಮತ್ತು ಪೆರಿಯಾರ್ ನದಿಗಳ ಸಂಗಮ ಸ್ಥಳದಲ್ಲಿದೆ.

ತಮಿಳುನಾಡು ಹೇಳುವುದೇನು?

ಅಣೆಕಟ್ಟೆಯನ್ನು ಬಲಪಡಿಸಲು ಕ್ರಮ ಕೈಗೊಳ್ಳಲಾಗಿದೆ ಎಂದು ತಮಿಳುನಾಡು ಹೇಳುತ್ತದೆ, ಆದರೆ ಕೇರಳ ಸರ್ಕಾರವು ಜಲಾಶಯದ ನೀರಿನ ಮಟ್ಟವನ್ನು ಹೆಚ್ಚಿಸುವ ತನ್ನ ಪ್ರಯತ್ನಗಳಿಗೆ ನಿರ್ಬಂಧ ಉಂಟುಮಾಡುತ್ತಿದೆ ಆ ಮೂಲಕ, ಮಧುರೈನ ರೈತರಿಗೆ ನಷ್ಟ ಉಂಟಾಗುತ್ತಿದೆ ಎಂದು ಬಲವಾಗಿ ಹೇಳುತ್ತಿದೆ.

ಕೇರಳದ ವಾದವೇನು?

  • ಅಣೆಕಟ್ಟೆಯ ಕೆಳಪಾತ್ರದಲ್ಲಿನ ಭೂಕಂಪ ಪೀಡಿತ ಜಿಲ್ಲೆಯಾದ ಇಡುಕ್ಕಿ ಜಿಲ್ಲೆಯ ನಿವಾಸಿಗಳ ವಿನಾಶದ ಅಥವಾ ಪ್ರಾಣಹಾನಿಯ ಸಾಧ್ಯತೆಯ ಬಗ್ಗೆ ಕೇರಳ ಚಿಂತಿಸುತ್ತಿದೆ.
  • ಭೂಕಂಪನವು ಈ ಪ್ರದೇಶದಲ್ಲಿ ರಿಕ್ಟರ್ ಮಾಪಕದಲ್ಲಿ ಆರು ಅಳತೆಗಳನ್ನು ಮೀರಿದರೆ, ಮೂರು ದಶಲಕ್ಷಕ್ಕೂ ಹೆಚ್ಚು ಜನರ ಜೀವವು ಗಂಭೀರ ಅಪಾಯಕ್ಕೆ ಸಿಲುಕುವ ಸಾಧ್ಯತೆಯಿದೆ ಎಂದು ವಿಜ್ಞಾನಿಗಳು ವಾದಿಸುತ್ತಾರೆ.

Mullaperiyar_Dam

 


ಸಾಮಾನ್ಯ ಅಧ್ಯಯನ ಪತ್ರಿಕೆ – 3


 

ವಿಷಯಗಳು: ಭಾರತೀಯ ಆರ್ಥಿಕತೆ ಮತ್ತು ಯೋಜನೆ, ಸಂಪನ್ಮೂಲಗಳ ಕ್ರೋಡೀಕರಣ, ಪ್ರಗತಿ, ಅಭಿವೃದ್ಧಿ ಮತ್ತು ಉದ್ಯೋಗಕ್ಕೆ ಸಂಬಂಧಿಸಿದ ಸಮಸ್ಯೆಗಳು.

ಖಾಸಗಿ ವಲಯದಲ್ಲಿ 75% ಉದ್ಯೋಗಗಳನ್ನು ಸ್ಥಳೀಯರಿಗಾಗಿ ಕಾಯ್ದಿರಿಸುವ ಜಾರ್ಖಂಡ್ ಮಸೂದೆ:


(The Jharkhand bill that reserves 75% jobs in private sector for locals)

 ಸಂದರ್ಭ:

ಇತ್ತೀಚೆಗೆ, ಸ್ಥಳೀಯ ಜನರಿಗೆ ಖಾಸಗಿ ವಲಯದ ಉದ್ಯೋಗಗಳಲ್ಲಿ 75% ಮೀಸಲಾತಿಯನ್ನು ಜಾರ್ಖಂಡ್ ಸರ್ಕಾರ ಘೋಷಿಸಿದೆ.

ಸರಕಾರವು ಈ ಮಸೂದೆಯಲ್ಲಿ ‘ಖಾಸಗಿ ವಲಯದ ಉದ್ಯೋಗಗಳು’ ಹೇಗೆ ವ್ಯಾಖ್ಯಾನಿಸಿದೆ?

ಮಸೂದೆಯಲ್ಲಿ, ಅಂಗಡಿಗಳು, ಸಂಸ್ಥೆಗಳು, ಗಣಿಗಳು, ಉದ್ಯಮಗಳು, ಕೈಗಾರಿಕೆಗಳು, ಕಂಪನಿಗಳು, ಸಂಘಗಳು, ಟ್ರಸ್ಟ್‌ಗಳು, ಸೀಮಿತ ಹೊಣೆಗಾರಿಕೆ ಪಾಲುದಾರಿಕೆ ಸಂಸ್ಥೆಗಳು ಮತ್ತು ಹತ್ತು ಅಥವಾ ಹೆಚ್ಚಿನ ವ್ಯಕ್ತಿಗಳನ್ನು ನೇಮಕ ಮಾಡುವ ಘಟಕಗಳನ್ನು ಖಾಸಗಿ ವಲಯ ಅಥವಾ ಖಾಸಗಿ ಸಂಸ್ಥೆಗಳೆಂದು ಪರಿಗಣಿಸಲಾಗುತ್ತದೆ. ಇದಲ್ಲದೆ ಇದನ್ನು ಸರ್ಕಾರವು ಕಾಲಕಾಲಕ್ಕೆ ಪರಿಷ್ಕರಿಸಬಹುದು.

ಮಸೂದೆಯ ಪ್ರಮುಖ ಅಂಶಗಳು:

  •  ಈ ಮಸೂದೆ ಅಂಗೀಕಾರಗೊಂಡು ಕಾಯ್ದೆ ಜಾರಿಗೆ ಬಂದ ಮೂರು ತಿಂಗಳೊಳಗೆ ಎಲ್ಲಾ ಉದ್ಯೋಗದಾತರು, ಒಟ್ಟು ಮಾಸಿಕ ವೇತನ ಅಥವಾ ವೇತನ 30,000 ರೂ.ಗಿಂತ ಹೆಚ್ಚಿಲ್ಲದ ವೇತನವನ್ನು ಪಡೆಯುತ್ತಿರುವ ನೌಕರರನ್ನು ಗೊತ್ತುಪಡಿಸಿದ ಪೋರ್ಟಲ್ ನಲ್ಲಿ ನೋಂದಾಯಿಸಬೇಕು, ಅಥವಾ ಕಾಲಕಾಲಕ್ಕೆ ಸರ್ಕಾರ ಸೂಚಿಸಿದ ಸೂಚನೆಗಳ ಪ್ರಕಾರ – ನೋಂದಾಯಿಸಿಕೊಳ್ಳಬೇಕು.
  • ನಿಗದಿತ ಪೋರ್ಟಲ್‌ನಲ್ಲಿ ನೋಂದಣಿ ಪ್ರಕ್ರಿಯೆಯನ್ನು ಪೂರ್ಣಗೊಳಿಸದೆ ಯಾವುದೇ ವ್ಯಕ್ತಿಯನ್ನು ನೇಮಿಸಿಕೊಳ್ಳುವಂತೆ ಇಲ್ಲ.
  • ಎಲ್ಲಾ ಸ್ಥಳೀಯ ಅಭ್ಯರ್ಥಿಗಳು ತಮ್ಮನ್ನು ತಾವು ಗೊತ್ತುಪಡಿಸಿದ ಪೋರ್ಟಲ್‌ನಲ್ಲಿ ನೋಂದಾಯಿಸಿಕೊಳ್ಳಬೇಕಾಗುತ್ತದೆ, ಇಲ್ಲದೆ ಹೋದರೆ ಯಾವುದೇ ಸ್ಥಳೀಯ ಅಭ್ಯರ್ಥಿಯು 75 ಪ್ರತಿಶತ ಮೀಸಲಾತಿಯ ಲಾಭವನ್ನು ಪಡೆಯಲು ಆಗುವುದಿಲ್ಲ.
  • ಅಪೇಕ್ಷಿತ ಕೌಶಲ್ಯ ಅರ್ಹತೆ ಅಥವಾ ಪ್ರಾವೀಣ್ಯತೆಯ ಸ್ಥಳೀಯ ಅಭ್ಯರ್ಥಿಗಳು ಸಾಕಷ್ಟು ಸಂಖ್ಯೆಯಲ್ಲಿ ಲಭ್ಯವಿಲ್ಲದಿದ್ದರೆ ಈ ವಿಷಯದಲ್ಲಿ ಉದ್ಯೋಗದಾತರು ವಿನಾಯಿತಿ ಪಡೆಯಬಹುದು.
  • ಉದ್ಯೋಗದಾತರು, ಖಾಲಿ ಹುದ್ದೆಗಳು ಮತ್ತು ಉದ್ಯೋಗದ ವಿವರಗಳನ್ನು ಪ್ರತಿ ತ್ರೈಮಾಸಿಕದಲ್ಲಿ ಪೋರ್ಟಲ್‌ನಲ್ಲಿ ಸಲ್ಲಿಸಬೇಕಾಗುತ್ತದೆ, ಇದನ್ನು ಅಧಿಕೃತ ಅಧಿಕಾರಿ (Authorised Officer), ಅಂದರೆ ಜಿಲ್ಲಾ ಉದ್ಯೋಗ ಅಧಿಕಾರಿ ಪರಿಶೀಲಿಸುತ್ತಾರೆ. ಈ ಅಧಿಕಾರಿ ಪರಿಶೀಲನೆಯ ಉದ್ದೇಶಕ್ಕಾಗಿ ಯಾವುದೇ ದಾಖಲೆಯನ್ನು ಕೇಳಬಹುದು.
  • ಅಧಿಕೃತ ಅಧಿಕಾರಿ (AO) ಹೊರಡಿಸಿದ ಆದೇಶದ ವಿರುದ್ಧದ ಅಸಮಾಧಾನಗೊಂಡ ಉದ್ಯೋಗದಾತರು 60 ದಿನಗಳೊಳಗೆ ಜಾರ್ಖಂಡ್ ಸರ್ಕಾರದ ಮೇಲ್ಮನವಿ ಪ್ರಾಧಿಕಾರವಾದ, ನಿರ್ದೇಶಕರು, ಉದ್ಯೋಗ ಮತ್ತು ತರಬೇತಿ, ನಿರ್ದೇಶನಾಲಯದ ಮುಂದೆ ಮೇಲ್ಮನವಿ ಸಲ್ಲಿಸಬಹುದು.

ಈ ನೀತಿಗೆ ಸಂಬಂಧಿಸಿದ ಕಾಳಜಿಗಳು ಮತ್ತು ಇತರ ಸಮಸ್ಯೆಗಳು:

  • ಈ ನೀತಿಯು 16 ನೇ ವಿಧಿಗೆ ಸಂಬಂಧಿಸಿದ ಸಾಂವಿಧಾನಿಕ ನಿಬಂಧನೆಗಳನ್ನು ಉಲ್ಲಂಘಿಸುತ್ತದೆ.
  • ಪರಿಣಾಮ: ‘ವೈವಿಧ್ಯತೆಯಲ್ಲಿ ಏಕತೆ’: ಈ ನೀತಿಯು ಒಂದು ಪ್ರದೇಶದಲ್ಲಿ ಸ್ಥಳೀಯ ಮತ್ತು ಸ್ಥಳೀಯೇತರ ಸಂಘರ್ಷದ ಪರಿಸ್ಥಿತಿಯನ್ನು ರಚಿಸಬಹುದು, ಇದು ದೇಶದ ಏಕೀಕರಣಕ್ಕೆ ಅಪಾಯವನ್ನುಂಟು ಮಾಡುತ್ತದೆ.
  • ಇದು ಈ ಪ್ರದೇಶದಲ್ಲಿನ ಬಂಡವಾಳ ಹೂಡಿಕೆಯನ್ನು ನಿರುತ್ಸಾಹಗೊಳಿಸಬಹುದು.
  • ವ್ಯವಹಾರದ ಸ್ವಾತಂತ್ರ್ಯದ ಮೇಲೆ ಪರಿಣಾಮ ಬೀರುತ್ತದೆ.
  • ಸ್ಪರ್ಧೆಯ ಮನೋಭಾವಕ್ಕೆ ವಿರುದ್ಧವಾಗಿದೆ.

 

ವಿಷಯಗಳು: ಸಂರಕ್ಷಣೆ, ಪರಿಸರ ಮಾಲಿನ್ಯ ಮತ್ತು ಅವನತಿ, ಪರಿಸರ ಪ್ರಭಾವದ ಮೌಲ್ಯಮಾಪನ.

‘ವಿಶ್ವ ವಾಯು ಗುಣಮಟ್ಟ ವರದಿ 2020’:


(World Air Quality Report)

 ಸಂದರ್ಭ:

ಇದು ಸ್ವಿಟ್ಜರ್ಲ್ಯಾಂಡ್ ಮೂಲದ ಐಕ್ಯೂಏರ್ ಸಂಸ್ಥೆ ಬಿಡುಗಡೆ ಮಾಡಿದ ವಾಯು ಗುಣಮಟ್ಟದ ವರದಿಯಾಗಿದೆ.

  • ವಾಯುಮಾಲಿನ್ಯ ಕುರಿತು ನಗರಗಳ ಜಾಗತಿಕ ಶ್ರೇಣಿಯನ್ನು 106 ದೇಶಗಳಿಂದ ಪಡೆದ ಗುಣಮಟ್ಟ ಮಾಪಕದ ಪಿಎಂ2.5 ಅಂಕಿ ಅಂಶ ಆಧರಿಸಿ ನೀಡಲಾಗಿದೆ. ಸರ್ಕಾರಗಳ ಅಧೀನ ಸಂಸ್ಥೆಗಳು ನೀಡಿರುವ ಅಂಕಿಅಂಶಗಳನ್ನು ಈ ವರದಿ ಆಧರಿಸಿದೆ.

ಭಾರತದ ನಗರಗಳಲ್ಲಿ ವಾಯುಮಾಲಿನ್ಯ:

  • ವಿಶ್ವದ ಅತ್ಯಂತ ಕಲುಷಿತ ರಾಜಧಾನಿ- ದೆಹಲಿ: ದೆಹಲಿಯ ವಾಯು ಗುಣಮಟ್ಟವು 2019 ರಿಂದ 2020 ರವರೆಗೆ ಸುಮಾರು 15 ಪ್ರತಿಶತದಷ್ಟು ಸುಧಾರಿಸಿದೆ.

ಅದರ ಹೊರತಾಗಿಯೂ, ದೆಹಲಿ ವಿಶ್ವದ 10 ನೇ ಹೆಚ್ಚು ಕಲುಷಿತ ನಗರ ಮತ್ತು ಅಗ್ರ ಕಲುಷಿತ ರಾಜಧಾನಿಯಾಗಿ ಸ್ಥಾನ ಪಡೆದಿದೆ.

  • ವಿಶ್ವದ ಅತ್ಯಂತ ಕಲುಷಿತ 30 ನಗರಗಳಲ್ಲಿ 22 ನಗರಗಳನ್ನು ಹೊಂದಿರುವ ಭಾರತವು ಹೆಚ್ಚು ಕಲುಷಿತ ನಗರಗಳ ಶ್ರೇಯಾಂಕದಲ್ಲಿ ಅಗ್ರಸ್ಥಾನದಲ್ಲಿದೆ.
  • ವರದಿಯ ಪ್ರಕಾರ, ಚೀನಾದ ಕ್ಸಿನ್‌ಜಿಯಾಂಗ್ ನಗರದ ನಂತರ ಗಾಜಿಯಾಬಾದ್ ವಿಶ್ವದ ಎರಡನೇ ಅತ್ಯಂತ ಕಲುಷಿತ ನಗರವಾಗಿದೆ.
  • ಅಗ್ರ 10 ಕಲುಷಿತ ನಗರಗಳ ಪಟ್ಟಿಯಲ್ಲಿರುವ ಎಂಟು ಭಾರತೀಯ ನಗರಗಳು – ಬುಲಂದ್‌ಶಹರ್, ಬಿಸಾರ್ಕ್ ಜಲಾಲ್‌ಪುರ, ನೋಯ್ಡಾ, ಗ್ರೇಟರ್ ನೋಯ್ಡಾ, ಕಾನ್ಪುರ್, ಲಕ್ನೋ ( ಎಲ್ಲವೂ ಉತ್ತರಪ್ರದೇಶದಲ್ಲಿ), ರಾಜಸ್ಥಾನದ ಭಿವಾಡಿ ಮತ್ತು ದೆಹಲಿ.
  • ಭಾರತದಲ್ಲಿ ವಾಯುಮಾಲಿನ್ಯದ ಪ್ರಮುಖ ಮೂಲಗಳು ಸಾರಿಗೆ, ಅಡುಗೆಗಾಗಿ ಜೈವಿಕ ಇಂಧನಗಳನ್ನು ಸುಡುವುದು, ವಿದ್ಯುತ್ ಉತ್ಪಾದನೆ, ಉದ್ಯಮ, ನಿರ್ಮಾಣ, ತ್ಯಾಜ್ಯ ದಹನ ಮತ್ತು ಕೃಷಿ ತ್ಯಾಜ್ಯದ ಆವರ್ತಕ ದಹನ ಇತ್ಯಾದಿ.

polution_fight

ಜಾಗತಿಕ ಚಿತ್ರಣ:

  •  ಭಾರತವು 2019 ರ ವರ್ಷದಂತೆ, 2020 ರಲ್ಲಿ ವಿಶ್ವದ ಮೂರನೇ ಅತಿ ಹೆಚ್ಚು ಕಲುಷಿತ ರಾಷ್ಟ್ರವಾಗಿದೆ. 2019 ರಲ್ಲಿ ಭಾರತದ ಗಾಳಿಯ ಗುಣಮಟ್ಟವು ಐದನೇ ಹಾನಿಕಾರಕ ಸ್ಥಾನದಲ್ಲಿದೆ.
  • 2020 ರಲ್ಲಿ, ಬಾಂಗ್ಲಾದೇಶ ಮತ್ತು ಪಾಕಿಸ್ತಾನ ಗಳಲ್ಲಿನ ಪಿಎಂ 2.5 ರ ಸರಾಸರಿ ಭಾರತಕ್ಕಿಂತ ಕೆಟ್ಟದಾಗಿದೆ.
  • ಇತ್ತೀಚಿನ ವರದಿಯಲ್ಲಿ ಚೀನಾ 11 ನೇ ಸ್ಥಾನದಲ್ಲಿದೆ.
  • ಮೇಲ್ವಿಚಾರಣೆ ಮಾಡಬೇಕಾದ 106 ದೇಶಗಳ ಪೈಕಿ ಕೇವಲ 24 ದೇಶಗಳು 5 ಗಾಗಿ ವಿಶ್ವ ಆರೋಗ್ಯ ಸಂಸ್ಥೆಯ ವಾರ್ಷಿಕ ಮಾರ್ಗಸೂಚಿಗಳನ್ನು ಪೂರೈಸಿವೆ.

ಮುಂದಿನ ಹಾದಿ:

  • ಲಾಕ್‌ಡೌನ್‌ನಿಂದಾಗಿ ದೆಹಲಿ ಸೇರಿದಂತೆ ಅನೇಕ ನಗರಗಳಲ್ಲಿ ಗಾಳಿಯ ಗುಣಮಟ್ಟದಲ್ಲಿ ಸ್ವಲ್ಪ ಸುಧಾರಣೆ ಕಂಡುಬಂದರೂ, ಆರೋಗ್ಯ ಮತ್ತು ಆರ್ಥಿಕತೆಯ ಮೇಲೆ ವಾಯುಮಾಲಿನ್ಯದ ಹಾನಿಕಾರಕ ಪರಿಣಾಮಗಳು ಅಪಾಯಕಾರಿ ಸ್ಥಿತಿಯಲ್ಲಿವೆ.
  • ಆದ್ದರಿಂದ, ಸರ್ಕಾರಗಳು ಮತ್ತು ನಗರಗಳು ಸುಸ್ಥಿರ ಮತ್ತು ಶುದ್ಧ ಇಂಧನ ಮೂಲಗಳಿಗೆ ಆದ್ಯತೆ ನೀಡುವುದು, ಕಡಿಮೆ-ವೆಚ್ಚದ, ಸಕ್ರಿಯ ಮತ್ತು ಇಂಗಾಲ-ತಟಸ್ಥ ಸಾರಿಗೆ ಆಯ್ಕೆಗಳಾದ ವಾಕಿಂಗ್, ಸೈಕ್ಲಿಂಗ್ ಮತ್ತು ಕೈಗೆಟುಕುವ ಸಾರ್ವಜನಿಕ ಸಾರಿಗೆಯನ್ನು ಪ್ರೋತ್ಸಾಹಿಸುವುದು ಸೂಕ್ತವಾಗಿದೆ.
  • ಶುದ್ಧ ಶಕ್ತಿ ಮತ್ತು ಶುದ್ಧ ಸಾರಿಗೆಯ ಬದಲಾವಣೆಯನ್ನು ತ್ವರಿತಗೊಳಿಸುವರಿಂದ ಜೀವಗಳನ್ನು ಉಳಿಸಬಹುದು, ಹಾಗೂ ಆರೋಗ್ಯ ಸಂಬಂಧಿತ ಖರ್ಚುಗಳನ್ನು ನಾಟಕೀಯವಾಗಿ ಕಡಿಮೆ ಮಾಡಬಹುದಾಗಿದೆ.

 

ವಿಷಯಗಳು: ಮೂಲಸೌಕರ್ಯ: ಇಂಧನ, ಬಂದರುಗಳು, ರಸ್ತೆಗಳು, ವಿಮಾನ ನಿಲ್ದಾಣಗಳು, ರೈಲ್ವೆ ಇತ್ಯಾದಿ.

ಅಭಿವೃದ್ಧಿ ಹಣಕಾಸು ಸಂಸ್ಥೆ (DFI) ಯನ್ನು ಸ್ಥಾಪಿಸುವ ಮಸೂದೆಗೆ ಅನುಮೋದನೆ ನೀಡಿದ ಕೇಂದ್ರ ಸಚಿವ ಸಂಪುಟ:


(Cabinet gives nod to Bill for setting up DFI)

ಸಂದರ್ಭ:

ಇತ್ತೀಚೆಗೆ, ‘ಅಭಿವೃದ್ಧಿ ಹಣಕಾಸು ಸಂಸ್ಥೆ’ (Development Finance Institution- DFI) ಅಂದರೆ ‘ಮೂಲಸೌಕರ್ಯ ಮತ್ತು ಅಭಿವೃದ್ಧಿಯ ರಾಷ್ಟ್ರೀಯ ಬ್ಯಾಂಕ್’ (NaBFID) ಸ್ಥಾಪನೆಗೆ  ಕೇಂದ್ರ ಸಚಿವ ಸಂಪುಟ ಮಸೂದೆಯನ್ನು ಅಂಗೀಕರಿಸಿದೆ.

ಹಿನ್ನೆಲೆ:

ಕಳೆದ ಬಜೆಟ್‌ನಲ್ಲಿ ಮೂಲಸೌಕರ್ಯಗಳನ್ನು ಉತ್ತೇಜಿಸಲು ‘ಅಭಿವೃದ್ಧಿ ಹಣಕಾಸು ಸಂಸ್ಥೆ’ (DFI) ಎಂಬ ರಾಷ್ಟ್ರೀಯ ಬ್ಯಾಂಕ್ ಸ್ಥಾಪಿಸುವುದಾಗಿ ಸರ್ಕಾರ ಪ್ರಕಟಿಸಿತ್ತು.

ಮುಖ್ಯಾಂಶಗಳು:

  • ಮೂಲಸೌಕರ್ಯ ಮತ್ತು ಅಭಿವೃದ್ಧಿಯ ರಾಷ್ಟ್ರೀಯ ಬ್ಯಾಂಕ್’ (NaBFID) ಅನ್ನು 20,000 ಕೋಟಿ ರೂ. ಗಳ ಆರಂಭಿಕ ನಿಧಿ ಮತ್ತು ಸರ್ಕಾರದಿಂದ 5,000 ಕೋಟಿ ರೂ. ಗಳ ಆರಂಭಿಕ ಅನುದಾನದೊಂದಿಗೆ ಸ್ಥಾಪಿಸಲಾಗುವುದು.
  • ಆರಂಭದಲ್ಲಿ, ಇದು ಸಂಪೂರ್ಣವಾಗಿ ಸರ್ಕಾರದ ಒಡೆತನದಲ್ಲಿದೆ ಆದರೆ ನಂತರ ಸರ್ಕಾರದ ಪಾಲನ್ನು ಕಾಲು ಭಾಗಕ್ಕೆ ಇಳಿಸಲಾಗುತ್ತದೆ.
  • ಆರಂಭಿಕ 10 ವರ್ಷಗಳವರೆಗೆ, ಇದಕ್ಕೆ ಕೆಲವು ತೆರಿಗೆ ಸಂಬಂಧಿತ ಪ್ರಯೋಜನಗಳನ್ನು ಸಹ ನೀಡಲಾಗುವುದು ಮತ್ತು ಈ ನಿಟ್ಟಿನಲ್ಲಿ ಭಾರತೀಯ ಅಂಚೆಚೀಟಿ ಕಾಯ್ದೆಯಲ್ಲಿ ಕೆಲವು ತಿದ್ದುಪಡಿಗಳನ್ನು ಮಾಡಲಾಗುವುದು.
  • NaBFID ವೃತ್ತಿಪರ ಮಂಡಳಿಯನ್ನು ಹೊಂದಿರುತ್ತದೆ ಮತ್ತು ಕನಿಷ್ಠ 50% ಸದಸ್ಯರು ಅಧಿಕೃತೇತರ ನಿರ್ದೇಶಕರಾಗಿರುತ್ತಾರೆ.
  • ಒಬ್ಬ ಪ್ರಖ್ಯಾತ ವ್ಯಕ್ತಿಯನ್ನು ಅದರ ಅಧ್ಯಕ್ಷರನ್ನಾಗಿ ನೇಮಿಸಲಾಗುವುದು.

ಈ ಹೊತ್ತಿನ ಅವಶ್ಯಕತೆ:

  • ಮಹತ್ವಾಕಾಂಕ್ಷೆಯ ರಾಷ್ಟ್ರೀಯ ಮೂಲಸೌಕರ್ಯ ಪೈಪ್‌ಲೈನ್‌ಗೆ ಹಣಕಾಸು ಒದಗಿಸಲು ಅಗತ್ಯವಾದ 111 ಲಕ್ಷ ಕೋಟಿ ರೂಪಾಯಿಗಳನ್ನು ಸಂಗ್ರಹಿಸುವುದು. ಯೋಜನೆಗಳ ಕ್ರೆಡಿಟ್ ರೇಟಿಂಗ್ ಹೆಚ್ಚಿಸಲು.
  • ಅಂತರ್ಗತ ಅಪಾಯದಿಂದಾಗಿ ಇತರ ಸಂಸ್ಥೆಗಳು ಹೂಡಿಕೆ ಮಾಡಲು ಸಿದ್ಧರಿಲ್ಲದ ಯೋಜನೆಗಳಿಗೆ ಡಿಎಫ್‌ಐ ಹಣವನ್ನು ಒದಗಿಸುತ್ತದೆ.

 


ಪೂರ್ವಭಾವಿ ಪರೀಕ್ಷೆಗೆ ಸಂಬಂಧಿಸಿದ ವಿದ್ಯಮಾನಗಳು:


ವಿಶ್ವದ ಅತಿ ಎತ್ತರದ ರೈಲ್ವೆ ಸೇತುವೆ:

  •  ಇದನ್ನು ಜಮ್ಮು ಮತ್ತು ಕಾಶ್ಮೀರದ ಚೆನಾಬ್ ನದಿಯ ಮೇಲೆ ನಿರ್ಮಿಸಲಾಗುತ್ತಿದೆ.
  • 1,250 ಕೋಟಿ ರೂಪಾಯಿಗಳ ಸೇತುವೆಯು ಚೆನಾಬ್ ನದಿಯ ನೆಲ ಮಟ್ಟದಿಂದ 359 ಮೀಟರ್ ಎತ್ತರದಲ್ಲಿದೆ.
  • ಈ ಸೇತುವೆಯ ಮೂಲಕ ಹಾದುಹೋಗುವ ರೈಲ್ವೆ ಮಾರ್ಗವು ಐಫೆಲ್ ಟವರ್‌ಗಿಂತ 35 ಮೀಟರ್ ಎತ್ತರವಿರಲಿದೆ ಎಂದು ನಿರೀಕ್ಷಿಸಲಾಗಿದೆ.
  • ಇದು ಪೂರ್ಣಗೊಂಡ ನಂತರ, ಚೀನಾದ ಬೀಪನ್ ನದಿಯಲ್ಲಿ ನಿರ್ಮಿಸಲಾದ ಶೂಬೈ ರೈಲ್ವೆ ಸೇತುವೆಯ (275 ಮೀ) ದಾಖಲೆಯನ್ನು ಈ ಸೇತುವೆಯು ಮೀರಿಸುತ್ತದೆ.

World’s_highest_railway_bridge

ಯುರೋಪಿಯನ್ ಒಕ್ಕೂಟವನ್ನು ‘LGBTIQ ಸ್ವಾತಂತ್ರ್ಯ ವಲಯ’ ಎಂದು ಘೋಷಿಸಲಾಗಿದೆ:

(EU has been declared an ‘LGBTIQ Freedom Zone’)

  • ಇತ್ತೀಚೆಗೆ, ಯುರೋಪಿಯನ್ ಪಾರ್ಲಿಮೆಂಟ್ ತನ್ನ ಇಡೀ 27 ಸದಸ್ಯರ ಗುಂಪನ್ನು ಸಾಂಕೇತಿಕವಾಗಿ ‘LGBTIQ ಸ್ವಾತಂತ್ರ್ಯ ವಲಯ’ ಎಂದು ಘೋಷಿಸಿದೆ.
  • ಯುರೋಪಿಯನ್ ಒಕ್ಕೂಟದ (23/27) ಹೆಚ್ಚಿನ ದೇಶಗಳು ಸಲಿಂಗ ವಿವಾಹಗಳನ್ನು ಗುರುತಿಸಿವೆ, ಇದರಿಂದ 16 ದೇಶಗಳು ಸಲಿಂಗ ವಿವಾಹಗಳಿಗೆ ಕಾನೂನು ಬದ್ಧತೆಯನ್ನು ಒದಗಿಸಿವೆ.
  • ಯುರೋಪಿಯನ್ ಒಕ್ಕೂಟವು ಅಂಗೀಕರಿಸಿದ ನಿರ್ಣಯದ ಪ್ರಕಾರ, LGBTIQ ಜನರಿಗೆ ಯುರೋಪಿಯನ್ ಒಕ್ಕೂಟದಲ್ಲಿ ಎಲ್ಲಿಯಾದರೂ ವಾಸಿಸಲು, ಅಸಹಿಷ್ಣುತೆ, ತಾರತಮ್ಯ ಅಥವಾ ಕಿರುಕುಳದ ಭಯವಿಲ್ಲದೆ ತಮ್ಮ ಲಿಂಗ-ದೃಷ್ಟಿಕೋನ ಮತ್ತು ಲಿಂಗ ಗುರುತನ್ನು ಬಹಿರಂಗವಾಗಿ ಘೋಷಿಸುವ ಸ್ವಾತಂತ್ರ್ಯ ನೀಡಲಾಗುತ್ತದೆ.

ಅಂತರರಾಷ್ಟ್ರೀಯ ನವೀಕರಿಸಬಹುದಾದ ಇಂಧನ ಸಂಸ್ಥೆ (IRENA):

  • ವಿಶ್ವ ಇಂಧನ ಪರಿವರ್ತನೆ ಮುನ್ನೋಟ (World Energy Transitions Outlook) ವರದಿಯನ್ನು ಅಂತರರಾಷ್ಟ್ರೀಯ ನವೀಕರಿಸಬಹುದಾದ ಇಂಧನ ಸಂಸ್ಥೆ (International Renewable Energy Agency- IRENA) ಹೊರತಂದಿದೆ.
  • ಇತ್ತೀಚಿನ ವರದಿಯ ಪ್ರಕಾರ, ಕೋವಿಡ್ -19 ತಂದೊಡ್ಡಿದ ಬಿಕ್ಕಟ್ಟು ಎಲ್ಲಾ ದೇಶಗಳಿಗೆ ತಮ್ಮ ಆರ್ಥಿಕತೆಯನ್ನು ಪಳೆಯುಳಿಕೆ ಇಂಧನಗಳಿಗೆ ಬದಲಾಗಿ ನವೀಕರಿಸಬಹುದಾದ ಇಂಧನ ಮೂಲಗಳಿಗೆ ಪರಿವರ್ತಿಸುವುದನ್ನು ವೇಗಗೊಳಿಸಲು ಅನಿರೀಕ್ಷಿತ ಅವಕಾಶವನ್ನು ಒದಗಿಸಿದೆ.

IRENA ಕುರಿತು:

  • ಇದು ಪರಸ್ಪರ ಸಹಕಾರ ಮತ್ತು ಜ್ಞಾನವನ್ನು ಹೆಚ್ಚಿಸಲು, ಸುಸ್ಥಿರ ಬಳಕೆ ಮತ್ತು ನವೀಕರಿಸಬಹುದಾದ ಶಕ್ತಿಯನ್ನು ಅಳವಡಿಸಿಕೊಳ್ಳಲು ಪ್ರೋತ್ಸಾಹಿಸುವ ಒಂದು ಅಂತರ್ ಸರ್ಕಾರಿ ಸಂಸ್ಥೆಯಾಗಿದೆ.
  • ಇದು, ಕೈಗಾರಿಕೀಕರಣಗೊಂಡ ಮತ್ತು ಅಭಿವೃದ್ಧಿಶೀಲ ರಾಷ್ಟ್ರಗಳಲ್ಲಿನ ಅಗತ್ಯಗಳನ್ನು ತಿಳಿಸುವ ನವೀಕರಿಸಬಹುದಾದ ಶಕ್ತಿಯ ಮೇಲೆ ಪ್ರತ್ಯೇಕವಾಗಿ ಗಮನ ಕೇಂದ್ರೀಕರಿಸಿದ ಮೊದಲ ಅಂತರರಾಷ್ಟ್ರೀಯ ಸಂಸ್ಥೆಯಾಗಿದೆ.
  • ಇದನ್ನು 2009 ರಲ್ಲಿ ಸ್ಥಾಪಿಸಲಾಯಿತು ಮತ್ತು ಅದರ ಕಾನೂನು 8 ಜುಲೈ 2010 ರಂದು ಜಾರಿಗೆ ಬಂದಿತು. ಇದರ ಪ್ರಧಾನ ಕಚೇರಿಯು ಅಬುಧಾಬಿಯ ಮಾಸ್ದಾರ್ ನಗರದಲ್ಲಿದೆ.
  • IRENA ವಿಶ್ವಸಂಸ್ಥೆಯಲ್ಲಿ ಅಧಿಕೃತ ವೀಕ್ಷಕ ಸ್ಥಾನಮಾನವನ್ನು ಹೊಂದಿದೆ.

  • Join our Official Telegram Channel HERE for Motivation and Fast Updates
  • Subscribe to our YouTube Channel HERE to watch Motivational and New analysis videos